ܫܘܪܐܠܗܘܢ ܝܘܡ ܬܠܬܒܫܒܐ 1 ܢܝܣܢ 2025، ܥܒܘܕܘ̈ܬܐ ܕܥܕܥܐܕܐ ܕܥܢܟܒܐ- ܐܟܝܬܘ، ܗܘ ܕܦܝܫ ܥܒܝܕܐ ܙܘܝܚܐ ܒܦܘܪܣܐ ܕܥܐܕ̈ܐ ܕܐܟܝܬܘ ܪܫܐ ܕܫܢ̄ܬܐ ܐܘܡܬܢܝܬܐ ܚܕܬܐ، ܗܘ ܡܛܟܣܠܗ ܒܐܡܐ ܕܥܕܥܐܕܐ ܕܥܢܟܒܐ، ܒܪܥܝܘܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܥܘܕܪܢ ܥܡ ܩܢܛܪܘܢ ܐܟܕܝܡܝܐ ܟܢܘܫܝܝܐ ܘܒܝܬ ܣܡܟܐ ܕܥܠܝܡ̈ܐ ܕܥܢܟܒܐ، ܥܠ ܓܢܢ̈ܐ ܕܩܢܛܪܘܢ ܐܟܕܝܡܝܐ ܟܢܘܫܝܝܐ ܓܘ ܥܢܟܒܐ.
ܘܚܒܫܠܗ ܝܘܡܐ ܩܕܡܐ ܕܥܕܥܐܕܐ، ܗܘ ܒܕ ܡܓܪܫܝ ܥܒܘܕܘ̈ܬܗ ܗܠ ܚܘܬܡܐ ܕܫܒܘܥܐ ܩܐܡܝܐ، ܓܠܚ̈ܐ ܐܡܢܝ̈ܐ ܘܡܪ̈ܕܘܬܢܝܐ ܦܝܫܝ ܡܘܩܪܒܐ ܒܝܕ ܡܢܝܢܐ ܡܢ ܐܡܢ̈ܐ ܕܥܡܢ، ܡܢܝܗܝ ( ܣܪܓܘܢ ܝܘܚܢܢ، ܣܐܟܘ ܣܐܟܐ، ܢܝܢܘܣ ܐܕܘܪ، ܙܐܢܐ ܡܓ̰ܝܕ)، ܥܡ ܓܠܚ̈ܐ ܦܠܟܠܘܪ̈ܝܐ ܦܝܫܝ ܡܘܩܪܒܐ ܒܝܕ ܝܗܠܐ ܣܘܪܝܝܐ ܕܐܡܢ̈ܐ، ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ.
ܘܦܝܫܠܗܘܢ ܡܛܝܒܐ ܒܝܘܡܐ ܩܕܡܝܐ ܕܥܕܥܐܕܐ ܐܠܦܝ̈ܐ ܡܢ ܒܢܝ̈ ܥܡܢ، ܒܐܐܪ̈ܐ ܙܘܝܚܝ̈ܐ ܦܪ̈ܝܫܐ، ܡܥܒܪܝ ܥܠ ܫܘܒܗܪܐ ܒܗܝܝܘܬܐ ܐܘܡܬܢܝܬܐ ܘܝܘܪܬܢܐ ܡܪܕܘܬܢܝܐ ܕܥܡܢ ܒܐܬܪܐ.
