ܡܛܘܟܣܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ، ܒܪܡܫܐ ܕܝܘܡ ܬܠܬܒܫܒܐ 24 ܐܝܠܘܠ 2024، ܪܡܫܐ ܕܕܟܼܪܐ ܒܦܘܪܣܐ ܕܐܪܒܥܝܢܝܘܬܐ ܕܟܬܘܒܐ ܘܡܟܼܬܒܼ ܙܒܢ̈ܐ ܪܒܐ ܡܢܚܐ (ܒܗܢܡ ܣܠܝܡ ܚܒܒܐ)، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ.
ܘܫܘܪܐܠܗ ܪܡܫܐ ܒܘܝܐܝܐ ܥܒܼܘܿܕܘ̈ܬܗ، ܒܟܠܝܬܐ ܕܚܕ ܕܩܝܩܐ ܕܫܬܩܐ ܥܠ ܪܘܚܐ ܕܡܢܚܐ، ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܚܕ ܡܡܠܐ ܡܚܘܬܬܠܗ ܓܘܗ، (ܐܕܝܘܡ ܫܒܼܘܿܩܘܚ ܒܫܝܢܐ ܚܕ ܟܬܘܒܐ ܝܕܝܥܐ ܘܡܟܼܬܒܼ ܙܒܢ̈ܐ ܪܒܐ ܦܠܚܠܗ ܒܬܫܥܝܬܐ ܕܥܕܬܢ ܘܐܝܬܘܬܐ ܕܥܡܢ ܘܛܘܝܒܗ ܒܡܕܝܢ̄ܬܐ ܕܡܘܨܠ)، ܘܪܡܙܠܗ ܕܡܢܚܐ (ܝܠܦܠܗ ܥܠ ܐܝܕܗ ܘܫܩܠܗ ܡܢ ܝܘܠܦܢܗ ܘܝܕܥ̈ܬܗ ܥܬܝܪ̈ܐ ܡܢܝܢܐ ܪܒܐ ܡܢ ܦܪ̈ܨܘܦܐ ܝܕܝܥ̈ܐ ܥܠ ܫܘܝܐ ܕܥܕܬܝ̈ܢ ܡܢܝܗܝ ܛܘܒܬܢܘܬܗ ܕܒܒܢ ܦܛܪܝܪܟܐ ܡܪܝ (ܠܘܝܣ ܣܐܟܘ) ܟܠܢܐܝܬ ܛܘܒ̈ܐ).
ܘܚܘܬܬܠܗ (ܐܘܓܼܢܐ) ܒܚܘܬܡܐ ܕܡܡܠܗ، (ܕܡܘܬܐ ܫܒܼܘܿܩ ܡܢ ܟܡ ܦܪܫܠܘܟ ܡܢܢ ܒܦܓܼܪܐ ܐܠܐ ܦܘܠܚܢ̈ܘܟ ܦܝܫ̈ܐܝܠܗܘܢ ܒܚܘܫܒܝ̈ܢ، ܘܐܟܼܘܬܘܟܼ ܝܐ ܒܒܐ ܕ(ܓ̰ܘܪܓ̰ܝܢܐ) ܠܐ ܡܝܬܝ)، ܘܒܬܪ ܗܕܟ ܡܘܩܪܒܠܗ ܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ، ܡܡܠܐ ܚܘܬܬܠܗ ܓܘܗ ܕܦܘܠܚܢ̈ܐ ܕܡܢܚܐ ܘܣܝܡ̈ܗ ܒܕ ܦܝܫܝ ܡܒܘܥܐ ܠܝܘܒܠ̈ܐ ܐܬܝܢ̈ܐ ܠܒܘܨܝܐ ܒܐܝܬܘܬܐ ܡܫܝܚܝܬܐ ܒܡܕܝܢ̄ܬܐ ܕܡܘܨܠ.
ܒܬܪ ܗܕܟ ܐܬܝܠܗܿ ܐܓܪܬܐ ܕܦܛܪܝܪܟܘܬܐ ܟܠܕܝܬܐ ܗܝ ܕܗܒܠܗܿ ܓܘܗܿ ܒܘܝܐܐ ܠܡܢܚܐ، ܒܬܪ ܗܕܟ ܡܡܠܐ ܕܪܫ ܐܦܣܩܘܦ̈ܐ ܕܡܘܨܠ ܘܢܩܝܦܘ̈ܬܗܿ ܕܥܕܬܐ ܟܠܕܝܬܐ ܡܪܝ (ܡܝܟܼܐܝܠ ܢܓ̰ܝܒܿ)، ܘܡܡܠܐ ܒܪܬܐ ܕܡܢܚܐ ܓܠܝܘܢܝܬܐ (ܓ̰ܘܪܓ̰ܝܢܐ ܒܗܢܡ ܚܒܒܐ)، ܦܝܫܠܗ ܡܘܩܪܒܐ ܒܝܕ ܣܦܪܐ (ܦܛܪܘܣ ܗܘܪܡܙ ܢܒܬܝ)، ܗܝ ܕܬܢܐܠܗܿ ܒܡܡܠܗܿ ܚܕܪ ܦܘܠܚܢ̈ܐ ܣܦܪ̈ܝܐ ܕܡܢܚܐ ܥܠ ܡܘܨܠ ܘܬܫܥܝܬܐ ܕܒܝܬܘܝ̈ܬܐ ܡܫܝܚܝ̈ܐ ܐܢܝ ܕܥܡܪܗܘܢ ܓܘܗܿ ܘܦܪܝܫܐܝܬ ܟܬܒܗ ( ܒܝܬܘܝ̈ܬܐ ܡܫܝܚܝ̈ܐ ܓܘ ܡܘܨܠ – الأسر المسيحية في الموصل) ، ܘ(ܫܪ̈ܫܐ ܘܦܪ̈ܥܐ – الأصول والفروع )، ܒܬܪ ܗܕܟ ܦܝܫܠܗ ܓܠܝܚܐ ܦܝܠܡܐ ܕܝܠܢܝܐ ܥܠ ܚܝܘܬܐ ܕܡܢܚܐ، ܡܢ ܛܘܝܒܐ ܕ(ܦܐܠܢܬܝܢܐ ܝܘܐܪܫ).
ܒܬܪ ܗܕܟ ܡܘܩܪܒܠܗܘܢ ܡܢܝܢܐ ܡܢ ܦܪ̈ܨܘܦܐ ܫܘܬܦ̈ܐ ܓܘ ܪܡܫܐ ܕܒܘܝܐܐ ܣܗܕܘ̈ܬܐ ܚܝ̈ܐ ܥܠ ܡܢܚܐ، ܘܝܠܝܗܝ ܟܠ ܡܢ ( ܕܟܬܘܪ ܠܝܬ ܚܒܒܐ، ܢܘܐܝܠ ܛܒܐܚ، ܡܐܪܘܢ ܣܥܝܕ ܬܐܘܡܐܝܝ)، ܥܡ ܢܩܫܬܐ ܕܡܩܛܥ̈ܐ ܡܘܣܝܩܝ̈ܐ ܘܡܠܗܝܬܐ ܕܦܘܢܕ̈ܐ ܕܕܟܪܐ ܠܡܢܚܐ، ܘܦܝܫܠܗܘܢ ܚܬܝܡܐ ܥܒܼܘܿܕܘ̈ܬܐ ܕܪܡܫܐ ܒܚܕ ܡܡܠܐ ܕܒܝܬܘܬܐ ܕܡܢܚܐ (ܒܗܢܡ ܚܒܒܐ)، ܗܝ ܕܡܘܩܪܒܠܗܿ ܩܘܒܠܛܝܒܘܬܗܿ ܠܟܠ ܡܢ ܕܟܪܗ ܡܢܚܐ ܘܫܘܬܦܠܗ ܒܥܒܘܕܘ̈ܬܐ ܕܪܡܫܐ.
ܘܦܝܫܠܗܘܢ ܡܛܝܒ̈ܐ ܠܪܡܫܐ ܕܒܘܝܐܐ، ܪܫ ܐܦܣܩܘܦ̈ܐ ܕܡܘܨܠ ܘܢܩܝܦܘ̈ܬܗܿ ܕܥܕܬܐ ܟܠܕܝܬܐ ܡܪܝ (ܡܝܟܐܝܠ ܢܓ̰ܝܒܿ)، ܘܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܘܒܝܬܘܬܐ ܕܡܢܚܐ، ܘܪܫ ܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ ܣܦܪܐ ( ܪܘܢܕ ܦܘܠܘܣ)، ܥܡ ܟܢܫܐ ܡܢ ܣܦܪ̈ܐ ܘܡܘܪ̈ܕܢܐ ܘܝܨܘܦ̈ܐ ܒܨܒܘܬܐ ܡܪܕܘܬܢܝܬܐ ܘܣܦܪܝܬܐ ܕܥܡܢ.
ܘܦܝܫ ܕܟܝܪܐ، ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܡܘܩܪܒ ܗ̄ܘܐܠܗܿ ܒܘܝܐܐ ܠܟܬܘܒܐ ܘܡܟܬܒ ܙܒܢ̈ܐ ܪܒܐ (ܒܗܢܡ ܣܠܝܡ ܚܒܒܐ)، ܗܘ ܕܫܘܢܐܠܗ ܠܓܢܘܢܐ ܫܡܝܢܐ، ܒܨܦܪܐ ܕܝܘܡ ܬܠܬܒܫܒܐ 13 ܐܒ 2024، ܒܬܪ ܣܝܒܘܬܐ ܛܒܬܐ ܒܐܪܒܝܠ ܐܪܫܟܝܬܐ ܕܩܠܝܡܐ.
