ܫܘܪܐܠܗܘܢ ، ܝܘܡ ܚܡܫܒܫܒܐ 5 ܐܝܠܘܠ 2024، ܓܘ ܐܘܢܐ ܕܩܨܪܐ ܕܣܗܕܐ ܣܥܕ ܥܒܕܠܠܗ ܕܠܘܡܕ̈ܐ ܒܐܪܒܝܠ، ܦܘܠܚܢ̈ܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܗܘ ܡܛܟܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܘܒܥܘܕܪܢ ܥܡ ܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܓܘ ܥܢܟܒܐ ܒܐܪܒܝܠ، ܒܪܥܝܘܬ ܪܫ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ (ܡܣܪܘܪ ܒܐܪܙܢܝ) ܘܬ̄ܚܘܬ ܪܘܫܡܐ (ܣܘܪܝܝܘܬܐ ܡܪܕܘܬܼܐ ܚܝܬܐ ܡܬܥܫܢܐ ܐܣ̈ܐ ܕܡܩܘܝܢܘܬܢ).
ܘܦܝܫܠܗܘܢ ܡܛܝܒ̈ܐ ܠܚܘܪ̈ܩܢܐ ܕܦܘܬܚܐ، ܡܫܕܪܘܬܐ ܫܘܠܛܢܝܬܐ ܥܠܝܬܐ ܚܒܫܠܗܿ ܪܫ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ( ܡܣܪܘܪ ܒܐܪܙܢܝ)، ܘܙܝܪܐ ܕܫܘܟܢ̈ܐ ܘܨܒܘ̈ܬܐ ܬܘܕܝܬܢܝ̈ܐ (ܦܫܬܝܘܐܢ ܨܐܕܩ)، ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ (ܐܢܘ ܓ̰ܘܗܪ ܥܒܕܘܟܐ)، ܘܙܝܪܐ ܕܩܠܝܡܐ ܕܨܒܘ̈ܬܐ ܕܡܟܝܢ̈ܬܐ ( ܐܝܕܢ ܡܥܪܘܦ)̤ ܗܘܦܪܟܝܐ ܕܐܪܒܝܠ ( ܐܘܡܝܕ ܚܘܫܢܘ)، ܘܟܝܠܐ ܕܘܙܝܪܐ ܕܡܪܕܘܬܐ ܘܥܠܝܡ̈ܐ ( ܐܪܝܐܢ ܨܠܐܚ ܐܠܕܝܢ) ܘܡܫܕܪܘܬܐ ܡܢ ܘܙܝܪܘܬ ܡܪܕܘܬܐ ܘܕܝܪܘܬܐ ܘܥܬܩ̈ܐ ܚܘܝܕܝܬܐ ܘܦܪ̈ܨܘܦܐ ܪ̈ܘܫܡܝܐ ܘܬܘܕܝܬܢܝ̈ܐ ܘܒܩܘܕܡܝܗܝ ܦܛܪܝܪܟܐ ܕܥܕܬܐ ܕܡܕܢܚܐ ܐܬܘܪܝܬܐ ܓܘ ܥܝܪܩ ܘܬܒܝܠ ܩܕܝܫܘܬܗ ܕܦܛܪܝܪܟܐ ܡܪܝ (ܐܒܐ ܬܠܝܬܝܐ)، ܩܝܘܡܐ ܦܛܪܝܪܟܝܐ ܕܕܪ̈ܫܝܬܐ ܣܘܪ̈ܝܝܐ ܓܘ ܥܕܬܐ ܣܘܪܝܝܬܐ ܐܪܬܕܘܟܣܝܬܐ ܡܪܝ (ܣܘܝܪܝܘܣ ܪܘܓ̰ܝܗ ܐܚܪܣ)، ܪܫ ܐܦܣܩܘܦ̈ܐ ܕܐܪܒܝܠ ܕܥܕܬܐ ܟܠܕܝܬܐ ܡܪܝ ( ܒܫܐܪ ܘܪܕܐ)، ܪܫ ܐܦܣܩܘܦ̈ܐ ܕܡܘܨܠ ܘܢܩܝܦ̈ܘܬܗܿ ܕܟܠܕܝ̈ܐ ܡܪܝ (ܢܓ̰ܝܒ ܡܝܟܐܝܠ)، ܪܥܝܐ ܕܡܪܥܝܬܐ ܕܚܕܝܒ ܕܣܘܪ̈ܝܝܐ ܩܬܘܠܝܩܝ̈ܐ ܓܘ ܐܪܒܝܠ ܡܝܛܪܦܘܠܝܛܐ ܡܪܝ (ܢܬܢܝܐܝܠ ܢܙܐܪ ܥܓ̰ܡ)، ܪܥܝܐ ܕܡܪܥܝܬܐ ܕܡܘܨܠ ܘܟܪܟܘܟ ܘܩܠܝܡܐ ܕܟܘܪܕܣܬܢ ܕܣܘܪ̈ܝܝܐ ܐܪ̈ܬܕܘܟܣܝܐ ܡܪܝ (ܢܝܩܘܕܝܡܘܣ ܕܘܝܕ ܡܬܝ ܫܪܦ)، ܘܡܢܝܢܐ ܡܢ ܡܫܕܪ̈ܘܬܐ ܪ̈ܘܫܡܝܐ ܘܟܢܫܐ ܡܢ ܐܟܕܝܡܝ̈ܐ ܘܒܨܘܝ̈ܐ ܘܝܨܘܦ̈ܐ ܒܓܝܓܠܐ ܡܪܕܘܬܢܝܐ ܣܘܪܝܝܐ ܓܘ ܩܠܝܡܐ ܕܟܘܪܕܣܬܢ ܘܥܝܪܩ ܘܦܢܝܬܐ.
ܘܫܘܪܐܠܗ ܙܘܝܚܐ ܕܦܘܬܚܐ ܥܒܘܕܘ̈ܬܗ، ܒܟܠܝܬܐ ܕܚܕ ܕܩܝܩܐ ܕܫܬܩܐ ܥܠ ܪ̈ܘܚܐ ܕܣܗܕ̈ܐ ܕܥܡܢ ܘܬܒܝܠ ܟܠܗ، ܒܬܪ ܗܕܟ ܡܘܩܪܒܠܗ ܝܗܠܐ ܕܒܪܡܝܐ ܣܘܪܝܝܐ ܐܬܝܢܐ ܡܢ ܡܕܝܢ̄ܬܐ ܕܩܡܫܠܝ ܒܣܘܪܝܼܐ ܚܕ ܐܘܦܪܝܬ ܦܠܟܠܘܪܝܐ ܪܩܕܝܐ.
ܒܬܪ ܐܘܦܪܝܬ، ܡܡܠܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܗܘ ܕܫܘܪܪܠܗ ܓܘܗ ܕ( ܗܢ ܓܕܫܐ ܐܟܕܝܡܝܐ ܩܕܡܝܐ ܡܢ ܐܕܫܗ ܥܠ ܫܘܝܐ ܕܥܝܪܩ ܘܩܠܝܡܐ ܕܟܘܪܕܣܬܢ، ܟܐܬܐ ܒܛܥܡܐ ܦܪܝܫܐ ܒܥܠܬܐ ܕܦܝܫ ܥܒܝܕܐ ܥܠ ܐܪܥܐ ܕܐܒܗ̈ܬܐ ܒܛܥܡܐ ܕܐܬܪܐ ܗܘ ܕܚܦܩ ܐܕܝܘܡ ܝܠ̈ܕ̄ܗ)، ܘܪܡܙܠܗ (ܢܝܫܗ ܝܠܗ ܟܦܫܬܐ ܕܒܨܘܝ̈ܐ ܓܘ ܡܪܕܘܬܢ ܣܘܪܝܝܬܐ، ܘܦܪܝܫܐܝܠܗ ܒܛܘܝܒܐ ܐܣܟܝܡܝܐ ܘܡܢܝܢܝܐ ܘܡܦܪܐ ܦܘܪܣܐ ܕܚܘܠܦܐ ܕܚܘܫܒ̈ܐ ܘܢܘܣܝ̈ܐ ܘܡܘܗܒܝ̈ܬܐ).
ܘܡܘܒܝܢܗ (ܐܘܓܼܢܐ)، (ܡܕܒܪܢܘܬܢ ܘܒܐܘܪܚܐ ܡܐ ܡܘܩܪܒܠܗܿ ܠܛܘܪܢܬܐ ܕܩܐܡ ܡܪܕܘܬܢܝܐ ܣܘܪܝܝܐ ܫܒܘܩ ܡܢ ܐܝܟܢܘ̈ܬܐ ܡܠܝ̈ܐ ܥܣܩ̈ܐ ܓܘ ܩܠܝܡܐ، ܐܠܐ ܐܬܝܠܗܿ ܗܕ ܦܣܘܥܬܐ ܡܢ ܗܝܡܢܘܬܢ ܒܨܒܘܬܐ ܕܗܢ ܥܡܐ ܘܟܠܝܬܗ، ܘܗܢ ܡܢܕܝ ܟܡ ܝܪܬܘܚܠܗ ܡܢ ܐܒܗܬܝ̈ܢ ܐܢܝ ܕܡܘܩܪܒܠܗܘܢ ܟܠ ܡܢܕܝ ܛܝܡܢܐ ܠܦܝܫܬܐ ܘܦܪܣܬܐ ܕܡܪܕܘܬܢ، ܘܫܘܪܪܠܗ ܒܝܬ ܥܕܢܐ ܥܠ ܓܪܐ ܕܪܫ ܘܙܝܪ̈ܐ ܕܩܠܝܡܐ ܡܝܩܪܐ (ܡܣܪܘܪ ܒܐܪܙܢܝ) ܒܪܥܝܘܬܐ ܕܗܢ ܠܘܡܕܐ ܘܣܢܕܬܐ ܕܡܟܝܢ̈ܬܐ ܐܘܡܬܢܝ̈ܐ ܓܘ ܩܠܝܡܐ ܕܟܘܪܕܣܬܢ.
ܘܚܬܡܠܗ (ܐܘܓܼܢܐ) ܡܡܠܗ، ( ܒܫܪܪܬܐ ܕܗܘܐ ܣܝܡܦܘܙܝܘܡ ܚܕ ܫܘܦܐ ܝܘܠܦܢܝܐ، ܡܒܗܪ ܪܒܐ ܓܢ̄ܒܢ̈ܐ ܡܢ ܕܪ̈ܫܝܬܐ ܣܘܪ̈ܝܝܐ، ܘܦܘܠܚܢܐ ܠܛܘܪܢܬܐ ܕܫܒܝܠ̈ܐ ܕܕܪܫܬܐ ܕܠܫܢܐ ܣܘܪܝܝܐ، ܥܡ ܐܣܛܪ̈ܛܝܓܼܝܐ ܕܟܠܝܬܗ ܘܦܝܫܬܗ ܒܕܥܬܝܕ ܥܠ ܐܪܥܗ ܬܫܥܝܬܢܝܬܐ.
ܒܬܪ ܗܕܟ ܡܘܩܪܒܠܗ ܪܫ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ (ܡܣܪܘܪ ܒܐܪܙܢܝ)، ܡܡܠܗ، ܗܘ ܕܫܘܪܪܠܗ ܓܘܗ (ܟܘܪܕܣܬܢ ܝܗ̄ܘܬ ܒܐܡܝܢܘܬܐ ܚܕ̄ ܫܘܦܐ ܕܐܘܡܬܝ̈ܘܬܐ ܘܬܘܕܝ̈ܬܐ ܡܫܚܠܦ̈ܐ، ܘܐܚܢܝ ܘܠܝܬܐܝܠܗܿ ܥܠܢ ܚܡܝܬܐ ܕܗܕ ܚܝܝܬܐ ܘܚܝܠܢܬܗܿ، ܗܝ ܕܫܩܠܘܚ ܓܘܗܿ ܫܘܒܗܪܐ، ܘܝܗ̄ܒܠܗ ܘܥܕܐ ܒܐܡܝܢܝܘܬܐ ܕܝܨܝܦܘܬܐ ܒܠܫܢܐ ܘܡܪܕܘܬܐ ܣܘܪܝܝܐ ܘܟܠܝܗܝ ܡܟܝܢ̈ܬܐ ܡܫܚܠܦ̈ܐ ܓܘ ܟܘܪܕܣܬܢ، ܐܝܟ ܝܠܗ ܒܐܡܝܢܘܬܐ).
ܒܬܪ ܗܕܟ، ܡܘܩܪܒܠܗ ܦܛܪܝܪܟܐ ܕܥܕܬܐ ܕܡܕܢܚܐ ܐܬܘܪܝܬܐ ܓܘ ܥܝܪܩ ܘܬܒܝܠ ܩܕܝܫܘܬܗ ܕܡܪܝ (ܐܒܐ ܬܠܝܬܝܐ) ܡܡܠܐ ܒܦܘܪܣܐ ܕܦܘܬܚܐ، ܗܘ ܕܩܘܠܣܠܗ ܓܘܗ ܒܓܪܐ ܕܡܕܒܪܢܘܬܐ ܓܘܢܝܬܐ ܕܡܪܕܬܐ ܘܐܡܢ̈ܐ ܣܘܪ̈ܝܝܐ ܒܛܘܪܢܬܐ ܕܩܐܡ ܡܪܕܘܬܢܝܐ ܣܘܪܝܝܐ ܒܐܬܪܐ، ܒܬܪ ܗܕܟ ܦܝܫܠܗܿ ܩܪܝܬܐ ܐܓܪܬܐ ܕܦܛܪܝܪܟܐ ܕܥܕܬܐ ܟܠܕܝܬܐ ܩܬܘܠܝܩܝܬܐ ܡܪܝ (ܠܘܝܣ ܣܐܟܘ)، ܒܬܪ ܗܕܟ ܐܓܪܬܐ ܕܦܛܪܝܪܟܐ ܕܥܕܬܐ ܣܘܪܝܝܬܐ ܩܬܘܠܝܩܝܬܐ ܡܪܝ (ܐܓܼܢܐܛܝܘܣ ܝܘܣܦ ܬܠܝܬܝܐ ܝܘܢܢ)، ܘܡܡܠܐ ܕܦܪܘܦܝܣܘܪܐ ܓܘ ܒܝܬ ܨܘܒܐ ܕܐܟܣܦܘܪܕ (ܣܝܒܐܣܬܝܢ ܒܪܘܟ).
ܘܒܬܪ ܡܡܠܐ ܕ(ܒܪܘܟ)، ܦܝܫܠܗ ܡܘܩܪܒܐ ܕܫܢܐ ܠܪܫ ܘܙܝܪ̈ܐ ܕܩܠܝܡܐ ܡܝܩܪܐ (ܡܣܪܘܪ ܒܐܪܙܢܝ) ܒܝܕ ܦܛܪܝܪܟܐ ܡܪܝ (ܐܒܐ ܬܠܝܬܝܐ ) ܘܡܝܛܪ̈ܦܘܠܝܛܐ ܙܗܝ̈ܐ، ܒܬܪ ܗܕܟ ܡܡܠܐ ܕܓܘܫܡܐ ܡܕܒܪܢܝܐ ܕܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܒܝܕ ܗܕܡܐ ܕܓܘܫܡܐ ܣܦܪ̈ܐ (ܐܕܝܒ ܓܘܓܐ)، ܒܬܪ ܗܕܟ ܡܡܠܐ ܕܣܝܥܬܐ ܛܘܝܒܝܬܐ ܕܣܝܡܦܘܙܝܘܡ ܦܝܫܠܗ ܡܘܩܪܒܐ ܒܝܕ ܣܦܪܐ ܘܡܬܢܝܢܐ (ܦܛܪܘܣ ܢܒܬܝ)، ܗܘ ܕܬܢܐܠܗ ܒܐܪܝܟܘܬܐ ܚܕܪ ܬܚܡܠܬܐ ܕܥܒܕܬܐ ܕܣܝܡܦܘܙܝܘܡ ܘܡܘܩܪܒܠܗ ܒܝܬ ܥܕܢܐ ܩܘܒܠܛܝܒܘܬܗ ܠܣܢܕܢ̈ܐ ܘܒܨܘܝ̈ܐ ܡܫܘܬܦ̈ܐ ܒܒܘܨܝܝ̈ܗܝ ܐܬܝܢ̈ܐ ܡܢ ܓܘܝܐ ܕܥܝܪܩ ܘܒܪܝܗ، ܘܩܘܠܣܠܗ ܐܦ ܗܕܟ ܒܦܘܠܚܢܐ ܕܣܝܥܬܐ ܚܝܘܪܬܐ ܠܓܪܗܿ ܒܛܘܝܒܐ ܕܚܘܪ̈ܙܐ ܕܣܝܡܦܘܙܝܘܡ.
ܘܦܝܫܠܗ ܥܒܝܕܐ ܒܚܘܬܡܐ ܕܙܘܝܚܐ ܕܦܘܬܚܐ، ܒܝܬ ܓܠܚܐ ܕܟܬܒ̈ܐ ܣܘܪ̈ܝܝܐ ܘܡܢܝܢܐ ܡܢ ܛܒܝܥ̈ܬܐ ܕܝܠܢܝ̈ܐ ܒܝܠܝܦܘܬܐ ܕܠܫܢܐ ܣܘܪܝܝܐ، ܥܡ ܦܪ̈ܝܣܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܪܐ ܕܐܣܘܪܐ ܒܓܝܓܼܠܐ ܕܠܫܢܐ ܣܘܪܝܝܐ.
ܘܚܒܫܠܗܘܢ ܝܬܒܝ̈ܬܐ ܕܝܘܡܐ ܩܕܡܝܐ ܡܢ ܣܝܡܦܘܙܝܘܡ، ܬܪܬܝܢ ܚܠܩܝ̈ܬܐ ܕܘܪ̈ܫܝܐ (ܐ) ܓܘ ܐܘܢܐ ܕܒܐܡܐ ܕܢܘܪܘܙ ܥܠ ܣܦܪܝܘܬܐ ܣܘܪܝܝܬܐ ܒܟܪܬܐ، ܥܡ ܡܡܠܐ ܕܚܝܘܪܐ ܦܪܘܦܝܣܘܪܐ (ܣܝܒܐܣܬܝܢ ܒܪܘܟ) ܡܢ ܒܝܬ ܨܘܒܐ ܕܐܟܣܦܘܪܕ، ܒܡܠܟܘܬܐ ܡܚܝܕܬܐ، ܒܬܪ ܗܕܟ ܡܡܠܐ ܕܕܟܬܘܪ (ܝܘܗܢܐܣ ܐܕܘܡܢܕܙ) ܡܢ ܒܝܬ ܨܘܒܐ ܕܡܘܢܣܬܪ، ܒܐܠܡܢܝܐ (ܡܢ ܣܢܚܝܪܝܒ ܠܚܡܒܝܫܐܝܐ: ܛܝܡܢܬܐ ܕܦܝܫܬܐ ܕܡܪܕܘܬܐ ܕܐܬܪܐ ܕܒܝܬ ܢܗܪܝܢ ܒܕܪܐ ܦܪܙܠܝܐ ܓܘ ܣܦܪܝܘܬܐ ܘܦܠܟܠܘܪܐ ܐܪܡܝܐ ܢܩܝܦܐ- ܒܠܫܢܐ ܐܢܓܠܝܙܝܐ).
ܒܬܪ ܗܕܟ ܥܡ ܕܟܬܘܪ ( ܐܡܘܕ ܘܐܪ) ܡܢ ܒܝܬ ܨܘܒܐ ܕܡܐܪܕܝܢ ܐܪܬܩܠܘ ܒܬܘܪܟܝܐ (ܛܘܦ̮ܣܐ ܕܐܡܦܪܛܘܪܐ ܪܗ̄ܘܡܢܝܐ ܐ̄ܚܪܝܐ ܓܘ ܨܚܚ̈ܐ ܣܘܪ̈ܝܝܐ ܚܙܬܢܝ̈ܐ: ܬܢܝܬܐ ܕܚܝܪܬܐ ܓܘ ܨܒܼ̈ܘܬܐ ܒܝܬܝܘܬܢܝ̈ܐ ܘܕܝܠܝ̈ܬܐ-ܒܠܫܢܐ ܐܢܓܠܝܙܝܐ)، ܒܬܪ ܗܕܟ ܕܟܬܘܪ (ܒܝܪܬ ܓ̰ܐܟܘܒܣ) ܡܢ ܒܝܬ ܨܘܒܐ ܩܬܘܠܝܩܝܐ ܓܘ ܠܘܦܝܢ، ܒܠܓ̰ܝܟܐ ، ( ܬܢܝܬܐ ܕܒܢܝܬܐ ܕܦܘܠܚܢ̈ܐ ܬܐܘܠܘܓܼܝ̈ܐ ܣܘܪ̈ܝܝܐ ܬܠܝܩ̈ܐ: ܐܝܟܢܘܬܐ ܕܡܘܫܐ ܒܪ ܟܐܦܐ-ܒܠܫܢܐ ܐܢܓܠܝܙܝܐ).
ܘܚܠܩܬܐ ܕܘܪܫܝܬܐ ܬܪܝܢܝܬܐ (ܒ)، ܗܝ ܕܦܝܫܠܗܿ ܥܒܝܕܬܐ ܓܘ ܐܘܢܐ ܕܢܘܪܘܙ ܦܠܐܬ، ܥܠ ܣܦܪܝܘܬܐ ܣܘܪܝܝܬܐ ܓܘ ܕܪ̈ܐ ܡܨܥܝ̈ܐ، ܚܝܘܪܬܐ ܕܟܬܘܪܬܐ (ܐܛܠܐܠ ܣܐܠܡ ܚܢܐ ܦܛܪܘܣ ܐܠܩܣ ܚܢܐ) ܡܢ ܒܝܬ ܨܘܒܐ ܕܚܡܕܢܝܐ، ܒܬܪ ܗܕܟ ܡܠܦܢܐ ܕܟܬܘܪ ( ܟܼܡܝܣ ܓܼܪܒܝ ܚܣܝܢ) ܡܢ ܒܝܬ ܨܘܒܐ ܕܬܟܪܝܬ، (ܓܪܐ ܕܡܬܪ̈ܓܡܢܐ ܣܘܪ̈ܝܝܐ ܓܘ ܛܘܪܢܬܐ ܕܡܕܝܢܝܘܬܐ ܥܪܒܝܬܐ ܘܚܝܝܬܐ ܒܫܠܡܐ ܒܝܢ ܬܘܕܝ̈ܬܐ- ܒܠܫܢܐ ܥܪܒܝܐ)، ܘܒܚܪܬܐ ܥܡ ܡܠܦܢܐ ܕܟܬܘܪ (ܒܗܐܐ ܥܐܡܪ ܥܒܘܕ) ܡܢ ܒܝܬ ܨܘܒܐ ܕܒܓܕܕ، ܘܒܨܘܝܐ (ܢܪܣܝ ܓ̰ܒܪܐܝܠ ܚܢܐ ܡܐܡܘܟܐ) ܡܢ ܒܝܬ ܨܘܒܐ ܕܡܘܨܠ ( ܕܪܫܬܐ ܕܬܘܪܨ ܡܡܠܐ ܕܠܫܢܐ ܣܘܪܝܝܐ ܓܘ ܣܪܝܛܬܐ ܕܐܝܠܝܐ ܐܠܛܝܪܗܐܢܝ).
ܘܦܝܫ ܕܟܝܪܐ، ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܗܘ ܦܝܫ ܩܛܝܪܐ ܠܡܬܚܐ ܡܢ 5-8 ܐܝܠܘܠ ܩܐܡܝܐ، ܒܕ ܩܛܪ ܝܬܒܝ̈ܬܗ ܐܬܝܢ̈ܐ ܓܘ ܐܘܢܐ ܕܠܘܡܕ̈ܐ ܕܒܝܬ ܨܘܒܐ ܩܬܘܠܝܩܝܐ/ܐܪܒܝܠ ܘܐܘܢܐ ܕܠܘܡܕ̈ܐ ܕܦܛܪܝܪܟܐ ܡܪܝ ܝܘܣܦ ܫܬܝܬܝܐ ܐܘܕܘ ܒܕܝܪܐ ܕܣܗܕܐ ܓ̰ܒܪܐܝܠ ܕܢܒܘ، ܓܘ ܥܢܟܒܐ ܒܐܪܒܝܠ، ܘܚܒܫܝ ܦܘܠܚܢ̈ܗ ܣܥܘܪ̈ܘܬܐ ܠܩܢܛܪܘܢ ܡܪܕܘܬܢܝܐ ܕܢܛܪܬܐ ܕܣܪ̈ܝܛܬܐ ܣܘܪ̈ܝܝܐ ، ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܘܩܢܛܪܘܢ ܕܡܟܬܒܼܢܘܬܐ ܪܩܡܝܬܐ ܕܣܪ̈ܝܛܬܐ ܡܕܢܚܝ̈ܐ.
