ܫܘܪܐܠܗܘܢ ، ܒܪܡܫܐ ܕܝܘܡ ܬܪܝܢܒܫܒܐ 7 ܢܝܣܢ 2025، ܥܒܼܘܕܘ̈ܬܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܕܘܪܬܗ ܚܡܝܫܝܬܐ، ܗܘ ܡܛܟܣܐܠܗ ܡܕܒܪܢܘܬܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܬܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܒܫܘܦܗ ܥܝܕܝܐ ܒܦܢܝܬܐ ܕܕܪܓܐ ܒܪܩܘܒܠ ܬܠܐ ܕܩܨܪܐ ܥܬܩܝܐ ܒܠܒܐ ܕܪܘܣܬܩܐ ܕܥܢܟܒܐ.
ܘܦܝܫܠܗܘܢ ܡܛܝܒ̈ܐ ܠܚܘܪ̈ܩܢܐ ܕܦܘܬܚܐ ܪܫܐ ܕܐܦܣܩܘܦ̈ܐ ܕܡܘܨܠ ܘܢܩܝܦܘ̈ܬܗܿ ܕܥܕܬܐ ܟܠܕܝܬܐ ܡܪܝ (ܡܝܟܐܝܠ ܢܓ̰ܝܒ)، ܟܘܪ ܐܦܣܩܘܦܐ (ܦܝܠܝܦܘܣ ܕܘܝܕ)، ܘܐܒܐ (ܡܐܬܪܢ ܢܒܝܠ) ܡܡܬܠܢ̈ܐ ܕܩܕܝܫܘܬܗ ܕܦܛܪܝܪܟܐ ܕܥܕܬܐ ܕܡܕܢܚܐ ܐܬܘܪܝܬܐ ܡܪܝ (ܐܒܐ ܬܠܝܬܝܐ ܪܘܝܠ)، ܘܡܢܝܢܐ ܡܢ ܡܫܬܐܠܢ̈ܐ ܫܘܠܛܢܝ̈ܐ ܘܕܘܟܬܢܝ̈ܐ ܒܩܠܝܡܐ ܕܟܘܪܕܣܬܢ ܘܡܫܕܪ̈ܘܬܐ ܪ̈ܘܫܡܝܐ ܘܕܝܦܠܘܡܛܝܩܝ̈ܐ ܥܒܘܕ̈ܐ ܒܩܠܝܡܐ، ܥܡ ܟܢܫܐ ܪܒܐ ܡܢ ܒܢܝ̈ ܥܡܢ ܒܥܢܟܒܐ ܘܐܬܝܢ̈ܐ ܡܢ ܦܢܝ̈ܬܐ ܡܫܚܠܦ̈ܐ ܕܐܬܪܐ.
ܘܫܘܪܐܠܗܘܢ ܥܒܘܕܘ̈ܬܐ ܕܥܕܥܐܕܐ ܒܚܕܐ ܡܐܙܠܬܐ ܪܚܫܬܐ ܒܐܩܠܐ ܨܘܒ ܫܘܦܐ ܕܥܕܥܐܕܐ ܒܦܢܝܬܐ ܕܕܪܓܐ ܒܪܩܘܒܠ ܬܠܐ ܕܩܨܪܐ ܥܬܩܝܐ، ܒܚܕܐ ܡܫܪܝܬܐ ܒܩܘܕܡܝܗܝ ܐܠܗܬܐ ܥܫܬܪ ܪܡܙܐ ܕܚܘܒܐ ܘܫܘܦܪܐ ܗܝ ܕܟܡ ܡܡܬܠܐܠܗܿ ܐܘܡܢܬܐ (ܡܝܫܝܠܐ ܒܗܢܐܢ)، ܒܚܕ ܚܙܘܐ ܟܡܚܙܐ ܡܫܪܝܬܐ ܕܙܘܝܚ̈ܐ ܬܘܕܝܬܢܝ̈ܐ ܓܘ ܒܒܠ ܘܐܫܘܪ.
ܘܒܬܪ ܡܛܝܬܐ ܠܫܘܦܐ ܕܥܕܥܐܕܐ، ܫܘܪܐܠܗܘܢ ܚܘܪ̈ܩܢܐ ܕܦܘܬܚܐ ܪ̈ܘܫܡܝܐ ܒܛܘܝܒܐ ܪܘܫܡܝܐ ܫܘܠܛܢܝܐ ܡܢ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܕܡܝܕܥܝ ܒܫܪܝܬܐ ܕܥܒܘܕܘ̈ܬܐ ܕܥܕܥܐܕܐ، ܒܚܕ ܐܘܦܪܝܬ ܐܡܢܝܐ ܦܝܫܠܗ ܡܘܩܪܒܐ ܒܝܕ ܝܗܠܐ ܣܘܪܝܝܐ ܕܐܡܢܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ.
ܒܬܪ ܗܕܟ ܡܘܩܪܒܠܗ ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ (ܒܪܢܐܪܕ ܝܘܣܦ)، ܚܕ ܡܡܠܐ ܡܘܩܪܒܠܗ ܓܘܗ ܩܘܒܠܛܝܒܘܬܗ ܠܟܠ ܦܠܚ̈ܐ ܕܫܘܬܦܠܗܘܢ ܒܛܘܟܣܐ ܘܥܒܕܬܐ ܕܗܢ ܟܪܢܦܐܠ ܥܡܡܝܐ ܪܒܐ ܒܢܘܣܟܗ ܚܡܝܫܝܐ ܓܘ ܥܢܟܒܐ، ܗܘ ܕܡܡܬܠ ܥܘܡܩܐ ܕܡܕܝܢܝܘܬܐ ܕܥܡܢ ܒܐܬܪܐ، ܘܪܡܙܠܗ ܠܡܕܝܢ̄ܬܐ ܕܥܢܟܒܐ ܗܝ ܕܦܝܫܠܗܿ ܐܪܫܟܝܬܐ ܕܡܫܝܚܝ̈ܐ ܒܐܬܪܐ، ܚܦܩܐܠܗܿ ܡܕܝܢ̄ܬܐ ܕܐܚܘܬܐ ܘܚܝܝܬܐ ܐܪܒܝܠ ܐܢܝ ܕܟܦܫܝ ܓܘܗܿ ܐܘܡܬܝܘ̈ܬܐ ܘܬܘܕܝ̈ܬܐ ܡܫܚܠܦ̈ܐ.
ܒܬܪ ܗܕܟ ܡܘܩܪܒܠܗ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܡܝܩܪܐ (ܐܢܘ ܓ̰ܘܗܪ ܥܒܕܘܟܐ)، ܚܕ ܡܡܠܐ ܫܘܪܪܠܗ ܓܘܗ ܥܠ ܥܐܕܐ ܕܐܟܝܬܘ ܗܘ ܟܡܚܝܕ ܥܡܢ ܒܐܬܪܐ، ܘܪܡܙܠܗ ܕܗܘ ܡܢܕܝ ܕܟܦܫܠܢ ܒܘܫ ܪܒܐܝܠܗ ܡܢ ܡܐ ܕܦܪܫܠܢ، ܟܕ ܐܚܢܝ ܢܒܓ̈ܐ ܕܡܕܝܢܝܘ̈ܬܐ ܓܢ̄ܒܪ̈ܐ ܓܘ ܐܬܪܐ ܕܒܝܬ ܢܗܪܝܢ ܫܘܪܝܐ ܡܢ ܫܘܡܝܪ ܘܐܟܕ ܘܒܒܠ ܘܐܫܘܪ.
ܘܒܬܪ ܡܩܪܒܬܐ ܕܡܡܠ̈ܐ ܕܩܒܠܬܐ ܒܫܝܢܐ، ܫܘܪܐܠܗܘܢ ܓܠܚ̈ܐ ܦܠܟܠܘܪ̈ܝܐ ܐܡܢܝ̈ܐ ܘܙܡܝܪ̈ܝܐ ܐܢܝ ܕܦܝܫܠܗܘܢ ܡܘܩܪܒܐ ܒܝܕ ܝܗܠ̈ܐ ܐܬܝܢ̈ܐ ܡܢ ܐܬܪ̈ܘܬܐ ܡܫܚܠܦ̈ܐ ܠܡܫܘܬܦܬܐ ܓܘ ܥܕܥܐܕܐ، ܡܢܝܗܝ ܝܗܠܐ ܕ(ܐܘܪܢܝܢܐ) ܐܬܝܢܐ ܡܢ ܣܘܪܝܐ، ܝܗܠܐ ܕ(ܓܢ̄ܒܪܐ) ܡܢ ܐܪܡܝܢܝܐ، ܝܗܠܐ ܕ(ܢܡܪܘܕ) ܡܢ ܪܘܣܝܐ، ܝܗܠܐ ܕ(ܩܝܬܪܘ) ܡܢ ܡܕܝܢ̄ܬܐ ܕܒܓܼܕܝܕܐ ܒܕܫܬܐ ܕܢܝܢܘܐ، ܥܡ ܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ.
ܘܚܒܫܠܗ ܕܙܘܝܚܐ، ܦܘܬܚܐ ܕܫܘܩܐ ܕܦܘܠܚܢ̈ܐ ܕܐܝܕܐ ܝܪ̈ܬܘܬܢܝܐ ܥܡܡܝ̈ܐ، ܗܘ ܕܫܘܬܦܠܗܘܢ ܓܘܗ ܡܢܝܢܐ ܪܒܐ ܡܢ ܝܨܘܦ̈ܐ ܘܡܬܕܝܠܢܝ̈ܐ ܒܓܝܓܼܠܐ ܕܦܘܠܚܢ̈ܐ ܝܪ̈ܬܘܬܢܝܐ ܘܐܡܢ̈ܐ ܘܦܘܠܚܢ̈ܐ ܕܐܝܕܐ، ܥܡ ܒܝܬ ܒܘܫܠܐ ܝܪܬܘܬܢܝܐ ܕܒܝܫܐ ܒܦܘܪܢܐ ܝܪܬܘܬܢܝܐ، ܗܘ ܕܡܘܩܪܒܠܝܗܝ ܓܘܗ ܢܫ̈ܐ ܡܫܘܬܦ̈ܐ ܡܢܝܢܐ ܡܢ ܡܐܟ̈ܠܐ ܝܪ̈ܬܘܬܢܝܐ ܡܢ ܦܢܝ̈ܬܐ ܡܫܚܠܦ̈ܐ ܕܥܡܢ ܒܝܘܪܟܐ ܕܝܘܡ̈ܐ ܕܥܕܥܐܕܐ ܗܘ ܒܕ ܡܓܪܫ ܡܬܚܐ ܕ(4) ܝܘܡ̈ܐ.
ܘܚܒܫܠܗ ܝܘܡܐ ܩܕܡܝܐ ܡܢ ܥܕܥܐܕܐ ܡܩܪܒܬܐ ܕܡܢܝܢܐ ܡܢ ܙܡܝܪ̈ܬܐ ܫܘܬܦܠܗܘܢ ܓܘܝܗܝ ܡܢܝܢܐ ܡܢ ܙܡܪ̈ܐ ܕܥܡܢ (ܓ̰ܝܡܣ ܨܒܐܚ)، (ܐܘܒܝܪܘܢ ܙܝܥ̄ܐ)، ܒܐܪܣ ܐܦܪܝܡ)، (ܣܬܐܢܠܝ ܪܒܐܢ)، ( ܣܐܟܘ ܣܐܟܐ)، ܡܝܫܝܠܐ ܒܗܢܐܢ)، ( ܓܓܝ)، ܐܢܝ ܕܡܘܓܪܫܠܗܘܢ ܗܠ ܫܥܬܐ (10:00) ܒܪܡܫܐ، ܒܛܘܝܒܐ ܟܢܫܝܐ ܦܪܝܫܐ.
ܘܦܝܫ ܕܟܝܪܐ ، ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܐܡܝܢܝܬܐܝܠܗܿ ܒܛܘܟܣܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܓܘ ܢܝܣܢ ܡܢ ܟܠ ܫܢ̄ܬܐ، ܦܝܫܝ ܥܒܝܕܐ ܓܘܗ ܥܒܘܕܘ̈ܬܐ ܝܪ̈ܬܘܬܢܝܐ ܘܥܡܡܝ̈ܐ ܡܫܚܠܦ̈ܐ، ܟܕ ܦܝܫ ܥܒܝܕܐ ܗܕ ܫܢ̄ܬܐ ܠܡܬܚܐ ܡܢ (7-10) ܢܝܣܢ 2025 .
