ܫܘܪܐܠܗܘܢ، ܝܘܡ ܬܠܬܒܫܒܐ 26 ܬܫܪܝܢ ܬܪܝܢܐ 2024، ܓܘ ܐܘܢܐ ܕܩܪܛܒܐ ܒܦܢܕܩܐ ܕܡܢܨܘܪ ܡܝܠܝܐ ܒܐܪܫܟܝܬܐ ܕܒܓܼܕܕ، ܥܒܘܕܘ̈ܬܐ ܕܠܘܡܕܐ ܕ( ܟܠܝܬܐ ܕܪܩܘܒܠ ܣܢܝܘܬܐ ܘܬܢܝܬܐ ܕܒܢܝܬܐ ܕܗܝܡܢܘܬܐ ܒܟܢܘܫܝܐ ܥܝܪܩܝܐ)، ܗܘ ܕܦܝܫܠܗ ܥܒܝܕܐ ܒܝܕ ܚܘܕܪܐ ܕܩܨܪܐ ܕܠܘܡܕ̈ܐ ܢܩܝܦܐ ܠܘܙܝܪܘܬ ܡܪܕܘܬܐ ܘܕܝܪܘܬܐ ܘܥܬܩ̈ܐ ܥܝܪܩܝܬܐ.
ܘܫܘܪܐܠܗ ܠܘܡܕܐ، ܗܘ ܕܝܗ̄ܘܐ ܒܪܥܝܘܬ ܡܝܩܪܘܬܐ ܕܪܫ ܘܙܝܪ̈ܐ (ܡܚܡܕ ܫܝܐܥ ܐܠܣܘܕܐܢܝ) ܘܒܚܝܘܪܘܬܐ ܕܘܙܝܪܐ ܕܡܪܕܘܬܐ ܘܕܝܪܘܬܐ ܘܥܬܩ̈ܐ ܕܟܬܘܪ ( ܐܚܡܕ ܦܟܐܟ ܐܠܒܕܪܐܢܝ)، ܒܡܡܠܐ ܕܩܒܠܬܐ ܕܒܫܝܢܐ ܦܝܫܠܗ ܡܘܩܪܒܐ ܒܝܕ ܡܕܒܪܢܐ ܓܘܢܝܐ ܕܚܘܕܪܐ ܕܩܨܪܐ ܕܠܘܡܕ̈ܐ ܕܟܬܘܪ ( ܡܘܢܬܨܪ ܨܒܐܚ ܐܠܚܣܢܐܘܝ)، ܡܘܒܝܢܗ ܓܘܗ ܚܙܘܐ ܕܘܙܝܪܘܬܐ ܘܚܘܕܪܐ ܕܩܨܪܐ ܕܠܘܡܕ̈ܐ ܘܓܪܝܗܝ ܒܟܠܝܬܐ ܕܪܩܘܒܠ ܦܪܣܬܐ ܕܐܝܟܢܘܬܐ ܕܣܢܝܘܬܐ ܒܐܬܪܐ.
ܘܚܒܫܠܗܿ ܝܬܒܬܐ ܩܕܡܝܬܐ ܡܢ ܠܘܡܕܐ، ܗܝ ܕܦܝܫܠܗܿ ܡܬܘܓܒܪܬܐ ܒܝܕ ܝܘܕܥܝܐ (ܬܐܐܪ ܐܠܚܣܢܐܘܝ)، ܡܢܝܢܐ ܡܢ ܣܪ̈ܢܐ، ܡܢܝܗܝ ( ܚܡܝܬܐ ܕܡܟܝܢ̈ܬܐ ܥܝܪ̈ܩܝܐ ܡܢ ܡܡܠܐ ܕܣܢܝܘܬܐ) ܒܝܕ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܗܘ ܕܬܢܐܠܗ ܓܘܗ ܙܕܘܥ̄ܝ̈ܬܐ ܘܪ̈ܓܼܫܝܬܐ ܕܡܟܝܢ̈ܬܐ ܥܝܪ̈ܩܝܐ ܡܢ ܙܝܕܬܐ ܕܡܡܠܐ ܕܣܢܝܘܬܐ ܓܘ ܥܝܪܩ، ܘܪܡܙܠܗ ܠܐܢܢܩܝܘܬܐ ܕܬܚܡܬܐ ܕܥܩܪ̈ܐ ܕܡܡܠܐ ܕܣܢܝܘܬܐ ܠܚܙܝܬܐ ܕܫܪ̈ܝܬܐ ܘܟܠܝܬܐ ܕܪܩܘܒܠ ܗܢ ܡܡܠܐ.
ܘܡܘܙܝܕܠܗ (ܐܘܓܼܢܐ)، ( ܦܘܠܚܢܐ ܣܢܝܩܐܝܠܗ ܠܦܘܠܚܢܐ ܐ̄ܢܫܝܐ ܟܡܝܠܐ ܠܐ ܡܢ ܓܢ̄ܒ ܡܫܬܐܣܬܐ ܚܕܐ ܐܘ ܥܡܠܐ ܠܚܘܕܝܐ، ܐܠܐ ܘܠܐ ܕܗܘܐ ܚܕܐ ܬܪܡܝܬܐ ܫܘܠܛܢܝܬܐ ܡܫܘܬܦܝ ܓܘܗܿ ܟܢܘܫܝܐ ܡܕܝܢܝܐ ܘܝܘܕܥܐ ܘܫܘܠܛܢܘܬܐ)، ܘܫܘܪܪܠܗ ܥܠ ܐܢܢܩܝܘܬܐ ܕܐܝܬܘܬܐ ܕܢܡܘܣ̈ܐ ܚܕܬ̈ܐ ܓܠܝ ܠܡܫܬܐܠܢܘܬܐ ܒܐܣܟܝܡܐ ܒܘܫ ܛܒ ܥܠ ܦܪ̈ܘܣܐ ܕܡܡܠܐ ܕܣܢܝܘܬܐ، ܘܥܡ ܐܝܬܘܬܐ ܕܬܢܒ̈ܐ ܚܝܠܢ̈ܐ ܓܘ ܐܢܝ ܢܡܘܣ̈ܐ ܕܦܪܥܐ ܠܡܬܥܒܪܢܐ ܘܦܪܘܣܐ ܕܗܢ ܡܡܠܐ.
ܘܫܘܪܪܠܗ (ܐܘܓܼܢܐ)، ܥܠ ܐܢܢܩܝܘܬܐ ܕܕܥܪܬܐ ܠܬܫܥܝܬܐ ܠܡܟܠܝܬܐ ܕܣܘܪ̈ܚܢܐ ܕܡܡܠܐ ܕܣܢܝܘܬܐ، ܘܪܡܙܠܗ ܥܠ (ܟܠ ܦܘܠܚܢ̈ܐ ܣܘܪ̈ܚܢܝܐ ܘܐܒܝܕܘܬܐ ܟܢܝܫܝܬܐ ܘܡܕܟܝܬܐ ܫܪܫܝܬܐ ܓܘ ܬܫܥܝܬܐ ܫܘܪܐܠܗܘܢ ܒܡܡܠܐ ܚܦܝܛܐ ܚܒܫ ܣܢܝܘܬܐ ܘܦܪܣܠܗ ܒܝܢ ܡܟܝܢ̈ܬܐ.
ܘܓܠܚܠܗ (ܐܘܓܼܢܐ) ܒܚܘܬܡܐ ܕܫܘܬܦܬܗ، ܡܥܒܕܢܘܬܐ ܕܡܡܠܐ ܕܣܢܝܘܬܐ ܥܠ ܡܟܝܢ̈ܬܐ ܥܝܪ̈ܩܝܐ ܓܘ ܬܫܥܝܬܐ، ܘܡܘܒܝܢܗ ܕܦܪܡܐ ܕܣܡܝܠܐ ܗܘ ܕܓܕܫܠܗܿ ܒܬܠܬܝܢܝ̈ܐ ܡܢ ܕܪܐ ܥܒܝܪܐ، ܘܦܝܫܠܗܘܢ ܕܒܚ̈ܐ ܓܘܗ ܙܘܕܐ ܡܢ 5 ܐܠܦ̈ܐ ܦܪ̈ܨܘܦܐ، ܝܠܗ ܥܒܕܐ ܩܫܝܐ ܫܘܪܐܠܗ ܒܡܡܠܐ ܪܘܫܡܝܐ ܩܪܐ ܠܚܦܝܛܘܬܐ ܥܠ ܡܟܝܢܬܐ ܒܝܬܗܿ، ܘܐܦ ܗܕܟ ܓܕܫ̈ܐ ܕܕܥܫ ܫܢ̄ܬܐ ܕ 2014 ܐܝܬܗ̄ܘܐ ܬܡܐ ܡܡܠܐ ܚܘܫܒܝܐ.
ܘܦܝܫܠܗ ܥܒܝܕܐ ܒܚܘܬܡܐ ܕܠܘܡܕܐ̤ ܒܝܬ ܓܠܚܐ ܕܦܘܠܚܢ̈ܐ ܕܒܝܬ ܡܐܡܘܢ ܕܬܘܪܓܡܐ ܒܘܙܝܪܘܬ ܡܪܕܘܬܐ ܘܕܝܪܘܬܐ ܘܥܬܩ̈ܐ.
ܘܫܘܬܦܠܗܘܢ ܒܝܬܒܝ̈ܬܐ ܕܠܘܡܕܐ ܡܢܝܢܐ ܡܢ ܦܪ̈ܨܘܦܐ ܪ̈ܘܫܡܝܐ ܘܣܝܣܝ̈ܐ ܘܬܘܕܝܬܢܝ̈ܐ ܘܐܟܕܝܡܝ̈ܐ ܡܢ ܛܝܦ̈ܐ ܡܫܚܠܦ̈ܐ ܘܡܟܝܢ̈ܬܐ ܕܟܢܘܫܝܐ ܥܝܪܩܝܐ.
ܘܦܝܫ ܕܟܝܪܐ، ܕܦܝܫܠܗ ܡܛܝܒܐ ܠܠܘܡܕܐ ܘܟܝܠܐ ܕܘܙܝܪܐ ܕܡܪܕܘܬܐ (ܩܐܣܡ ܐܠܣܘܕܐܢܝ) ܡܡܬܠܢܐ ܕܘܙܝܪܐ ܕܡܪܕܘܬܐ ܘܕܝܪܘܬܐ ܘܥܬܩ̈ܐ ܥܝܪܩܝܐ، ܘܪܫ ܣܝܥܬܐ ܕܡܪܕܘܬܐ ܘܕܝܪܘܬܐ ܘܥܬܩ̈ܐ ܘܝܘܕܥܐ ܩܝܘܡܝܬܐ ܩܝܘܡܐ (ܦܐܪܘܩ ܚܢܐ ܥܬܘ)، ܘܢܛܪܐ ܓܘܢܝܐ ܕܡܘܬܒܐ ܕܩܝܘܡ̈ܐ ܥܝܪܩܝܐ (ܨܦܘܐܢ ܒܫܝܪ)، ܥܡ ܡܢܝܢܐ ܡܢ ܡܕܒܪ̈ܢܐ ܓܘܢܝܐ ܒܘܙܝܪܘܬ ܡܪܕܘܬܐ ܘܘܙܝܪ̈ܘܬܐ ܐ̄ܚܪ̈ܢܐ، ܘܥܡ ܐܣܝܪܘܬܐ ܓܘܢܝܬܐ ܕܡܘܬܒܐ ܕܘܙܝܪ̈ܐ.
