ܩܝܡܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܚܡܫܒܫܒܐ 13 ܐܕܪ 2025 ܒܣܥܘܪܘܬܐ ܠܩܠܝܬܐ ܕܬܓܪܘܬܐ ܐܬܘܪܝܬܐ ܒܡܕܝܢ̄ܬܐ ܕܫܝܟܓܼܘ ܒܐܘܚܕܢܐ ܕܐܝܠܝܢܘܝ ܐܡܪܝܟܝܐ، ܘܝܗ̄ܘܘ ܒܣܩܒܠܬܗ ܪܫܗܿ (ܪܘܒܪܬ ܒܝܬ ܩܠܝܬܐ) ، ܘܡܢܝܢܐ ܡܢ ܗܕܡ̈ܐ ܕܓܘܫܡܐ ܡܕܒܪܢܝܐ.
ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܒܣܘܘܕܝܗܝ ܩܐܡ ܡܪܕܘܬܢܝܐ ܕܥܡܢ ܒܐܬܪܐ، ܘܐܢܢܩܝܘܬܐ ܕܢܛܪܬܐ ܕܝܪܬܘܬܐ ܕܥܡܢ ܘܡܪܕܘܬܗ ܘܫܒܝܠ̈ܐ ܕܣܢܕܬܝܗܝ ܘܛܘܪܢܬܝܗܝ ܒܥܝܪܩ ܘܩܠܝܡܐ ܕܟܘܪܕܣܬܢ ، ܒܥܘܕܪܢܐ ܡܫܘܬܦܐ ܒܝܢ ܫܘܬܐܣ̈ܐ ܕܥܡܢ ܒܐܬܪܐ ܘܓܠܘܬܐ.
ܘܫܘܪܪܠܗ (ܐܘܓܼܢܐ) ܓܘ ܬܦܩܬܐ، ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܫܘܬܐܣ̈ܐ ܘܦܪ̈ܨܘܦܐ ܒܐܬܪܐ ܘܓܠܘܬܐ، ܠܬܫܡܫܬܐ ܕܝܪܬܘܬܢ ܘܡܪܕܘܬܢ.
ܘܟܐܬܝܐ ܣܥܘܪܘܬܐ ܕ(ܐܘܓܼܢܐ) ܡܢ ܟܪܘܟܝܐ ܓܘ ܐܘܚܕܢ̈ܐ ܡܚܝܕ̈ܐ ܐܡܪ̈ܝܟܝܐ، ܗܝ ܕܚܒܫܠܗܿ ܫܘܬܦܬܗ ܒܠܘܡܕܐ ܕRootsTech 2025 ܒܐܘܚܕܢܐ ܕܝܘܬܐ، ܟܕ ܫܘܬܦܠܗ ܓܘ ܥܒܘܕܘ̈ܬܗ ܐܝܟ ܐܪܚܐ ܕܐܝܩܪܐ. ܘܡܘܩܪܒܠܗ ܐܡܘܪܘܬܐ ܐܢܢܩܝܬܐ ܓܘ ܒܝܬ ܨܘܒܐ ܕܗܐܪܦܪܕ ܥܠ ܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܥܡܢ ܘܚܝܠܢܬܗ ܒܥܝܪܩ ܕܪܝܐ.
