ܦܝܫܠܗܘܢ ܥܒܝܕܐ ܓܘ ܐܘܢܐ ܕܒܝܬ ܨܘܒܐ ܩܬܘܠܝܩܝܐ ܓܘ ܐܪܒܝܠ، ܝܘܡ ܐܪܒܥܒܫܒܐ 5 ܫܒܛ 2025، ܚܘܪ̈ܩܢܐ ܕܓܠܚܬܐ ܕܟܬܒܐ ܗܘ ܕܟܡ ܟܬܒܠܗ ܒܠܫܢܐ ܐܠܡܢܝܐ ܡܠܠܐ ܒܫܡܐ ܕܡܘܬܒܐ ܕܐܦܣܩܘܦ̈ܐ ܕܐܠܡܢܝܐ، ܓܠܝܘܢܝܐ ܘܬܐܘܠܘܓܼܝܐ (ܠܗܘܬܝܐ) ܐܠܡܢܝܐ (ܡܐܬܝܣ ܟܘܦ)، ܘܝ̄ܗܘܐ ܒܫܡܐ (ܝܘܪܬܢܐ ܡܫܝܚܝܐ ܓܘ ܥܝܪܩ).
ܘܬܢܐ ܟܬܘܒܐ ܓܘ ܟܬܒܗ ܬܫܥܝܬܐ ܕܡܫܝܚܝܘܬܐ ܓܘ ܥܝܪܩ، ܥܡ ܝܨܝܦܘܬܐ ܥܠ ܚܙܘܩܝܐ ܕܦܦܐ (ܦܪܢܣܝܣ) ܠܥܝܪܩ ܒܫܢ̄ܬܐ ܕ2021 ܘܕܝܦܠܘܡܛܝܩܝܘܬܐ ܕܢܩܦܠܗܿ ܟܘܪܣܝܐ ܫܠܝܚܝܐ ܓܘ ܦܢܝܬܐ.
ܘܐܬܝܠܗ ܒܦܘܬܚܐ ܕܟܬܒܐ، ܗܘ ܕܟܡ ܟܬܒܠܗ ܒܠܫܢܐ ܐܝܛܠܝܐ ܦܦܐ (ܦܪܢܣܝܣ) (( ܕܟܪܢ ܘܛܥܝܢܐ ܡܢܬܐ ܚܙܘܩܝ ܫܠܝܚܝܐ ܠܥܝܪܩ، ܗܘ ܕܩܡܠܝ ܓܘܗ ܒܣܝܩܘܡ ܐܕܪ/ 2021، ܫܒܘܩ ܡܢ ܟܘܪܗܢܐ ܕ(ܟܘܪܘܿܢܐ) ܘܙܕܘܥ̈ܝܬܐ ܫܝܢܝܐ، ܠܡܥܒܪܢܘܬܐ ܥܠ ܚܘܒܝ ܘܐܘܝܘܬܝ ܥܡ ܡܫܝܚܝ̈ܐ ܘܟܠܝܗܝ ܐ̄ܢܫ̈ܐ ܛܒ̈ܐ ܒܗܢ ܐܬܪܐ،ܐܢܝ ܕܐܝܬܠܗܘܢ ܫܘܦܐ ܐܢܢܩܝܐ ܓܘ ܠܒܝ ܘܨܠܘ̈ܬܝ)).
ܘܚܬܡܠܗ ܦܦܐ ܦܘܬܚܐ ܕܟܬܒܐ ܟܕ ܐܡܪ: (( ܒܥܢ ܕܚܬܡܢ ܡܡܠܝ ܒܡܥܒܪܢܘܬܐ ܥܠ ܝܕܥܬܝ ܪܒܬܐ ܕܠܐ ܡܬܡܨܝܐܝ̄ܠܗ ܕܚܙܚ ܥܝܪܩ ܕܠܐ ܡܫܝܚܝ̈ܐ، ܒܥܠܬܐ ܕܝܠܝܗܝ ܥܡ ܡܗܝܡܢ̈ܐ ܐ̄ܚܪ̈ܢܐ ܡܫܘܬܦܝ ܒܐܣܟܝܡܐ ܪܒܐ ܒܗܝܝܘܬܐ ܦܪܝܫܬܐ ܕܐܬܪܐ، ܐܝܟ ܫܘܦܐ ܕܚܝܬܐ ܘܫܒܘܩܢܐ ܘܩܒܠܬܐ ܚܠܦܬܐ ܡܢ ܕܪ̈ܐ ܩܕܡܝ̈ܐ)).
ܘܦܝܫܠܗܘܢ ܡܛܝܒ̈ܐ ܠܚܘܪ̈ܩܢܐ ܕܡܘܕܥܢܘܬܐ ܕܟܬܒܐ ܡܝܩܪ̈ܐ ܡܝܛܪ̈ܦܘܠܝܛܐ ܙܗܝ̈ܐ ܓܘ ܐܪܒܝܠ، ܪܫܐ ܕܐܦܣܩܘܦܐ ܕܐܪܒܝܠ ܕܥܕܬܐ ܟܠܕܝܬܐ ܡܪܝ (ܒܫܐܪ ܡܬܝ ܘܪܕܐ)، ܗܘ ܕܡܘܩܪܒܠܗ ܡܡܠܐ ܕܫܘܪܪܠܗ ܓܘܗ (( ܒܝܬ ܨܘܒܐ ܩܬܘܠܝܩܐ ܫܩܠ ܫܘܒܗܪܐ ܒܚܦܩܬܗ ܡܘܕܥܢܘܬܐ ܕܗܢ ܟܬܒܐ ܗܘ ܕܬܢܐ ܝܘܪܬܢܐ ܕܫܪ̈ܫܝܐ ܓܘ ܥܝܪܩ))، ܘܥܡ ܪܥܝܐ ܕܡܪܥܝܬܐ ܕܚܕܝܒ ܕܥܕܬܐ ܣܘܪܝܝܬܐ ܩܬܘܠܝܩܝܬܐ ܓܘ ܐܪܒܝܠ ܡܪܝ (ܢܬܢܐܝܠ ܢܙܐܪ ܥܓ̰ܡ)، ܪܥܝܐ ܕܡܪܥܝܬܐ ܕܡܘܨܠ ܘܟܪܟܘܟ ܘܩܠܝܡܐ ܕܟܘܪܕܣܬܢ ܕܥܕܬܐ ܣܘܪܝܝܬܐ ܐܪܬܕܘܟܣܝܬܐ ܡܪܝ ܢܝܩܘܕܝܡܘܣ ܕܘܝܕ ܡܬܝ ܫܪܦܿ)، ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܟܢܫܐ ܡܢ ܡܘܪ̈ܕܢܐ ܘܝܨܘܦ̈ܐ ܒܬܫܥܝܬܐ ܕܐܬܪܐ ܕܒܝܬ ܢܗܪܝܢ.
