ܬܘܢܝܬܐ ܟܪܝܬܐ
ܥܐܕܠ ܕܢܘ
ܟܡܐ ܫܢܹ̈ܐ ܓܵܘ ܐܲܬܪܵܐ ܘܓܵܘ ܓܵܠܘܼܬ݂ܵܐ ܡܢܲܣܘܝܹܐ ܗܘܵܐ ܕܥܵܒ݂ܸܕ݂ ܚܲܕ݇ ܡܢܕܝܼ ܕܦܵܝܫܵܐ ܨܒܘܬܵܐ ܕܐܘܡܬܹܗ ܦܪܝܼܣܬܐ ܓܵܘ ܥܵܠܡܵܐ، ܘܠܵܐ ܗܘܵܐ ܡܨܵܝܵܐ..
ܕܵܪܸܫ ܗܘܵܐ ܥܲܡ ܚܲܒ݂ܪ̈ܵܢܹܗ، ܦܸܚܡܹ̈ܗ ܓܘ ܫܘܼܓܠܵܐ، ܘܠܵܐ ܡܵܛܹܐ ܗܘܵܐ ܠܚܲܕ݇ ܦܠܵܛܵܐ ܐܵܘ ܚܕܵܐ ܬܲܚܡܢܬܵܐ ، ܬܲܪܡܝܼܬܵܐ .. ܠܝܼܬ ܚܲܕ ܝܵܘܡܵܐ ܕܠܵܐ ܦܵܠܸܫ ܗܘܵܐ ܒܵܬܲܪ ܕܕܵܪܸܫ ܗܘܵܐ ܚܕܵܐ ܨܒܘܬܐ ܥܡ ܚܲܒ݂ܪ̈ܵܢܹܗ.. ܟܠ ܨܸܒ݂ܵܬ݂ܵܐ ܕܬܲܚܡܸܢ ܗܘܵܐ ܒܲܝ، ܝܗܘܵܐ ܐܘܼܡܬܝܼ .. ܐܘܼܡܬܝܼ ..!!
ܚܵܝܸܪ ܗܘܵܐ ܓܵܘ ܬܠܦܸܙܝܘܼܢܹ̈ܐ، ܩܵܪܹܐ ܗܘܵܐ ܛܸܒܹ̈ܐ.. ܚܲܕܟܡܵܐ ܛܸܒܹ̈ܐ ܡܓܵܒܹܐ ܗܘܵܐܠܗܘܢ ܘܩܵܪܹܐ ܗܘܵܐܠܗܘܢ ܐܵܢܝܼ ܕܒܲܣܡܝܼ ܗܘܵܐܠܹܗ ܠܚܘܿܕܲܝܗܝ.. ܠܵܐ ܩܵܪܹܐ ܗܘܵܐ ܕܡܲܠܸܦ ܓܵܢܹܗ ܐܵܘ ܕܡܲܙܝܸܕ ܝܼܕܲܥܬܹܗ.!
ܘܦܝܼܫܠܹܗ ܗܵܘܢܹܗ ܘܚܙܲܝܬܹܗ ܠܥܵܠܡܵܐ ܘܐܲܬ݂ܪܵܐ ܕܝܼܠܹܗ ܚܵܝܵܐ ܒܹܗ ܒܵܬܲܪ ܡܲܥܪܲܩܬܹܗ ܡܢ ܐܲܬܪܹܗ ܫܸܪܫܵܝܵܐ… ܚܣܝܼܪܬܵܐ ܥܲܠ ܚܲܕ݇ ܬܲܚܡܲܢܬܵܐ ܥܝܼܩܬܵܐ.. ܐܲܝܟ݂ ܐ݇ܡܸܪܲܝ ܚܲܕ݇ ܬܪܹ̈ܝܢ ܡܢ ܚܲܒ݂ܪ̈ܵܢܹܗ..
ܫܵܥܬ݂ܵܐ ܥܒ݂ܸܪ ܗܘܵܐܠܵܗ ܡܢ ܚܲܕܥܣܲܪ ܒܠܲܝܠܹܐ، ܠܵܐ ܕܥܸܪܹܗ ܠܒܲܝܬܵܐ. ܒܵܒܹܗ ܘܝܸܡܹܗ ܫܓ݂ܸܫܠܗܘܢ ܡܢ ܥܲܪܩܲܠܬܹܗ.. ܦܝܼܫܠܹܗ ܒܵܒܹܗ ܐ݇ܙܵܠܵܐ ܘܐ݇ܬ݂ܵܝܵܐ ܓܘ ܐܘܿܕܹܐ ܕܝܼܬܵܒ݂ܬܵܐ، ܘܝܸܡܹܗ ܚܝܵܪܵܐ ܠܫܵܥܬܵܐ ܡܬܘܠܬܲܝܬܵܐ ܒܓܘܼܕܵܐ ܚܲܕ ܪܦܵܦܵܐ.. ܘܚܲܕ ܪܦܵܦܵܐ ܠܨܘܼܪܬܵܐ ܕܩܲܕܝܼܫܵܐ ܡܵܪܲܬ݂ ܓܲܘܢܹ̈ܐ ܒܲܗܪ̈ܵܢܹܐ.. ܘܡܲܓ̰ܘܘܿܓ̰ܹܐ ܣܸܦܵܬ݂ܵܗ ܐܲܝܟ݂ ܕܝܼܠܵܗ ܡܨܲܠܘܿܝܹܐ..
ܦܬܸܚܠܵܗ ܒܪܵܬܵܐ ܒܲܪܬ݂ ܚܲܡܫܲܥܣܲܪ ܫܸܢܹ̈ܐ ܥܲܝܢܵܗ ܟܕ ܠܵܐ ܡܨܹܐܠܵܐ ܕܕܲܡܟ݂ܵܐ ܘܗܵܝ ܪܓܵܫܵܐ ܒܫܸܓ݂ܫܵܐ ܕܝܸܡܵܗ ܘܒܵܒܵܗ.. ܘܒܘܩܸܪܵܐ:
– ܡܵܐ ܠܘܿܟ݂ܘܿܢ ܗܲܕܟ݂ܵܐ ܫܓ݂ܝܼܫܹܐ ܘܠܵܐ ܡܨܵܝܵܐ ܝܼܬܵܒ݂ܵܐ ܒܚܲܕ ܕܘܟܵܐ؟
– ܐܲܚܘܿܢܵܟ݂ ܝܵܠܕ݇ܬܵܐ ..!
ܩܲܕܡ ܕܡܬܲܡܝܼܡܵܐ ܝܸܡܵܗ ܨܵܘܬ݂ܵܗ ܐ݇ܡܸܪܵܗ:
– ܡܐܠܹܗ؟
– ܠܐ ܕܥܸܪܹܐ ܗܠ ܕܲܗܵܐ..
ܡܒܪ̈ܪܣܸܡܠܵܐ ܒܪܵܬܵܐ .. ܟܕ ܚܙܹܐܠܵܐ ܝܸܡܵܗ ܒܲܪܣܲܡܬܵܐ ܠܣܸܦܘܵܬ݂ܵܗ ܟܪܸܒܠܵܗ ܘ:
– ܡܒܲܪܣܘܿܡܹܐ ܗܘܵܬ̇.؟؟
– ܐܸܠܵܐ ܡܵܐ ܥܲܒ݂ܕܲܢ؟
ܦܘܼܢܹܐܠܵܐ ܒܪܵܬܵܐ.
– ܩܘܼܡ ܕܚܵܙܲܚ ܐܲܝܟܵܐ ܐܵܙܲܠ݇ܚ ܡܒܲܩܪܲܚ ܥܠܹܗ..
ܦܘܼܢܹܐܠܵܐ ܒܪܵܬܵܐ ܘܗܵܝ ܓܚܵܟܵܐ:
– ܡܒܲܩܪܘܢ ܡܢ ܡܛܲܐܠܵܢܹ̈ܐ ܕܓܘܕ݂ܬܲܩܠܵܐ.
ܘܒܗܵܝ ܥܸܕܵܢܵܐ ܥܒ݂ܸܪܹܗ ܡܢ ܬܲܪܥܵܐ ܘܗܵܘ ܕܥܝܼܬ݂ܵܐ .. ܚܲܝܪܹܐ ܥܠܹܗ ܒܵܒܹܗ :
– ܐܲܝܟܵܐ ܗܘܸܬ ܗܘܵܐ؟
ܡܫܘܼܪܹܐܠܹܗ ܫܠܵܚܵܐ ܨܘܼܕܪܹܗ ܦܲܠܓܘܼ ܬܪܝܼܬ݂ܵܐ، ܘܗܵܘ ܦܨܝܼܚܵܐ ܘܓܚܵܟܵܐ ܘܡܘܪܡܵܐ ܢܲܚܝܼܪܹܗ ܚܬܝܼܪܵܐ ܒܓܵܢܹܗ.
ܩܪܸܒܠܵܗ ܥܠܹܗ ܝܸܡܹܗ ܘܐ݇ܡܪܵܐ:
– ܡܐܠܘܿܟ݂ ܒܪܘܿܢܝܼ.. ܩܲܡ ܫܵܓ݂ܫܸܬܠܲܢ ܐܵܢܵܐ ܘܒܵܒܘܿܟ݂ ܟܠܵܗ ܗܵܝ ܥܸܕܵܢܵܐ..
ܦܘܢܹܐܠܹܗ :
– ܫܬܘܿܩ ܝܸܡܝܼ .. ܠܵܐ ܗܘܸܢ ܗܘܵܐ ܣܒܝܼܪܵܐ ܗܲܕܟ݂ܵܐ.. ܠܐ ܝܗܘܸܢ ܗܲܝܡܘܿܢܹܐ..!
ܡܒܘܼܩܸܪܵܐ ܝܸܡܹܗ :
– ܡܵܐ ܝܠܹܗ ܒܸܪܝܵܐ..؟ ܡܲܚܕܝܼ ܠܲܢ ܐܵܦ ܐܲܚܢܲܢ ܥܲܡܘܟ݂..
ܝܼܬܸܒ݂ܠܹܗ ܠܣܸܦܬ݂ܵܐ ܕܫܘܝܼܬܹܗ ܘܡܫܘܼܪܹܐܠܹܗ ܫܠܵܚܵܐ ܓܘܼܪ̈ܒ݂ܹܗ ܘܡܨܵܘܘܿܬܹܐ:
– ܠܵܐ ܩܪܸܡܠܹܗ ܐܲܬܪܲܢ ܥܪܵܐܩ ܓܵܘ ܓܘܕܬܲܩܠܵܐ!!
-ܐܹܝܢ.. ܣܒܸܪܵܗ ܝܸܡܹܗ ܕܡܬܲܡܸܡ ܨܵܘܬܹܗ..
ܒܵܒܹܗ ܦܫܸܛܠܹܗ ܦܲܩܲܪܬܹܐ ܘܦܬܸܚܠܹܗ ܥܲܝܢܹܗ ܒܪܘܝܼܚܘܼܬ݂ܵܐ..
– ܩܪܸܡܠܹܗ ܠܡܵܢܝܼ..؟
– ܠܐܲܘܵܐ ܐܲܬܪܵܐ.. ܐܲܘܵܐ ܐܲܬ݂ܪܵܐ ܕܝܼܠܹܗ ܫܒ݂ܲܥܣܲܪ ܓܵܗܹ̈ܐ ܒܸܫ ܓܘܿܒ݂ܪܵܐ ܡܢ ܐܲܬܪܲܢ ܥܪܐܩ..
– ܘܐ݇ܚܲܪܬܵܐ؟
ܡܬܘܡܸܡܠܹܗ ܒܪܘܢܵܐ :
– ܐܵܢܵܐ ܠܵܐ ܗܘܵܢ ܗܘܵܐ ܣܒܝܼܪܵܐ ܕܐܵܬܝܼ ܗܘܵܘ ܬܸܠܦܙܝܘܿܢܹ̈ܐ ܘܫܘܼܪ̈ܛܹܐ..
ܡܫܘܼܪܹܐܠܹܗ ܠܸܒܵܐ ܕܒܵܒܹܗ ܡܚܵܝܵܐ ܒܣܘܼܪܗܵܒ݂ܵܐ:
– ܡܵܐ .. ܬܸܠܦܸܙܝܘܿܢܹ̈ܐ ܡܵܐ ܫܘܼܪ̈ܛܹܐ.. ܘܓܘܕܬܲܩܠܵܐ ..! ܡܲܦܪܸܡ ܠܝܼ ..
ܡܬܘܪܸܨܠܹܗ ܒܪܘܿܢܵܐ ܝܼܬܵܒ݂ܬܹܗ:
– ܓ̰ܡܸܥܠܲܢ ܟܠܲܢ ܥܠܲܝܡܹ̈ܐ ܘܓܘܼܒ݂ܪܹ̈ܐ ܘܐ݇ܢܸܫܹ̈ܐ ܥܝܼܪ̈ܵܩܵܝܹܐ ܩܘܼܪܒܵܐ ܕܡܲܫܪܝܵܐ ܕܩܛܵܪܵܐ.. ܐܵܢܝܼ ܕܝܼܗܘܵܘ ܙܡܵܪܵܐ ܘܫܘܵܪܵܐ.. ܘܐܲܢܹܝܗܝ ܡܟܲܠܟܘܿܠܹܐ.. ܘܐ݇ܚܹܪ̈ܢܹܐ ܡܵܪܘܿܡܹܐ ܐܵܬ݂ܵܐ ܕܥܪܵܐܩ..
– ܗܹܐ.. !
– ܘܐܵܢܵܐ ܣܸܩܠܝܼ ܠܪܹܫ ܚܕܵܐ ܪܵܕ݂ܝܼܬܵܐ ܘܡܘܪܸܡܠܝܼ ܐܵܬ݂ܵܐ ܕܐܘܼܡܬܝܼ..
ܝܸܡܵܐ ܘܒܪܵܬܵܗ ܚܝܪܲܝ ܚܕ݂ܐ ܒܗܵܝ ܐ݇ܚܸܪܬܵܐ..
– ܠܪܸܫ ܪ̈ܵܕܝܼܬܵܐ .. !؟ ܡܒܘܼܩܸܪܹܐ ܒܵܒܵܐ.. ܘܡܬܘܡܸܡܠܹܗ ܒܘܼܩܵܪܹܗ :
ܛܵܥܘܿܢܬܵܐ.. ܬܪܲܟ..؟!
ܦܘܼܢܹܐܠܹܗ ܒܪܘܿܢܵܐ :
– ܠܵܐ ܠܵܐ ܒܵܒܝܼ .. ܪܵܕܝܼܬ݂ܵܐ ܙܥܘܿܪܬܵܐ .. ܣܸܩܠܲܢ ܪܸܫ ܒܘܼܢܲܕ ܘܐܲܚܢܲܢ ܪܩܵܕ݂ܵܐ ..
ܘܐܵܢܵܐ ܡܲܪܘܿܡܹܐ ܐܵܬ݂ܵܐ ܕܐܘܼܡܬܵܐ .. ܠܵܐ ܚܙܹܐܠܲܢ ܐܸܠܵܐ ܬܪܹ̈ܝܢ ܬܠܵܬ݂ܵܐ ܨܵܝܘܿܪܹ̈ܐ ܡܢ ܬܸܠܦܸܙܝܘܿܢܹ̈ܐ ܐܲܬܪ̈ܵܠܵܝܹܐ ܓܪܵܫܵܐ ܨܘܼܪܬܲܢ .. ܘܐܵܢܵܐ ܡܲܪܘܿܡܹܐ ܐܵܬ݂ܵܐ ܪܵܡܵܐ ܪܵܡܵܐ..
ܕܥܸܪܹܗ ܒܵܒܵܐ ܘܪܘܿܦܸܐܠܹܗ ܓܵܢܹܗ ܠܟܘܼܪܣܝܵܐ ܘܡܘܪܸܡܠܹܗ ܟܲܦܹܗ ܠܪܹܫܹܗ..
ܡܬܘܡܸܡܠܹܗ ܒܪܘܢܵܐ:
– .. ܫܘܵܪܵܐ ܪܵܡܵܐ ܘܢܚܵܬ݂ܫܐ ܠܒܘܿܢܲܕ ܕܪܵܕܝܼܬܵܐ.. ܗܸܠ ܕܒܸܩܠܹܗ ܒܘܿܢܲܕ.. ܬܒܲܪܠܹܗ.. ܐܸܡܵܐ ܒܐܸܡܵܐ ܩܘܼܕܡܹܐ ܡܦܲܠܛܝܼ ܠܵܗ ܓܵܘ ܬܸܠܦܙܝܘܿܢ.. ܘܵܠܹܐ ܕܐܲܡܪܸܢ ܠܚܲܒ݂ܪ̈ܵܢܝܼ ܬܵܐ ܚܵܙܝܼ ܠܵܗ ܩܘܼܕܡܹܐ..
ܕܲܗܵܐ ܒܐܵܙܸܠ݇ܢ ܡܲܝܕܥܸܢܲܝ..
ܝܸܡܵܐ ܡܘܚܕ݂ܪܵܗ ܒܵܠܵܗ ܠܨܘܼܪܬܵܐ ܕܩܲܕܝܼܫܵܐ.. ܘܒܵܒܹܗ ܡܘܢܫܹܐܠܹܗ ܟܲܦܹܗ ܥܲܠ ܪܹܫܹܗ̇ .. ܘܪܓܵܫܵܐ ܗܘܵܐ ܡܲܐܝܟ݂ ܚܲܕ݇ ܩܦܝܼܚܵܐ.
19 ܫܒܛ 2024