ܩܝܡܠܗ ܒܝܬ ܕܪܫܐ ܕܐܡܢ̈ܐ ܫܦܝܪ̈ܐ ܚܠܝܛܐ / ܚܡܕܢܝܼܐ ܓܘ ܒܓܼܕܝܕܐ ܒܕܫܬܐ ܕܢܝܢܘܐ، ܝܘܡ ܚܡܫܒܫܒܐ 2 ܐܝܪ 2024، ܒܡܝܩܪܢܘܬܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܠܓܪܗ ܒܣܢܕܬܐ ܕܟܫܝܪ̈ܘܬܐ ܐܡܢܝ̈ܐ ܥܠܝܡܝ̈ܐ ܘܡܪܕܘܬܐ ܣܘܪܝܝܬܐ ܓܘ ܦܢܝܬܐ.
ܘܐܬܝܠܗܿ ܡܝܩܪܢܘܬܐ ܕ”ܐܘܓܼܢܐ” ܓܘ ܥܕܥܐܕܐ ܕܒܝܬ ܕܪܫܐ ܫܢ̄ܬܢܝܐ ܬܪܝܢܐ، ܠܡܬܚܐ ܡܢ 2-3 ܐܝܪ ܩܐܡܝܐ ܓܘ ܐܘܐ ܕܒܐܡܐ ܕ.”ܪܝܟܐܪܕܘܣ ܝܘܣܦ”، ܘܚܒܫܠܗ ܙܘܝܚܐ ܕܦܘܬܚܐ ܕܥܕܥܐܕܐ ܡܩܛܥ̈ܐ ܡܘܣܝܩܝ̈ܐ ܘܙܡܝܪ̈ܝܐ، ܥܡ ܓܠܚܐ ܒܐܡܝܐ ܒܫܡܐ ܕ(ܐܓܪܬܐ ܪܩܡܐ 1) ܡܢ ܣܝܘܡܘܬܐ ܕܟܬܘܒܐ “ܐܒܪܐܗܝܡ ܓܘܠܐܢ”، ܘܡܦܩܢܘܬܐ ܕ”ܘܣܐܡ ܢܘܚ”، ܥܡ ܦܘܬܚܐ ܕܒܝܬ ܓܠܚܐ ܐܡܢܝܐ ܚܒܫܠܗ ܡܢܝܢܐ ܡܢ ܦܘܠܚܢ̈ܐ ܐܡܢܝ̈ܐ ܘܣܘܟܡܝ̈ܐ ܕܝܠܘܦ̈ܐ ܕܒܝܬ ܕܪܫܐ.
ܘܐܦ ܗܕܟ ܚܒܫܠܗ ܙܘܝܚܐ ܕܦܘܬܚܐ ܡܡܠܐ ܕܡܕܒܪܢܐ ܕܒܝܬ ܕܪܫܐ “ܢܒܪܐܣ ܚܿܕܘ”، ܗܘ ܕܫܘܪܪܠܗ ܓܘܗ ܥܠ ܣܢܕܬܐ ܕܡܕܒܪܢܘܬܐ ܓܘ ܒܝܬ ܕܪܫܐ ܠܝܠܘܦ̈ܐ ܦܪ̈ܝܫܐ ܓܘܗ، ܒܢܝܫܐ ܕܓܠܝܬܐ ܕܡܘܗܒܝ̈ܬܝܗܝ ܘܡܛܘܪܢܬܝܗܝ، ܕܪܡܙ ܥܠܝܗܝ ܒܡܫܡܗ̈ܐ ܓܘ ܕܥܬܝܕ.
ܘܦܝܫܠܗܘܢ ܡܛܝܒܐ ܠܙܘܝܚܐ ܕܦܘܬܚܐ ܕܥܕܥܐܕܐ ، ܡܪܘܬܗ ܕܪܥܝܐ ܕܡܪܥܝܬܐ ܕܡܘܨܠ ܘܢܩܝܦܘ̈ܬܗܿ ܕܣܘܪ̈ܝܝܐ ܩܬܘܠܝܩܝ̈ܐ ܡܪܝ ” ܒܢܕܟܬܘܣ ܚܢܘ”، ܘܡܕܒܪܢܐ ܕܬܪܒܝܬܐ ܕܚܡܕܢܝܐ ” ܪܐܦܕ ܝܘܣܦ” ، ܘܗܕܡ̈ܐ ܒܚܩܠܐ ܕܬܪܒܝܬܐ ܓܘ ܗܘܦܪܟܝܐ ܕܢܝܢܘܐ، ܘܟܢܫܐ ܡܢ ܒܢܝ̈ ܥܡܢ ܓܘ ܦܢܝܬܐ.
ܘܥܡ ܡܝܩܪܢܘܬܗ ܦܪܨܘܦܐܝܬ ، ܡܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ܒܡܝܩܪܢܘܬܐ ܕܡܛܝܒ̈ܐ ܘܡܢܝܗܝ ܡܪܘܬܗ ܕܡܝܛܪܦܘܠܝܛܐ ܡܪܝ ” ܒܢܕܟܬܘܣ ܝܘܢܢ ܚܢܘ”، ܘܩܘܠܣܠܗ “ܐܘܓܼܢܐ” ܥܠ ܦܠܚ̈ܐ ܓܘ ܒܝܬ ܕܪܫܐ ܡܢ ܡܕܒܪܢܘܬܐ ܘܟܕܝܪ̈ܐ ܕܡܕܪܫܢܘܬܐ، ܘܘܥܕܠܗ ܒܐܡܝܢܘܬܐ ܕܣܢܕܬܐ ܕܐܡܢ̈ܐ ܕܥܡܢ ܡܢ ܥܠܝܡ̈ܐ ܓܘ ܕܫܬܐ ܕܢܝܢܘܐ.
