ܩܝܡܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܐܪܒܥܒܫܒܐ 12 ܐܕܪ 2025 ܒܣܥܘܪܘܬܐ ܠܡܫܬܐܣܬܐ ܡܪܕܘܬܢܝܬܐ ܐܬܘܪܝܬܐ ܒܐܘܚܕܢܐ ܕܐܝܠܝܢܘܝ ܐܡܪܝܟܝܐ، ܘܝܗ̄ܘܘ ܒܣܩܒܠܬܗ ܪܫ ܡܫܬܐܣܬܐ (ܬܝܓܼܠܐܬ ܝܣܐܒܝ)، ܥܡ ܡܢܝܢܐ ܡܢ ܦܘܪ̈ܢܣܝܐ ܘܦܪ̈ܨܘܦܐ ܡܪ̈ܕܘܬܢܝܐ ܘܐܡܢܝ̈ܐ ܥܒܘܕ̈ܐ، ܡܢܝܗܝ ܡܚܘܪܬܐ (ܡܐܪܝܢܐ ܒܝܢܓ̰ܐܡܝܢ)، ܘܡܚܘܪܐ ( ܢܝܢܘܣ ܢܝܪܐܪܝ)݂، ܘܐܡܢܐ (ܦܐܣܝܠܝ).
ܘܣܥܪܠܗ (ܐܘܓܼܢܐ) ܒܝܬ ܐܪ̈ܟܐ ܕܒܢܐܦܠ ܢܩܝܦܐ ܠܡܫܬܐܣܬܐ، ܗܘ ܕܚܒܫ ܡܢܝܢܐ ܪܒܐ ܡܢ ܟܬܒ̈ܐ ܘܐܫܛܪ̈ܐ ܛܝܡܢ̈ܐ ܐܢܝ ܕܣܓܼܠܢܝ ܬܫܥܝܬܐ ܘܝܪܬܘܬܐ ܕܥܡܢ. ܘܐܦ ܗܕܟ ܣܥܪܠܗ ܡܕܪܫܬܐ ܕܪܘܫܡܐ ܘܐܡܢ̈ܐ ܣܘܟܡܝ̈ܐ ܘܡܕܪܫܬܐ ܕܡܘܣܝܩܐ ܢܩܝܦܬܐ ܠܡܫܬܐܣܬܐ ܟܕ ܫܡܥܠܗ ܠܦܘܫܩܐ ܐܪܝܟܐ ܥܠ ܟܫܝܪ̈ܘܬܐ ܐܡܢܝ̈ܐ ܘܡܠܦܢܘܬܢܝ̈ܐ ܐܢܝ ܕܡܩܪܒܐܠܗܘܢ ܡܫܬܐܣܬܐ ܠܬܫܡܫܬܐ ܕܒܢܝ̈ ܓܠܘܝܘܬܐ.
ܘܒܡܬܚܐ ܕܣܥܘܪܘܬܐ، ܫܘܪܪܠܗ (ܐܘܓܼܢܐ) ܥܠ ܐܢܢܩܝܘܬܐ ܕܚܝܠܢܬܐ ܕܥܘܕܪܢܐ ܡܪܕܘܬܢܝܐ ܒܝܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܫܘܬܐܣ̈ܐ ܡܪ̈ܕܘܬܢܝܐ ܒܓܠܘܬܐ، ܒܢܝܫܐ ܕܣܢܕܬܐ ܕܗܝܝܘܬܐ ܡܪܕܘܬܢܝܬܐ ܕܥܡܢ ܘܚܝܠܢܬܗܿ
ܘܟܐܬܝܐ ܗܕ ܣܥܘܪܘܬܐ ܡܢ ܟܪܘܟܝܐ ܕ(ܐܘܓܼܢܐ) ܓܘ ܐܘܚܕܢ̈ܐ ܡܚܝܕ̈ܐ، ܗܝ ܕܚܒܫܠܗܿ ܫܘܬܦܬܗ ܒܠܘܡܕܐ ܕRootsTech 2025 ܒܐܘܚܕܢܐ ܕܝܘܬܐ، ܟܕ ܫܘܬܦܠܗ ܓܘ ܥܒܘܕܘ̈ܬܗ ܐܝܟ ܐܪܚܐ ܕܐܝܩܪܐ. ܘܡܘܩܪܒܠܗ ܐܡܘܪܘܬܐ ܐܢܢܩܝܬܐ ܓܘ ܒܝܬ ܨܘܒܐ ܕܗܐܪܦܪܕ ܥܠ ܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܥܡܢ ܘܚܝܠܢܬܗ ܒܥܝܪܩ ܕܪܝܐ.
