ܡܘܚܝܐܠܗܿ ܐܡܢܬܐ ܘܡܙܡܪܢܬܐ ܠܒܢܢܝܬܐ (ܠܝܐܠ ܢܥܡܐ، ܒܪܡܫܐ ܕܝܘܡ ܥܪܘܒܬܐ 25 ܢܝܣܢ 2025، ܪܡܫܘܢܐ ܕܣܘܓܼܝ̈ܬܐ ܓܘ ܡܕܝܢ̄ܬܐ ܕܙܟܼܘ ܒܗܘܦܪܟܝܐ ܕܕܗܘܟ، ܒܦܘܪܣܐ ܕܥܐܕܐ ܕܩܝܡܬܐ ܫܒܝܚܬܐ ܘܒܘܝܐܐ ܠܩܕܝܫܘܬܗ ܕܦܦܐ (ܦܪܢܣܝܣ)، ܪܫܐ ܕܥܕܬܐ ܩܬܘܠܝܩܝܬܐ ܓܘ ܬܒܝܠ، ܗܘ ܕܫܘܢܐܠܗ ܩܕ̄ܡ ܚܕܟܡܐ ܝܘܡ̈ܐ، ܒܥܘܡܪܐ ܕ(88) ܫܢ̈ܐ .
ܘܐ̄ܬܝܠܗ ܪܡܫܘܢܐ، ܒܣܕܝܪܘܬܐ ܒܝܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܡܪܥܝܬܐ ܕܙܟܼܘ ܕܟܠܕܝ̈ܐ، ܗܝ ܕܩܒܠܗܿ ܒܐܪܚܘܬܐ ܪܡܫܘܢܐ ܓܘ ܥܕܬܐ ܕܡܪܝ ܓܝܘܪܓܝܣ ܣܗܕܐ ܓܘ ܙܟܼܘ، ܒܛܘܝܒܐ ܕܪܥܝܐ ܕܡܪܥܝܬܐ ܡܪܘܬܗ ܕܡܝܛܪܦܘܠܝܛܐ ܡܪܝ (ܦܝܠܝܟܣ ܐܠܫܐܒܝ) ܘܒܫܘܬܦܬܐ ܕܐܒܗ̈ܬܐ ܟܗܢ̈ܐ ܘܪ̈ܒܢܝܬܐ ܘܡܫܡܫܢ̈ܐ ܘܣܝܥܬܐ ܕܙܡܪ̈ܐ ܘܥܠܝܡܘܬܐ ܡܢ ܩܘܪ̈ܝܐ ܢܩܝܦ̈ܐ ܠܡܪܥܝܬܐ ܕܙܟܼܘ ܟܠܕܝܬܐ، ܥܡ ܥܠܝܡܘܬܐ ܕܥܕܬܐ ܕܡܪܝ ܐܝܬ ܐܠܗܐ ܓܘ ܕܗܘܟ ܘܟܢܫܐ ܪܒܐ ܡܢ ܡܗܝܡܢ̈ܐ .
ܘܫܘܪܪܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܓܘ ܡܡܠܗ ܕܦܝܫܠܗ ܡܘܩܪܒܐ ܓܘ ܪܡܫܘܢܐ، (ܗܝܡܢܘܬܢ ܥܡܘܩܬܐ ܒܩܝܡܬܐ ܕܡܪܢ ܝܫܘܥ ܡܫܝܚܐ ܘܢܨܝܚܘܬܗ ܥܠ ܡܘܬܐ ܡܘܠܦܠܢ ܕܥܡܢ ܝܠܗ ܥܡܐ ܠܐ ܟܡܝܬ، ܐܠܐ ܟܩܝܡ ܒܐܡܝܢܘܬܐ ܡܢ ܒܝܢ ܩܛܡ̈ܐ، ܛܥܝܢܐ ܝܘܪܬܢܐ ܕܐܒܗ̈ܬܐ ܘܣܒܪܐ ܕܩܝܡܬܐ)، ܘܪܡܙܠܗ ܒܡܬܚܐ ܕܕܟܪܗ ܣܥܘܪܬܐ ܕܩܕܝܫܘܬܗ ܕܦܦܐ (ܦܪܢܣܝܣ) ܠܐܬܪܐ ( ܣܥܘܪܘܬܐ ܕܩܕܝܫܘܬܗ ܕܦܦܐ (ܦܪܢܣܝܣ) ܠܥܝܪܩ ܘܩܠܝܡܐ ܕܟܘܪܕܣܬܢ ܡܠܦܐܠܢ ܕܐܚܢܝ ܟܠܢ ܝܗ̄ܘܚ ܐܚܘܢ̈ܘܬܐ ܒܡܟܝܟܘܬܐ ܘܐ̄ܢܫܘܬܐ ܒܐܡܝܢܝܘܬܐ).
ܘܡܘܒܝܢܗ (ܐܘܓܼܢܐ) ، ( ܫܘܬܦܬܐ ܕܡܙܡܪܢܬܐ ܠܒܢܢܝܬܐ (ܠܝܐܠ ܢܥܡܐ) ܒܗܢ ܪܡܫܘܢܐ ܟܡܡܬܠܐ ܚܕ ܝܘܩܢܐ (ܨܘܪܬܐ) ܕܪܓܼܫܐ ܕܐܚܘܬܐ ܕܡܪ̈ܘܢܝܐ ܒܕܥܪܬܐ ܠܫܪ̈ܫܐ، ܘܐܗܐ ܝܠܗ ܚܕ ܫܘܒܗܪܐ ܕܕܥܪܘܚ ܟܠܢ ܠܫܪ̈ܫܝܢ ܕܥܝܪ̈ܐ ܒܥܘܡܩܐ ܕܐܗܐ ܡܕܢܚܐ)، ܘܕܟܪܗ ܒܣܘܘܕܗ ܕܟܪܐ ܕ(110) ܠܓܕܫ̈ܐ ܕܦܪܡܐ ܕܣܝܦܘ، ܐܢܝ ܕܦܝܫܠܗܘܢ ܥܒܝܕܐ ܕܪܩܘܒܠ ܥܡܢ ܓܘ ܩܪܒܐ ܬܒܝܠܝܐ ܩܕܡܝܐ ܒܐܪ̈ܥܬܐ ܕܕܘܠܬܐ ܥܘܬܡܢܝܬܐ ܒܗܘ ܙܒܢܐ، ܐܗܐ ܕܟܪܐ ܕܢܦܠ ܒܣܝܩܘܡ 24 ܢܝܣܢ ܡܢ ܟܠ ܫܢ̄ܬܐ .
ܘܩܘܠܣܠܗ (ܐܘܓܼܢܐ) ܒܚܘܬܡܐ ܕܡܡܠܗ ، ܒܡܪܥܝܬܐ ܕܙܟܼܘ ܟܠܕܝܬܐ ܘܥܒܘܕܘ̈ܬܗܿ ܐܢܝ ܕܝܨܦܝ ܒܗܝܝܘܬܐ ܕܥܡܢ، ܘܡܘܩܪܒܠܗ ܩܘܒܠܛܝܒܘܬܗ ܠܪܥܝܗܿ ܝܩܝܪܐ ܡܪܝ (ܦܝܠܝܟܣ ܐܠܫܐܒܝ)، ܘܒܥܐܠܗ ܠܗ ܐܡܝܢܘܬ ܫܘܘܫܛܐ ܘܢܨܝܚܘܬܐ ܠܬܫܡܫܬܐ ܕܥܡܢ ܘܥܕܬܗ.
ܘܒܚܘܬܡܐ ܕܪܡܫܘܢܐ، ܣܥܪܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܠܝܘܩܢܐ (ܨܠܡܐ) ܕܝܕܘܥܐ (ܦܘܠܘܣ ܒܝܕܐܪܝ)، ܗܘ ܕܡܡܬܠ ܦܬܐ ܒܗܪܢܬܐ ܡܢ ܡܐܙܠܬܐ ܕܪܢܝܐ ܘܗܝܡܢܘܬܐ ܓܘ ܦܢܝܬܐ، ܘܐܦ ܗܕܟ ܟܬܒܠܗ ܚܕ ܡܡܠܐ ܓܘ ܣܓܼܠܐ ܕܕܟܪܐ ܒܦܘܪܣܐ ܕܫܘܢܝܐ ܕܩܕܝܫܘܬܗ ܦܦܐ (ܦܪܢܣܝܣ).
ܘܦܝܫ ܕܟܝܪܐ، ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܘܩܪܒܠܗܿ ܒܘܝܐܐ ܠܩܕܝܫܘܬܗ ܕܦܦܐ (ܦܪܢܣܝܣ)، ܗܘ ܕܫܘܢܐܠܗ ܠܓܢܘܢܐ ܫܡܝܢܐ، ܒܨܦܪܐ ܕܝܘܡ ܬܪܝܢܒܫܒܐ 21 ܢܝܣܢ 2025، ܘܡܘܩܪܒܠܗܿ ܒܘܝܐܗܿ ܠܥܕܬܐ ܩܬܘܠܝܩܝܬܐ ܒܬܒܝܠ، ܘܠܥܕܬܝ̈ܢ ܩܬܘܠܝܩܝ̈ܐ ܒܐܬܪܐ، ܘܠܡܫܝܚܝ̈ܐ ܕܡܕܢܚܐ ܒܐܣܟܝܡܐ ܓܘܢܝܐ، ܒܗܢ ܓܕܫܐ ܚܫܢܐ .
