ܡܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܝܘܡ ܚܕܒܫܒܐ 18 ܫܒܛ 2024 ، ܒܚܘܬܡܐ ܕܒܝܬ ܦܘܠܚܢܐ ܕܪܫܘܬܢܝܐ ܗܘ ܕܟܡ ܛܟܣܐܠܗ ܡܛܟܣܬܐ ܕܫܠܝܚ̈ܐ ܙܥܘܪ̈ܐ ܓܘ ܡܕܝܢ̄ܬܐ ܕܐܪܒܝܠ ܘܝܗ̄ܘܐ ܐܡܘܪܐ ܓܘܗ “ܢܝܢܒ ܠܐܡܣܘ”، ܒܢܝܫܐ ܕܥܘܕܪܢܐ ܕܡܢܝܢܐ ܡܢ ܥܠܝܡ̈ܐ ܕܕܫܬܐ ܕܢܝܢܘܐ ܒܓܝܓܼܠܐ ܕܡܕܒܪܢܘܬܐ ܕܦܘܠܚܢ̈ܐ ܘܬܪ̈ܡܝܬܐ ܙܥ̄ܘܿܪ̈ܐ .
ܘܐ̄ܬܝܠܗ ܒܝܬ ܦܘܠܚܢܐ ܒܣܢܕܬܐ ܡܢ ܡܫܬܐܣܬܐ ܕ(ܣܐܠܬ ܗܘܠܢܕܝܬܐ) ܘܡܘܓܪܫܠܗ ܬܠܬܐ ܝܘܡ̈ܐ، ܬܢܐܠܗܘܢ ܩܝܡܢ̈ܐ ܥܠܗ ܡܠܘܐܐ ܕ(ܣܘܪܛܐ ܐܣܛܪܛܝܓܼܝܐ) ܕܡܕܒܪܢܘܬܐ ܕܦܘܠܚܢ̈ܐ، ܘܚܒܫܠܗ ܡܣܬܟܠܢܘ̈ܬܐ ܕܣܘܪܛܐ ܐܣܛܪܛܝܓܼܝܐ ܕܡܕܪܢܘܬܐ ܕܦܘܠܚܢ̈ܐ ܥܡ ܡܒܪܝܬܐ ܕܬܪ̈ܡܝܬܐ ܚܕܬ̈ܐ ܘܒܪ̈ܘܝܝܐ ܒܢܝܫܐ ܕܫܪܪܬܝܗܝ ܒܕܫܬܐ ܕܢܝܢܘܐ ܒܐܣܟܝܡܐ ܓܘܢܝܐ ܒܢܝܫܐ ܕܚܝܠܢܬܐ ܕܓܪܐ ܕܥܠܝܡ̈ܐ ܓܘ ܗܘܦܪܟܝܐ ܥܠ ܐܝܬܘܬܐ.
ܘܒܚܘܬܡܐ ܕܒܝܬ ܦܘܠܚܢܐ ܫܘܪܪܠܗ “ܐܘܓܼܢܐ” ، (ܦܝܫܬܐ ܐ̄ܣܝܪܬܐܝܠܗܿ ܒܒܪܝܬܐ ܕܦܘܪ̈ܣܐ ܕܦܘܠܚܢܐ ܠܥܠܝܡ̈ܐ ܘܐܢܢܩܝܘܬܐ ܕܥܘܪܕܢܝܗܝ ܒܓܝܓܼܠܐ ܕܦܘܠܚܢܐ ܕܝܠܝܗܝ ܡܢ ܥܠܠ̈ܬܐ ܪ̈ܫܝܐ ܘܐܢܢܩܝ̈ܐ ܒܥܪܝܬܐ ܕܦܪܨܘܦܐ ܒܐܪܥܗ ܘܒܢܝܬܐ ܕܕܥܬܝܕ ܠܥܠܝܡ݁̈ܐ ܡܫܪ̈ܝܢܐ ܓܘ ܦܢܝܬܝ̈ܗܝ ܬܫܥܝܬܢܝ̈ܐ ܒܕܫܬܐ ܕܢܝܢܘܐ).
ܘܒܚܘܬܡܐ ܕܒܝܬ ܦܘܠܚܢܐ ܡܫܘܬܦܠܗ ܡܕܒܪܢܐ ܓܘܢܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܓܘ ܦܠܓܼ̄ܝܬܐ ܕܕܫܢ̈ܐ ܕܡܝܩܪܢܘܬܐ ܥܠ ܡܫܘܬܦ̈ܐ ܓܘܗ.
ܘܦܝܫ ܕܟܝܪܐ، ܕܡܛܟܣܬܐ ܕܫܠܝܚ̈ܐ ܙܥܘܪ̈ܐ ܕܣܘܝܥܐ ܘܡܪܒܝܬܐ ܝܠܗܿ ܡܛܟܣܬܐ ܕܘܟܬܢܝܬܐ ܡܣܘܓܼܠܬܐ ܓܘ ܚܘܕܪܐ ܕܡܛܟܣܝ̈ܬܐ ܕܟܢܘܫܝܐ ܡܕܝܢܝܐ ܓܘ ܬܪܬܝ ܫܘܠܛܢܘ̈ܬܐ ܩܢܛܪܘܢܝܬܐ ܘܩܠܝܡܐ، ܘܦܝܫܠܗܿ ܡܫܘܬܐܣܬܐ ܫܢ̄ܬܐ ܕ 2014 ܒܬܪ ܫܠܛܢܬܐ ܕܛܘܟܣܐ ܕܕܥܫ ܥܠ ܦܢܝܬܐ ܕܕܫܬܐ ܕܢܝܢܘܐ.
