ܡܙܘܝܚܠܗ ܚܘܕܪܐ ܕܩܨܪܐ ܕܠܘܡܕ̈ܐ ܢܩܝܦܐ ܠܘܙܝܪܘܬ ܡܪܕܘܬܐ ܘܕܝܪܘܬܐ ܘܥܬܩ̈ܐ ܚܘܝܕܝܬܐ، ܝܘܡ ܐܪܒܥܒܫܒܐ 21 ܫܒܛ 2024، ܒܝܘܡܐ ܬܒܠܝܐ ܕܠܫܢܐ ܝܡܝܐ ܒܚܕ ܙܘܝܚܐ ܕܝܠܢܝܐ ܓܘ ܐܘܢܐ ܕܐܠܫܒܝܒܝ ܓܘ ܩܨܪܐ ܕܠܘܡܕ̈ܐ ܒܐܪܫܟܝܬܐ ܒܓܼܕܕ.
ܦܝܫܠܗ ܥܒܝܕܐ ܙܘܝܚܐ ܬܚܘܬ ܪܘܫܡܐ (ܠܫܢܐ ܣܘܪܝܝܐ ܝܠܗ ܡܬܚܐ ܕܡܕܝܢܝܘܬܐ ܢܗܪܝܢܝܬܐ) ܘܦܝܫܠܗ ܥܒܝܕܐ ܙܘܝܚܐ ܒܪܥܝܘܬ ܘܙܝܪܐ ܕܡܪܕܘܬܐ ܘܕܝܪܘܬܐ ܘܥܬܩ̈ܐ ܒܫܘܠܛܢܘܬܐ ܚܘܝܕܝܬܐ ܕܟܬܘܪ ” ܐܚܡܕ ܦܟܐܟ ܐܠܒܕܪܐܢܝ”، ܫܘܪܐܠܗ ܙܘܝܚܐ ܒܡܡܠܐ ܕܩܒܠܬܐ ܒܫܝܢܐ ܦܝܫܠܗ ܡܘܩܪܒܐ ܒܝܕ ܡܕܒܪܢܐ ܓܘܢܝܐ ܕܚܘܕܪܐ ܕܩܨܪܐ ܕܠܘܡܕ̈ܐ ܕܟܬܘܪ ” ܡܘܢܬܨܪ ܨܒܐܚ ܐܠܚܣܢܐܘܝ”، ܬܢܐܠܗ ܓܘܗ ܣܘܘܕܐ ܥܠ ܐܢܢܩܝܘܬܐ ܕܠܫܢܐ ܓܘ ܡܪܒܝܬܐ ܘܐܡܝܢܝܘܬܐ ܥܡ ܟܢܘܫܝ̈ܐ ܘܝܕܥܬܐ ܕܡܪ̈ܕܘܬܝܗܝ ܘܢܛܪܬܝܗܝ.
ܘܚܒܫܠܗ ܙܘܝܚܐ ܚܘܕܪܐ ܕܘܪܫܝܐ ܥܠ ܠܫܢܐ ܣܘܪܝܝܐ ܘܝܗ̄ܘܐ ܒܬܓܒܪܬܐ ܕܡܕܒܪܢܐ ܓܘܢܝܐ ܕܒܝܬ ܣܪ̈ܝܛܬܐ ܓܘ ܘܙܝܪܘܬ ܡܪܕܘܬܐ ܚܘܝܕܝܬܐ ܕܟܬܘܪ “ܐܚܡܕ ܐܠܥܠܝܐܘܝ” ܘܡܫܘܬܦܠܗܘܢ ܓܘܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܣܦܪܐ ܣܘܪܝܝܐ “ܦܛܪܘܣ ܗܘܪܡܙ ܢܒܬܝ” ܘܡܬܕܝܠܢܝܐ ܒܨܨܝ̈ܬܐ ܘܠܫܢܐ ܕܣܘܪܬ ܣܦܪܐ ” ܢܝܢܒ ܠܐܡܣܘ”.
ܘܫܘܪܪܠܗ “ܐܘܓܼܢܐ” ܒܚܘܕܪܐ ܕܘܪܫܝܐ، (ܠܫܢܐ ܣܘܪܝܝܐ ܐܪܡܝܐ ܝܠܗ ܡܢ ܠܫܢ̈ܐ ܒܫ ܥܬܝܩ̈ܐ ܟܬܝܒܐ ܒܐܬܘ̈ܬܐ ܐܒܓܕܝ̈ܐ ܘܡܬܚ ܠܙܘܕܐ ܡܢ 3 ܐܠܦ̈ܐ ܫܢ̈ܐ، ܗܘ ܡܘܦܪܐܠܗ ܠܥܝܪܩ ܘܒܪܢܫܘܬܐ ܟܠܗܿ ܝܪܬܘܬܐ ܣܦܪܝܬܐ ܘܡܕܝܢܝܬܐ ܡܬܘܡܝܬܐ ܘܣܗܡܐ ܪܒܐ ܡܢܗܿ ܝܠܗ ܚܝܐ).
ܘܡܘܙܝܕܠܗ “ܐܘܓܼܢܐ”، ܒܡܡܠܗ ܚܕܪ ܬܫܥܝܬܐ ܕܠܫܢܐ ܣܘܪܝܝܐ ܗܘ ܕܩܢܐܠܗ ܐܢܢܩܝܘܬܗ ܪܒܬܐ ܒܬܪ ܬܘܪܓܡܐ ܕܟܬܒܐ ܩܕܝܫܐ ܠܠܥܙܐ ܕܐܘܪܗܝ ܒܕܪܐ ܬܪܝܢܐ ܠܡܘܠܕܐ.
ܘܚܕܪ ܐܝܟܢܘܬܐ ܕܠܫܢܐ ܣܘܪܝܝܐ ܒܥܕܢܐ ܩܐܡܝܐ ܒܩܠܝܡܐ ܕܟܘܪܕܣܬܢ ܫܘܪܪܠܗ “ܐܘܓܼܢܐ” ، (ܡܢ ܫܢ̄ܬܐ ܕ 1991 ܦܝܫ ܕܪܝܫܐ ܠܫܢܐ ܣܘܪܝܝܐ ܓܘ ܟܘܪܕܣܬܢ ܕܥܝܪܩ ܒܬܠܬܐ ܡܫܩ̈ܠܐ ܫܪܘܝܐ ܘܡܨܥܝܐ ܘܛܘܝܒܝܐ، ܘܐܕܝܘܡ ܐܝܬܠܢ ܩܘܪܒܐ ܕ(50) ܡܕܪ̈ܫܝܬܐ ܦܝܫ ܕܪܝܫܐ ܓܘܝܗܝ ܠܫܢܐ ܣܘܪܝܝܐ ܓܘ ܩܠܝܡܐ).
ܘܡܘܙܝܕܠܗ “ܐܘܓܼܢܐ” ܒܐܡܪܐ ( ܡܫܘܬܐܣܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܗܝ ܟܦܠܚܐ ܒܐܣܟܝܡܐ ܪܘܝܚܐ ܠܦܪܣܬܐ ܕܡܪܕܘܬܐ ܣܘܪܝܝܬܐ ܘܢܛܪܬܐ ܕܝܪܬܘܬܐ ܣܘܪܝܝܬܐ).
ܘܦܝܫܠܗܘܢ ܡܛܝܒܐ ܠܙܘܝܚܐ، ܢܛܪܐ ܓܘܢܝܐ ܕܡܘܬܒܐ ܕܩܝܘܡ̈ܐ ܥܝܪܩܝܐ “ܨܦܘܐܢ ܒܫܝܪ ܝܘܢܣ”، ܘܗܕܡܐ ܕܡܘܬܒܐ ܕܟܬܘܪ “ܡܐܓ̰ܕ ܫܢܓܐܠܝ”، ܥܡ ܡܢܝܢܐ ܡܢ ܝܨܘܦ̈ܐ ܒܓܝܓܠܐ ܡܪܕܘܬܢܝܐ ܘܣܦܪܝܐ ܣܘܪܝܝܐ.
ܘܡܛܘܟܣܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܥܘܕܪܢ ܥܡ ܡܕܒܪܢܘܬܐ ܓܘܢܝܬܐ ܕܡܠܦܢܘܬܐ ܣܘܪܝܝܬܐ ܘܡܕܒܪܢܘܬܐ ܕܬܪܒܝܬܐ ܕܚܕܪ̈ܘܢܐ ܕܐܪܒܝܠ، ܒܝܘܡ ܐܪܒܥܒܫܒܐ 21 ܫܒܛ 2024، ܥܒܘܕܘ̈ܬܐ ܕܝܘܡܐ ܕܝܠܢܝܐ ܕܙܘܝܚܐ ܒܝܘܡܐ ܬܒܠܝܐ ܕܠܫܢܐ ܝܡܝܐ، ܓܘ ܐܘܢܐ ܕܒܝܬ ܥܬܩ̈ܐ ܣܘܪܝܝܐ ܓܘ ܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܦܝܫ ܕܟܝܪܐ، ܕܝܘܡܐ ܬܒܠܝܐ ܕܠܫܢܐ ܝܡܝܐ (International Mother Language Day) ܝܠܗ ܙܘܝܚܐ ܫܢ̄ܬܢܝܐ ܓܘ ܟܠܝܗܝ ܦܢܝ̈ܬܐ ܕܥܠܡܐ ܠܚܝܠܢܬܐ ܕܥܝܪܘܬܐ ܒܐܕܫܢܘܬܐ ܠܫܢܝܬܐ ܘܡܪܕܘܬܢܝܬܐ ܘܣܓܝܐܘܬ ܠܫܢ̈ܐ، ܘܦܝܫܠܗ ܡܚܘܫܒܢܐ ܝܘܡܐ ܕ 21 ܫܒܛ ܝܘܡܐ ܬܒܠܝܐ ܕܠܫܢܐ ܝܡܝܐ، ܘܦܝܫܠܗ ܦܣܝܩܐ ܪܘܫܡܐܝܬ ܒܝܕ ܟܢܘܫܬܐ ܓܘܢܝܬܐ ܕܐܡܘ̈ܬܐ ܡܚܝܕ̈ܐ.
