ܡܘܝܕܥܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܝܘܡ ܚܕܒܫܒܐ 1 ܐܝܠܘܠ 2024، ܕܝܘܡܐ ܕܚܡܫܒܫܒܐ ܐܬܝܢܐ، 5/ܐܝܠܘܠ، ܒܕ ܡܫܪܝ ܦܘܠܚ̈ܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܗܘ ܕܒܥܝܐ ܡܕܒܪܢܘܬܐ ܓܘܢܝܬܐ ܩܛܪܬܗ ܥܡ ܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ، ܒܪܘܣܬܩܐ ܕܥܢܟܒܐ ܒܐܪܫܟܝܬܐ ܕܩܠܝܡܐ ܕܟܘܪܕܣܬܢ ܐܪܒܝܠ.
ܘܡܘܒܝܢܗ ܐܘܓܼܢܐ، ܕ( ܣܝܡܦܘܙܝܘܡ ܒܕ ܚܒܫ ܕܘܪܫܐ ܕܒܘܨܝ̈ܐ ܐܢܝ ܕܚܒܫܝ ܝܪܬܘܬܐ ܥܡܡܝܬܐ ܣܘܪܝܝܬܐ، ܐܡܢ̈ܐ ܚܝܪ̈ܝܐ ܘܐܘܡܢ̈ܘܬܐ ܣܘܪ̈ܝܝܐ، ܡܘܣܝܩܐ ܘܙܡܝܪ̈ܬܐ ܣܘܪ̈ܝܝܐ، ܒܐܡܐ ܣܘܪܝܝܐ ܘܐܡܢ̈ܐ ܒܐܡܝ̈ܐ ܘܣܝܢܡܐ، ܥܡ ܚܝܘܬܐ ܕܩܘܪ̈ܝܐ ܣܘܪ̈ܝܝܐ، ܘܝܘܕܥܐ ܣܘܪܝܝܐ ܘܐܝܟܢܘܬܐ ܕܛܘܪܢܬܐ ܕܦܘܠܚܢܗ)، ܘܪܡܙܠܗ ܠܫܘܬܦܬܐ ܕܙܘܕܐ ܡܢ (200) ܒܨܘܝ̈ܐ ܘܐܟܕܝܡܝ̈ܐ ܘܝܨܘܦ̈ܐ ܓܘ ܝܬܒ̈ܝܬܐ ܕܣܝܡܦܘܙܝܘܡ ܘܚܠܩܝ̈ܬܗ ܕܘܪ̈ܫܝܐ، ܐܢܝ ܒܦܝܫ ܥܒܝܕܐ ܓܘܝܗܝ ܕܘܪܫܐ ܕ(50) ܒܘܨܝ̈ܐ ܦܝܫܠܗܘܢ ܡܓܘܒܝܐ ܒܝܕ ܣܝܥܬܐ ܝܘܠܦܢܝܬܐ ܡܢ ܒܝܢ ܙܘܕܐ ܡܢ (100) ܦܬܘ̈ܬܐ ܒܘܨܝܝ̈ܐ ܦܝܫܠܗܘܢ ܡܘܩܪܒܐ ܠܫܘܬܦܬܐ ܓܘ ܣܝܡܦܘܙܝܘܡ).
ܘܡܘܒܝܢܗ ܐܘܓܼܢܐ، (ܗܢ ܣܝܡܦܘܙܝܘܡ، ܦܝܫ ܩܛܝܪܐ ܒܪܥܝܘܬܐ ܕܪܫ ܘܙܝܪ̈ܐ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ ܡܣܪܘܪ ܒܐܪܙܢܝ، ܘܝܠܗ ܠܘܡܕܐ ܬܒܝܠܝܐ ܩܕܡܝܐ ܡܫܘܬܦܝ ܓܘܗ ܙܘܕܐ ܡܢ (40) ܐܟܕܝܡܝ̈ܐ ܘܒܨܘܝ̈ܐ ܡܢ ܙܘܕܐ ܡܢ (25) ܒܬܝ̈ ܨܘܒ̈ܐ ܬܒܝܠܝ̈ܐ ܪ̈ܨܝܢܐ ܡܢ (15) ܐܬܪ̈ܘܬܐ ܡܢ ܐܬܪ̈ܘܬܐ ܕܬܒܝܠ ܡܢܝܗܝ (ܗܐܪܦܐܪܕ)، (ܐܘܟܣܦܘܪܕ) ܘ( ܟܡܒܪܝܕܓ̰)، ܥܡ ܡܢܝܢܐ ܐ̄ܚܪܢܐ ܡܢ ܒܨܘܝ̈ܐ ܘܐܟܕܝܡܝ̈ܐ ܡܫܘܬܦ̈ܐ ܡܢ ܒܬܝ̈ ܨܘܒ̈ܐ ܥܝܪ̈ܩܝܐ ܡܫܚܠܦ̈ܐ).
ܘܐ̄ܡܪܗ ܐܘܓܼܢܐ، ( ܢܝܫܐ ܡܢ ܥܒܕܬܐ ܕܣܝܡܦܘܙܝܘܡ ܠܫܪܪܬܐ ܕܠܫܢܐ ܣܘܪܝܝܐ ܠܐܝܠܗ ܠܫܢܐ ܠܝܬܘܪܓ̰ܝܐ ܕܒܨܘܪܘܬܐ ܬܘܕܝܬܢܝܬܐ ܬܪܝܟܬܐ ܓܘ ܡܕܢܚܐ ܡܨܥܝܐ، ܐܠܐ ܒܚܫܒܢܬܗ ܠܫܢܐ ܕܡܪܕܘܬܐ ܕܚܕ ܥܡܐ ܫܪܫܝܐ ܒܕܪܐ ܚܕܬܐ) ، ܘܡܘܒܝܗ (ܫܘܬܦ̈ܐ ܒܕ ܥܒܕܝ ܒܘܨܝ̈ܐ ܒܐܝܟܢܘܬܐ ܕܡܨܝܬܐ ܕܠܫܢܐ ܘܡܪܕܘܬܐ ܣܘܪܝܝܬܐ ܠܦܝܫܬܐ ܘܐܡܝܢܘܬܐ ܒܝܘܪܟܐ ܕܐܢܝ ܙܒܢ̈ܐ ܫܒܘܩ ܡܢ ܣܩܘܒܠܝ̈ܘܬܐ ܪ̈ܒܝ ܕܟܠܝ ܕܪܩܘܒܠ ܐܡܝܢܘܬ ܐܝܬܘܬܗ).
ܘܦܝܫ ܕܟܝܪܐ، ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܗܘ ܒܦܝܫ ܩܛܝܪܐ ܠܡܬܚܐ ܡܢ 5-8 ܐܝܠܘܠ ܐܬܝܢܐ، ܬܚܘܬ ܪܘܫܡܐ ” ܣܘܪܝܝܘܬܐ ܡܪܕܘܬܐ ܚܝܬܐ ܡܬܥܫܢܐ ܐܣ̈ܐ ܕܡܩܘܝܢܘܬܢ”، ܒܕ ܦܝܫ ܩܛܝܪܐ ܓܘ ܐܘܢܐ ܕܣܥܕ ܥܒܕܠܠܗ ܕܠܘܡܕ̈ܐ ܓܘ ܐܪܒܝܠ، ܒܬܪ ܗܕܟ ܒܕ ܡܫܪܐ ܣܝܡܦܘܙܝܘܡ ܝܬܒ̈ܝܬܗ ܕܘܪ̈ܫܝܐ ܓܘ ܐܘܢܐ ܕܠܘܡܕ̈ܐܕܒܝܬ ܨܘܒܐ ܩܬܘܠܝܩܝܐ/ ܐܪܒܝܠ ܘܐܘܢܐ ܕܠܘܡܕ̈ܐ ܕܦܛܪܝܪܟܐ ܡܪܝ ܝܘܣܦ ܫܬܝܬܝܐ ܐܘܕܘ ܒܕܝܪܐ ܕܣܗܕܐ ܓ̰ܒܪܐܝܠ ܕܢܒܘ، ܓܘ ܥܢܟܒܐ ܒܐܪܒܝܠ، ܘܚܒܫܝ ܦܘܠܚܢ̈ܗ ܣܥܘܪ̈ܘܬܐ ܠܩܢܛܪܘܢ ܡܪܕܘܬܢܝܐ ܕܢܛܪܬܐ ܕܣܪ̈ܝܛܬܐ ܣܘܪ̈ܝܝܐ ، ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܘܩܢܛܪܘܢ ܕܡܟܬܒܼܢܘܬܐ ܪܩܡܝܬܐ ܕܣܪ̈ܝܛܬܐ ܡܕܢܚܝ̈ܐ.