ܫܘܪܐܠܗܘܢ ܒܪܘܣܬܩܐ ܕܥܢܟܒܐ، ܒܪܡܫܐ ܕܝܘܡ ܫܒܬܐ 21 ܟܢܘܢ ܩܕܡܝܐ 2024، ܥܒܼܘܕܘ̈ܬܐ ܕܥܕܥܐܕܐ ܕܥܢܟܒܼܐ ܟܪܝܣܡܣ ܒܕܘܪܬܗ ܪܒܝܥܝܬܐ، ܒܛܘܝܒܐ ܪܘܫܡܝܐ ܡܢ ܓܢ̄ܒ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܘܟܢܫܐ ܪܒܐ ܥܠ ܓܢ̈ܐ ܕܩܢܛܪܘܢ ܐܟܕܝܡܝܐ ܟܢܘܫܝܝܐ ܒܥܢܟܒܐ.
ܘܦܝܫܠܗܘܢ ܡܛܝܒ̈ܐ ܠܙܘܝܚܐ ܕܦܘܬܚܐ ܡܫܪܕܘܬܐ ܪܘܫܡܝܬܐ ܡܢ ܫܘܠܛܢܘܬܐ ܕܩܠܝܡܐ ܚܒܫܠܗܿ ܡܡܬܠܢܐ ܕܪܫ ܫܘܠܛܢܘܬܐ ܘܙܝܪܐ ܕܫܘܟܢ̈ܐ ܘܨܒܘ̈ܬܐ ܬܘܕܝܬܢܝ̈ܐ (ܦܫܬܝܘܐܢ ܨܐܕܩ)، ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ (ܐܢܘ ܓ̰ܘܗܪ ܥܒܕܘܟܐ)، ܗܘܦܪܟܐ ܕܐܪܒܝܠ (ܐܘܡܝܕ ܚܘܫܢܘ)، ܡܠܠܐ ܪܘܫܡܝܐ ܒܫܡܐ ܕܫܘܠܛܢܘܬܐ ܕܩܠܝܡܐ (ܦܝܫܘܐ ܗܘܪܐܡܝ)، ܥܡ ܡܝܩܪ̈ܐ ܡܝܛܪ̈ܦܘܠܝܛܐ ܗܕܝܪ̈ܐ ܟܠ ܡܢ ܪܫܐ ܕܐܦܣܩܘ̈ܦܐ ܕܐܪܒܝܠ ܕܥܕܬܐ ܟܠܕܝܬܐ ܡܪܝ (ܒܫܐܪ ܡܬܝ ܘܪܕܐ)، ܪܥܝܐ ܕܡܪܥܝܬܐ ܕܚܕܝܒ ܕܥܕܬܐ ܣܘܪܝܝܬܐ ܩܬܘܠܝܩܝܬܐ ܒܐܪܒܝܠ ܡܪܝ ܢܬܢܐܝܠ ܢܙܐܪ ܥܓ̰ܡ)، ܪܥܝܐ ܕܡܪܥܝܬܐ ܕܡܘܨܠ ܘܟܪܟܘܟ ܘܩܠܝܡܐ ܕܟܘܪܕܣܬܢ ܕܥܕܬܐ ܣܘܪܝܝܬܐ ܐܪܬܕܘܟܣܝܬܐ ܡܪܝ (ܢܝܩܘܕܝܡܘܣ ܕܘܝܕ ܡܬܝ ܫܪܦܿ)، ܘܡܡܬܠܢܐ ܕܦܛܪܝܪܟܐ ܕܥܕܬܐ ܕܡܕܢܚܐ ܐܬܘܪܝܬܐ ܐܒܐ (ܡܐܪܬܢ ܢܒܝܠ).
ܘܫܘܪܐܠܗܘܢ ܥܒܘܕܘ̈ܬܐ ܕܥܕܥܐܕܐ ܒܙܘܝܚܐ ܗܕܝܪܐ ܚܒܫܠܗܘܢ ܣܘܓܼܝ̈ܬܐ ܕܡܘܠܕܐ ܦܝܫܠܗܘܢ ܡܘܩܪܒܐ ܒܝܕ ܐܡܢܬܐ ܘܡܙܡܪܢܝܬܐ ܠܒܢܢܝܬܐ (ܠܝܐܠ ܢܥܡܐ) ، ܒܫܘܬܦܬܐ ܕܣܝܥܬܐ ܕܙܡܪ̈ܐ ܕܥܕܬܐ ܟܠܕܝܬܐ ܒܥܢܟܒܐ، ܐܢܝ ܕܡܘܒܪܐܠܗܘܢ ܥܕܢ̈ܐ ܒܣܝܡ̈ܐ ܒܐܐܪ̈ܐ ܕܡܘܠܕܐ ܩܪܝܪ̈ܐ ܘܣܘܓܼܝ̈ܬܐ ܪ̈ܘܚܢܝܐ ܐܢܝ ܝܠܝܗܝ ܡܐܟܘܠܬܐ ܠܪܘܚܐ، ܒܬܪ ܗܕܟ ܐܬܝܠܗ ܡܡܠܐ ܕܡܕܒܪܢܘܬܐ ܦܝܫܠܗ ܡܘܩܪܒܐ ܒܝܕ ܡܕܒܪܢܗܿ ܓܘܢܝܐ ܡܝܩܪܐ ( ܟܠܕܘ ܪܡܙܝ ܐܘܓܼܢܐ) ܫܘܪܪܠܗ ܓܘܗ ( ܥܢܟܒܐ ܦܝܫܠܗܿ ܩܦܠܐ ܗܘ ܕܟܦܫ ܝܘܪܬܢܐ ܕܥܡܢ ܐܡܢܝܐ ܘܡܪܕܘܬܢܝܐ، ܘܫܘܦܗܿ ܪܒܐܝܠܗ ܒܝܢ ܡܕܝܢ̈ܬܐ ܠܡܐ ܕܡܘܩܪܒܠܗܿ ܡܢ ܒܪܘܝܘܬܐ ܐܡܢܝܬܐ ܘܡܪܕܘܬܢܝܬܐ، ܘܪܡܙܠܗ ܕܥܕܥܐܕܐ ܝܠܗ ܡܡܪܝܢܘܬܐ ܠܥܠܝܡ̈ܐ ܕܥܢܟܒܐ ܕܡܩܪܒܝ ܚܕܐ ܨܘܪܬܐ ܫܦܝܪܬܐ ܚܕܪ ܡܕܝܢ̄ܬܝܗܝ ܒܫܘܦܗܿ ܬܫܥܝܬܢܝܐ ܘܡܪܕܘܬܢܝܐ).
ܘܡܘܒܝܢܗ (ܐܘܓܼܢܐ) : ( ܥܕܥܐܕܐ ܣܢܕ ܠܦܘܠܚܢ̈ܐ ܕܐܝܕܐ ܡܘܩܪܒܐ ܡܢ ܓܢ̄ܒ ܥܠܝܡ̈ܐ، ܟܕ ܣܢܕ (46) ܥܠܝܡ̈ܐ ܘܥܠܝܡ̈ܬܐ ܒܡܩܪܒܬܐ ܕܦܘܠܚܢܝ̈ܗܝ ܕܐܝܕܐ ܥܡ ܣܢܕܬܐ ܕ(15) ܥܠܝܡ̈ܐ ܒܫܪܝܬܐ ܕܬܪ̈ܡܝܬܝܗܝ ܙܥܘܪ̈ܐ)، ܘܡܘܒܝܢܗ ܕܗܢܐ ܝܠܗ ܢܝܫܐ ܪܒܐ ܕܥܕܥܐܕܐ.
ܒܬܪ ܗܕܟ ܡܘܩܪܒܠܗ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ( ܐܢܘ ܓ̰ܘܗܪ ܥܒܕܘܟܐ) ܡܡܠܗ، ܗܘ ܕܫܘܪܪܠܗ ܓܘܗ ܥܠ ܚܘܪܙܐ ܕܫܘܠܛܢܘܬܐ ܬܫܝܥܝܬܐ ܒܣܢܕܬܐ ܕܟܫܝܪ̈ܘܬܐ ܡܪ̈ܕܘܬܢܝܐ ܘܐܡܢܝ̈ܐ ܕܡܟܝܢ̈ܬܐ ܐܘܡܬܢܝ̈ܐ ܒܩܠܝܡܐ، ܘܪܡܙܠܗ ܕܩܠܝܡܐ ܕܟܘܪܕܣܬܢ ܝܠܗ ܫܛܚܐ ܕܚܝܬܐ ܒܫܠܡܐ ܒܥܝܪܩ ܘܦܢܝܬܐ.
ܘܚܒܫܠܗ ܝܘܡܐ ܩܕܡܝܐ ܡܢ ܥܕܥܐܕܐ، ܡܝܩܪܢܘܬܐ ܕܢܨܝܚܐ (ܩܪܡܢܐ) ܒܕܪܓܼܐ ܩܕܡܝܐ ܒܡܘܪܝܐ ܕܨܘܪ̈ܬܐ ܦܘܬܘܓܼܪ̈ܦܝܐ ܗܘ ܕܝܗ̄ܘܐ ܠܨܝܪܐ (ܕܝܐܪ ܣܪܟܝܣ)، ܥܡ ܢܨܝܚܬܐ ܒܕܪܓܼܐ ܬܪܝܢܐ ܠܨܝܪܬܐ (ܦܝܦܝܐܢ ܚܢܐ)، ܥܡ ܡܝܩܪܢܘܬܐ ܕܓܢ̄ܒܢ̈ܐ ܣܢܕܢ̈ܐ ܘܪ̈ܥܘܬܢܝܐ ܕܥܕܥܐܕܐ ܒܕܘܪ̈ܥܐ ܕܡܝܩܪܢܘܬܐ.
ܘܦܝܫܠܗܘܢ ܐܡܝܢܝ̈ܐ ܥܒܘܕܘ̈ܬܐ ܕܥܕܥܐܕܐ ܒܝܘܡܐ ܩܕܡܝܐ ܒܟܪܘܟܝܐ ܒܫܘܩܐ ܦܬܝܚܐ، ܥܡ ܐܡܝܢܝܘܬܐ ܕܥܒܘܕܘ̈ܬܐ ܗܠ ܦܠܓܐ ܕܠܝܠܐ، ܒܢܘܩܙ̈ܐ ܐܡܢܝ̈ܐ ، ܡܘܣܝܩܝ̈ܐ، ܙܡܝܪ̈ܝܐ ܘܐ̄ܚܪ̈ܢܐ ܝܪ̈ܬܘܬܢܝܐ، ܒܫܘܬܦܬܐ ܕܐܡܢ̈ܐ ( ܠܝܐܠ ܢܥܡܐ، ܐܘܢܝܠ ܪܝܚܢܐ، ܥܠܝ ܨܝܐܐ، ܘܣܡܝܪ ܒܝܘܬܝ ܐܬܝܢܐ ܡܢ ܐܠܡܢܝܐ)، ܥܡ ܫܘܬܦܬܐ ܕܗܕܡ̈ܐ ܕܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐ ܒܡܩܪܒܬܐ ܕܓܠܚ̈ܐ ܘܪ̈ܩܕܐ ܝܪ̈ܬܘܬܢܝܐ ܘܥܡܡܝ̈ܐ.
ܘܦܝܫ ܕܟܝܪܐ، ܕܥܕܥܐܕܐ ܕܥܢܟܒܐ ܟܪܝܣܡܣ، ܦܝܫ ܡܚܘܫܒܢܐ ܥܕܥܐܕܐ ܕܟܪܝܣܡܣ ܒܘܫ ܪܒܐ ܦܝܫ ܥܒܝܕܐ ܟܠ ܫܢ̄ܬܐ ܠܡܫܝܚܝ̈ܐ ܒܥܢܟܒܐ ܘܦܢܝ̈ܬܐ ܡܫܚܠܦ̈ܐ ܕܥܡܢ، ܘܓܪܫ ܐܠܦܝ̈ܐ ܕܡܫܝܚܝ̈ܐ ܡܢ ܓܘܝ̈ܐ ܕܐܬܪܐ ܘܐܬܪ̈ܘܬܐ ܕܓܠܘܬܐ ܒܐܘܪܘܦܐ ܘܐܘܣܬܪܠܝܐ ܘܐܡܪܝܟܐ، ܘܦܝܫ ܡܛܘܟܣܐ ܒܪܥܝܘܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܬܦܬܐ ܕܡܢܝܢܐ ܡܢ ܡܛܟܣܝ̈ܬܐ ܕܟܢܘܫܝܐ ܡܕܝܢܝܐ ܥܠܝܡܘܬܢܝ̈ܐ ܘܟܢܘܫܝܝ̈ܐ، ܘܒܕ ܡܓܪܫ ܗܕ ܫܢ̄ܬܐ ܠܡܬܚܐ ܕ(12) ܝܘܡ̈ܐ ܒܡܬܚܐ ܕܥܐܕ̈ܐ ܕܡܘܠܕܐ ܡܫܒܚܐ ܘܪܫܐ ܕܫܢ̄ܬܐ ܚܕܬܐ.
