ܣܘܩܒܠܗ ܡܕܒܪܢܐܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܡܕܒܪܢܐ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ( ܒܪܢܐܪܕ ܝܘܣܦ) ، ܓܘ ܒܢܝܢܐ ܕܒܝܬ ܥܬܝܩ̈ܬܐ ܒܪܘܣܬܩܐ ܕܥܢܟܒܐ، ܝܘܡ ܚܡܫܒܫܒܐ 24 ܢܝܣܢ 2025، ܡܫܕܪܘܬܐ ܬܒܝܠܝܬܐ، ܚܒܫܠܗܿ ܣܥܘܪ̈ܐ ܡܢ ܐܬܪ̈ܘܬܐ ܘܬܘܕ̈ܝܬܐ ܡܫܚܠܦ̈ܐ ܕܬܒܝܠ .
ܘܟܪܟܠܗܘܢ ܣܥܘܪ̈ܐ ܒܡܢܘ̈ܬܐ ܕܒܝܬ ܥܬܝܩ̈ܬܐ ܘܚܙܐܠܗܘܢ ܐܝܬܘ̈ܬܗ ܘܩܢܝܢ̈ܗ ܝܪ̈ܬܘܬܢܝܐ، ܐܢܝ ܕܡܡܬܠܝ ܝܘܪܬܢܐ ܡܪܕܘܬܢܝܐ ܘܬܫܥܝܬܢܝܐ ܕܥܡܢ ، ܘܫܘܪܪܠܗܘܢ ܥܠ ܐܢܢܩܝܘܬܐ ܕܢܛܪܬܐ ܕܗܢ ܝܘܪܬܢܐ ܡܕܝܢܝܐ ܘܐܢܢܩܝܘܬܐ ܕܫܢܝܬܗ ܠܝܘܒܠ̈ܐ ܐܬܝܢ̈ܐ ܠܢܛܪܬܗ ܡܢ ܬܠܩܬܐ.
ܘܒܡܬܚܐ ܕܣܥܘܪܘܬܐ ، ܟܠܐܠܗܘܢ ܚܕ ܕܩܝܩܐ ܕܫܬܩܐ ܘܡܠܗܝܬܐ ܕܦܘܢܕ̈ܐ ܥܠ ܪ̈ܘܚܬܐ ܕܣܗܕ̈ܐ ܕܥܡܢ ܘܓܠܚܬܐ ܕܦܠܡܐ ܟܪܝܐ ܥܠ ܓܕܫ̈ܐ ܕܣܝܦܘ، ܒܕܟܪܐ ܕ(110)، ܐܢܝ ܕܦܝܫܠܗܘܢ ܥܒܝܕܐ ܕܪܩܘܒܠ ܥܡܢ ܓܘ ܩܪܒܐ ܬܒܝܠܝܐ ܩܕܡܝܐ ܓܘ ܐܪ̈ܥܬܐ ܕܕܘܠܬܐ ܥܘܬܡܢܝܬܐ ܒܗܘ ܙܒܢܐ.
ܘܐܦ ܗܕܟ ܡܘܠܗܐܠܗܘܢ ܣܥܘܪ̈ܐ ܦܘܢܕ̈ܐ ܥܠ ܢܝܚܘܬܐ ܕܪܘܚܐ ܕܦܦܐ (ܦܪܢܣܝܣ)، ܗܘ ܕܫܘܢܐܠܗ ܩܕܡ ܚܕܟܡܐ ܝܘܡ̈ܐ، ܓܘ ܙܘܝܬܐ ܕܛܥܢܐ ܫܡܗ ܒܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܓܘ ܥܢܟܒܐ .
ܘܫܘܪܪܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܓܘ ܡܡܠܗ ܗܘ ܕܟܡ ܡܩܪܒܠܗ ܒܚܘܬܡܐ ܕܣܥܘܪܘܬܐ، ( ܡܚܝܝܬܐ ܕܕܟܪܐ ܠܐܝܠܗ ܚܕ ܥܒܕܐ ܡܪܝܡܢܐ، ܐܠܐ ܝܠܗܿ ܚܕܐ ܟܠܝܬܐ ܥܒܘܕܬܐ ܒܪܩܘܒܠ ܢܟܪܬܐ، ܘܫܝܦܬܐ ܕܫܪܝܪ̈ܘܬܐ، ܘܢܫܝܬܐ ܬܫܥܝܬܢܝܬܐ)، ܘܪܡܙܠܗ ܕܝܠܗܿ (ܩܪܝܬܐ ܠܡܘܕܝܢܘܬܐ ، ܠܐ ܒܥܠܬܐ ܕܢܘܩܡܐ، ܐܠܐ ܫܪܪܬܐ ܕܟܐܢܘܬܐ ܘܢܛܪܬܐ ܕܐܝܩܪܐ ).
ܘܦܝܫ ܕܟܝܪܐ، ܕܡܫܕܪܘܬܐ ܩܝܡܐ ܒܣܥܘܪܘܬܐ ܕܩܠܝܡܐ ܕܟܘܪܕܣܬܢ ܠܫܘܬܦܬܐ ܒܝܘܡܐ ܕܨܠܘܬܐ ܐܬܪܢܝܬܐ ܓܘ ܟܘܪܕܣܬܢ، ܗܝ ܕܫܘܪܐܠܗܘܢ ܚܘܪ̈ܩܢܝܗܝ ܓܘ ܐܪܒܝܠ ܝܘܡܐ ܕܐܪܒܥܒܫܒܐ ܥܒܝܪܐ، ܗܝ ܕܦܝܫܐ ܥܒܝܕܬܐ ܠܓܗܐ ܩܕܡܝܬܐ ܓܘ ܩܠܝܡܐ ܠܡܬܚܐ ܡܢ 22 ܗܠ 25 ܢܝܣܢ ܩܐܡܝܐ، ܬ̄ܚܘܬ ܪܘܫܡܐ (ܨܘܒ ܚܘܝܕܐ ܓܘ ܗܝܡܢܘܬܐ) .
