ܩܒܠܗ ܒܐܪܚܘܬܐ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܝܘܡ ܬܠܬܒܫܒܐ 25 ܐܕܪ 2025، ܝܬܒܬܐ ܕܘܪܫܝܬܐ ܥܠ ܓܪܐ ܕܪܩܡܢܬܐ ܠܢܛܪܬܐ ܕܗܝܝܘܬܐ ، ܒܫܡܐ ܕ(( ܪܩܡܢܬܐ ܕܝܪܬܘܬܐ ܘܡܬܩܕܡܢܘܬܗܿ ܠܕܪܐ ܕܬܟܢܘܠܘܓ̰ܝܐ))، ܠܒܨܘܝܬܐ ܘܐܟܕܝܡܝܬܐ ܓܘ ܒܝܬ ܨܘܒܐ ܕ(ܕܐܝܬܘܢ) ܐܡܪܝܟܝܐ، ܕ.(ܐܠܕܐ ܒܝܢܓ̰ܐܡܝܢ).
ܘܫܘܪܐܠܗܿ ܝܬܒܬܐ ܒܡܡܠܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܗܘ ܕܩܘܠܣܠܗ ܓܘܗ ܥܠ ܦܘܠܚܢܐ ܐܡܝܢܝܐ ܕܡܩܪܒܠܗ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܩܡܢܬܐ ܕܐܝܬܘ̈ܬܗ ܘܩܢܝܢ̈ܗ ܥܬܩܝ̈ܐ، ܘܪܡܙܠܗ ܥܠ ܐܢܢܩܝܘܬܐ ܕܐܫܛܪܬܐ ܕܝܪܬܘܬܐ ܡܪܕܘܬܢܝܬܐ ܕܡܟܝܢ̈ܬܐ ܓܘ ܥܝܪܩ ܘܩܠܝܡܐ ܕܟܘܪܕܣܬܢ ܒܐܘܪܚܐ ܕܪܩܡܢܬܐ، ܠܢܛܪܬܐ ܥܠ ܝܪܬܘܬܐ ܕܥܡܢ ܡܢ ܬܠܩܬܐ ܘܫܢܝܬܗܿ ܠܝܘܒܠ̈ܐ ܐܬܝܢ̈ܐ، ܥܡ ܫܒܩܬܗܿ ܒܐܝܕܐ ܕܒܨܘܝ̈ܐ.
ܘܡܢ ܓܢ̄ܒܗܿ ܪܡܙܠܗܿ ܒܨܘܝܬܐ ܘܐܟܕܝܡܝܬܐ ܓܘ ܒܝܬ ܨܘܒܐ ܕ(ܕܐܝܬܘܢ)، ܕ.(ܐܠܕܐ ܒܝܢܓ̰ܐܡܝܢ)، ܥܠ ܐܢܢܩܝܘܬܐ ܕܬܟܢܘܠܘܓ̰ܝܐ ܘܕܪܝܘܬܐ ܒܕܪܐ ܚܕܬܐ ܘܐܝܟܢܘܬܐ ܕܫܩܠܬܐ ܕܝܘܬܪܢܐ ܡܢܝܗܝ ܠܢܛܪܬܐ ܕܝܪܬܘܬܐ ܥܬܝܪܐ ܕܥܡܢ، ܒܢܝܫܐ ܕܫܢܝܬܗܿ ܠܝܘܒܠ̈ܐ ܐܬܝܢ̈ܐ ܘܦܪܝܫܐܝܬ ܒܙܒܢܐ ܕܛܘܘܪܐ ܒܫܒܝܠ̈ܐ ܕܐܡܝܢܘܬܐ ܟܢܘܫܝܝܬܐ ܐܢܝ ܕܫܒܩܠܗܘܢ ܬܒܝܠ ܕܦܝܫ ܚܕܐ ܩܪܝܬܐ ܙܥܘܪܬܐ، ܘܪܡܙܠܗܿ ܠܓܪܐ ܕܘܠܐ ܥܠ ܫܘܬܐܣ̈ܐ ܡܪ̈ܕܘܬܢܝܐ ܕܥܡܢ ܒܐܬܪܐ ܘܓܠܘܬܐ ܕܩܝܡܝ ܓܘܗ ܘܥܘܕܪܢܐ ܒܚܕܕܐ ܠܛܘܪܢܬܐ ܕܐܡܝܢܝܘܬܐ ܘܚܘܠܦܐ ܕܒܚܝܪ̈ܘܬܐ ܒܝܢܬܝܗܝ، ܒܢܝܫܐ ܕܠܐ ܦܫܪܬܐ ܕܓܠܘܝܘ̈ܬܐ ܕܥܡܢ ܒܐܬܪ̈ܘܬܐ ܕܓܠܘܬܐ ܪ̈ܚܝܩܐ ܡܢ ܐܬܪܐ.
ܘܫܘܬܦܠܗܘܢ ܡܛܝܒ̈ܐ ܒܝܬܒܬܐ، ܐܢܝ ܕܡܘܚܙܠܗܘܢ ܝܨܝܦܘܬܐ ܪܒܬܐ ܒܡܠܘܐ ܕܪܩܡܢܬܐ ܘܓܪܗܿ ܒܢܛܪܬܐ ܕܝܪܬܘܬܐ ܕܥܡܢ، ܒܐܘܪܚܐ ܕܡܩܪܒܬܝܗܝ ܡܢܝܢܐ ܡܢ ܫܘܐܠ̈ܐ ܘܕܘܪ̈ܫܐ ܐܢܝ ܕܐܝܬܗ̄ܘܐܠܗܘܢ ܡܥܒܕܢܘܬܐ ܒܡܠܘܐܐ ܒܐܣܟܝܡܐ ܡܣܝܡܢܐ ، ܘܫܘܪܪܠܗܘܢ ܥܠ ܐܢܢܩܝܘܬܐ ܕܡܦܪܝܬܐ ܕܬܟܢܘܠܘܓ̰ܝܐ ܚܕܬܐ ܒܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܥܡܢ.
