ܩܝܡܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ، ܒܪܡܫܐ ܕܝܘܡ ܫܒܬܐ 1 ܬܫܪܝܢ ܬܪܝܢܐ 2025، ܒܚܕ ܙܘܝܚܐ ܒܦܘܪܣܐ ܕܕܟܪܐ ܕ(176) ܠܡܘܠܕܐ ܕܓܠܝܘܢܐ ܣܘܪܝܝܐ ܩܕܡܝܐ، ܓܘ ܐܘܢܐ ܕܓܝܠܓܡܫ ܒܪܘܣܬܩܐ ܕܥܢܟܒܐ ܒܐܪܒܝܠ.
ܘܫܘܪܐܠܗ ܥܒܘܕ̈ܘܬܐ ܕܙܘܝܚܐ ܒܟܠܝܬܐ ܕܚܕ ܕܩܝܩܐ ܕܫܬܩܐ ܥܠ ܪ̈ܘܚܐ ܕܣܗܕ̈ܐ ܕܓܠܝܘܢܘܬܐ ܣܘܪܝܝܬܐ، ܒܬܪ ܗܕܟ ܡܡܠܐ ܕܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ ܦܝܫܠܗ ܡܘܩܪܒܐ ܒܝܕ ܪܫ ܚܘܝܕܐ (ܪܘܢܕ ܦܘܠܘܣ)، ܚܒܫܠܗ ܠܐܝܟܢ̈ܘܬܐ ܕܫܬܐܣܬܐ ܕܓܠܝܘܢܘܬܐ ܣܘܪܝܝܬܐ ܘܡܫܪ̈ܝܐ ܒܫ ܐܢܢܩܝ̈ܐ ܒܡܐܙܠܬܗܿ ܒܡܬܚܐ ܕ(176) ܫܢ̈ܐ ܥܒܝܪ̈ܐ، ܒܬܪ ܗܕܟ ܡܡܠܐ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܦܝܫܠܗ ܡܘܩܪܒܐ ܒܝܕ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ (ܐܢܘ ܓ̰ܘܗܪ ܥܒܕܘܟܐ)، ܗܘ ܕܚܒܫܠܗ ܡܡܠܗ ܥܠ ܓܪܐ ܕܫܘܠܛܢܘܬܐ ܕܩܠܝܡܐ ܒܣܢܕܬܐ ܕܠܫܢ̈ܐ ܐܘܡܬܢܝ̈ܐ ܘܡܪܕܘܬܐ ܕܡܟܝܢ̈ܬܐ ܓܘ ܩܠܝܡܐ.
ܒܬܪ ܗܕܟ ܡܘܩܪܒܠܗ ܡܕܒܪܢܐܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܡܡܠܗ ܗܘ ܕܫܘܪܪܠܗ ܓܘܗ، (ܡܕܒܪܢܘܬܐ ܓܘܢܝܬܐ ܘܒܡܬܚܐ ܕܐܪܒܥܐ ܫܢ̈ܐ ܐ̄ܚܪ̈ܝܐ ܗ̄ܘܐܗ̄ܘܬ ܥܠ ܚܕܐ ܪܚܩܘܬܐ ܡܢ ܟܠܝܗܝ ܘܒܟܠ ܟܫܝܪ̈ܘܬܐ ܘܥܒܘܕܘ̈ܬܐ ܐܢܝ ܕܟܡ ܛܟܣܐܠܗܘܢ ܒܦܢܝ̈ܬܐ ܡܫܚܠܦ̈ܐ ܕܐܝܬܘܬܐ ܕܥܡܢ ܒܐܬܪܐ)، ܘܪܡܙܠܗ ܕܬܪ̈ܥܐ ܕܡܕܒܪܢܘܬܐ ܗ̄ܘܐܗ̄ܘܘ ܦܬܝܚ̈ܐ ܒܐܡܝܢܘܬܐ ܠܥܘܕܪܢܐ ܥܡ ܟܠ ܫܘܬܐܣ̈ܐ ܕܥܡܢ ܒܟܠܝܗܝ ܡܫܡܗܘ̈ܬܐ ܘܚܝܪ̈ܝܬܐ.
ܘܒܬܪ ܡܡܠ̈ܐ ܦܝܫܠܗܿ ܥܒܝܕܬܐ ܚܠܩܬܐ ܕܘܪܫܝܬܐ، ܦܝܫܠܗܿ ܡܬܘܓܒܪܬܐ ܒܝܕ ܣܦܪܐ (ܦܛܪܘܣ ܢܒܬܝ)، ܘܫܘܬܦܠܗܘܢ ܓܘܗܿ ܟܠ ܡܢ (ܫܐܒܘ ܡܝܟܐܝܠ، ܢܡܪܘܕ ܩܫܐ)، ܗܝ ܚܒܫܠܗܿ ܩܐܡ ܕܓܠܝܘܢܘܬܐ ܣܘܪܝܝܬܐ ܒܬܪ (176) ܫܢ̈ܐ ܡܢ ܢܘܦܩܐ ܕܓܠܝܘܢܐ ܣܘܪܝܝܐ ܩܕܡܝܐ ܒܦܢܝܬܐ ܕܡܕܢܚܐ ܡܨܥܝܐ.
ܘܦܝܫܠܗܘܢ ܚܬܝܡ̈ܐ ܥܒܘܕܘ̈ܬܐ ܕܙܘܝܚܐ، ܒܡܝܩܪܢܘܬܐ ܕܡܓܘܒܝ̈ܐ ܡܢ ܓܠܝܘܢܝ̈ܐ ܦܠܚ̈ܐ ܒܓܠܝܘܢܘܬܐ ܣܘܪܝܝܬܐ ܘܒܫܒܝܠ̈ܐ ܕܝܘܕܥܐ ܡܫܚܠܦ̈ܐ ܛܝܡܢܬܐ ܠܦܘܠܚܢܝ̈ܗܝ ܝܘܕܥܝ̈ܐ، ܘܗ̄ܘܐܗ̄ܘܘ ܟܠ ܡܢ ( ܡܪܝܡ ܐܠܒܪܬ ܗܘܐܝܠ-ܐܬܝܪܝܬܐ ܕܥܝܪܩܝܬܐ ܣܘܪܝܝܬܐ/ܒܓܕܕ، ܐܡܝܪ ܦܘܠܘܣ ܐܒܪܗܝܡ-ܐܬܝܪܝܬܐ ܕܣܘܪܘܝܘ TV / ܒܪܛܠܐ ، ܫܐܒܘ ܡܝܟܐܝܠ- M studio Iraq / ܥܢܟܒܐ ، ܗܕܝܪ ܟܘܢܕܐ-ܫܘܦܐ ܕܥܡܟܐܒܕ/ܥܢܟܒܐ، ܪܘܕܝ ܫܝܪ-ܘܟܝܠܘܬܐ ܕܐܣܝ ܡܝܢܐ/ܥܢܟܒܐ، ܢܘܐܝܠ ܓ̰ܡܝܠ-ܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ/ܒܓܕܝܕܐ، ܨܠܚ ܣܪܟܝܣ ܒܐܟܘܣ-ܐܬܝܪܝܬܐ ܕܣܘܪܘܝܘ TV /ܒܓܕܝܕܐ ، ܒܐܪܙܐܢ ܥܒܕ ܐܠܓܼܢܝ-ܒܝܬ ܚܘܕܪܐ ܕܒܓܕܝܕܐ ܡܪܕܘܬܢܝܐ/ܒܓܕܝܕܐ، ܣܐܢܐܝ ܡܢܨܘܪ ܡܝܟܐ-ܗܕܡܐ ܕܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ/ܐܠܩܘܫ، ܪܝܦܐܢ ܦܛܪܘܣ ܚܟܝܡ-ܦܬܐ ܕܐܠܪܐܨܕ ܛܒܝܬܐ/ܐܠܩܘܫ، ܟܪܡ ܐܠܩܘܫܝܐ- ܗܕܡܐ ܕܚܘܝܕܐ ܕܓܠܝܘܢܝ̈ܐ ܥܝܪ̈ܩܝܐ/ܐܠܩܘܫ، ܪܘܕܝ ܐܢܘܪ ܕܘܝܕ-ܫܒܟܬܐ ܕܝܘܕܥܐ ܥܝܪܩܝܐ/ܟܪܟܘܟ، ܐܬܘܪ ܐܢܕܪܝܘܣ ܝܥܩܘܒ-ܐܬܝܪܝܬܐ ܕܥܝܪܩܝܬܐ ܣܘܪܝܝܬܐ/ܕܗܘܟ، ܪܐܡܝܢܐ ܬܐܘܡܐ ܐܝܣܚܩ-ܐܬܝܪܝܬܐ ܕܘܐܪ/ܕܗܘܟ، ܪܘܢܝ ܫܡܥܘܢ ܐܠܝܐܣ-ܗܕܡܐ ܕܚܘܝܕܐ ܕܓܠܝܘܢܝ̈ܐ ܥܝܪ̈ܩܝܐ/ܒܪܛܠܐ).
ܘܦܝܫ ܕܟܝܪܐ، ܕܥܡܢ ܟܡܙܝܚ ܒܥܐܕܐ ܕܓܠܝܘܢܘܬܐ ܣܘܪܝܝܬܐ، ܐ̄ܣܪܬܐ ܒܣܝܩܘܡ ܢܘܦܩܐ ܕܓܠܝܘܢܐ ܩܕܡܝܐ ܒܠܫܢܐ ܣܘܪܝܝܐ، ܒܫܡܐ ܕ(ܙܗܪܝܪ̈ܐ ܕܒܗܪܐ) ܗܘ ܕܢܦܩܠܗ ܡܢܝܢܐ ܩܕܡܝܐ ܡܢܗ ܒܣܝܩܘܡ 1 ܬܫܪܝܢ ܬܪܝܢܐ ܫܢ̄ܬܐ ܕ(1849) ܒܡܕܝܢ̄ܬܐ ܕܐܘܪܡܝ ܒܐܝܪܢ.
