ܣܥܪܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ، ܝܘܡ ܬܪܝܢܒܫܒܐ 17 ܚܙܝܪܢ 2024، ܒܚܒܼܪܘܬܐ ܕܡܫܕܪܘܬܐ ܡܢ ܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܚܒܫܠܗܿ ܟܠ ܡܢ “ܐܕܝܒ ܓܘܓܐ”، “ܡܕܚܬ ܐܠܒܐܙܝ” ܠܡܕܪܫܬܐ ܕܪܒܢ ܗܘܪܡܙ ܫܪܘܝܬܐ ܐܬܘܪܝܬܐ ܓܘ ܡܕܝܢ̄ܬܐ ܕܣܝܕܢܝ ܒܐܘܣܬܪܠܝܐ.
ܘܝܗ̄ܘܘ ܒܣܩܒܠܬܐ ܕܡܫܕܪܘܬܐ ܡܕܒܪܢܐ ܕܡܕܪܫܬܐ “ܒܢܝܡܝܢ ܚܘܫܒܐ” ܘܡܕܪܫܢܝܬܐ ܓܘܗܿ “ܐܝܦܘܢ ܫܡܐܝܠ”، ܘܟܪܟܼܠܗܿ ܡܫܕܪܘܬܐ ܒܡܢܘ̈ܬܐ ܕܡܕܪܫܬܐ ܘܒܬܝ̈ ܢܘܣܝ̈ܗܿ ܘܚܙܐܠܗܘܢ ܢܘܣܝܐ ܕܡܠܦܢܘܬܐ ܕܠܫܢܐ ܝܡܝܐ ܓܘܗܿ، ܘܡܘܚܙܐܠܗ “ܐܘܓܼܢܐ” ܕܡܝܪܘܬܗ ܗܘ ܕܩܘܠܣܠܗ ܥܠ ܦܘܠܚܢ̈ܐ ܕܡܕܒܪܢܘܬܗܿ ܘܟܕܝܪ̈ܐ ܕܡܕܪܫܢܘܬܐ ܓܘܗܿ، ܘܫܘܪܪܠܗ ܥܠ ܐܢܢܩܝܘܬܐ ܕܡܠܦܢܘܬܐ ܕܝܘܒܠ̈ܐ ܐܬܝܢ̈ܐ ܒܠܫܢܐ ܝܡܝܐ ܠܢܛܪܬܐ ܥܠܗ ܘܥܠ ܝܪܬܘܬܐ ܕܥܡܢ ܡܢ ܬܠܩܬܐ، ܘܦܪܝܫܐܝܬ ܒܐܬܪ̈ܘܬܐ ܕܓܠܘܬܐ ܪܚܩܐ ܡܢ ܐܬܪܐ.
ܘܪܡܙܠܗ “ܐܘܓܼܢܐ” ܒܚܘܬܡܐ ܕܣܘܘܕܗ، ܥܠ ܐܢܢܩܝܘܬܐ ܕܥܘܕܪܢܐ ܡܫܘܬܦܐ ܒܝܢ ܫܘܬܐܣ̈ܐ ܕܥܡܢ ܓܘ ܐܬܪܐ ܘܓܠܘܬܐ، ܠܛܘܪܢܬܐ ܕܩܐܡ ܡܪܕܘܬܢܝܐ ܘܣܢܕܬܐ ܕܥܡܠܝܬܐ ܕܡܠܦܢܘܬܐ ܒܠܫܢܐ ܝܡܝܐ ܘܛܘܪܢܬܗܿ ܒܚܕܕܐ.
ܘܦܝܫ ܕܟܝܪܐ، ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ، ܩܝܡ ܒܣܥܘܪܘܬܐ ܠܐܘܣܬܪܠܝܬܐ ܒܩܪܝܬܐ ܪܘܫܡܝܬܐ ܡܢ ܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܘܒܝܬ ܘܥܕܐ ܕܣܘܪܝܐ ܡܪܕܘܬܢܝܐ، ܠܕܘܪܫܐ ܚܕܪ ܩܐܡ ܡܪܕܘܬܢܝܐ ܘܐܡܢܝܐ ܕܥܡܢ ܓܘ ܐܬܪܐ، ܓܘ ܡܢܝܢܐ ܡܢ ܥܒܘܕܘ̈ܬܐ ܘܬܦܩܝ̈ܬܐ ܕܟܦܫ ܒܒܢܝ̈ ܥܡܢ ܡܬܘܬܒ̈ܐ ܬܡܐ.
