ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܒܛܘܝܒܐ ܕܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ” ܒܪܢܐܪܕ ܝܘܣܦ”، ܝܘܡ ܚܕܒܫܒܐ 14 ܬܡܘܙ 2024، ܓܘ ܒܢܝܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ، ܐܝܙܓܕܐ ܒܪܝܛܢܝܐ ܓܘ ܥܝܪܩ “ܣܬܝܦܢ ܗܝܬܫܢ”، ܒܚܒܪܘܬܐ ܕܩܢܨܠܐ ܒܪܝܛܢܝܐ ܓܘ ܐܪܒܝܠ “ܐܢܕܪܘ ܒܝܙܠܝ”.
ܘܬܢܐܠܗ ܡܕܒܪܢܐ ܓܘܢܝܐ ܓܘ ܣܘܘܕܗ ܠܚܘܪ̈ܙܐ ܘܟܫܝܪ̈ܘܬܐ ܡܪ̈ܕܘܬܢܝܐ ܐܢܝ ܡܛܟܣܐܠܗܘܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܥܡ ܚܘܪ̈ܙܐ ܐܢܝ ܕܩܝܡ ܓܘܝܗܝ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ، ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܠܐܘܦܩ̈ܐ ܕܥܬܝܕܝ̈ܐ ܠܥܘܕܪܢܐ ܡܫܘܬܦܐ.
ܘܒܬܪ ܟܪܘܟܼܝܐ ܕܡܫܕܪܘܬܐ ܣܥܘܪܬܐ ܒܡܢܘ̈ܬܐ ܕܒܝܬ ܥܬܝܩ̈ܬܐ ܘܚܙܝܬܐ ܕܡܘܠܟܢ̈ܗ ܝܪ̈ܬܘܬܢܝܐ، ܟܬܒܠܗ ܐܝܙܓܕܐ ܒܪܝܛܢܝܐ”ܣܬܝܦܢ ܗܝܬܫܢ” ܢܘܗܪ̈ܗ ܓܘ ܣܓܼܠܐ ܕܣܥܘܪ̈ܘܬܐ ܕܒܝܬ ܥܬܝܩ̈ܬܐ، ܐܢܝ ܕܫܘܪܪܠܗ ܓܘܝܗܝ ( ܬܫܥܝܬܐ ܕܥܡܘܟܢ ܫܪܫܝܬܐܝܠܗܿ ܘܦܪܝܫܬܐ ܐܠܐ ܒܝܬ ܥܕܢܐ ܓܘܢܚܝܬܐܝܠܗܿ)، ܘܪܡܙܠܗ: ( ܐܚܢܝ ܓܘ ܐܘܚܕܢܐ ܡܚܝܕܐ ܠܐ ܡܢܫܚ ܟܙܝܪܘܬܐ ܕܗܢ ܥܡܐ ܒܩܪܒܐ ܬܒܝܠܝܐ ܩܕܡܝܐ ܗܘ ܕܝܗ̄ܘܐ ܒܪ ܩܝܡܢ ܙܥܘܪܐ).
ܘܐ̄ܡܪܗ “ܗܝܬܫܢ”: ( ܡܨܠܚ ܒܣܒܪܐ ܕܚܕ ܕܥܬܝܕ ܒܘܫ ܛܒܐ ܠܗܢ ܥܡܐ، ܘܡܢܕܝ ܫܦܝܪܐܝܠܗ ܟܦܠܚܝܬܘܢ ܒܝܨܝܦܘܬܐ ܕܢܛܪܝܬܘܢ ܝܪܬܘܬܘܟܢ ܘܕܟܪܝܬܘܢ ܬܘܢܝܬܘ̈ܟܢ).
ܘܒܚܘܬܡܐ ܕܣܥܘܪܘܬܐ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܠܢܗܝܪܘܬܗ ܕܐܝܙܓܕܐ، ܚܝܠܬܐ ܓܘܕܢܝܬܐ ܡܢ ܦܘܠܚܢ̈ܐ ܕܐܝܕܐ ܓܠܝܦܬܐ ܒܨܠܡܐ ܕܬܘܪܐ ܕܓܘܠܦܢ̈ܐ (ܠܡܣܘ)، ܚܕ ܡܢ ܪ̈ܡܙܐ ܝܪ̈ܬܘܬܢܝܐ ܘܡܕܝܢܝ̈ܐ ܕܥܡܢ ܓܘ ܬܫܥܝܬܐ.
