ܟܦܫܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܝܘܡ ܚܕܒܫܒܐ 16 ܚܙܝܪܢ 2024 ، ܒܬܪܬܝܢ ܡܫܕܪ̈ܘܬܐ ܕܟܢܘܫܬܐ ܕܥܠܝܡܘܬܐ ܐܬܘܪܝܬܐ ܡܪܕܘܬܢܝܬܐ ܘܟܢܘܫܬܐ ܐܬܘܪܝܬܐ ܝܠܘܦܝܬܐ، ܓܘ ܚܘܬܡܐ ܕܚܘܕܪܐ ܕܦܝܫܠܗ ܩܛܝܪܐ ܓܘ ܐܘܢܐ ܕܒܝܬ ܣܡܟܐ ܡܪܕܘܬܢܝܐ ܘܐܬܠܝܛܝܐ ܐܬܘܪܝܐ ܒܡܕܝܢ̄ܬܐ ܕܣܝܕܢܝ ܓܘ ܐܘܣܬܪܠܝܐ.
ܘܬܢܐܠܗ “ܐܘܓܼܢܐ” ܓܘ ܬܦܩܬܐ، ܥܠ ܐܢܢܩܝܘܬܐ ܕܚܕܬܘܬܐ ܘܬܟܢܘܠܘܓ̰ܝܐ ܒܢܛܪܬܐ ܕܝܪܬܘܬܐ ܕܥܡܢ، ܘܡܨܝܢܘܬܐ ܕܡܦܪܝܬܐ ܕܐܢܝ ܫܒܝܠ̈ܐ ܒܢܛܪܬܐ ܕܝܪܬܘܬܢ ܘܠܫܢܢ ܡܢ ܬܠܩܬܐ ܥܡ ܣܢܕܬܐ ܕܡܠܦܢܘܬܐ ܒܠܫܢܐ ܝܡܝܐ ܘܛܘܪܢܬܗ ܒܐܬܪܐ ܘܓܠܘܬܐ.
ܘܫܘܪܪܠܗ “ܐܘܓܼܢܐ” ܒܚܘܬܡܐ ܕܣܘܘܕܗ، ܥܠ ܐܢܢܩܝܘܬܐ ܕܥܘܕܪܢܐ ܡܫܘܬܦܐ ܒܝܢ ܫܘܬܐܣ̈ܐ ܕܥܡܢ ܒܐܬܪܐ ܘܓܠܘܬܐ ܘܦܘܠܚܢܐ ܡܫܘܬܦܐ ܒܢܝܫܐ ܕܡܪܡܬܐ ܕܨܒܘܬܐ ܕܡܕܪܘܬܐ ܕܥܡܢ ܒܚܕܕܐ.
ܘܦܝܫ ܕܟܝܪܐ، ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ، ܩܝܡ ܒܣܥܘܪܘܬܐ ܠܐܘܣܬܪܠܝܬܐ ܒܩܪܝܬܐ ܪܘܫܡܝܬܐ ܡܢ ܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܘܒܝܬ ܘܥܕܐ ܕܣܘܪܝܐ ܡܪܕܘܬܢܝܐ، ܠܕܘܪܫܐ ܕܩܐܡ ܡܪܕܘܬܢܝܐ ܘܐܡܢܝܐ ܕܥܡܢ ܓܘ ܐܬܪܐ، ܓܘ ܡܢܝܢܐ ܡܢ ܥܒܘܕܘ̈ܬܐ ܘܬܦܩܝ̈ܬܐ ܕܟܦܫ ܒܒܢܝ̈ ܥܡܢ ܡܬܘܬܒ̈ܐ ܬܡܐ، ܘܣܕܝܪܘܬܐ ܥܡ ܫܘܬܐܣ̈ܐ ܕܥܡܢ ܠܥܒܕܬܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܗܘ ܕܒܥܝܐ ܡܕܒܪܢܘܬܐ ܩܛܪܬܗ ܒܐܝܠܘܠ ܐܬܝܢܐ ܒܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
