ܫܘܪܪܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ܗܘ ܕܡܫܘܬܦ ܓܘ ܥܒܘܕܘ̈ܬܐ ܕܠܘܡܕܐ ܕܚܐܪ̈ܘܬܐ ܬܘܕܝܬܢܝ̈ܐ ܬܒܠܝ̈ܐ IRFSummit2024 ܗܘ ܕܦܝܫܠܗ ܩܛܝܪܐ ܒܐܪܫܟܝܬܐ ܐܡܪܝܟܝܬܐ ܘܐܫܢܛܘܢ، ܕܛܘܠܩܐ ܕܡܫܝܚܝ̈ܐ ܡܢ ܥܝܪܩ ܓܙܡ ܛܘܠܩܐ ܕܗܝܝܘܬܐ ܡܪܕܘܬܢܝܬܐ ܕܐܬܪܐ.
ܘܡܫܘܬܦܠܗ “ܐܘܓܼܢܐ”، ܝܘܡ ܬܠܬܒܫܒܐ 30 ܟܢܘܢ ܬܪܝܢܐ 2024 ، ܓܘ ܝܬܒܝ̈ܬܐ ܕܠܘܡܕܐ ܕܚܐܪ̈ܘܬܐ ܬܘܕܝܬܢܝ̈ܐ ܬܒܠܝܐ ܘܬܢܐܠܗ ܚܕܪܐ ܡܕܢܚܐ ܡܨܥܝܐ ܒܥܝܢ̈ܐ ܕܒܨܘܪ̈ܘܬܐ، ܟܕ ܪܡܙܠܗ ܒܡܡܠܗ ܠܩܘܝܡܐ ܪܢܝܝܐ ܘܡܪܕܘܬܢܝܐ ܗܘ ܕܡܫܘܬܦܠܗܘܢ ܓܘܝܗܝ ܡܫܝܚܝ̈ܐ ܓܘ ܥܝܪܩ ܒܐܘܪܚܐ ܕܡܒܪܝܬܐ ܕܗܝܝܘܬܐ ܡܪܕܘܬܢܝܬܐ ܐܕܫܝܬܐ ܓܘ ܐܬܪܐ.
ܘܡܘܙܝܕܠܗ “ܐܘܓܼܢܐ” ܒܐ̄ܡܪܐ: ( ܒܛܘܠܩܐ ܕܡܫܝܚܝ̈ܐ ܡܢ ܥܝܪܩ ܘܗܕ ܗܝܝܘܬܐ ܕܦܪܫ ܓܘܗܿ ܥܝܪܩ ܐܕܫܢܝܐ ܒܕ ܦܝܫܐ ܓܙܝܡܬܐ ܒܛܘܠܩܐ) ܘܪܡܙܠܗ ܕ ” ܟܢܘܫܝܐ ܡܫܝܚܝܐ ܘܒܨܘܪ̈ܘܬܐ ܝܠܝܗܝ ܒܪܩܘܒܠ ܡܢܝܢܬܐ ܡܢ ܓܘܒܝ̈ܐ ، ܚܝܝܬܐ ܬ̄ܚܝܬ ܛܟܣܐ ܛܠܘܡܝܝܐ(ܪܕܘܦܝܝܐ) ܪܕܝܟܠܝܐ ܐܘ ܕܗܘܐܠܗܘܢ ܚܕ ܐܕܫܐ ܡܢ ܡܕܒܪܢܘܬܐ ܝܬܝܬܐ ܠܡܕܒܪܢܘܬܐ ܕܨܒܘܬܝ̈ܗܝ ܒܢܦܫܝ̈ܗܝ ܘܡܫܘܬܦܬܝܗܝ ܫܪܝܪܬܐ ܒܦܘܣܩܢܐ”.
ܘܡܢ ܓܢ̄ܒܐ ܐ̄ܚܪܢܐ ܬܢܐܠܗ “ܐܘܓܼܢܐ” ܚܕܪ ܡܐ ܕܡܩܪܒܐܠܗ ܘܙܝܪܘܬ ܡܪܕܘܬܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܗܝ ܕܪܚܫܐ ܒܦܣܘܥܝ̈ܬܐ ܚܬܝܬ̈ܐ ܨܘܒ ܥܡܠܝܬܐ ܕܫܘܪܪܐ ܕܡܣܬܟܠܢ̈ܘܬܐ ܕܐܕܫܢܝܘܬܐ ܓܘ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܢܩܝܦܬܐ ܐܠܗܿ.
ܘܩܒܠܗܿ ܒܐܪܚܘܬܐ ܐܪܫܟܝܬܐ ܐܡܪܝܟܝܬܐ ܘܐܫܢܛܘܢ ܠܡܬܚܐ ܡܢ 30-31 ܟܢܘܢ ܬܪܝܢܐ 2024 ، ܒܠܘܡܕܐ ܕܚܐܪ̈ܘܬܐ ܬܘܕܝܬܢܝ̈ܐ ܬܒܠܝܐ IRFSummit2024 ܒܡܫܘܬܦܬܐ ܕܫܘܬܐܣ̈ܐ ܙܕܩܢܝ̈ܐ ܘܬܘܕܝܬܢܝ̈ܐ ܬܒܠܝ̈ܐ، ܐܢܝ ܕܦܣܩܠܗܘܢ ܓܘ ܦܘܠܚܢ̈ܐ ܕܠܘܡܕܐ ܕ 80% ܡܢ ܫܟܝܢ̈ܐ ܕܥܠܡܐ ܐܝܬܠܗܘܢ ܩܛܪܐ ܕܩܘܕ̈ܐ ܬܘܕܝܬܢܝ̈ܐ.
ܘܩܘܒܠܠܗ “ܐܘܓܼܢܐ” ܒܚܘܬܡܐ ܕܠܘܡܕܐ ܚܕܐ ܩܪܝܬܐ ܠܡܫܘܬܦܬܐ ܒܝܘܡܐ ܐܬܪܢܝܐ ܐܡܪܝܟܝܐ ܕܥܪܝܬܐ (ܦܛܪܬܐ) ܘܨܠܘܬܐ The National Prayers Breakfast ، ܗܘ ܒܕ ܦܝܫ ܩܛܝܪܐ ܒܨܦܪܐ ܕܝܘܡ ܚܡܫܒܫܒܐ ܒܡܫܘܬܦܬܐ ܕܦܩܘܕ̈ܐ ܘܡܛܦܣܢ̈ܐ ܡܢ (140) ܐܬܪ̈ܘܬܐ ܡܢ ܟܠ ܦܢܝ̈ܬܐ ܕܥܠܡܐ.
