ܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܐܪܒܥܒܫܒܐ 4 ܚܙܝܪܢ 2025، ܒܚܘܕܪܐ ܗܘ ܕܟܡ ܛܟܣܐܠܗ ܐܣܝܪܘܬܐ ܣܘܪܝܝܬܐ ܓܘ ܠܒܢܢ ܒܦܘܪܣܐ ܕܥܒܪܬܐ ܕܚܡܫܝܢ ܫܢ̈ܐ ܥܠ ܫܘܬܐܣܗܿ، ܗܘ ܕܦܝܫܠܗ ܥܒܝܕܐ ܓܘ ܐܘܢܐ ܕܦܢܕܩܐ ܕܚܒܬܘܪ ܒܐܪܫܟܝܬܐ ܒܝܪܘܬ، ܬܚܝܬ ܫܡܐ :
((ܫܘܡܠܝ̈ܐ ܘܕܘܡܝ̈ܐ: ܕܐܝܟ ܫܒܘܩܚ ܚܐܪܘܬܐ ܘܐܕܫܢܝܘܬܐ ܓܘ ܡܕܢܚܐ)).
ܘܫܘܬܦܠܗܘܢ ܒܚܘܕܪܐ ܡܢܝܢܐ ܡܢ ܦܪ̈ܨܘܦܐ ܡܫܝܚܝ̈ܐ ܡܢ ܐܬܪ̈ܘܬܐ ܡܫܚܠܦ̈ܐ، ܡܢܝܗܝ ܣܘܪܝܼܐ ܘܠܒܢܢ ܘܦܠܣܛܝܢ ܘܡܨܪܝܢ، ܘܡܢܝܗܝ ܛܘܝܒܐ ܕܓܒܼܪܐ ܕܦܘܠܚܢ̈ܐ ܡܨܪܝܐ ܝܕܝܥܐ (ܢܓ̰ܝܒܿ ܣܐܘܝܪܣ).
ܘܪܡܙܠܗ (ܐܘܓܼܢܐ) ܒܡܡܠܗ، ܠܥܡܠ̈ܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܘܫܘܬܐܣ̈ܗܿ ܢܩܝܦ̈ܐ، ܒܚܡܝܬܐ ܕܝܪܬܘܬܐ ܕܥܡܢ ܡܢ ܬܠܩܬܐ، ܥܡ ܓܪܗܿ ܒܚܝܠܢܬܐ ܕܩܐܡ ܡܪܕܘܬܢܝܐ ܣܘܪܝܝܐ ܓܘ ܥܝܪܩ ܘܩܠܝܡܐ ܕܟܘܪܕܣܬܢ.
ܘܫܘܪܪܠܗ ܥܠ ܐܢܢܩܝܘܬܐ ܕܟܡܝܠܘܬܐ ܒܝܢ ܡܫܝܚܝ̈ܐ ܕܡܕܢܚܐ، ܠܫܩܠܬܐ ܕܝܘܬܪܢܐ ܡܢ ܩܢܝܢ̈ܐ ܡܫܘܪܪܐ ܒܐܬܪ̈ܘܬܐ ܕܦܢܝܬܐ، ܘܫܘܪܪܠܗ ܕܓܒܝ ܡܫܝܚܝ̈ܐ ܓܘ ܡܕܢܚܐ ܒܫܘܬܦܬܐ ܫܪܝܪܬܐ ܒܬܪܨܬܐ ܕܦܘܣܩܢܐ، ܘܩܪܐܠܗ ܒܝܬ ܥܕܢܐ ܠܙܘܕܐ ܡܢ ܦܘܬܚܐ ܘܦܘܠܚܢܐ ܡܫܘܬܦܐ ܥܡ ܟܠ ܡܟܝܢ̈ܬܐ ܕܟܢܘܫܝܐ.
ܘܦܝܫ ܕܟܝܪܐ ܕܐܣܝܪܘܬܐ ܣܘܪܝܝܬܐ ܡܫܘܬܐܣܠܗܿ ܫܢ̄ܬܐ ܕ 1975 ܒܢܝܫܐ ܕܡܡܬܠܢܘܬܐ ܕܣܘܪ̈ܝܝܐ ܓܘ ܠܒܢܢ ܘܝܠܗܿ ܗܕܡܐ ܡܫܬܐܣܢܐ ܒܚܘܝܕܐ ܣܘܪܝܝܬܐ ܬܒܝܠܝܐ.
