ܡܛܘܝܡܢܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܥܡܠ̈ܐ ܕܡܩܪܒܝܠܝܗܝ ܟܕܝܪ̈ܐ ܘܫܕܬܢ̈ܐ ܕܡܕܒܪܢܘܬܐ ܓܘܢܝܬܐ ܘܡܕܒܪ̈ܢܘܬܗܿ ܘܫܘܬܐܣ̈ܐ ܢܩܝܦ̈ܐ ܐܠܗܿ، ܒܬܡܡܬܐ ܕܘܠܝܬܝ̈ܗܝ ܒܐܘܡܢܘܬܐ ܘܡܫܬܐܠܢܘܬܐ، ܫܒܘܩ ܡܢ ܐܝܟܢ̈ܘܬܐ ܥܣܩ̈ܐ ܕܐܝܬ ܓܘ ܦܢܝܬܐ، ܓܘ ܚܕܐ ܬܦܩܬܐ ܪܘܝܚܬܐ ܦܝܫܠܗܿ ܩܛܝܪܬܐ ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܥܢܟܒܐ، ܠܛܝܡܢܬܐ ܕܟܫܝܪ̈ܘܬܐ ܕܡܕܒܪܢܘܬܐ ܒܡܬܚܐ ܥܒܝܪܐ.
ܘܚܘܬܬܠܗ (ܐܘܓܼܢܐ) ܓܘ ܡܡܠܗ، ܒܫܘܝܐ ܕܡܫܬܐܠܢܘܬܐ ܘܬܡܝܡܘܬܐ ܕܦܠܚ̈ܐ ܓܘ ܡܕܒܪܢܘܬܐ ܒܬܡܡܬܐ ܕܦܘܠܚܢ̈ܝܗܝ، ܘܫܘܪܪܠܗ ܕܣܩܘܒܠܝ̈ܘܬܐ ܓܘܝ̈ܐ ܘܩܠܝܡܝ̈ܐ ܠܐ ܟܠܐܠܗܘܢ ܕܪܩܘܒܠ ܐܡܝܢܝܘܬܐ ܕܦܘܠܚܢܐ ܘܠܐ ܪܒܘܬܐ ܕܟܫܝܪ̈ܘܬܐ ܡܪ̈ܕܘܬܢܝܐ ܘܐܘܡܢܝ̈ܐ ܒܢܝܫܐ ܕܚܡܝܬܐ ܕܝܘܪܬܢܐ ܡܪܕܘܬܢܝܐ ܘܬܪܨܬܗ.
ܘܪܡܙܠܗ ܕ(ܡܐ ܕܦܝܫܠܗ ܡܫܘܪܪܐ ܒܡܬܚܐ ܕܗܕ ܫܢ̄ܬܐ، ܫܒܘܩ ܡܢ ܟܪܝܘܬܐ ܕܡܬܚܐ، ܝܠܗ ܦܠܛܐ ܕܥܘܕܪܢܐ ܕܟܠܝܗܝ ܡܢܘ̈ܬܐ ܘܚܘܕܪ̈ܐ)، ܘܡܘܒܝܢܗ ( ܩܛܪܐ ܡܠܝܐ ܘܫܓܼܘܫܝܐ ܩܠܝܡܝܐ ܩܐܡܝܐ ܝܠܝܗܝ ܣܩܘܒܠܝܘܬܐ ܪܒܬܐ ܒܪܩܘܒܠ ܬܡܡܬܐ ܕܚܕܟܡܐ ܚܘܪ̈ܙܐ ܘܣܘܪ̈ܛܐ، ܘܘܠܐ ܕܣܒܪܚ ܒܚܕܟܡܐ ܟܫܝܪ̈ܘܬܐ ܗܠ ܡܦܪܝܬܐ ܕܐܝܟܢ̈ܘܬܐ ܚܫܝܚ̈ܐ).
ܘܫܘܪܪܠܗ (ܐܘܓܼܢܐ) ܥܠ ܐܢܢܩܝܘܬܐ ܕܡܬܒܬܐ ܕܚܕܐ ܚܝܪܬܐ ܓܠܝܬܐ ܠܚܘܪ̈ܙܐ ܕܡܕܒܪܢܘܬܐ ܒܡܬܚܐ ܐܬܝܢܐ، ܒܢܝܫܐ ܕܢܛܪܬܐ ܕܝܘܪܬܢܐ ܡܪܕܘܬܢܝܐ ܫܪܫܝܐ ܕܡܕܝܢܬܝ̈ܢ ܘܩܘܪ̈ܝܢ، ܘܦܪܝܫܐܝܬ ܥܢܟܒܐ، ܒܥܠܬܐ ܕܐܝܬܠܗܿ ܕܝܠܝܘܬܐ ܬܫܥܝܬܢܝܬܐ ܘܡܪܕܘܬܢܝܬܐ، ܒܥܝܐ ܝܨܝܦܘܬܐ ܦܪܝܫܬܐ، ܠܢܛܪܬܐ ܕܗܝܝܘܬܗܿ ܫܪܫܝܬܐ ܕܠܐ ܙܐܦܢܘܬܐ، ܐܝܟ ܕܝܪܬܠܢ ܡܢ ܐܒܗ̈ܬܐ، ܐܢܝ ܕܢܛܪܝܗܝ ܥܠܗܿ ܫܦܝܬܐ ܓܘ ܙܒܢܐ.
ܘܦܝܫܠܗܿ ܚܬܝܡܬܐ ܬܦܩܬܐ ܒܫܪܪܬܐ ܥܠ ܢܨܝܚܘܬܐ ܕܡܕܒܪܢܘܬܐ ܝܠܗܿ ܢܒܝܥܬܐ ܡܢ ܪܘܚܐ ܕܥܘܕܪܢܐ ܘܦܘܠܚܢܐ ܡܫܘܬܦܐ ܘܦܘܬܚܐ ܒܢܝܐ ܥܠ ܫܘܬܐܣ̈ܐ ܡܪ̈ܕܘܬܢܝܐ ܘܡܕܝܢܝ̈ܐ ܘܬܘܕܝܬܢܝ̈ܐ، ܠܫܘܬܦܬܐ ܓܘ ܬܡܡܬܐ ܕܢܝܫ̈ܐ ܕܡܕܒܪܢܘܬܐ ܒܬܫܡܫܬܐ ܕܡܪܕܘܬܐ ܘܟܢܘܫܝܐ.
