ܫܘܪܐܠܗܘܢ ܓܘ ܪܘܣܬܩܐ ܕܥܢܟܒܐ، ܝܘܡ ܚܡܫܒܫܒܐ 14 ܟܢܘܢ ܩܕܡܝܐ 2023 ، ܥܒܘܕܘ̈ܬܐ ܕܥܕܥܐܕܐ ܕܒܐܡܐ ܣܘܪܝܝܐ ܒܕܘܪܬܗ ܩܕܡܝܬܐ، ܒܛܘܝܒܐ ܕܡܢܝܢܐ ܪܒܐ ܡܢ ܐܡܢ̈ܐ ܘܒܐܡܝ̈ܐܥܝܪ̈ܩܝܐ ܘܟܘܪ̈ܕܣܬܢܝܐ ܘܣܘܪ̈ܝܝܐ، ܓܘ ܐܘܢܐ ܕܟܢܘܫܬܐ ܕܡܪܕܘܬܐ ܟܠܕܝܬܐ ܒܥܢܟܒܐ.
ܘܫܘܪܐܠܗ ܙܘܝܚܐ ܕܦܘܬܚܐ ܥܒܘܕܘ̈ܬܗ ܒܚܕ ܠܘܚܐ ܓܘܠܚܝܐ ܒܝܕ ܝܗܠܐ ܕܒܐܪܡܝܐ ܣܘܪܝܝܐ ܐܬܝܢܐ ܡܢ ܡܕܝܢ̄ܬܐ ܕܩܡܫܠܝ ܣܘܪܝܝܬܐ، ܒܫܡܐ ܕ( ܚܫܐ ܕܒܓܕܝܕܐ- آلم بغديدي) ܫܒܩܠܗ ܟܢܫܐ ܕܡܬܥܒܕ ܥܡܗ ܒܢܩܫܬܐ ܕܟܦܐ ܘܠܒܝܒܘܬܐ ܠܡܐ ܕܡܘܩܪܒܠܗ ܝܗܠܐ ܡܢ ܛܢܢܘܬܐ ܒܪ̈ܩܕܗ ܦܠܟܠܘܪ̈ܝܐ ܐܢܝ ܕܡܥܒܪܝ ܥܠ ܓܘܢܚܐ ܕܝܩܕܐ ܕܒܓܕܝܕܐ.
ܒܬܪ ܗܕܟ ܦܝܫܠܗܿ ܡܘܩܪܒܬܐ ܡܡܠܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܝܕ ܡܕܒܪܢܗܿ ܓܘܢܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܫܘܪܪܠܗ ܓܘܗ، (ܡܕܒܪܢܘܬܐ ܚܦܛܐ ܠܩܝܡܬܐ ܒܒܐܡܐ ܣܘܪܝܝܐ ܓܘ ܚܦܛܢܬܐ ܕܥܒܘܕܘ̈ܬܗ ܘܦܘܠܚܢܐ ܠܬܢܝܬܐ ܕܓܪܗ ܒܣܢܕܬܐ ܕܒܐܡܝ̈ܐ ܥܠܝܡ̈ܐ ܝܗܝܒ̈ܐ ܡܢ ܒܢܝ̈ ܥܡܢ)، ܘܪܡܙܠܗ “ܕܣܘܪ̈ܝܝܐ ܝܠܝܗܝ ܒܟܪ̈ܐ ܕܙܘܥܐ ܒܐܡܝܐ ܓܘ ܐܬܪܐ ܘܥܠܝܗܝ ܕܥܪܐ ܛܒܼܘܬܐ ܓܘ ܡܩܪܒܬܐ ܕܓܠܚܐ ܒܐܡܝܐ ܩܕܡܝܐ ܓܘ ܥܝܪܩ ܒܡܕܝܢ̄ܬܐ ܕܡܘܨܠ ܫܢ̄ܬܐ ܕ 1890”.
ܘܛܘܝܡܢܗ “ܐܘܓܼܢܐ” ܒܡܡܠܗ ܥܠ ܓܪܐ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܒܒܦܪܨܘܦܐ ܕܪܫܗܿ ܡܝܩܪܐ “ܡܣܪܘܪ ܒܐܪܙܐܢܝ” ܥܠ ܣܢܕܬܗܿ ܐܡܝܢܝܬܐ ܠܡܒܥܢ̈ܐ ܣܘܪ̈ܝܝܐ ܘܟܫܝܪܘܬܝܗܝ ܡܪܕܘܬܢܝܬܐ ܘܐܡܢܝܬܐ.
ܘܒܚܘܬܡܐ ܕܡܡܠܗ ܪܡܙܠܗ ” ܐܘܓܼܢܐ” ܕܡܕܒܪܢܘܬܐ ܚܦܛܐ ܒܗܕ ܦܣܘܥܬܐ ܕ”ܦܫܛܐ ܓܫܪܐ ܥܬܝܕܐ ܒܝܢܬ ܚܙܘܐ ܒܐܡܝܐ ܣܘܪܝܝܐ ܘܬܪܝ ܚܙܘ̈ܐ ܟܘܪܕܣܬܢܝܐ ܘܥܝܪܩܝܐ”، ܘܡܘܒܝܢܗ ܕ” ܥܕܥܐܕܢ ܝܠܗ ܚܕܐ ܫܪܝܬܐ ܕܟܫܝܪ̈ܘܬܐ ܘܥܒܘܕܘ̈ܬܐ ܒܐܡܝ̈ܐ ܐܬܝܢ̈ܐ”.
ܒܬܪ ܗܕܟ ܡܘܩܪܒܠܗ ܘܟܝܠܐ ܕܘܙܝܪ ܡܪܕܘܬܐ ܘܥܠܝܡ̈ܐ ܒܫܘܠܛܢܘܬܐ ܕܩܠܝܡܐ “ܐܪܝܐܢ ܨܠܐܚ ܐܠܕܝܢ” ܡܡܠܐ ܕܘܙܝܪܘܬܐ ܩܘܠܣܠܗ ܓܘܗ ܥܠ ܦܘܠܚܢ̈ܐ ܕܡܕܒܪܢܘܬܐ ܘܟܫܝܪ̈ܘܬܐ ܐܢܝ ܕܡܛܟܣܐܠܗܘܢ، ܒܬܪ ܗܕܟ ܦܝܫܠܗ ܓܠܝܚܐ ܦܝܠܡܐ ܟܪܝܐ ܥܠ ܬܫܥܝܬܐ ܕܒܐܡܐ ܣܘܪܝܝܐ ܘܡܫܩܠ̈ܐ ܕܥܒܪܗ ܓܘܝܗܝ.
ܒܬܪ ܗܕܟ ܣܠ̄ܩܠܗ ܠܒܐܡܐ ܪܫܐ ܕܥܕܥܐܕܐ ܡܒܚܢܢܐ ܒܐܡܝܐ ܘܡܬܢܝܢܐ “ܨܒܐܚ ܐܠܫܐܢܝ” ܕܡܝܕܥ ܥܠ ܫܪܝܬܐ ܕܦܘܠܚܢ̈ܐ ܕܥܕܥܐܕܐ ܘܡܩܪܒ ܗܕܡ̈ܐ ܕܣܝܥܬܐ ܕܡܦܠܓܼܢܘܬܐ ܐܢܝ ܕܦܝܫܠܗܘܢ ܡܓܘܒܝܐ ܒܪܫܢܘܬܐ ܕܕܟܬܘܪ ” ܐܚܡܕ ܚܣܢ ܡܘܣܐ” ܘܗܕܡܝܘܬܐ ܕܟܠ ܡܢ ( ܕ. “ܡܢܨܘܪ ܢܥܡܐܢ ܢܓ̰ܡ”، ܘܕ.”ܒܠܩܝܣ ܕܘܣܟܝ”، ܐܡܢܐ “ܪܦܝܩ ܢܘܪܝ ܚܢܐ” ، ܘܡܒܚܢܢܐ ܒܐܡܝܐ “ܚܡܐ ܣܘܐܪ ܥܙܝܙ”).
ܘܦܝܫܠܗ ܥܒܝܕܬܐ ܓܘ ܙܘܝܚܐ ܡܝܩܪܢܘܬܐ ܕܚܡܫܐ ܡܢ ܒܟܪ̈ܐ ܕܒܐܡܐ ܡܢ ܒܢܝ̈ ܥܡܢ، ܡܢ ܦܢܝ̈ܬܐ ܡܫܚܠܦ̈ܐ ܕܐܝܬܘܬܗ ܓܘ ܥܝܪܩ ܘܒܩܘܕܡܝܗܝ ܐܡܢܐ ܡܬܘܬܒܐ ܪܒܐ ” ܪܘܡܝܘ ܝܘܣܦ”، ܗܘ ܕܫܘܕܪܗ ܚܕ ܡܡܠܐ ܩܠܝܐ ܐ̄ܡܪܗ ܓܘܗ ܠܟܢܫܐ، ܗܘܐ ܒܪܝܟܐ ܗܢ ܥܕܥܐܕܐ ܐܡܢܝܐ ܪܒܐ ܘܡܘܩܪܒܠܗ ܗܘܢܝ̈ܐ ܠܥܡܠ̈ܐ ܡܘܩܪܒܐ ܠܥܒܕܬܗ، ܘܥܡ ܡܝܩܪܢܘܬܐ ܕܟܠ ܡܢ ( ܐܡܢܬܐ ܐܚܠܐܨ ܡܬܝ، ܐܡܢܐ ܡܢܚܐ ܕܢܚܐ ܒܘܝܐ، ܐܡܢܐ ܒܐܣܠ ܫܐܡܝܐ، ܐܡܢܐ ܙܘܗܝܪ ܥܒܕ ܐܠܡܣܝܗ ܥܒܕܘܟܐ) ܡܝܩܪܢܘܬܐ ܠܡܐܙܠܬܝܗܝ ܘܫܘܬܦܝܬܝ̈ܗܝ ܘܡܘܗܒܬܝܗܝ ܐܡܢܝܐ ܘܒܪܘܝܝܐ ܒܓܝܓܼܠܐ ܕܒܐܡܐ .
ܘܝܩܪܠܗ ܥܕܥܐܕܐ ܓܘ ܥܒܘܕܘ̈ܬܗ ܐܡܢܐ ܣܘܪܝܝܐ ܣܘܪܝܼܝܐ ܪܒܐ “ܐܣܟܢܕܪ ܥܙܝܙ ܩܘܠܢܓ̰” ܗܘ ܝܠܗ ܡܢ ܫܪܫܐ ܕܡܕܝܢ̄ܬܐ ܕܩܡܫܠܝ ܣܘܪܝܼܝܝܬܐ، ܠܥܡ̈ܠܗ ܘܡܫܘܬܦܝ̈ܬܗ ܘܡܐܙܠܬܗ ܡܠܝܬܐ ܘܡܘܗܒܬܗ ܐܡܢܝܐ ܦܪܝܫܐ ܒܓܝܓܼܠܐ ܕܒܐܡܐ.
ܘܠܐ ܢܫܐܠܗܘܢ ܩܝܡܢ̈ܐ ܥܠ ܥܕܥܐܕܐ ܡܢ ܡܝܩܪܢܘܬܐ ܕܕܟܬܘܪ “ܐܚܡܕ ܚܣܢ ܡܘܣܐ”، ܠܓܪܗ ܓܘ ܡܙܓܼܬܐ ܕܡܪ̈ܕܘܬܐ ܘܐܡܢ̈ܐ ܕܡܟܝܢ̈ܬܐ ܥܝܪ̈ܩܝܐ ܘܦܫܛܬܐ ܕܓܫܪ̈ܐ ܒܝܢܬ ܒܐܡܝ̈ܐ ܥܪ̈ܒܝܐ ܘܣܘܪ̈ܝܝܐ، ܘܗܘ ܕܦܝܫܠܗ ܡܓܘܒܝܐ ܪܫܐ ܕܣܝܥܬܐ ܕܡܦܠܓܼܢܘܬܐ ܓܘ ܥܕܥܐܕܐ ܠܡܐ ܕܡܘܩܪܒܠܗ ܡܢ ܡܒܥܢ̈ܘܬܐ ܐܢܢܩܝ̈ܐ ܒܦܘܠܚܢ̈ܗ ܡܕܒܪܢܐ ܓܘܢܝܐ ܕܚܘܕܪܐ ܕܣܝܢܡܐ ܘܒܐܡܐ ܘܪܫܐ ܕܥܕܥܐܕܐ ܕܒܓܕܕ ܬܒܠܝܐ ܕܒܐܡܐ ܠܡܢܝܢܐ ܡܢ ܕܘܪ̈ܬܐ.
ܘܒܚܘܬܡܐ ܕܥܒܘܕܘܗܬܐ ܕܡܝܩܪܢܘܬܐ ܡܝܘܩܪܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܕܒܪܢܘܬܐ ܕܟܢܘܫܬܐ ܕܡܪܕܘܬܐ ܟܠܕܝܬܐ ܠܩܒܠܬܗܿ ܒܐܪܚܘܬܐ ܠܥܒܘܕܘ̈ܬܐ ܕܥܕܥܐܕܐ ܕܒܐܡܐ ܣܘܪܝܝܐ ܩܕܡܝܐ.
ܘܚܬܡܠܗ ܝܘܡܐ ܩܕܡܝܐ ܥܒܘܕܘ̈ܬܗ ܒܓܠܚܬܐ ܒܐܡܝܬܐ ܕܝܗܠܐ ܕܫܡܫܐ ܠܡܡܬܠܢܘܬܐ ܒܫܡܐ ܕ( ܙܘܘܓܼܐ ܐ̄ܚܪܝܐ).
ܘܦܝܫ ܕܟܝܪܐ، ܕܥܕܥܐܕܐ ܕܒܐܡܐ ܣܘܪܝܝܐ ܒܕܘܪܬܗ ܩܕܡܝܬܐ ܗܡ ܡܛܣܟܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܠܡܬܚܐ ܡܢ 14-16 ܟܢܘܢ ܩܕܡܝܐ، ܚܒܫ ܡܢܝܢܐ ܡܢ ܥܒܘܕܘ̈ܬܐ ܒܐܡܝ̈ܐ ܘܚܠܩܝ̈ܬܐ ܕܘܪ̈ܫܝܐ ܐܢܝ ܕܡܫܘܬܦܝ ܓܘܝܗܝ ܡܢܝܢܐ ܡܢ ܐܡܢ̈ܐ ܘܐܟܕܝܡܝ̈ܐ ܝܨܘܦ̈ܐ ܒܨܒܘܬܐ ܒܐܡܝܬܐ.
