ܩܒܠܗ ܒܐܪܚܘܬܐ ܒܝܬ ܓܠܚܐ ܕܐܪܒܝܠ ܬܒܝܠܝܐ ܕܟܬܒܐ ܒܢܘܣܟܗ ܫܒܥܣܝܪܝܐ، ܝܘܡ ܚܡܫܒܫܒܐ 10 ܢܝܣܢ 2025، ܬܪܝܬܝܢ ܝܬܒܝ̈ܬܐ ܕܘܪ̈ܫܝܐ، ܟܡ ܛܟܣܐܠܗܘܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܒܥܘܕܪܢ ܥܡ ܚܘܕܪܐ ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܘܫܘܬܐܣܐ ܕ(ܡܕܐ) ܕܡܪܕܘܬܐ ܘܝܘܕܥܐ ܘܐܡܢ̈ܐ، ܚܒܫܠܗܘܢ ܬܪܬܝ ܝܬܒܝ̈ܬܐ ܠܫܢܐ ܣܘܪܝܝܐ ܘܣܩܘܒܠܝܘ̈ܬܐ ܕܕܥܬܝܕ ܘܐܢܢܩܝܘܬܐ ܕܪܩܡܢܬܐ ܕܝܪܬܘܬܐ ܣܘܪܝܝܬܐ، ܒܚܕ ܓܕܫܐ ܦܝܫ ܥܒܝܕܐ ܓܗܐ ܩܕܡܝܬܐ ܒܠܫܢܐ ܣܘܪܝܝܐ ܥܠ ܐܪܥܐ ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܕܟܬܒܐ ܒܝܘܪܟܐ ܕܢܘܣܟܗ ܩܕܝܡܐ.
ܘܚܒܫܠܗ ܝܬܒܬܐ ܩܕܡܝܬܐ، ܗܝ ܕܟܡ ܬܓܒܪܐܠܗܿ ܡܕܒܪܢܝܬܐ ܕܒܝܬ ܐܪ̈ܟܐ ܣܘܪܝܝܐ ܡܝܩܪܬܐ (ܦܝܚܐܐ ܫܡܥܘܢ)، ܘܫܘܬܦܠܗܘܢ ܓܘܗܿ ܟܠ ܡܢ ( ܡܪܝ ܡܝܟܐܝܠ ܢܓ̰ܝܒ ܕܘܡܢܝܟܝܐ) ، ܪܫ ܕܝܪܐ (ܕ.ܣܐܡܪ ܨܘܪܝܫܘ ܝܘܚܢܢ) ، (ܒܪܢܐܪܕ ܝܘܣܦ ܥܐܫܘܪ)، ܡܠܘܐܐ ܕ((ܪܩܡܢܬܐ ܕܝܪܬܘܬܐ ܣܘܪܝܝܬܐ: ܚܡܝܬܐ ܠܗܝܝܘܬܐ ܘܓܫܪܐ ܨܘܒ ܕܥܬܝܕ)، ܟܕ ܬܢܐܠܗܘܢ ܡܫܘܬܦ̈ܐ ܥܠ ܐܢܢܩܝܘܬܐ ܕܬܟܢܘܠܘܓ̰ܝܐ ܘܕܪܝܘܬܐ ܓܘ ܕܪܐ ܚܕܬܐ ܘܐܝܟܢܘܬܐ ܕܫܩܠܬܐ ܕܝܘܬܪܢܐ ܡܢܗܿ ܠܢܛܪܬܐ ܕܝܪܬܘܬܐ ܥܬܝܪܬܐ ܕܥܡܢ، ܒܢܝܫܐ ܕܫܢܝܬܗܿ ܠܝܘܒ̈ܠܐ ܐܬܝܢ̈ܐ ܒܟܠ ܗܝܡܢܬܐ ܘܬܣܦܝܬܐ.
ܘܚܒܫܠܗܿ ܝܬܒܬܐ ܬܪܝܢܝܬܐ ܡܠܘܐܐ ܕ(( ܠܫܢܐ ܣܘܪܝܝܐ: ܩܐܡ ܪܗܝܢܐ ܘܣܩܘܒܠܝ̈ܘܬܐ ܕܕܥܬܝܕ))، ܦܝܫܠܗܿ ܡܬܘܓܒܪܬܐ ܝܬܒܬܐ ܒܝܕ ܣܦܪܐ (ܦܛܪܘܣ ܢܒܬܝ)، ܘܒܫܘܬܦܬܐ ܕܟܠ ܡܢ ( ܕ.ܒܗܢܐܡ ܥܛܠܠܗ، ܢܝܢܒ ܠܡܣܘ، ܢܙܐܪ ܚܢܐ)، ܟܕ ܬܢܐܠܗܘܢ ܡܫܘܬܦ̈ܐ ܓܘ ܝܬܒܬܐ ܥܠ ܩܐܡ ܕܠܫܢܐ ܣܘܪܝܝܐ ܘܩܛܪ̈ܐ ܒܘܫ ܐܢܢܩܝ̈ܐ ܕܟܠܝ ܕܪܩܘܒܠܗ ܒܥܕܢܐ ܩܐܡܝܐ، ܘܫܒܝܠ̈ܐ ܚܫܝܚ̈ܐ ܠܟܠܝܬܐ ܕܪܩܘܒܠ ܣܩܘܒܠܝܘ̈ܬܐ ܒܕܥܬܝܕ ܠܢܛܪܬܗ ܘܫܢܝܬܗ ܠܝܘܒ̈ܠܐ ܐܬܝܢ̈ܐ، ܐܝܟ ܕܟܡ ܫܢܝܠܗ ܐܠܢ ܘܟܡ ܢܛܪܝܠܗ ܐܒܗܬܝ̈ܢ ܡܢ ܕܪ̈ܐ ܥܒܝܪ̈ܐ.
ܘܦܝܫܠܗܘܢ ܩܒܝܠ̈ ܬܪܬܝܢ ܝܬܒ̈ܝܬܐ ܡܢ ܓܢ̄ܒ ܡܛܝܒ̈ܐ، ܐܢܝ ܕܡܘܚܙܐܠܗܘܢ ܝܨܝܦܘܬܐ ܪܒܬܐ ܒܡܠܘܐܐ ܕܪܩܡܢܬܐ ܘܓܪܗܿ ܒܢܛܪܬܐ ܕܝܪܬܘܬܐ ܕܥܡܢ، ܒܫܘܬܦܬܝܗܝ ܒܡܢܝܢܐ ܡܢ ܫܘܐܠ̈ܐ ܘܕܘܪ̈ܫܐ ܥܠ ܡܠܘܐܐ ܒܐܣܟܝܡܐ ܡܣܝܡܢܐ، ܘܐܦ ܗܕܟ ܫܘܪܪܠܗܘܢ ܥܠ ܐܢܢܩܝܘܬܐ ܕܡܦܪܝܬܐ ܕܬܟܢܘܠܘܓ̰ܝܐ ܚܕܬܐ ܒܚܡܝܬܐ ܕܝܪܬܘܬܐ ܡܪܕܘܬܢܝܬܐ ܕܥܡܢ ܒܐܬܪܐ.
ܘܦܝܫ ܕܟܝܪܐ، ܕܒܝܬ ܓܠܚܐ ܕܐܪܒܝܠ ܬܒܠܝܐ ܕܟܬܒܐ ܒܢܘܣܟܗ ܕ(17)، ܦܝܫ ܥܒܝܕܐ ܒܡܬܚܐ ܡܢ 9-19 ܢܝܣܢ ܩܐܡܝܐ، ܒܫܘܬܦܬܐ ܕܒܘܫ ܡܢ (350) ܒܝܬ ܦܪܣܐ ܡܢ ܩܠܝܡܐ ܕܟܘܪܕܣܬܢ ܘܥܝܪܩ ܘܐܬܪ̈ܘܬܐ ܥܪ̈ܒܝܐ ܘܢܘܟܪ̈ܝܐ، ܘܡܛܟܣܐܠܗܘܢ ܡܫܬܐܣܬܐ ܕ(ܡܕܐ) ܕܝܘܕܥܐ ܘܡܪܕܘܬܐ ܘܐܡܢ̈ܐ ܥܠ ܐܪܥܐ ܕܒܝܬ ܓܠܚܐ ܕܐܪܒܝܠ ܬܒܝܠܝܐ ܓܘ ܦܪܟ (ܣܐܡܝ ܥܒܕ ܐܠܪܚܡܢ) ܒܐܪܒܝܠ.
