ܚܘܬܬܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓܘ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܕܡܕܒܪܢܘܬܐ ܡܩܪܒܐ ܬܫܡܫܬܐ ܠܡܪܕܘܬܐ ܘܣܦܪܘܬܐ ܣܘܪܝܝܬܐ ܓܘ ܩܠܝܡܐ ܘܥܝܪܩ ܘܐܦ ܗܕܟ ܒܐܬܪ̈ܘܬܐ ܫܒܒ̈ܐ ܕܐܝܬܘܬܐ ܕܥܡܢ، ܟܕ ܪܡܙܠܗ ܕܗܢ ܡܢܕܝ ܟܐܬܐ ܒܥܠܬܐ ܕܣܢܕܬܐ ܚܕܪܫܝܬܐ ܒܝܕ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܠܓܕܫܐ ܡܪܕܘܬܢܝܐ ܣܘܪܝܝܐ ܘܦܪܝܫܐܝܬ ܒܝܕ ܡܝܩܪܘܬܐ ܕܪܫ ܫܘܠܛܢܘܬܐ ܕܩܠܝܡܐ ܡܠܦܢܐ ” ܡܣܪܘܪ ܒܪܙܐܢܝ”.
ܘܐ̄ܬܝܠܗ ܗܢܐ ܓܘ ܬܦܩܬܐ ܣܘܘܕܝܬܐ ܦܝܫܠܗܿ ܡܛܘܟܣܬܐ ܒܝܕ ܐܣܘܪܐ ܣܘܪܝܝܐ ܓܘ ܒܝܪܘܬ ܒܫܡܐ ܕ(ܣܩܘܒܠܝܘ̈ܬܐ ܕܦܝܫܬܐ ܕܥܡܢ) ، ܒܝܘܡ ܬܠܬܒܫܒܐ 6 ܚܙܝܪܢ 2023 ، ܗܝ ܕܩܒܠܗܿ ܒܐܪܚܘܬܐ ܓܘܗܿ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ ” ܟܠܕܘ ܪܡܙܝ ܐܘܓܼܢܐ”.
ܘܫܘܪܐܠܗ ” ܐܘܓܼܢܐ ” ܡܡܠܠܗ ܒܚܩܝܪܘܬܐ ܒܓܪܐ ܕܐܣܘܪܐ ܣܘܪܝܝܐ ܗܘ ܕܟܡ ܚܫܒܢܗ ܚܕ ܒܝܬܐ ܠܟܠ ܟܫܝܪ̈ܐ ܓܘ ܚܩܠܐ ܕܙܕܩ̈ܐ ܕܒܪܢܫܐ ܘܐܓܘܢܐ ܕܥܡܢ ܓܘ ܡܕܢܚܐ ܘܓܠܘܬܐ، ܒܬܪ ܗܕܟ ܬܢܐܠܗ ܚܕܪ ܡܐ ܕܚܙܐܠܗ ܥܡܢ ܡܢ ܦܪ̈ܡܐ ܓܘ ܡܕܢܚܐ ܒܫ ܡܢ 100 ܫܢ̈ܐ، ܘܪܡܙܠܗ ܠܚܘܫܒܢ̈ܐ ܕܡܝܪ̈ܐ ܟܕ ܐܚܢܝ ܒܪܩܘܒܠ ܡܢܝܢܐ ܡܢ ܟܡܝܪ̈ܘܬܐ (ܩܛܪ̈ܐ) ܫܘܪܐܠܗܘܢ ܡܢ ܣܝܦܿܘ 1915، ܗܠ ܣܡܝܠܐ 1933 ܘܗܠ ܕܥܫ 2014.
ܘܚܘܬܬܠܗ “ܐܘܓܼܢܐ” ܕܐܢ ܚܝܪܚ ܒܡܕܢܚܐ ܕܠܐ ܐܕܫܘܬܐ، ܒܚܕܢܝܘܬܐ ܬܘܕܝܬܢܝܬܐ ܐܘ ܐܘܡܬܢܝܬܐ، ܝܠܗ ܚܕ ܢܒܗܐ ( ܪܓܫܐ ) ܡܙܕܥܢܐ، ܘܪܡܙܠܗ ܕܫܘܬܦܬܐ ܕܥܡܢ ܒܩܘܝܡܐ ܕܥܝܪܩ ܪܒܬܐܝܠܗܿ، ܘܡܘܙܝܕܠܗ : ” ܐܚܢܝ ܝܗ̄ܘܚ ܒܨܘܪ̈ܘܬܐ ܘܐܝܬܠܢ ܫܘܒܗܪܐ ܕܐܚܢܝ ܠܐܗ̄ܘܚ ܚܕ ܣܗܡܐ ܡܢ ܚܪܒܬܐ ܘܠܐ ܡܢ ܚܘܒܠܐ ܓܘ ܥܝܪܩ”.
ܘܐܦ ܗܕܟ ܬܢܐܠܗ “ܐܘܓܼܢܐ” ܚܕܪ ܩܛܪܐ ܐܣܝܐ ܓܘ ܦܪܫܓܼܢܐ (ܩܢܘܢܐ) ܥܝܪܩܝܐ ܚܒܫ ܨܚܚܐ ܕܡܘܫܠܡܢܘܬܐ ܝܠܗܿ ܬܘܕܝܬܐ ܕܕܘܠܬܐ ܘܡܒܘܥܐ ܐܣܝܐ ܒܣܝܡ ܢܡܘܣ̈ܐ، ܘܗܢ ܢܘܩܙܐ ܡܘܢܦܠܗܿ ܠܗܝܝܘܬܢ ܘܫܘܝܘܬܢ ܐܝܟ ܒܢܝ̈ ܐܬܪܐ ܘܝܗ̄ܘܐ ܥܠܬܐ ܠܫܒܩܬܐ ܕܐܡܝ̈ܐ ܕܐܠܦܝ̈ܐ ܠܒܪ̈ܝܐ ܕܐܬܪܐ، ܘܪܡܙܠܗ ܕܚܘܫܒܢ̈ܐ ܕܥܡܢ ܩܕܡ 2003 ܝܗ̄ܘܘ ܙܘܕܐ ܡܢ ܡܠܝܘܢܐ ܘܦܠܓܐ، ܐܠܐ ܐܕܝܘܡ ܥܕ̈ܬܐ ܝܠܝܗܝ ܕܡܘܬ ܣܦܝܩ̈ܐ.
ܘܚܘܬܬܠܗ ” ܐܘܓܼܢܐ” ܒܐܝܟܢܝܘܬܐ ܕܥܡܢ ܓܘ ܩܠܝܡܐ ܕܟܘܪܕܣܬܢ ܗܝ ܕܟܡ ܫܡܗܠܗܿ ܒ(ܛܒܬܐ) ܟܕ ܝܠܗܿ ܚܕ ܛܘܦܣܐ ܒܚܝܝܬܐ ܫܠܡܝܬܐ، ܐܠܐ ܡܢܝܢ̈ܐ ܕܥܡܢ ܓܘ ܥܢܟܒܐ ܗܝ ܕܝܗ̄ܘܬ ܦܢܝܬܐ ܘܐܕܝܘܡ ܦܝܫܠܗܿ ܪܘܣܬܩܐ ܡܛܐ ܡܢܝܢܐ ܕܫܟܝܢܗܿ 75000 ܐܠܦܝ̈ܐ ܦܪ̈ܨܘܦܐ، ܘܚܘܬܬܠܗ ܕܘܠܐ ܥܠܢ ܕܢܛܪܚ ܐܝܟܢܘܬܢ، ܘܦܠܚܚ ܒܚܕܕܐ ܠܡܛܘܪܢܘܬܐ ܡܐ ܕܫܘܪܪܠܢ ܡܢ ܩܢܝܢ̈ܐ ܓܘ ܩܠܝܡܐ.
ܘܬܘܡܡܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܕܠܫܢܐ ܣܘܪܝܝܐ ܝܠܗ ܠܫܢܐ ܐܬܪܢܝܐ ܓܘ ܥܝܪܩ ܘܩܠܝܡܐ ܘܝܠܗ ܠܫܢܐ ܪܘܫܡܝܐ ܓܘ ܦܢܝ̈ܬܐ ܕܐܝܬܓܘܝܗܝ ܣܗܡܐ ܪܒܐ ܡܢ ܫܟܝܢ̈ܐ ܡܠܠ̈ܐ ܓܘܗ، ܘܗܢ ܝܠܗ ܚܕ ܝܘܬܪܢܐ ܠܢ، ܘܡܘܙܝܕܠܗ ܒܐܡܪܐ: ܕܐܝܬܠܢ 50 ܡܕܪ̈ܫܝܬܐ ܡܠܦܝ ܠܫܢܐ ܕܝܡܐ ܐܠܐ ܗܢܐ ܠܐܝܠܗ ܣܘܟܝܢ، ܘܪܡܙܠܗ ܕܐܚܢܝ ܒܥܚ ܙܕܩܝ̈ܢ ܒܫ ܙܘܕܐ، ܘܐܦ ܗܕܟ ܡܨܚ ܕܐܡܪܚ ܕܐܝܬܠܢ ܚܕ ܦܘܪܣܐ ܠܦܘܠܚܢܐ ܓܘ ܩܠܝܡܐ ܕܟܘܪܕܣܬܢ ܓܘ ܫܘܬܐܣ̈ܐ ܫܪܝܪ̈ܐ ܦܠܚܝ ܥܠ ܐܪܥܐ ܦܪܝܫܐܝܬ ܡܕܒܪܢܘܬܐ ܓܘܢܝܬܐ ܗܝ ܕܡܩܪܒܐ ܬܫܡܫܬܐ ܠܡܪܕܘܬܐ ܣܘܪܝܝܬܐ ܓܘ ܩܠܝܡܐ ܘܦܝܫܢ̈ܐ ܕܦܢܝ̈ܬܐ ܕܐܝܬܘܬܐ ܕܥܡܢ .
ܘܬܢܐܠܗ “ܐܘܓܼܢܐ” ܚܕܪ ܡܢܝܢܐ ܡܢ ܡܠܘ̈ܐܐ ܠܟܠܝܬܐ ܕܪܩܘܒܠ ܡܐ ܒܚܙܝܐܝܠܗ ܥܡܢ ܘܦܪܝܫܐܝܬ ܣܢܕܬܐ ܕܦܝܫܢܐ ܡܢܗ ܓܘ ܥܝܪܩ ܒܐܘܪܚܐ ܕܝܨܝܦܘܬܐ ܒܓܢ̇ܒܐ ܡܪܕܘܬܢܝܐ ܘܝܪܬܘܬܐ ܘܥܡ ܦܪܣܬܐ ܕܥܝܪܘܬܐ ܓܢ̄ܒ ܝܘܒܠܐ ܩܐܡܝܐ ܒܢܝܫܐ ܕܦܝܫܬܗ ܒܐܪܥܗ ܘܡܒܪܝܬܐ ܕܦܘܪܣܐ ܕܦܘܠܚܢܐ، ܘܚܘܬܬܠܗ ܛܘܝܒܐ ܕܡܕܒܪܢܘܬܐ ܓܘܢܝܬܐ ܠܥܘܕܪܢܐ ܥܡ ܟܠܝܗܝ ܫܘܬܐܣ̈ܐ ܡܪ̈ܕܘܬܢܝܐ ܘܐܡܢܝ̈ܐ ܣܘܪ̈ܝܝܐ ܓܘ ܥܠܡܐ.
ܘܒܚܘܬܡܐ ܕܬܦܩܬܐ ܣܘܘܕܝܬܐ ܫܘܪܐܠܗܘܢ ܕܘܪ̈ܫܐ ܕܡܫܘܬܦܠܗܘܢ ܓܘܝܗܝ ܡܢܝܢܐ ܡܢ ܝܨܘܦ̈ܐ ܘܟܫܝܪ̈ܐ ܒܓܝܓܠܐ ܡܪܕܘܬܢܝܐ ܣܘܪܝܝܐ.
