ܣܥܪܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ، ܝܘܡ ܚܡܫܒܫܒܐ 13 ܚܙܝܪܢ 2024، ܒܟܪܘܟܼܝܗ ܓܘ ܡܕܝܢ̄ܬܐ ܕܡܠܒܘܪܢ ܐܘܣܬܪܠܝܬܐ ܒܚܒܪܘܬܐ ܕܡܫܕܪܘܬܐ ܕܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܚܒܫܠܗܿ ܟܠ ܡܢ “ܐܕܝܒ ܓܘܓܐ”، “ܥܐܕܠ ܕܢܘ”، “ܡܕܚܬ ܐܠܒܐܙܝ”، ܣܥܪܠܗ ܠܬܪܝܢܝܬܐ ܕܡܪܝ ܢܪܣܝ ܐܬܘܪܝܬܐ ܡܫܝܚܝܬܐ ܓܘ ܡܕܝܢ̄ܬܐ.
ܘܝܗ̄ܘܘ ܒܣܩܒܠܬܐ ܕܡܫܕܪܘܬܐ ܡܗܕܝܢܐ ܪܘܚܢܝܐ ܕܡܕܪܫܬܐ ܐܒܐ “ܫܡܘܐܝܠ” ܘܡܕܒܪܢܗܿ “ܐܕܘܪ ܕܢܚܐ”، ܘܟܪܟܼܠܗܿ ܡܫܕܪܘܬܐ ܓܘ ܡܢܘ̈ܬܐ ܕܡܕܪܫܬܐ ܘܚܙܐܠܗܿ ܠܢܘܣܝܐ ܕܡܠܦܢܘܬܐ ܕܠܫܢܐ ܣܘܪܝܝܐ ܓܘܗܿ، ܘܡܘܥܒܪܗ “ܐܘܓܼܢܐ” ܥܠ ܕܡܝܪܘܬܗ ܒܡܠܦܢܘܬܐ ܒܠܫܢܐ ܝܡܝܐ ܓܘ ܡܕܪܫܬܐ، ܘܫܘܪܪܠܗ ܥܠ ܐܢܢܩܝܘܬܐ ܕܡܠܦܢܘܬܐ ܕܝܘܒܠܐ ܐܬܝܢܐ ܒܠܫܢܐ ܝܡܝܐ ܠܢܛܪܬܐ ܡܢ ܬܠܩܬܐ، ܘܦܪܝܫܐܝܬ ܓܘ ܐܬܪ̈ܘܬܐ ܕܬܘܬܒܘܬܐ ܪ̈ܚܩܐ ܡܢ ܐܬܪܐ.
ܘܪܡܙܠܗܿ “ܐܘܓܼܢܐ” ܓܘ ܣܘܘܕܗ ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܦܪ̈ܨܘܦܐ ܘܫܘܬܐܣ̈ܐ ܕܝܠܢܝܐ ܒܒܢܝ̈ ܥܡܢ ܓܘ ܥܝܪܩ ܘܓܠܘܬܐ ، ܒܢܝܫܐ ܕܦܘܠܚܢܐ ܠܡܪܡܬܐ ܕܨܒܼܘܬܐ ܕܡܪܕܘܬܐ ܣܘܪܝܝܬܐ ܘܛܘܪܢܬܗܿ ܓܘ ܐܬܪܐ ܘܓܠܘܬܐ.
ܘܦܝܫ ܕܟܝܪܐ، ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ، ܩܝܡ ܒܣܥܘܪܘܬܐ ܠܡܕܝܢ̄ܬܐ ܕܡܠܒܘܪܢ ܐܘܣܬܪܠܝܬܐ ܒܩܪܝܬܐ ܪܘܫܡܝܬܐ ܡܢ ܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܘܒܝܬ ܘܥܕܐ ܕܣܘܪܝܐ ܡܪܕܘܬܢܝܐ، ܠܕܘܪܫܐ ܕܩܐܡ ܡܪܕܘܬܢܝܐ ܘܐܡܢܝܐ ܕܥܡܢ ܓܘ ܐܬܪܐ، ܓܘ ܡܢܝܢܐ ܡܢ ܥܒܘܕܘ̈ܬܐ ܘܬܦܩܝ̈ܬܐ ܕܟܦܫ ܒܒܢܝ̈ ܥܡܢ ܡܬܘܬܒ̈ܐ ܓܘ ܐܘܣܬܪܠܝܐ.
