ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܬܠܬܒܫܒܐ 15 ܢܝܣܢ 2025، ܓܘ ܒܢܝܢܐ ܕܡܕܒܪܢܘܬܐ ܒܪܘܣܬܩܐ ܕܥܢܟܒܐ، ܐܘܡܢܬܐ ܒܪܘܩܬܐ ( ܠܝܢܕܐ ܓ̰ܘܪܓ̰)̤ ، ܐܬܝܢܬܐ ܡܢ ܐܘܚܕܢ̈ܐ ܡܚܝܕ̈ܐ ܐܡܪ̈ܝܟܝܐ ܠܫܘܬܦܬܐ ܒܙܘܝܚ̈ܐ ܕܒܢܝ̈ ܥܡܢ ܒܥܐܕ̈ܐ ܕܐܟܝܬܘ ܪܫܐ ܕܫܢ̄ܬܐ ܐܘܡܬܢܝܬܐ ܚܕܬܐ.
ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܒܣܘܘܕܝܗܝ ܥܠ ܩܐܡ ܡܪܕܘܬܢܝܐ ܘܐܡܢܝܐ ܕܥܡܢ ܘܐܢܢܩܝܘܬܐ ܕܓܪܐ ܕܐܘܡܢܐ ܒܫܢܝܬܐ ܕܐܓܪܬܐ ܕܥܡܗ ܘܡܥܒܪ ܥܠ ܩܛܪ̈ܗ ܘܗܢܝܢ̈ܗ ، ܘܡܘܩܪܒܠܗ (ܐܘܓܼܢܐ) ܩܘܒܠܛܝܒܘܬܗ ܠܐܘܡܢܬܐ (ܠܝܢܕܐ ܓ̰ܘܪܓ̰) ܠܫܘܬܦܬܗܿ ܛܝܡܢܬܐ ܒܥܕܥܐܕܐ ܕܝܪܬܘܬܐ ܣܘܪܝܝܬܐ ܒܕܘܪܬܗ ܚܡܝܫܝܬܐ، ܘܡܘܩܪܒܠܗܿ ܐܘܡܢܬܐ ܩܘܒܠܛܝܒܘܬܐ ܠܡܕܒܪܢܘܬܐ ܓܘܢܝܬܐ ܥܠ ܡܝܩܪܢܘܬܗܿ ܒܕܘܪܥܐ ܕܗܒܢܝܐ ܕܒܪܘܝܘܬܐ ܣܘܪܝܝܬܐ، ܘܫܘܪܪܠܗ ܥܠ ܐܓܪܬܐ ܪܒܬܐ ܕܐܡܢܐ ܒܫܢܝܬܐ ܕܗܢܝܢ̈ܐ ܕܥܡܐ ܘܣܘܟܝ̈ܗ.
ܘܫܘܪܪܠܗ (ܐܘܓܼܢܐ) ܓܘ ܬܦܩܬܐ، ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܦܪ̈ܨܘܦܐ ܘܫܘܬܐܣ̈ܐ ܐܢܝ ܕܐܝܬܠܗܘܢ ܝܨܝܦܘܬܐ ܒܨܒܘܬܐ ܕܥܡܢ ܒܐܬܪܐ ܘܓܠܘܬܐ ، ܠܛܘܪܢܬܐ ܕܩܐܡ ܡܪܕܘܬܢܝܐ ܕܥܡܢ.
ܘܒܚܘܬܡܐ ܕܬܦܩܬܐ، ܡܘܩܪܒܠܗ (ܐܘܓܼܢܐ) ܠܐܘܡܢܬܐ ( ܠܝܢܕܐ ܓ̰ܘܪܓ̰) ܢܘܣܟܐ ܡܢ ܡܢܝܢܐ (52) ܡܢ ܡܓܠܬܐ ܕ(ܒܢܐܦܠ) ܗܝ ܕܢܦܩܐ ܐܩܡܐܝܬ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ.
ܘܒܚܘܬܡܐ ܕܣܥܘܪܘܬܐ، ܪܚܫܠܗ ܡܕܒܪܢܐ ܓܘܢܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ) ܥܡ ܐܘܡܢܬܐ ( ܠܝܢܕܐ ܓ̰ܘܪܓ̰) ܒܣܥܘܪܘܬܐ ܠܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ، ܘܝܗ̄ܘܐ ܒܣܩܒܠܬܝܗܝ ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ( ܒܪܢܐܪܕ ܝܘܣܦ)، ܘܡܘܚܙܐܠܗܿ ܐܘܡܢܬܐ ܣܥܘܪܬܐ، ܗܝ ܕܩܝܡܗ̄ܘܐܠܗܿ ܒܣܥܘܪܘܬܐ ܠܒܝܬ ܥܬܝܩ̈ܬܐ ܫܢ̄ܬܐ ܕ2015، ܕܡܝܪܘܬܗܿ ܒܡܬܩܕܡܢܘܬܐ ܒܪܝܬܐ ܓܘ ܛܘܟܣܐ ܘܦܠܓ̄ܝܬܐ ܕܩܢܝ̈ܬܐ ܕܒܝܬ ܥܬܝܩ̈ܬܐ ܘܐܝܬܘ̈ܬܗ ܝܪ̈ܬܘܬܢܝܐ، ܐܢܝ ܕܝܨܦܐ ܓܘܝܗܝ ܡܕܒܪܢܘܬܐ ܕܒܝܬ ܥܬܝܩ̈ܬܐ ܝܨܝܦܘܬܐ ܪܒܬܐ ܠܢܛܪܬܐ ܘܫܢܝܬܐ ܕܝܘܪܬܢܐ ܡܪܕܘܬܢܝܐ ܘܬܫܥܝܬܢܝܐ ܕܥܡܢ ܠܝܘܒܠ̈ܐ ܐܬܝܢ̈ܐ ܠܢܛܪܬܗ ܡܢ ܬܠܩܬܐ.
ܘܦܝܫ ܕܟܝܪܐ، ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܕܘܪܬܗ ܚܡܝܫܝܬܐ ܚܬܡܠܗ ܥܒܘܕܘ̈ܬܗ، ܝܘܡ ܚܡܫܒܫܒܐ 10 ܢܝܣܢ 2025، ܗܘ ܟܡ ܛܟܣܐܠܗ ܡܕܒܪܢܘܬܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܬܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܫܘܦܗ ܥܝܕܝܐ ܒܦܢܝܬܐ ܕܕܪܓܐ ܒܪܩܘܒܠ ܬܠܐ ܕܩܨܪܐ ܥܬܩܝܐ ܒܠܒܐ ܕܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
