ܬܘܡܡܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܟܪܘܟܼܝܗ ܓܘ ܠܒܢܢ، ܕܐܙܠ ܠܓܪܒܝܐ ܨܘܒܿ ܡܕܝܢ̄ܬܐ ܕܐܠܒܬܪܘܢ ܒܗܘܦܪܟܝܐ ܕܓܪܒܝܐ ، ܒܢܝܫܐ ܕܥܒܕܬܐ ܕܐܣܘܪ̈ܐ ܕܚܘܠܦܐ ܡܪܕܘܬܢܝܐ ܒܝܢ ܥܕܥܐܕܗܿ ܬܒܠܝܐ ܘܥܕܥܐܕ̈ܐ ܕܦܝܫܝ ܥܒܝܕܐ ܒܦܢܝ̈ܬܐ ܕܥܡܢ ܓܘ ܐܬܪܐ.
ܘܬܦܩܠܗ “ܐܘܓܼܢܐ” ، ܝܘܡ ܥܪܘܒܬܐ 26 ܢܝܣܢ 2024 ، ܘܥܠ ܦܬܘܪܐ ܕܫܪܘܬܐ (ܟܘܬܪܐ) ܗܘ ܕܦܝܫܠܗ ܥܒܝܕܐ ܥܠ ܐܝܩܪܗ، ܒܪܫ ܟܪܟܝܘܬܐ ܕܐܠܒܬܪܘܢ ܪܫܐ ܕܚܘܝܕܐ ܕܟܪ̈ܟܝܘܬܐ ܕܦܢܝܬܐ ܕܐܠܒܬܪܘܢ “ܡܐܪܣܠܝܢܘ ܐܠܚܪܟ”، ܢܛܪ ܐ̄ܪܙܐ ܕܥܕܥܐܕ̈ܐ ܕܐܠܒܬܪܘܢ ܬܒܠܝ̈ܐ ” ܣܝܡܘܢ ܒܝܒܐܢ”، ܪܫ ܒܝܬ ܣܡܟܐ ܕܒܬܪܘܢ ܐܬܠܝܛܝܐ “ܝܘܣܦ ܒܐܣܝܠ” ܘܗܕܡܐ ܕܡܘܬܒܐ ܕܟܪܟܝܘܬܐ “ܥܣܐܦ ܡܗܢܐ”، ܥܡ ܡܕܒܪܢܘܬܐ ܕܟܢܘܫܬܐ ܕܒܬܪܘܢܝܐܬ.
ܘܕܪܫܠܗܘܢ ܓܘ ܬܦܩܬܐ ܣܕܝܪܘܬܐ ܕܦܘܠܚܢ̈ܐ ܒܢܝܫܐ ܕܚܘܠܦܐ ܡܪܕܘܬܢܝܐ ܘܐܬܠܝܛܝܐ ܘܕܝܪܘܬܝܐ ܒܝܢ ܐܢܝ ܡܕܝ̈ܢܬܐ، ܐܢܝ ܕܝܠܝܗܝ ܩܘܒܠܬܐ ܕܝܪܘܬܝܬܐ ܐܢܢܩܝܬܐ ܓܘ ܠܒܢܢ، ܘܒܝܢ ܦܢܝܬܝ̈ܢ ܓܘ ܩܠܝܡܐ، ܒܢܝܫܐ ܕܚܝܠܢܬܐ ܕܐܣܘܪ̈ܐ ܒܝܢ ܒܢܝ̈ ܥܡܢ ܒܐܬܪ̈ܘܬܐ ܕܡܕܢܚܐ.
ܘܡܣܘܙܓܪܗܘܢ ܒܟܦܫܬܐ ܥܠ ܥܘܕܪܢܐ ܒܓܝܓܼܠܐ ܕܚܘܠܦܐ ܡܪܕܘܬܢܝܐ ܒܝܢ ܥܕܥܐܕ̈ܐ ܕܐܠܒܪܬܘܢ ܬܒܠܝ̈ܐ ܘܥܕܥܐܕ̈ܐ ܐܢܝ ܡܛܟܣܐܠܗܘܢ ܫܢ̄ܬܐܝܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܘܫܘܪܪܠܗܘܢ ܥܠ ܐܢܢܩܝܘܬܐ ܕܐܣܘܪܐ ܕܡܕܝ̈ܢܬܐ ܕܥܡܢ ܓܘ ܥܝܪܩ ܒܓܝܓܼܠܐ ܕܬܓܪܘܬܐ، ܕܝܪܘܬܐ ܘܡܪܕܘܬܐ ܥܡ ܡܕܝܢ̄ܬܐ ܕܐܠܒܬܪܘܢ ܓܘ ܠܒܢܢ .
ܘܐܦ ܗܕܟ ܣܥܪܠܗ “ܐܘܓܼܢܐ” ܒܡܬܚܐ ܕܟܪܘܟܼܝܗ ܓܘ ܡܕܝܢ̄ܬܐ، ܟܢܘܫܬܐ ܕܒܪܬܘܢܝܐܬ، ܒܝܬ ܣܡܟܐ ܕܥܠܝܡ̈ܐ ܕܒܬܪܘܢ ܐܬܠܝܛܝܐ، ܘܟܪܟܠܗ ܒܐܪܚܘܬܐ ܕܣܩܒܠܢ̈ܗ ܓܘ ܒܝܬ ܡܬܘܬܒܐ ܠܒܢܢܝܐ ܒܩܠܥܐ ܥܬܝܩܬܐ ܓܘ ܐܠܒܬܪܘܢ، ܥܡ ܫܘܩ̈ܐ ܕܡܕܝܢ̄ܬܐ ܘܬܪ̈ܡܝܬܐ ܫܘܘܚܝ̈ܐ ܠܚܙܝܬܐ ܕܡܛܘܪܢܘܬܐ ܘܩܘܝܡܐ ܥܘܡܪܢܝܐ ܓܘ ܦܢܝܬܐ.
ܘܦܝܫ ܕܟܝܪܐ، ܕܡܕܝܢ̄ܬܐ ܕܐܠܒܬܪܘܢ ܦܝܫܐ ܡܚܘܫܒܢܬܐ ܚܕܐ ܡܢ ܦܢܝ̈ܬܐ ܕܝܪ̈ܘܬܢܝܐ ܪ̈ܫܝܐ ܓܘ ܠܒܢܢ، ܟܕ ܚܒܫܐ ܡܢܝܢܐ ܡܢ ܥܕ̈ܬܐ ܡܪ̈ܘܢܝܐ ܘܐܪ̈ܬܕܘܟܣܝܐ ܝܘܢܢܝܐ ܬܫܥܝܬܢܝ̈ܐ، ܘܦܝܫܝ ܥܒܝܕܐ ܒܡܕܝܢ̄ܬܐ ܕܐܠܒܬܪܘܢ ܥܠ ܝܘܪܟܐ ܕܫܢ̄ܬܐ ܡܢܝܢܐ ܡܢ ܙܘܝܚ̈ܐ ܘܥܒܘܕܘ̈ܬܐ ܬܒܠܝ̈ܐ ܐܝܟ ܥܕܥܐܕܐ ܕܐܠܒܬܘܪܢ ܩܝܛܝܐ ܫܢ̄ܬܢܝܐ ܘܩܘܕܫܐ ܕܝܡܐ ܘܥܐܕܐ ܕܠܝܡܘܢܨܿܐ.
