ܐܡܝܢܝܐܝܠܝܗܝ ܥܒܘܕܘ̈ܬܐ ܕܝܘܡܐ ܬܪܝܢܐ ܕܒܝܬ ܓܠܚܐ ܕܟܬܒܐ ܦܬܝܚܐ ܒܕܘܪܬܗ ܬܠܝܬܝܬܐ، ܝܘܡ ܚܕܒܫܒܐ 26 ܐܝܪ 2024، ܗܘ ܕܛܟܣ ܠܗ ܒܝܬ ܐܪ̈ܟܐ ܣܘܪܝܝܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ، ܠܡܬܚܐ ܡܢ 25-27 ܐܝܪ ܩܐܡܝܐ، ܒܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܫܘܪܐܠܗ ܝܘܡܐ ܬܪܝܢܐ ܟܫܝܪ̈ܘܬܗ ܒܓܪܫܬܐ ܕܕܪܥܢܐ ܕܟܬܒܐ ܕ(ܫܡܫܝ – شمسي ) ܕܟܬܘܒܬܐ “ܣܠܦܐ ܨܠܝܒܐ”، ܗܝ ܕܟܡ ܡܩܪܒܠܗܿ ܠܡܛܝܒܐ ܣܦܪܐ “ܢܝܢܒ ܠܡܣܘ”، ܒܬܪ ܗܕܟ ܦܝܫܠܗܘܢ ܡܘܩܪܒܐ ܡܢܝܢܐ ܡܢ ܡܘܫ̈ܚܬܐ ܦܪ̈ܝܫܐ ܒܝܕ ܡܚܘܪ̈ܐ ܡܢ ܒܢܝ̈ ܥܡܢ ܘܥܠ ܩܝܢ̈ܬܐ ܕܥܘܕܐ، ܘܝܠܝܗܝ ( ܒܐܪܙܐܢ ܥܒܕ ܐܠܓܼܢܝ، ܐܡܝܪ ܦܘܠܘܣ، ܦܪܘܝܢ ܫܡܥܘܢ، ܢܝܢܒ ܠܡܣܘ).
ܒܬܪ ܗܕܟ ܡܘܩܪܒܠܗ ܝܗܠܐ ܕܐܟܕܝܡܝܘܬܐ ܕܐܘܪܢܝܢܐ ܕܐܡܢ̈ܐ ܢܘܩܙܐ ܐܡܢܝܐ، ܒܬܪ ܗܕܟ ܫܘܪܐܠܗܿ ܝܬܒܬܐ ܕܘܪܫܝܬܐ ܒܬܓܒܪܬܐ ܕܝܘܕܥܝܬܐ ܘܡܚܘܪܬܐ “ܦܐܠܢܬܝܢܐ ܗܝܕܘ” ܘܫܘܬܦܠܗ ܓܘܗ (ܪܫ ܓܘܫܡܐ ܕܫܠܝܛ ܒܝܬܗ ܕܙܕܩ̈ܐ ܕܒܪܢܫܐ ܕ.”ܡܢܐ ܝܐܩܘ” ،ܪܫ ܒܝܬ ܚܘܕܪܐ ܡܨܥܝܬܐ ܕܡܪܕܘܬܐ ܘܫܘܝܘܬܐ ܡܝܩܪܐ ” ܪܚܝܡ ܐܒܘ ܪܓܼܝܦ” ، ܘܟܫܝܪܐ ܒܓܝܓܠܐ ܕܟܢܘܫܝܐ ܡܕܝܢܝܐ : ܕ.” ܐܕܡ ܒܝܕܐܪ” ܘܝܬܒܬܐ ܝܗ̄ܘܬ ܚܕܪ ܡܠܘܐܐ (ܡܡܠ̈ܐ ܕܣܢܝܘܬܐ ܘܡܥܒܕܢܘܬܝܗܝ ܥܠ ܚܝܝܬܐ ܒܫܠܡܐ).
ܘܒܬܪ ܝܬܒܬܐ ܕܘܪܫܝܬܐ ܡܘܩܪܒܠܗ ܝܗܠܐ ܕܐܟܕܝܡܝܘܬܐ ܕܐܘܪܢܝܢܐ ܕܐܡܢ̈ܐ ܢܘܩܙܐ ܙܡܝܪܐ ܐ̄ܚܪܢܐ، ܕܡܫܪܝܐ ܒܬܪ ܗܕܟ ܝܬܒܬܐ ܕܘܪܫܝܬܐ ܬܪܝܢܝܬܐ ܒܬܓܒܪܬܐ ܕܐܟܕܝܡܝܬܐ “ܣܠܦܐ ܡܬܝ” ܘܫܘܬܦܠܗܘܢ ܓܘܗܿ ( ܒܟܪܐ ܕܦܘܠܚܢ̈ܐ ܠܒܢܢܝܐ ܘܐܣܛܪܛܝܓܝܐ ܕܫܘܚܠܦܐ ܪܩܡܝܐ “ܓ̰ܐܟ ܓ̰ܢܕܘ”، ܘܝܠܘܦܐ ܕܕܟܬܘܪܐ: “ܦܢܐܪ ܪܘܦܘ”
ܘܐܟܕܝܡܝܬܐ “ܡܐܝܟܝ ܚܘܪܐܢܝ” ܘܝܬܒܬܐ ܝܗܘܬ ܚܕܪ ܡܠܘܐܐ ܕ(ܢܛܪܬܐ ܕܝܪܬܘܬܐ ܘܠܫܢܐ ܣܘܪܝܝܐ ܓܘ ܕܪܐ ܕܢܗܝܪܘܬܐ ܐܘܡܢܝܬܐ…. ܣܩܘܒܠܝ̈ܘܬܐ ܘܦܘܪ̈ܣܐ).
ܘܦܝܫܠܗܘܢ ܚܬܝܡܐ ܥܒܘܕܘ̈ܬܐ ܕܝܘܡܐ ܬܪܝܢܐ ܒܢܘܩܙܐ ܙܡܝܪܝܐ ܕܝܗܠܐ ܕܐܟܕܝܡܝܘܬܐ ܕܐܘܪܢܝܢܐ ܕܐܡܢ̈ܐ.
ܘܦܝܫ ܕܟܝܪܐ، ܕܒܝܬ ܓܠܚܐ ܕܟܬܒܐ ܦܬܝܚܐ ܒܕܘܪܬܗ ܬܠܝܬܝܬܐ ܦܝܫ ܥܒܝܕܐ ܒܡܬܚܐ ܡܢ 25-27 ܐܝܪ ܩܐܡܝܐ، ܘܚܒܫܝ ܥܒܘܕܘ̈ܬܗ ܝܬܒܝ̈ܬܐ ܕܘܪ̈ܫܝܐ ܘܢܘܩܙ̈ܐ ܐܡܢܝ̈ܐ ܘܙܡܝܪ̈ܝܐ ܡܫܚܠܦ̈ܐ.
