ܡܛܘܟܣܠܗܿ ܡܕܒܪܢܘܬܐܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܒܥܘܕܪܢ ܥܡ ܡܕܒܪܢܘܬܐ ܓܘܢܝܬܐ ܕܡܠܦܢܘܬܐ ܣܘܪܝܝܬܐ، ܝܘܡ ܚܡܫܒܫܒܐ 20 ܫܒܛ 2025، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ، ܥܒܘܕܘ̈ܬܐ ܕܝܘܡܐ ܙܘܝܚܝܐ ܕܝܠܢܝܐ ܒܦܘܪܣܐ ܕܝܘܡܐ ܬܒܠܝܐ ܕܠܫܢܐ ܝܡܝܐ.
ܘܫܘܪܐܠܗ ܙܘܝܚܐ، ܗܘ ܕܫܘܬܦܠܗܿ ܒܡܩܪܒܬܐ ܕܢܘܩܙ̈ܗ (ܐܝܢܢܐ ܓ̰ܪܓ̰ܝܣ)̤ ، ܒܡܡܠܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܝܕ ܡܕܒܪܢܗܿ ܓܘܢܝܐ (ܟܠܕܘ ܪܡܙܝ ܐܘܓܼܢܐ)، ܗܘ ܕܫܘܪܪܠܗ ܒܡܡܠܗ ܥܠ ܝܨܝܦܘܬܐ ܕܐܝܬܠܗܿ ܡܕܒܪܢܘܬܐ ܠܡܚܝܬܐ ܕܗܢ ܦܘܪܣܐ ܫܢ̄ܬܢܝܐ ܒܥܠܬܐ ܕܐܢܢܩܝܘܬܐ ܬܫܥܝܬܢܝܬܐ ܛܝܡܢܬܐ ܕܐܝܬܠܗ ܠܫܢܐ ܣܘܪܝܝܐ، ܘܪܡܙܠܗ ܕܠܫܢܐ ܣܘܪܝܝܐ ܝܠܗ ܠܫܢܐ ܕܡܪܢ ܝܫܘܥ ܡܫܝܚܐ ܗܘ ܕܡܘܚܟܐܠܗ ܓܘܗ ܩܕܡ ܬܪܝܢ ܐܠܦ̈ܐ ܫܢ̈ܐ
ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܠܦܢܘܬܐ ܣܘܪܝܝܬܐ ܡܝܩܪܐ ( ܢܙܐܪ ܚܢܐ) ܡܡܠܐ ܕܡܕܒܪܢܘܬܐ ܓܘܢܝܬܐ ܕܡܠܦܢܘܬܐ ܣܘܪܝܝܬܐ، ܗܘ ܕܩܘܠܣܠܗ ܓܘܗ ܥܠ ܓܪܐ ܕܡܕܒܪܢܘܬܐܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܣܢܕܬܐ ܘܛܘܪܢܬܐ ܕܡܪܕܘܬܐ ܣܘܪܝܝܬܐ ܓܘ ܥܝܪܩ ܘܩܠܝܡܐ ܕܟܘܪܕܣܬܢ، ܘܩܘܠܣܠܗ ܒܝܬ ܥܕܢܐ ܥܠ ܥܡܠ̈ܐ ܕܡܕܒܪܢܘܬܗܿ ܘܟܕܝܪ̈ܗܿ ܘܫܕܬܢ̈ܗܿ، ܘܒܥܐܠܗ ܠܝܗܝ ܫܘܘܫܛܐ ܘܢܨܝܚܘܬܐ ܒܦܘܠܚܢܝܗܝ ܠܬܫܡܫܬܐ ܕܡܪܕܘܬܐ ܕܥܡܢ ܘܠܫܢܗ ܫܪܫܝܐ.
ܒܬܪ ܗܕܟ ܡܘܩܪܒܠܗܘܢ ܝܠܘܦ̈ܐ ܕܡܕܪܫܬܐ ܕܐܪܒܥ̄ܐܝܠܘ ܣܘܪܝܝܬܐ ܙܡܝܪܬܐ ܒܫܡܐ ܕ(ܠܫܢܝ)، ܒܬܪ ܗܕܟ ܦܝܫܠܗ ܡܘܩܪܒܐ ܐܘܦܪܝܬ ܙܡܝܪܝܐ ܒܫܡܐ ܕ(ܐܝܬܗ̄ܘܐ ܘܠܝܬܗ̄ܘܐ)، ܒܝܕ ܐܡܢܐ (ܛܠܐܠ ܓܪܝܫ)، ܘܬܦܪܝܬܐ ܕܡܕܒܪܢܘܬܐܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ.
ܘܡܘܩܪܒܠܗܘܢ ܝܠܘܦ̈ܐ ܕܡܕܪܫܬܐ ܕܚܡܘܪܒܝ ܙܡܝܪܬܐ ܒܫܡܐ ܕ(ܫܡܫܐ ܕܚܐܪܘܬܐ)، ܒܬܪ ܗܕܟ ܡܘܩܪܒܠܗܿ ܝܠܘܦܬܐ (ܡܐܪܝܢܐ ܥܐܡܪ) ܡܫܘܚܬܐ ܒܫܡܐ ܕ(ܡܕܪܫܬܝ)، ܥܡ ܡܩܪܒܬܐ ܕܐܘܦܪܝܬ ܐ̄ܚܪܢܐ ܒܫܡܐ ܕ(ܚܘܝܕܐ) ܒܝܕ ܐܡܢܐ (ܛܠܐܠ ܓܪܝܫ)، ܘܬܦܪܝܬܐ ܕܡܕܒܪܢܘܬܐܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ.
ܘܡܘܩܪܒܠܗܘܢ ܝܠܘܦ̈ܐ ܕܡܕܪܫܬܐ ܕܚܡܘܪܒܝ ܥܒܘܕܘܬܐ ܒܫܡܐ ܕ(ܡܬܐ)، ܕܦܝܫܝ ܚܬܝܡܐ ܥܒܘܕܘ̈ܬܐ ܕܝܘܡܐ ܙܘܝܚܝܐ ܒܡܛܐܠܬܐ ܒܫܡܐ ܕ(ܠܫܢܢ ܚܒܝܒ̈ܐ) ܦܝܫܠܗܿ ܡܘܩܪܒܬܐ ܒܝܕ ܝܠܘܦ̈ܐ ܕܡܕܪܫܬܐ ܕܐܪܒܥ̄ܐܝܠܘ ܣܘܪܝܝܬܐ.
ܘܟܪܟܠܗܘܢ ܒܝܬ ܝܘܡܐ ܝܗܠ̈ܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܘܒܝܬ ܐܪ̈ܟܐ ܣܘܪܝܝܐ ܢܩܝܦ̈ܐ ܐܠܗܿ، ܠܡܕܪ̈ܫܝܬܐ ܣܘܪ̈ܝܝܐ ܒܪܘܣܬܩܐ ܕܥܢܟܒܐ ܘܦܠܝܓ̄ܠܗܘܢ ܟܘܪ̈ܣܐ ܒܠܫܢܐ ܣܘܪܝܝܐ ܕܦܝܫ̈ܐܝܠܗܘܢ ܡܘܦܩܐ ܒܝܕ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܥܘܕܪܢ ܥܡ ܫܘܬܐܣܐ ܕ(ܒܝܬ ܟܐܢܘ) ܕܠܫܢܐ ܣܘܪܝܝܐ.
ܘܦܝܫ ܕܟܝܪܐ، ܕܝܘܡܐ ܬܒܠܝܐ ܕܠܫܢܐ ܝܡܝܐ (International Mother Language Day) ܝܠܗ ܙܘܝܚܐ ܫܢ̄ܬܢܝܐ ܒܟܠ ܦܢܝ̈ܬܐ ܕܥܠܡܐ ܠܚܝܠܢܬܐ ܕܥܝܪܘܬܐ ܒܐܕܫܢܝܘܬܐ ܠܫܢܝܬܐ ܘܡܪܕܘܬܢܝܬܐ ܘܣܓܝܐܘܬܐ ܕܠܫܢ̈ܐ، ܘܦܝܫܠܗ ܡܚܘܫܒܢܐ ܣܝܩܘܡ 21 ܫܒܛ ܝܘܡܐ ܬܒܝܠܝܐ ܕܠܫܢܐ ܝܡܝܐ، ܘܦܝܫܠܗ ܦܣܝܩܐ ܪܘܫܡܐܝܬ ܒܝܕ ܟܢܘܫܬܐ ܓܘܢܝܬܐ ܕܐܡܘ̈ܬܐ ܡܚܝܕ̈ܐ.
