ܪܥܐܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ، ܝܘܡ ܐܪܒܥܒܫܒܐ 5 ܚܙܝܪܢ 2024، ܙܘܝܚܐ ܕܓܪܫܬܐ ܕܕܪܥܢܐ ܕܟܬܒܐ ܚܕܬܐ ܕܟܬܘܒܐ “ܣܐܡܝ ܐܠܡܐܠܚ” ܗܘ ܝܗ̄ܘܐ ܒܫܡܐ (ܝܠܝܦܘܬܐ ܡܢ ܓܢ̄ܒ ܚܝܪܬܐ ܒܘܫ ܪܘܝܚܬܐ – التعلم من منظور اوسع)، ܘܒܛܘܟܣܐ ܡܢ ܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܐܘܢܐ ܕܓܠܓܡܫ ܢܩܝܦܐ ܠܩܢܛܪܘܢ ܓܘ ܥܢܟܒܐ.
ܘܕܟܪܗ ܟܬܘܒܐ”ܣܐܡܝ ܐܠܡܐܠܚ” ܓܘ ܙܘܝܚܐ ܕܓܪܫܬܐ ܕܕܪܥܢܐ ܕܟܬܒܗ ܚܕܬܐ، ܗܘ ܕܥܒܕܠܗ ܕܘܪܫܐ ܥܡܗ ܘܡܩܪܒܬܗ ܠܡܛܝܒ̈ܐ ܕܟܬܘܪ “ܣܡܝܪ ܨܒܪܝ ܚܘܪܐܢܝ”، ܕܢܝܫܐ ܡܢ ܟܬܒܗ ( ܡܚܘܝܬܐ ܕܥܝܪܘܬܐ ܚܕܪ ܡܠܘܐܐ ܘܡܣܬܟܠܢܘܬܐ ܕܝܠܝܦܘܬܐ ܘܫܘܬܦܬܐ ܒܝܨܝܦܘܬܐ ܥܠ ܓܢ̄ܒܢ̈ܐ ܐܣܝ̈ܐ ܠܡܣܬܟܠܢܘܬܐ ܕܝܠܝܦܘܬܐ)، ܘܫܘܪܪܠܗ ܥܠ ( ܠܐ ܟܠܝܬܐ ܥܠ ܓܠܚܬܐ ܕܡܕܪ̈ܫܝܬܐ ܘܬܐܘܪ̈ܝܐ ܘܨܘܒ̈ܐ ܕܝܠܝܦܘܬܐ ܟܠܣܝܟܝ̈ܐ، ܐܠܐ ܓܠܚܬܐ ܕܬܐܘܪ̈ܝܐ ܘܨܘܒ̈ܐ ܚܕܬ̈ܐ ܘܕܘܪܫܝܗܝ، ܥܡ ܓܠܚܬܐ ܕܛܘܦܣ̈ܐ ܚܕܬ̈ܐ ܘܡܦܠܚܬܝܗܝ ܓܘ ܒܢܝܢܐ ܕܛܘܦܣܐ ܕܝܠܝܦܘܬܐ ܛܒܬܐ ܥܒܘܕܬܐ).
ܘܦܝܫܠܗܘܢ ܡܛܝܒ̈ܐ ܠܚܘܪ̈ܩܢܐ ܕܓܪܫܬܐ ܕܕܪܥܢܐ ܕܟܬܒܐ، ܘܙܝܪܬܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ “ܐܢܘ ܓ̰ܘܗܪ ܥܒܕܘܟܐ” ، ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܘܟܢܫܐ ܡܢ ܡܘܪ̈ܕܢܐ ܘܝܨܘܦ̈ܐ ܒܓܝܓܼܠܐ ܡܪܕܘܬܢܝܐ ܘܣܦܪܝܐ.
ܘܒܚܘܬܡܐ ܕܙܘܝܚܐ ܦܝܫܠܗܿ ܥܒܝܕܬܐ ܡܝܩܪܢܘܬܐ ܕܟܬܘܒܐ “ܣܐܡܝ ܐܠܡܐܠܚ” ܒܕܘܪܥܐ ܕܩܢܛܪܘܢ ܐܟܕܝܡܝܐ ܟܢܘܫܝܝܐ ܕܦܝܫܠܗ ܡܘܩܪܒܐ ܐܠܗ ܒܝܕ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ “ܐܢܘ ܓ̰ܘܗܪ ܥܒܕܘܟܐ” ܘܟܦܐ ܕܘܪ̈ܕܐ ܦܝܫܠܗ ܡܘܩܪܒܐ ܒܝܕ ܡܕܒܪܢܝܬܐ ܕܒܝܬ ܐܪ̈ܟܐ ܣܘܪܝܝܐ “ܦܝܚܐܐ ܫܡܥܘܢ”، ܘܦܝܫܠܗܘܢ ܥܒܝܕܐ ܕܘܪ̈ܫܐ ܠܦܘܢܝܐ ܥܠ ܫܘܐܠ̈ܐ ܕܡܛܝܒ̈ܐ.
ܘܡܫܢܐ ܟܬܒܐ ܢܘܣܝܐ ܕܟܬܘܒܐ ܦܪܨܘܦܝܐ ܓܘ ܡܠܦܢܘܬܐ ܘܝܠܝܦܘܬܐ ܘܦܘܪܫܢܐ ܒܝܢܬܝܗܝ، ܘܡܛܦܣ ܐܢܢܩܝܘܬܐ ܦܪܝܫܬܐ ܓܢ̄ܒ ܒܨܘܝ̈ܐ ܒܓܝܓܼܠܐ ܕܝܘܠܦܢ̈ܐ ܟܢܘܫܝܝ̈ܐ ܘܦܪ̈ܥܐ ܐܟܕܝܡܝ̈ܐ ܕܐܝܬܠܗܘܢ ܐܣܘܪܐ ܒܓܝܓܼܠܐ ܕܕܝܠܢܝܘܬܐ ܕܝܘܠܦܢ̈ܐ ܐ̄ܢܫܝ̈ܐ ܘܦܪܝܫܐܝܬ ܝܘܠܦܢ ܟܢܘܫܝܝ̈ܬܐ ܘܝܘܠܦܢ ܢܦܫܐ.
ܘܦܝܫ ܕܟܝܪܐ، ܕܟܬܒܐ ܕ(ܝܠܝܦܘܬܐ ܡܢ ܓܢ̄ܒ ܚܝܪܬܐ ܒܘܫ ܪܘܝܚܬܐ) – (التعلم من منظور اوسع)، ܝܠܗ ܟܬܒܐ ܚܕܬܐ ܡܢ ܫܬܐ ܦܣܘܩ̈ܐ، ܢܦܩܠܗ ܒܡܬܚܐ ܐ̄ܚܪܝܐ ܕܣܝܘܡܗ ܟܬܘܒܐ “ܣܐܡܝ ܒܗܢܐܡ ܐܠܡܐܠܚ”، ܘܚܒܫ ( 201) ܦܬܘ̈ܬܐ ܘܒܓܘܫܡܐ ܡܨܥܝܐ ܘܒܪܩܡܐ ( 72) ܡܢ ܫܫܠܬܐ ܕܡܪܕܘܬܐ ܣܘܪܝܝܬܐ ܢܩܝܦܬܐ ܠܒܝܬ ܐܪ̈ܟܐ ܣܘܪܝܝܐ ܓܘ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ.
