ܩܒܠܗ ܒܐܪܚܘܬܐ ܒܝܬ ܓܠܚܐ ܕܐܪܒܝܠ ܬܒܝܠܝܐ ܕܟܬܒܐ ܒܢܘܣܟܗ ܕܫܒܥܣܪ، ܝܘܡ ܚܡܫܒܫܒܐ 17 ܢܝܣܢ 2025، ܒܝܬܒܬܐ ܕܘܪܫܝܬܐ ܗܝ ܟܡ ܛܟܣܐܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܒܥܘܕܪܢ ܥܡ ܡܕܒܪܢܘܬܐ ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܘܡܫܐܐܣܬܐ ܕ(ܡܕܐ) ܕܡܪܕܘܬܐ ܘܝܘܕܥܐ ܘܐܡܢ̈ܐ، ܘܝܗ̄ܘܐ ܒܫܡܐ ((ܡܪܕܘܬܐ ܣܘܪܝܝܬܐ: ܚܝܠܢܬܐ ܕܗܝܝܘܬܐ ܘܓܪܗܿ ܓܘ ܩܐܡ- الثقافة السريانية: تعزيز الهوية ودورها في المشهد)).
ܘܫܘܬܦܠܗܘܢ ܒܝܬܒܬܐ، ܗܝ ܕܟܡ ܬܓܒܪܐܠܗܿ ܝܘܕܥܝܬܐ ( ܦܐܠܢܬܝܢܐ ܝܘܐܪܫ ܗܝܕܘ)، ܟܠ ܡܢ (ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܐܟܕܝܡܝܐ ܕ.(ܪܝܟܐܪܕܘܣ ܝܘܣܦ)، ܟܕ ܬܢܐܠܗܘܢ ܒܝܬܒܬܐ ܚܕܪ ܩܐܡ ܕܡܪܕܘܬܐ ܣܘܪܝܝܬܐ ܓܘ ܥܝܪܩ ܡܢ ܓܢ̄ܒ ܛܘܝܒܗܿ ܘܡܥܒܕܢܘܬܗܿ ܘܣܩܘܒܠܝ̈ܘܬܗܿ، ܘܫܪܝܬܐ ܡܢ ܫܘܐܠܐ ܐܣܝܐ ܚܕܪ ܐܢ ܝܗ̄ܘܐ ܗܕ ܡܪܕܘܬܐ ܦܝܫܬܐܝܠܗܿ ܡܟܝܢܐ ܚܝܐ ܥܒܘܕܐ ܓܘ ܩܐܡ ܡܪܕܘܬܢܝܐ ܐܬܪܢܝܐ ܐܘ ܛܘܝܒܗܿ ܦܝܫܐܝܠܗ ܥܠ ܓܢ̄ܒܐ ܪܡܙܝܐ ܓܘ ܦܘܪ̈ܣܐ ܘܕܠܐ ܚܒܼܟܼܬܐ ܫܪܝܪܬܐ ܓܘ ܙܩܪܐ ܡܪܕܘܬܢܝܐ ܐܬܪܢܝܐ.
ܘܡܘܒܝܢܗܘܢ ܫܘܬܦ̈ܐ ܒܬܝܬܐ ܕܘܪܫܝܬܐ، ܕܫܒܘܩ ܡܢ ܥܘܡܩܐ ܬܫܥܝܬܢܝܐ ܕܡܪܕܘܬܐ ܣܘܪܝܝܬܐ ܘܫܘܬܦܬܗܿ ܦܪܝܫܬܐ ܒܥܬܝܪܘܬܐ ܕܡܕܝܢܝܘܬܐ ܕܐܬܪܐ ܕܒܝܬ ܢܗܪܝܢ ܘܐܕܝܘܡ ܒܟܠܝܐܝܠܗܿ ܕܪܩܘܒܠ ܪܒܐ ܣܩܘܒܠܝܘ̈ܬܐ، ܘܒܩܘܕܡܝܗܝ ܬܗܡܫܬܐ ܫܘܬܐܣܢܝܬܐ ܘܝܘܕܥܝܬܐ ܘܡܚܝܠܘܬܐ ܕܣܢܕܬܐ ܡܠܝܬܐ ܘܪܘܫܡܝܬܐ، ܘܫܘܪܪܠܗܘܢ ܕܫܒܘܩ ܡܢ ܟܠ ܐܢܝ ܐܠܐ ܡܪܕܘܬܐ ܣܘܪܝܝܬܐ ܦܝܫܬܐܝܠܗܿ ܚܝܬܐ، ܘܐܡܝܢܝܘܬܗܿ ܒܥܝܐ ܡܦܪܝܬܐ ܕܣܢܕܬܐ ܫܪܝܪܬܐ ܕܫܘܐܐܣ̈ܐ ܡܪ̈ܕܘܬܢܝܐ ܣܘܪ̈ܝܝܐ ܘܚܝܠܢܬܐ ܕܬܦܪܝܬܐ ܡܪܕܘܬܢܝܬܐ ܪܩܡܝܬܐ ܕܦܝܫܐ ܦܥܘܠܬܐ ܥܡ ܝܘܒܠ̈ܐ ܚܕ̈ܬܐ.
ܘܒܚܘܬܡܐ ܕܝܬܒܬܐ، ܫܘܪܪܠܗܘܢ ܫܘܬܦ̈ܐ، ܕܡܪܕܘܬܐ ܣܘܪܝܝܬܐ ܠܐܝܠܗܿ ܝܪܬܘܬܐ ܦܝܫܐ ܕܟܝܪܬܐ ܓܘ ܦܘܪ̈ܣܐ ܐܠܐ، ܝܠܗܿ ܗܝܝܘܬܐ ܚܝܬܐ ܫܘܬܦܐ ܒܥܬܝܪܘܬܐ ܕܐܕܫܢܝܘܬܐ ܡܪܕܘܬܢܝܬܐ ܥܝܪܩܝܬܐ، ܗܘ ܡܢܕܝ ܕܫܒܩ ܦܝܫܐ ܥܒܝܕܬܐ ܡܘܕܝܢܘܬܐ ܓܘܗܿ ܘܣܢܕܬܐ ܓܘ ܣܝܣ̈ܐ ܐܬܪ̈ܢܝܐ ܙܕܩܐ ܠܟܐܢܘܬܐ ܡܪܕܘܬܢܝܬܐ.
ܘܫܘܬܦܠܗܘܢ ܡܛܝܒ̈ܐ ܒܝܬܒܬܐ، ܐܢܝ ܕܡܘܚܙܠܗܘܢ ܝܨܝܦܘܬܐ ܪܒܬܐ ܒܡܠܘ̈ܗܿ، ܒܡܩܪܒܬܐ ܕܡܢܝܢܐ ܡܢ ܫܘܐܠ̈ܐ ܘܕܘܪ̈ܫܐ ܐܢܝ ܕܡܘܙܝܕܠܗܘܢ ܠܡܠܘܐ ܒܐܣܟܝܡܐ ܡܣܝܡܢܐ.
ܘܦܝܫ ܕܟܝܪܐ، ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܕܟܬܒܐ ܒܢܘܣܟܗ ܕ(17)، ܦܝܫ ܥܒܝܕܐ ܠܡܬܚܐ ܡܢ 9-19 ܢܝܣܢ ܩܐܡܝܐ، ܒܫܘܬܦܬܐ ܕܙܘܕܐ ܡܢ (350) ܒܬܝ̈ ܦܪܣܐ ܡܢ ܩܠܝܡܐ ܕܟܘܪܕܣܬܢ ܘܥܝܪܩ ܘܐܬܪ̈ܘܬܐ ܥܪ̈ܒܝܐ ܘܢܘܟܼܪ̈ܝܐ، ܘܡܛܟܣܐܠܗ ܡܫܬܐܣܬܐ ܕ(ܡܕܐ) ܕܝܘܕܥܐ ܘܡܪܕܘܬܐ ܘܐܡܢ̈ܐ ܥܠ ܐܪܥܐ ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܓܘ ܦܪܟ (ܣܐܡܝ ܥܒܕ ܐܠܪܚܡܢ) ܒܐܪܒܝܠ.
