ܦܬܚܠܗ ܒܝܬ ܐܪ̈ܟܐ ܣܘܪܝܝܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܪܡܫܐ ܕܬܪܝܢܒܫܒܐ 29 ܐܝܠܘܠ 2025، ܒܛܘܝܒܐ ܪܘܫܡܝܐ ܘܟܢܫܝܐ ܪܘܝܚܐ، ܥܒܘܕܘ̈ܬܐ ܕܒܝܬ ܓܠܚܐ ܕܟܬܒܐ ܦܬܝܚܐ ܒܕܘܪܬܗ ܪܒܝܥܝܬܐ، ܬܚܘܬ ܪܘܫܡܐ (ܟܬܒܐ ܡܚܙܝܬܐܝܠܗ ܕܗܝܝܘܬܐ)، ܒܫܘܦܗ ܥܝܕܝܐ ܩܘܪܒܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܫܘܪܐܠܗܘܢ ܥܒܘܕܘ̈ܬܐ ܕܒܝܬ ܓܠܚܐ ܒܦܘܬܚܐ ܕܡܢܘ̈ܬܗ ܡܫܚܠܦ̈ܐ، ܒܬܪ ܗܕܟ ܟܪܘܟܝܐ ܒܡܢܘ̈ܬܐ ܕܒܝܬ ܓܠܚܐ ܘܚܙܝܬܐ ܕܒܬܝ̈ ܦܪܣܐ ܘܟܬܒ݁̈ܐ ܡܫܘܬܦ̈ܐ، ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܚܕ ܡܡܠܐ ܫܘܪܪܠܗ ܓܘܗ: (ܥܢܟܒܐ ܒܕ ܦܝܫܐ ܡܢܪܬܐ ܡܪܕܘܬܢܝܬܐ ܚܦܩܐ ܥܒܘܕܘ̈ܬܐ ܣܦܪ̈ܝܐ ܘܐܘܡܢܝ̈ܐ)، ܘܫܘܪܪܠܗ ܐܦ ܗܕܟ ܥܠ ( ܟܬܒܐ ܝܠܗ ܡܚܙܝܬܐ ܕܗܝܝܘܬܢ ܘܢܛܘܪܐ ܕܥܘܗܕܢܢ، ܘܟܡܐ ܕܩܪܒܚ ܡܢܗ ܒܕ ܥܒܕܚ ܝܘܒܠ̈ܐ ܒܫ ܥܝܪ̈ܐ ܘܡܪܐ ܕܗܝܡܢܘܬܐ ܒܗܝܝܘܬܝܗܝ ܘܒܝܬܝܘܬܝܗܝ).
ܘܗܕܟ ܐ̄ܡܪܗ ܐܘܓܼܢܐ: (ܐܓܪܬܐ ܕܒܝܬ ܓܠܚܐ ܡܫܪܪܐ ܕܐܚܢܝ ܝܗ̄ܘܚ ܥܡܐ ܠܐ ܟܩܒܠ ܕܚܝܐ ܕܠܐ ܗܝܝܘܬܐ، ܘܠܐ ܟܩܒܠ ܕܦܝܫ ܫܝܦܐ ܡܢ ܥܘܗܕܢܐ)، ܘܫܘܪܪܠܗ ̣ (ܡܪܕܘܬܐ ܕܥܡܢ، ܘܥܡ ܡܪܕܘܬܐ ܕܐܬܪܢ، ܒܕ ܦܝܫܝ ܡܒܘܥܐ ܕܠܐ ܟܝܒܫ، ܘܓܫܪܐ ܕܐܣܪ ܕܥܒܪ ܒܕܥܬܝܕ).
ܘܡܘܒܝܢܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܚܘܬܡܐ ܕܡܡܠܗ، ܕ(ܟܡܐ ܕܟܠܢ ܒܪܩܘܒܠ ܥܢܟܒܐ، ܟܚܙܢ ܡܕܝܢ̄ܬܐ ܠܐ ܟܡܠܝܐ ܕܗܘܝܐ ܣܗܕܐ ܥܠ ܬܫܥܝܬܐ، ܐܠܐ ܡܬܪܨܐ ܕܥܬܝܕ ܒܡܪܕܘܬܐ ܘܝܕܥܬܐ، ܘܡܫܪܪܐ ܕܟܬܒܐ ܝܠܗ ܙܝܢܗܿ ܒܟܠܝܬܐ ܕܪܩܘܒܠ ܣܩܘܒܠܝ̈ܘܬܐ ܘܢܛܪܬܐ ܕܗܝܝܘܬܐ).
ܒܬܪ ܗܕܟ ܡܘܩܪܒܠܗ ܪܫ ܐܦܣܩܘܦ̈ܐ ܕܡܪܥܝܬܐ ܕܐܪܒܝܠ ܟܠܕܝܬܐ ܡܪܘܬܗ ܕܡܝܛܪܦܘܠܝܛܐ ܡܪܝ (ܒܫܐܪ ܡܬܝ ܘܪܕܐ) ܚܕ ܡܡܠܐ، ܡܘܥܒܪܗ ܓܘܗ ܥܠ ܐܢܢܩܝܘܬܐ ܕܟܬܒܐ ܐܝܟ ܓܫܪܐ ܕܐܣܪ ܒܝܢ ܕܥܒܪ ܘܩܐܡ، ܘܡܘܒܝܢܗ ܥܠ ܐܢܢܩܝܘܬܐ ܕܓܪܗ ܒܢܛܪܬܐ ܕܗܝܝܘܬܐ ܕܥܡܢ ܘܚܡܝܬܐ ܕܐܝܬܘܬܗ ܒܐܪܥܗ، ܒܬܪ ܗܕܟ ܦܝܫܠܗܿ ܥܒܝܕܬܐ ܝܬܒܬܐ ܕܘܪܫܝܬܐ ܚܒܫܠܗܿ ܡܠܘܐܐ ܕ(ܠܫܢܐ، ܝܪܬܘܬܐ ܪܢܝܝܬܐ ܘܗܝܝܘܬܐ ܚܙܘ̈ܐ ܘܐܘܦܩ̈ܐ)، ܒܬܓܒܪܬܐ ܕܣܦܪܐ (ܦܛܪܘܣ ܢܒܬܝ)، ܘܒܫܘܬܦܬܐ ܕܟܠ ܡܢ ( ܪܫ ܐܦܣܩܘ̈ܦܐ ܕܡܪܥܝܬܐ ܕܡܘܨܠ ܘܥܩܪܐ ܕܟܠܕܝ̈ܐ ܡܪܘܬܗ ܕܡܝܛܪܦܘܠܝܛܐ ܡܪܝ (ܡܝܟܐܝܠ ܢܓ̰ܝܒ)، ܘܪܫ ܡܢܬܐ ܕܠܫܢܐ ܣܘܪܝܝܐ ܒܟܠܢܝܘܬ ܬܪܒܝܬܐ ܒܒܝܬ ܨܘܒܐ ܕܨܠܚ ܐܠܕܝܢ ܓܘ ܐܪܒܝܠ ܕܟܬܘܪ (ܟܘܬܪ ܢܓ̰ܝܒ)، ܘܒܨܘܝܐ ܘܐܟܕܝܡܝܐ ܕܟܬܘܪ (ܠܘܪܢܣ ܢܐܕܪ ܡܚܘ)، ܘܬܢܐܠܗܘܢ ܫܘܬܦ̈ܐ ܓܘ ܝܬܒܬܐ ܠܩܐܡ ܕܠܫܢܐ ܣܘܪܝܝܐ ܘܝܪܬܘܬܐ ܕܥܡܢ ܘܫܒܝܠ̈ܐ ܘܐܘܦܩ̈ܐ ܕܫܢܝܬܝܗܝ ܒܗܘܡܢܘܬܐ ܠܝܘܒܠ̈ܐ ܐܬܝܢ̈ܐ.
ܘܒܬܪ ܝܬܒܬܐ، ܡܘܩܪܒܠܗܿ ܐܡܢܬܐ (ܡܝܠܐ ܙܪܕܝ) ܢܘܩܙܐ ܙܡܝܪܝܐ ܦܪܝܫܐ، ܒܬܪ ܗܕܟ ܙܘܝܚܐ ܕܓܪܫ ܕܪܥܢܐ ܕܬܘܢܝܬܐ ܕ(ܐܠܩܒܘ) ܕܣܦܪܐ ܘܡܬܢܝܢܐ ܪܒܐ (ܐܚܡܕ ܐܠܣܥܕܐܘܝ)، ܗܘ ܕܟܡ ܡܩܪܒܝܠܗ ܠܡܛܝܒ̈ܐ ܟܠ ܡܢ (ܡܐܪܓܪܝܬ ܐܕܘܪ) ܘܟܬܘܒܐ ܘܡܒܚܢܢܐ (ܨܒܐܚ ܐܠܫܐܢܝ)، ܕܦܝܫܐ ܡܝܩܪܢܘܬܗ ܡܢ ܓܢ̄ܒ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܠܓܪܗ ܒܣܢܕܬܐ ܕܡܪܕܘܬܐ ܣܘܪܝܝܬܐ، ܘܥܒܕܠܗ ܣܦܪܝܘܬܐ ܚܕ ܓܫܪܐ ܕܐܡܝܢܝܘܬܐ ܘܚܒܘܫܬܐ ܠܐܕܫܢܝܘܬܐ ܡܪܕܘܬܢܝܬܐ.
ܘܦܝܫܠܗܘܢ ܚܬܝܡ̈ܐ ܥܒܘܕܘ̈ܬܐ ܕܝܘܡܐ ܩܕܡܝܐ ܒܢܘܩܙܐ ܙܡܝܪܝܐ ܒܝܕ ܐܡܢܬܐ (ܡܝܪܢܐ ܐܝܫܘ)، ܗܝ ܕܡܘܒܣܡܠܗܿ ܠܒܐ ܕܡܛܝܒ̈ܐ ܒܩܠܗܿ ܒܣܝܡܐ.
ܘܦܝܫܠܗܘܢ ܡܛܝܒ̈ܐ ܠܙܘܝܚܐ ܕܦܘܬܚܐ ܕܒܝܬ ܓܠܚܐ ܟܠ ܡܢ ܪܫ ܐܦܣܩܘܦ̈ܐ ܕܡܝܛܪܦܘܠܝܛܘܬܐ ܕܐܪܒܝܠ ܟܠܕܝܬܐ ܡܪܘܬܗ ܕܡܝܛܪܦܘܠܝܛܐ ܡܪܝ (ܒܫܐܪ ܡܬܝ ܘܪܕܐ)، ܘܪܫ ܐܦܣܩܘܦ̈ܐ ܕܡܘܨܠ ܘܥܩܪܐ ܕܟܠܕܝ̈ܐ ܡܪܘܬܗ ܕܡܝܛܪܦܘܠܝܛܐ ܡܪܝ (ܡܝܟܐܝܠ ܢܓ̰ܝܒ)، ܘܡܢܝܢܐ ܡܢ ܗܕܡ̈ܐ ܕܦܪܠܡܢ ܕܩܠܝܡܐ ܕܟܘܪܕܣܬܢ، ܥܡ ܡܢܝܢܐ ܡܢ ܦܪ̈ܨܘܦܝܘܬܐ ܡܪ̈ܕܘܬܢܝܐ ܘܐܟܕܝܡܝ̈ܐ، ܘܟܢܫܐ ܡܢ ܒܢܝ̈ ܥܡܢ ܝܨܘܦ̈ܐ ܒܡܪܕܘܬܐ ܘܣܦܪܝܘܬܐ.
ܘܦܝܫ ܕܟܝܪܐ، ܕܒܝܬ ܓܠܚܐ ܕܟܬܒܐ ܦܬܝܚܐ ܒܕܘܪܬܗ ܪܒܝܥܝܬܐ ܦܝܫ ܥܒܝܕܐ ܠܡܬܚܐ ܡܢ 29 ܐܝܠܘܠ- 1 ܬܫܪܝܢ ܩܕܡܝܐ، ܘܚܒܫܝ ܥܒܘܕܘ̈ܬܗ ܝܬܒ̈ܝܬܐ ܕܘܪ̈ܫܝܐ ܘܢܘܩܙ̈ܐ ܐܡܢܝ̈ܐ ܘܙܡܝܪ̈ܝܐ ܡܫܚܠܦ̈ܐ.
