ܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܒܪܡܫܐ ܕܥܪܘܒܬܐ 19 ܬܡܘܙ 2024، ܒܙܘܝܚܐ ܒܘܝܐܝܐ ܗܘ ܕܩܝܡܠܗܿ ܓܘܗ ܡܕܒܪܢܘܬܐ ܒܥܘܕܪܢ ܥܡ ܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ ܘܟܢܘܫܬܐ ܕܐܠܩܘܫ ܡܪܕܘܬܢܝܬܐ، ܓܘ ܐܘܢܐ ܕ(ܡܚܒܐ) ܒܦܢܝܬܐ ܕܐܠܩܘܫ ܓܘ ܕܫܬܐ ܕܢܝܢܘܐ.
ܘܫܘܪܠܗ ܙܘܝܚܐ ܒܘܝܐܝܐ ܥܒܘܕܘ̈ܬܗ، ܒܟܠܝܬܐ ܕܚܕ ܕܩܝܩܐ ܕܫܬܩܐ ܥܠ ܪܘܚܐ ܕܡܢܚܐ ܘܣܗܕ̈ܐ ܕܡܡܠܐ ܚܐܪܐ، ܒܬܪ ܗܕܟ ܦܝܫܠܗܿ ܡܘܩܪܒܬܐ ܣܘܓܼܝܬܐ ܒܝܕ ܙܡܪܬܐ (ܦܪܚ ܦܘܐܕ) ، ܒܬܪ ܗܕܟ ܦܫܝܠܗܘܢ ܡܘܩܪܒܐ ܡܢܝܢܐ ܡܢ ܡܡܠ̈ܐ ܡܢ ܫܘܬܐܣ̈ܐ ܡܢܝܗܝ (ܟܢܘܫܬܐ ܕܐܠܩܘܫ ܡܪܕܘܬܢܝܬܐ، ܡܝܛܪܦܘܠܝܛܘܬܐ ܕܐܠܩܘܫ ܟܠܕܝܬܐ، ܚܘܝܕܐ ܓܘܢܝܐ ܕܣܦܪ̈ܐ ܘܟܬܘܒ̈ܐ ܓܘ ܥܝܪܩ، ܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ).
ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܡܡܠܐ ܕܡܕܒܪܢܘܬܐ ܓܘܢܝܬܐ ܗܘ ܕܫܘܪܪܠܗ ܓܘܗ : ( ܐܚܢܝ ܚܣܝܪܢ ܚܕ ܪܡܙܐ ܘܐܬܐ ܘܟܘܟܒܐ ܒܪܘܩܐ ܦܫܝܛ ܐܝܕܐ ܘܡܠܝܐ ܡܘܗܒܬܐ ܗܠ ܪܦܦܐ ܐ̄ܚܪܝܐ ܡܢ ܚܝܘܬܗ ، ܕܐܝܟ ܐܡܪܚܠܘܟ ܐܘܠܝܬܐ ܝܐ ܡܪܐ ܕܡܡܠ̈ܐ ؟ ܗ̄ܘܬܗ̄ܘܐ ܓܙܐ ܛܝܡܢܐ ܠܐܘܡܬܢ ܘܒܕ ܦܝܫܬ ܗܕܟ ܒܦܘܠܚܢܘ̈ܟ ܥܬܝܪ̈ܐ ) ، ܘܡܘܒܝܢܗ (ܣܝܡܘ̈ܟܼ ܦܪ̈ܝܣܐ ܒܡܢܝܢܐ ܪܒܐ ܝܠܝܗܝ ܒܘܫ ܒܨܘܪ̈ܐ ܡܢ ܣܪ̈ܝܛܬܘܟ ܐܢܝ ܕܒܣܦܪܐ ܕܦܝܫܝ ܦܪܝܣܐ ܝܐ ܒܪܘܢܐ ܕܢܝܢܘܐ ܒܪܝܪܐ ܐܝܟ ܝܠܝܗܝ ܥܬܩ̈ܐ ܕܡܕܝܢ̄ܬܘܟ ܢܝܢܘܐ ܟܕ ܗܘ ܡܢܕܝ ܕܦܝܫܠܗ ܚܙܝܐ ܡܢܝܗܝ ܝܠܗ ܒܘܫ ܒܨܘܪܐ ܡܢ ܡܐ ܕܐܝܬ).
ܘܒܬܪ ܡܩܪܒܬܐ ܕܡܡܠ̈ܐ ܫܘܬܦܠܗ ܐܡܢܐ (ܣܐܡ ܣܐܠܡ) ܒܚܕܐ ܣܘܓܼܝܬܐ ܥܡ ܢܩܫܐ ܡܘܣܝܩܝܐ ܚܫܢܐ، ܘܒܬܪ ܗܕܟ ܦܝܫܠܗܘܢ ܡܘܩܪܒܐ ܡܘܫ̈ܚܬܐ ܡܚܪ̈ܝܐ ܒܝܕ ܡܢܝܢܐ ܡܢ ܡܚܘܪ̈ܐ ܕܥܡܢ ܓܘ ܐܘܠܝܬܐ ܕܝܕܘܥܐ ܡܢܚܐ ܘܝܠܝܗܝ ܟܠ ܡܢ( ܡܚܘܪܐ ܢܒܝܠ ܕܡܐܢ، ܡܚܘܪܐ ܝܘܢܐܕܡ ܒܢܝܡܝܢ، ܡܚܘܪܬܐ ܡܢܐܠ ܐܒܘܢܐ، ܘܡܚܘܪܐ ܐܒܪܐܗܝܡ ܚܨܿܪ)، ܒܬܪ ܗܕܟ ܦܝܫܠܗ ܓܠܝܚܐ ܚܕ ܙܘܠܐ (ܦܝܠܡܐ) ܐܫܛܪܝܐ ܕܝܠܢܝܐ ܥܠ ܚܝܘܬܐ ܕܡܢܚܐ ܡܢ ܬܦܪܝܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܡܦܩܢܘܬܐ ܕ(ܪܓܼܝܕ ܢܢܒܝܐ).
ܒܬܪ ܗܕܟ ܡܘܩܪܒܠܗܘܢ ܡܢܝܢܐ ܡܢ ܦܪ̈ܨܘܦܐ ܡܫܘܬܦ̈ܐ ܒܙܘܝܚܐ ܒܘܝܐܝܐ ܣܗܕܘ̈ܬܐ ܚܝ̈ܐ ܥܠ ܡܢܚܐ ܘܝܠܝܗܝ ܟܠ ܡܢ ( ܘܨܦܝ ܚܣܢ ܡܢ ܕܗܘܟ، ܠܘܝܣ ܓ̰ܡܐ ܡܢ ܐܠܩܘܫ) ، ܒܬܪ ܗܕܟ ܦܝܫܠܗ ܚܬܝܡܐ ܙܘܝܚܐ ܒܘܝܐܝܐ ܥܒܘܕܘ̈ܬܗ ܒܡܡܠܐ ܕܒܝܬܘܬܐ ܕܡܢܚܐ (ܒܢܝܡܝܢ ܚܕܐܕ)، ܗܝ ܕܡܘܩܪܒܠܗܿ ܩܘܒܠܛܝܒܘܬܗܿ ܠܟܠ ܡܢ ܕܟܪܗ ܡܢܚܐ ܘܫܘܬܦܠܗ ܒܥܒܘܕܘ̈ܬܗ ܕܙܘܝܚܐ.
ܘܦܝܫ ܕܟܝܪܐ، ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܡܘܩܪܒܠܗܿ ܒܘܝܐܐ ܠܝܕܘܥܐ ܪܒܐ ܘܡܟܬܒܢܐ ܕܙܒܢܐ ( ܒܢܝܡܝܢ ܚܕܐܕ)، ܗܘ ܕܫܘܢܐܠܗ ܠܓܢܘܢܐ ܫܡܝܢܐ، ܒܨܦܪܐ ܕܝܘܡ ܬܪܝܢܒܫܒܐ 17 ܚܙܝܪܢ 2024، ܒܥܠܬܐ ܕܟܘܪܗܢܐ ܥܣܩܐ ܒܚܕ ܡܢ ܒܬܝ̈ ܐܣܝܘܬܐ ܕܗܘܦܪܟܝܐ ܕܕܗܘܟ ܒܩܠܝܡܐ ܕܟܘܪܕܣܬܢ ܕܥܝܪܩ.
