ܩܝܡܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܝܘܡ ܫܒܬܐ 19 ܢܝܣܢ 2025، ܒܡܝܩܪܢܘܬܐ ܕܝܘܥܝܐ ܠܒܢܢܝܐ ܒܪܘܩܐ (ܣܥܝܕ ܫܒܝܒ)، ܡܢ ܥܒܘܕܘ̈ܬܐ ܕܚܘܬܡܐ ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܕܟܬܒܐ ܒܢܘܣܟܗ ܕܫܒܥܣܪ، ܗܘ ܕܟܡ ܚܦܩܐܠܐ ܐܪܥܐ ܕܒܬܝ̈ ܓܠܚ̈ܐ ܬܒܝܠܝܐ ܓܘ ܦܪܟ ܣܐܡܝ ܥܒܕ ܐܠܪܚܡܢ ܒܐܪܒܝܠ.
ܘܐ̄ܬܝܠܗܿ ܗܕ ܡܝܩܪܢܘܬܐ ܕܝܗ̄ܒܠܗ ܓܘܗܿ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܠܝܘܕܥܝܐ ܒܪܘܩܐ (ܣܥܝܕ ܫܒܝܒ)، ܕܘܪܥܐ ܦܪܝܫܐ ܛܝܡܢܬܐ ܠܦܘܠܚܢ̈ܗ ܝܘܕܥܝ̈ܐ ܒܓܠܝܬܐ ܕܡܪܕܘܬܐ ܣܘܪܝܝܬܐ ، ܘܝܨܝܦܘܬܗ ܒܟܘܝܢܐ ܫܪܫܝܐ ܓܘ ܥܝܪܩ.
ܘܦܝܫܠܗܿ ܥܒܝܕܬܐ ܡܝܩܪܢܘܬܐ ܒܚܘܬܡܐ ܕܚܘܕܪܐ، ܆ܕܦܝܫܠܗ ܡܘܩܪܒܐ ܒܝܘܡܐ ܐ̄ܚܪܝܐ ܡܢ ܒܝܬ ܓܠܚܐ ܕܐܪܒܝܠ ܬܒܝܠܝܐ ܕܟܬܒܐ ܒܢܘܣܟܗ ܕܫܒܥܣܪ، ܕܦܝܫܠܗ ܡܬܘܓܒܪܐ ܒܝܕ ܓܠܝܘܢܝܐ (ܡܐܠܟ ܫܪܝܦܿ)، ܘܝܗ̄ܘܐ ܐܪܚܐ ܓܘܗ ܝܘܕܥܝܐ (ܣܥܝܕ ܫܒܝܒ)، ܘܚܒܫܠܗ ܡܠܘܐܐ ܕܬܦܩܝ̈ܬܐ ܬܠܦܙܝܘܢܝ݁̈ܐ ܒܝܢ ܐܘܡܢܘܬܐ ܘܣܕܝܪܘܬܐ
ܘܫܘܪܪܠܗ (ܐܘܓܼܢܐ) ܒܡܬܚܐ ܕܡܝܩܪܢܘܬܐ، (ܗܕ ܡܝܩܪܢܬܐ ܝܠܗܿ ܥܪܒܘܢܐ ܕܩܘܒܠܛܝܒܘܬܐ ܠܥܡܠܘܟܢ ܐܡܝܢܝܐ، ܘܗܝܡܢܘܬܢ ܪܒܬܐ ܕܡܠܬܐ ܫܪܝܪܬܐ، ܐܝܡܢ ܕܗܘܝܐ ܒܐܝܕܐ ܫܪܝܪܬܐ، ܡܬܪܨܐ ܡܢܕܝ ܠܐ ܦܝܫ ܡܘܢܫܝܐ)، ܘܪܡܙܠܗ ܕܝܘܕܥܝܐ (ܣܥܝܕ ܫܒܝܒ) ܝܗ̄ܘܐ (ܝܘܕܥܝܐ ܐܠܝܨܐ ܒܫܪܪܐ، ܦܪܝܫܐ ܠܩܠܐ ܕܗܝܝܘܬܐ ܫܪܝܪܬܐ ܓܘ ܥܝܪܩ، ܘܡܚܡܝܢܐ ܠܣܓܝܐܘܬܐ ܗܝ ܕܙܡܪܐ ܙܩܪܐ ܕܐܬܪܢ).
ܘܦܝܫ ܕܟܝܪܐ، ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܕܟܬܒܐ ܒܢܘܣܟܗ ܕ(17)، ܦܝܫܠܗ ܥܒܝܕܐ ܠܡܬܚܐ ܡܢ 9-19 ܢܝܣܢ ܩܐܡܝܐ، ܒܫܘܬܦܬܐ ܕܙܘܕܐ ܡܢ (350) ܒܬܝ̈ ܦܪܣܐ ܡܢ ܩܠܝܡܐ ܕܟܘܪܕܣܬܢ ܘܥܝܪܩ ܘܐܬܪ̈ܘܬܐ ܥܪ̈ܒܝܐ ܘܢܘܟܼܪ̈ܝܐ، ܘܡܛܟܣܐܠܗ ܡܫܬܐܣܬܐ ܕ(ܡܕܐ) ܕܝܘܕܥܐ ܘܡܪܕܘܬܐ ܘܐܡܢ̈ܐ ܥܠ ܐܪܥܐ ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܓܘ ܦܪܟ (ܣܐܡܝ ܥܒܕ ܐܠܪܚܡܢ) ܒܐܪܒܝܠ.
