ܦܬܚܠܗ ܒܝܬ ܐܪ̈ܟܐ ܣܘܪܝܝܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܝܘܡ ܫܒܬܐ 25 ܐܝܪ 2024، ܥܒܘܕܘ̈ܬܐ ܕܒܝܬ ܓܠܚܐ ܕܟܬܒܐ ܦܬܝܚܐ ܒܕܘܪܬܗ ܬܠܝܬܝܬܐ ܬܚܘܬ ܪܘܫܡܐ (ܐܕܫܢܝܘܬܐ ܡܪܕܘܬܢܝܬܐ… ܢܗܪܘܢܐ ܕܚܝܘܬܐ) ، ܒܫܘܦܗ ܥܝܕܝܐ ܩܘܪܒܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ ܓܘ ܗܘܦܪܟܝܐ ܕܐܪܒܝܠ.
ܘܫܘܪܐܠܗ ܒܝܬ ܓܠܚܐ ܥܒܘܕܘ̈ܬܗ ܒܦܘܬܚܐ ܕܡܢܘ̈ܬܗ ܡܫܚܠܦ̈ܐ، ܒܬܪ ܗܕܟ ܡܡܠܐ ܕܒܝܬ ܐܪ̈ܟܐ ܣܘܪܝܝܐ ܦܝܫܠܗ ܡܘܩܪܒܐ ܒܝܕ ܡܕܒܪܢܝܬܗ “ܦܝܚܐܐ ܫܡܥܘܢ”، ܫܘܪܪܠܗܿ ܓܘܗ ( ܒܝܬ ܓܠܚܢ ܐܕܝܘܡ ܩܪܐܠܢ ܟܠܢ ܠܡܪܕܘܬܐ ܐ̄ܢܫܝܬܐ ܒܢܝܬܐ، ܘܝܠܗܿ ܩܪܝܬܐ ܠܦܬܚܬܐ ܕܬܪ̈ܥܐ ܘܟܘ̈ܬܐ ܩܕ̄ܡ ܪ̈ܘܚܐ ܕܐܕܫܢܝܘܬܐ ܚܦܝܛ̈ܐ ܘܙܘܝܚܐ ܒܪܢܝܐ ܚܝܐ ܘܝܕܥܬܐ ܚܕܝܬܐ ܘܒܪܘܝܘܬܐ ܢܨܝܚܬܐ)، ܘܪܡܙܠܗܿ ( ܒܝܬ ܓܠܚܢ ܝܠܕܠܗ ܙܥܘܪܐ ܘܦܝܫܠܗ ܝܕܥܐ ܦܪܝܫܐ ܓܘ ܚܝܘܬܐ ܡܪܕܘܬܢܝܬܐ ܓܘ ܡܕܝܢ̄ܬܢ ܚܒܝܒܬܐ ܥܢܟܒܐ، ܘܓܠܐܠܗ ܛܘܘܪܐ ܕܚܝܘܬܢ ܡܪܕܘܬܢܝܬܐ).
ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ܚܕ ܡܡܠܐ ܫܘܪܪܠܗܓܘܗ ( ܐܗܐ ܓܕܫܐ ܡܪܕܘܬܢܝܐ ܥܡ ܓܠܚܐ ܕܟܬܒ̈ܐ ܝܠܗ ܚܕ ܒܐܡܐ ܕܐܡܝܢܝܘܬܐ ܥܡ ܟܬܘܒ̈ܐ ܘܡܘܪ̈ܕܢܐ ܣܘܪ̈ܝܝܐ ܘܒܬܝ̈ ܦܪܣܐ ܘܒܬܝ̈ ܐܪ̈ܟܐ ܘܫܘܬܣ̈ܐ ܡܪ̈ܕܘܬܢܝܐ، ܘܝܠܗ ܒܝܬ ܘܥܕܐ ܐܡܝܢܝܐ ܠܐ ܠܟܬܘܒܝ̈ܢ ܘܡܘܪ̈ܕܢܝܢ ܒܠܚܘܕ، ܐܠܐ ܠܟܠܝܗܝ ܝܨܘܦ̈ܐ ܒܨܒܘ̈ܬܐ ܕܐܕܫܢܝܘܬܐ ܘܩܒܠܬܐ ܕܐ̄ܚܪܢܐ، ܘܡܢ ܗܕܟ ܐ̄ܬܝܠܗ ܪܘܫܡܐ ܕܗܕ ܫܢ̄ܬܐ (ܐܕܫܢܝܘܬܐ ܡܪܕܘܬܢܝܬܐ …. ܢܗܪܘܢܐ ܕܚܝܘܬܐ).
ܘܡܘܙܝܕܠܗ ܐܘܓܼܢܐ ܒܐܡܪܐ: (ܕܢܘܣܟܐ ܬܠܝܬܝܐ ܕܒܝܬ ܓܠܚܐ ܕܟܬܒܐ ܦܬܝܚܐ ܝܠܗ ܒܫ ܦܪܝܫܐ ܘܪܘܝܚܐ ܒܫܘܬܦܬܐ ܡܢ ܕܩܕ̄ܡ ܡܢܗ ܗܘ ܒܕ ܡܓܪܫ ܡܬܚܐ ܕܬܠܬܐ ܝܘܡ̈ܐ ܒܬܓܠܝܬܐ ܡܪܕܘܬܢܝܬܐ ܒܟܫܝܪ̈ܘܬܗܿ ܘܐܡܘܪ̈ܘܬܗܿ ܪ̈ܢܝܝܐ ܡܫܚܠܦ̈ܐ، ܘܦܝܫܠܗ ܦܪܝܫܐ ܓܘܗܿ ܚܕ ܣܗܡܐ ܪܒܐ ܠܡܠܘ̈ܐܐ ܐܢܢܩܝ̈ܐ ܐܝܟ ܐܢ̄ܬܬܐ ܘܢܗܝܪܘܬܐ ܐܘܡܢܝܬܐ ܘܡܡܠܐ ܕܣܢܝܘܬܐ، ܘܐܦ ܗܕܟ ܦܪܫܠܗ ܐܗܐ ܢܘܣܟܐ ܡܢ ܒܝܬ ܓܠܚܐ ܒܛܘܝܒܐ ܦܪܝܫܐ ܡܢ ܢܝܢܘܐ ܘܒܓܕܕ ܘܠܒܢܢ).
ܘܡܘܝܕܥܠܗ “ܐܘܓܼܢܐ” ܓܘ ܡܡܠܐ، ܕܐܗܐ ܢܘܣܟܐ ܟܐܬܗ ܒܡܝܩܪܢܘܬܐ ܕܡܠܦܢܐ “ܚܒܝܒ ܐܦܪܝܡ” ܐܬܝܢܐ ܡܢ ܠܒܢܢ ܒܕܘܪܥܐ ܕܗܒܢܝܐ ܣܘܪܝܝܐ، ܙܘܝܚܐ ܒܫܘܡܠܝ̈ܗ ܪ̈ܢܝܝܐ ܦܪ̈ܝܫܐ، ܘܗܘ ܒܕ ܗܘܐ ܚܕܐ ܡܝܩܪܢܘܬܐ ܫܢ̄ܬܢܝܬܐ ܟܡ ܫܪܝܐܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܐܗܐ ܫܢ̄ܬܐ، ܠܙܘܝܚܐ ܒܫܘܡܠܝ̈ܐ ܕܚܕ ܡܢ ܦܪ̈ܨܘܦܐ ܦܪ̈ܝܫܐ ܒܓܝܓܼܠܐ ܕܡܪܕܘܬܐ ܘܣܦܪܝܘܬܐ ܘܐܡܢ̈ܐ.
ܘܒܬܪ ܡܩܪܒܬܐ ܕܡܡܠ̈ܐ، ܦܝܫܠܗ ܥܒܝܕܐ ܙܘܝܚܐ ܕܡܝܩܪܢܘܬܐ ܕܪܫ ܐܣܘܪܐ ܣܘܪܝܝܐ ܓܘ ܠܒܢܢ ܡܠܦܢܐ “ܚܒܝܒ ܐܦܪܝܡ”، ܒܕܘܪܥܐ ܣܘܪܝܝܐ ܕܦܝܫܠܗ ܡܘܩܪܒܐ ܒܝܕ ܘܟܝܠ ܘܙܝܪܐ ܕܡܪܕܘܬܐ ܘܥܠܝܡ̈ܐ ܒܫܘܠܛܢܘܬܐ ܕܩܠܝܡܐ “ܐܪܝܐܢ ܨܠܚ ܐܠܕܝܢ”، ܥܡ ܓܪܫܬܐ ܕܕܪܥܢܐ ܕܛܒܥܬܐ ܪܒܝܥܝܬܐ ܡܢ ܟܬܒܗ (ܡܫܝܚܝ̈ܐ ܕܡܕܢܚܐ …. ܓܒܝܬܐ ܕܦܝܫܬܐ ܘܨܒܝܢܐ ܕܣܒܪܐ) ،
ܒܛܘܝܒܐ ܕܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܓܘ ܫܘܠܛܢܘܬܐ ܕܩܠܝܡܐ “ܐܢܘ ܓ̰ܘܗܪ ܥܒܕܘܟܐ”، ܘܗܘ ܕܟܡ ܡܩܪܒܠܗ ܠܡܛܝܒ̈ܐ ܝܘܕܥܝܐ ܡܝܩܪܐ “ܫܡܥܘܢ ܡܬܝ” ، ܒܡܫܡܗܘܬܗ ܪܢܘܝܐ ܗܘ ܕܦܪܫܠܗ ܨܒܝܢܗ ܠܡܫܝܚܝ̈ܐ ܕܡܕܢܚܐ، ܘܟܠܐܠܗ ܕܪܩܘܒܠ ܐܢܝ ܕܚܫܒܝ ܐܝܬܘܬܐ ܕܡܫܝܚܝ̈ܐ ܡܕܢܚܝ̈ܐ ܫܓܝܫܬܐܝܠܗܿ ، ܘܡܘܩܪܒܠܗ ܒܣܗܕܘܬܐ ܪܒܬܐ ܕܡܫܝܚܝ̈ܐ ܕܡܕܢܚܐ ܠܐ ܒܥܝ ܚܡܝܬܐ ، ܐܠܐ ܙܕܩ̈ܐ ܐܢܝ ܕܟܡ ܫܩܠܝܠܗܘܢ ܐ̄ܚܪ̈ܢܐ ܘܒܥܐܠܗܘܢ ܣܘܦܩܐ ܕܡܕܢܚܐ ܡܢ ܡܫܝܚܝ̈ܐ ܫܒܘܩ ܡܢ ܟܠܝܗܝ ܫܪ̈ܫܐ ܬܫܥܝܬܢܝ̈ܐ ܡܕܝܢܝ̈ܐ ܥܡܝܩ̈ܐ ܐܢܝ ܕܐܝܬܠܗܘܢ ܒܐܗܐ ܦܢܝܬܐ ܡܢ ܫܘܪܝܐ ܕܝܘܒܠ̈ܐ.
ܒܬܪ ܗܕܟ ܡܘܩܪܒܠܗ ܝܗܠܐ ܕܐܟܕܝܡܝܘܬܐ ܕܐܘܪܢܝܢܐ ܕܐܡܢ̈ܐ ܢܘܩܙܐ ܙܡܝܪܝܐ ܒܣܡܠܗ ܠܒܐ ܕܡܛܝܒ̈ܐ، ܒܬܪ ܗܕܟ ܦܝܫܠܗ ܥܒܝܕܬܐ ܝܬܒܬܐ ܕܘܪܫܝܬܐ ܒܬܓܒܪܬܐ ܕܝܘܕܥܝܬܐ “ܐܘܦܝܠܝܐ ܛܐܗܪ” ܘܫܘܬܦܠܗܘܢ ܓܘܗܿ (ܕ.”ܣܐܪܐ ܢܙܐܪ”، ܝܘܕܥܝܬܐ “ܣܪܐ ܐܠܚܦܐܓ̰ܝ”، ܘܟܬܘܒܬܐ “ܓ̰ܡܐܢܐ ܡܡܬܐܙ)، ܗܝ ܕܝܗ̄ܘܐ ܚܕܪ (ܝܘܕܥܐ ܒܝܢ ܐܕܫܢܝܘܬܐ ܘܡܥܒܕܢܘܬܐ).
ܘܦܝܫܠܗܘܢ ܚܬܝܡܐ ܥܒܘܕܘ̈ܬܐ ܕܝܘܡܐ ܩܕܡܝܐ ܒܢܘܩܙܐ ܙܡܝܪܐ ܕܝܗܠܐ ܕܐܟܕܝܡܝܘܬܐ ܕܐܘܪܢܝܢܐ ܕܐܡܢ̈ܐ.
ܘܦܝܫ ܕܟܝܪܐ، ܕܒܝܬ ܓܠܚܐ ܕܟܬܒܐ ܦܬܝܚܐ ܒܕܘܪܬܗ ܬܠܝܬܝܬܐ ܦܝܫ ܥܒܝܕܐ ܒܡܬܚܐ ܡܢ 25-27 ܐܝܪ ܩܐܡܝܐ، ܘܚܒܫܝ ܥܒܘܕܘ̈ܬܗ ܝܬܒܝ̈ܬܐ ܕܘܪ̈ܫܝܐ ܘܢܘܩܙ̈ܐ ܐܡܢܝ̈ܐ ܘܙܡܝܪ̈ܝܐ ܡܫܚܠܦ̈ܐ.
