ܦܝܫܠܗ ܥܒܝܕܐ ܓܘ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ ܚܕ ܙܘܝܚܐ ܕܫܪܝܬܐ ܕܡܫܩܠܐ ܬܪܝܢܐ ܡܢ ܬܪܡܝܬܐ ܕ( ܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܒܨܘܪ̈ܘܬܐ ܓܘ ܥܝܪܩ) ܒܥܘܕܪܢ ܥܡ ܘܟܝܠܘܬܐ ܐܡܪܝܟܝܬܐ ܕܫܘܘܚܐ (ܡܪܒܝܬܐ) ܬܒܠܝܬܐ USAID ، ܘܐܘܝܘܬܐ ܕܥܬܩ̈ܐ، ܒܨܦܪܐ ܕܚܕܒܫܒܐ 15 ܬܫܪܝܢ ܩܕܡܝܐ 2023. ܒܛܘܝܒܐ ܕܡܝܩܪܐ “ܐܢܘ ܓ̰ܘܗܪ ” ܘܙܝܪ ܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ، ܘܡܝܩܪܐ ” ܡܐܪܟ ܣܬܪܘ” ܩܢܨܠܐ ܓܘܢܝܐ ܐܡܪܝܟܝܐ ܓܘ ܐܪܒܝܠ ، ܘܡܝܩܪܐ ” ܪܐܡܝ ܢܘܪܝ” ܩܝܡܩܡܐ ܕܪܘܣܬܩܐ ܕܥܢܟܒܐ ܘܡܢܝܢܐ ܡܢ ܦܪ̈ܠܡܢܝܐ ܩܐܡܝ̈ܐ ܘܩܕܝܡ̈ܐ ܘܡܫܬܐܠܢ̈ܐ ܡܕܒܪ̈ܢܝܐ ܘܫܘܠܛܢܝ̈ܐ ܘܡܕܒܪ̈ܢܐ ܕܚܘܕܪ̈ܐ ܓܘ ܥܢܟܒܐ.
ܘܫܘܪܐܠܗ ܙܘܝܚܐ ܒܡܡܠܐ ܕܡܝܩܪܐ “ܒܪܢܐܪܕ ܝܘܣܦ” ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܗܘ ܕܩܘܒܠܗ ܒܫܝܢܐ ܒܡܡܠܗ ܒܡܛܝܒ̈ܐ ܘܩܘܠܣܠܗ ܒܡܐ ܕܡܬܘܡܡܠܗܿ ܬܪܡܝܬܐ ܓܘ ܡܫܩܠܗܿ ܩܕܡܝܐ ܘܚܘܕ̈ܬܐ ܕܦܝܫܠܗܘܢ ܥܒܝܕܐ ܒܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܘܡܘܥܒܪܗ ܥܠ ܦܨܚܘܬܗ ܠܐܡܝܢܝܘܬܐ ܕܦܘܠܚܢܐ ܓܘ ܡܫܩܠܗ ܬܪܝܢܐ ܕܐܝܬܠܗ ܣܒܪܐ ܒܢܨܝܚܘܬܗ ܘܬܫܡܫ̈ܝܬܗ .
ܒܬܪ ܗܕܟ ܦܝܫܠܗ ܡܘܩܪܒܐ ܡܡܠܐ ܒܝܕ ܩܢܨܠܐ ܐܡܪܝܟܝܐ ܓܘܢܝܐ ܩܘܠܣܠܗ ܒܫܘܪܝܐ ܕܡܡܠܗ ܒ ((ܦܩܘܕܘܬܐ ܘܚܝܪܬܐ ܕܡܝܪܬܐ ܠܩܒܠܢܢ ܒܐܪܚܘܬܐ ܡܝܩܪܐ ” ܟܠܕܘ ܪܡܙܝ” ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܡܝܩܪܐ “ܒܪܢܐܪܕ ܝܘܣܦ” ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ)) ܘܡܘܥܒܪܗ ܥܠ ܫܘܒܗܪܗ ܒܣܢܕܬܐ ܕܦܘܠܚܢܐ ܒܗܢ ܒܝܬ ܥܬܝܩ̈ܬܐ ܐܢܢܩܝܐ.
ܘܪܡܙܠܗ ܠܓܪܐ ܪܒܐ ܕܟܢܘܫܝܐ ܡܫܝܚܝܐ ܓܘ ܬܫܥܝܬܐ ܕܥܝܪܩ ܘܓܘ ܟܢܘܫܝܐ ܥܝܪܩܝܐ ܒܐܣܟܝܡܐ ܓܘܢܝܐ، ܘܓܘ ܥܬܝܪܘܬܐ ܕܝܪܬܘܬܐ ܬܘܕܝܬܢܝܬܐ ܘܡܪܕܘܬܢܝܬܐ ܘܐܕܫܘܬܗܿ، ܘܡܘܙܝܕܠܗ ܒܐܡܪܐ (( ܚܕܐ ܦܨܚܘܬܐܝܠܗܿ ܕܗܘܢ ܥܡܘܟܢ ܒܗܢ ܝܘܡܐ ، ܠܙܘܝܚܐ ܒܡܘܗܒܬܐ (ܫܘܟܢܐ) ܐ̄ܚܪܢܐ ܒܛܝܡܐ ܕܚܕ ܡܠܝܘܢܐ ܕܘܠܐܪ̈ܐ ܡܢ ܡܘܘܠܐ ܕܘܟܝܠܘܬܐ ܐܡܪܝܟܝܬܐ ܕܡܪܒܝܬܐ ܬܒܠܝܬܐ USAID ، ܕܢܛܪܬܐ ܕܝܪܬܘܬܐ ܡܪܕܘܬܢܝܬܐ ܐܕܫܢܝܬܐ ܓܘ ܥܝܪܩ)).
ܘܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܚܕ ܡܡܠܐ ܬܢܐܠܗ ܓܘܗ ܚܕܪ ܦܐܪ̈ܐ ܕܡܫܩܠܐ ܩܕܡܝܐ ܡܢ ܥܘܕܪܢܐ ܥܡ ܫܘܬܦ̈ܐ ܘܦܠܛ̈ܗ ܛܒ̈ܐ ܐܢܝ (( ܕܡܨܚ ܐܕܝܘܡ ܕܚܙܚ ܓܢ̄ܒܢ̈ܐ ܡܢܝܗܝ ܓܘ ܐܘܢ̈ܐ ܕܒܝܬ ܥܬܝܩ̈ܬܐ ܘܦܪܝܫܐܝܬ ܓܘ ܫܘܦܗ ܪܘܫܡܝܐ ܘܒܐܪܒܥܐ ܠܫܢ̈ܐ ( ܣܘܪܝܝܐ ، ܩܘܪܕܝܐ ، ܥܪܒܝܐ ، ܘܐܢܓܠܝܙܝܐ )) .
ܘܬܢܐܠܗ ܚܕܪ ܫܪܝܬܐ ܕܡܫܩܠܐ ܬܪܝܢܐ ܡܢ ܗܕ ܬܪܡܝܬܐ، ܕܗܘܚ ܓܘܗ (( ܥܠ ܡܘܥܕܐ ܥܡ ܚܠܩܬܐ ܚܕܬܐ ܓܘ ܫܫܠܬܐ ܕܥܘܕܪܢܐ ܘܢܨܚܢܐ ܥܡ ܫܘܬܦܝ̈ܢ ܘܚܒܪ̈ܝܢ، ܒܟܠ ܡܐ ܕܚܒܫ ܡܢ ܟܫܝܪ̈ܘܬܐ ܘܥܒܘܕܘ̈ܬܐ ܕܪ̈ܫܘܬܢܝܐ ܘܡܠܦܢܘܬܝܢܝ̈ܐ ܓܘ ܛܘܝܒܐ ܕܟܕܝܪ̈ܐ ܡܬܡܨܝܢ̈ܐ ܥܠ ܡܝܕܥܬܐ ܕܝܘܒܠ̈ܐ ܐܬܝܢ̈ܐ ܡܢ ܒܢܝ̈ ܥܡܢ ܥܠ ܝܪܬܘܬܐ ܕܐܒܗ̈ܬܐ ܕܦܝܫܝ ܚܬܝܬ̈ܐ ܓܘܗܿ)).
ܘܡܘܩܪܒܠܗ ܩܘܒܠܛܝܒܘܬܐ ܒܫܡܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܘܒܫܡܐ ܕܟܠܝܗܝ ܫܘܬܦ̈ܐ، ܐܡܪܝܟܝܐ ܥܠ ܣܢܕܬܗ ܪܒܬܐ، ܘܡܫܕܪܘܬܐ ܐܡܪܝܟܝܬܐ ܓܘ ܥܝܪܩ ܗܝ ܕܐܡܝܢܬܐܝܠܗܿ ܓܘ ܘܟܝܠܘܬܐ ܐܡܪܝܟܝܬܐ ܕܡܪܒܝܬܐ ܬܒܠܝܬܐ USAID ܒܝܨܝܦܘܬܗܿ ܒܝܪܬܘܬܐ ܡܪܕܘܬܢܝܬܐ. ܘܐܦ ܗܕܟ ܡܘܩܪܒܠܗ ܩܘܒܠܛܝܒܘܬܐ ܠܫܘܠܛܢܘܬܐ ܕܩܠܝܡܐ، ܘܦܪܝܫܐܝܬ ܪܫܐ ܕܡܘܬܒܐ ܕܘܙܝܪ̈ܐ ܡܝܩܪܐ “ܡܣܪܘܪ ܒܐܪܙܐܢܝ” ، ܥܠ ܣܢܕܬܝܗܝ ܐܡܝܢܬܐ.
ܘܒܬܪ ܗܕܟ ܡܘܩܪܒܠܗ ܡܝܩܪܐ ” ܒܝܬܪ ܗܝܪܕܪܝܓ̰” ܫܘܬܦܐ ܡܫܬܐܣܢܐ ܓܘ ܐܘܝܘܬܐ ܕܥܬܩ̈ܐ، ܚܕ ܡܡܠܐ ܡܘܩܪܒܠܗ ܓܘܗ ܩܘܒܠܛܝܒܘܬܐ ܠܟܠܝܗܝ ܫܘܬܦ̈ܐ ܘܚܒܪ̈ܐ ܥܕܘܪ̈ܐ ܥܡ ܐܘܝܘܬܐ ܕܥܬܩ̈ܐ ܓܘ ܢܨܝܚܘܬܐ ܕܗܕ ܬܪܡܝܬܐ. ܘܬܢܐܠܗ ܡܝܩܪܬܐ ” ܐܠܕܐ ܒܢܓ̰ܐܡܝܢ” ܡܕܒܪܢܝܬܐ ܕܒܘܨܝܐ ܓܘ ܬܪܡܝܬܐ ܓܘ ܡܡܠܗܿ ܠܐܢܢܩܝܘܬܐ ܕܡܠܦܢܘܬܐ ܓܘ ܡܫܩܠܐ ܬܪܝܢܐ ܡܢ ܬܪܡܝܬܐ، ܘܐܣܝܪܘܬܗܿ ܒܢܛܪܬܐ ܕܝܪܬܘܬܐ ܥܬܝܪܬܐ ܘܡܪܕܘܬܐ ܫܪܫܝܬܐ ܕܒܢܝ̈ ܗܢ ܐܬܪܐ ܐܢܝ ܕܚܙܐܠܗܘܢ ܬܗܡܫܬܐ ܘܡܪܚܩܬܐ ܘܐܒܝܕܘܬܐ ܟܢܝܫܝܬܐ، ܐܠܐ ܟܚܦܛܢܝ ܠܢܛܪܬܐ ܕܝܪܬܘܬܐ ܕܐܒܗ̈ܬܐ ܘܡܡܛܝܬܗ ܠܝܠ̈ܕ̄ܐ .
ܘܒܚܘܬܡܐ ܩܝܡܠܗܘܢ ܐܪ̈ܚܐ ܒܚܕܐ ܣܥܘܪܘܬܐ ܠܒܝܬ ܓܠܚܐ ܙܥܘܪܐ ܚܒܫ ܨܘܪ̈ܬܐ ܕܡܫܩ̈ܠܐ ܡܢ ܬܪܡܝܬܐ ܐܝܟ ܡܥܒܪܢܘܬܐ ܥܠ ܩܘܒܠܛܝܒܘܬܐ ܘܐܝܩܪܐ ܠܦܘܠܚܢ̈ܐ ܕܘܟܝܠܘܬܐ ܐܡܪܝܟܝܬܐ ܕܡܪܒܝܬܐ ܬܒܠܝܬܐ USAID ، ܘܐܘܝܘܬܐ ܕܥܬܩ̈ܐ، ܘܟܠܝܗܝ ܫܘܬܦ̈ܐ ܓܘ ܡܫܕܪܘܬܐ ܐܡܪܝܟܝܬܐ.
