ܟܦܫܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ”ܟܠܕܘ ܪܡܙܝ ܐܘܓܼܢܐ”، ܝܘܡ ܫܒܬܐ 15 ܚܙܝܪܢ 2024، ܒܡܕܒܪܢܘܬܐ ܕܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܓܘ ܡܕܝܢ̄ܬܐ ܕܣܝܕܢܝ ܐܘܣܬܪܠܝܬܐ، ܠܕܘܪܫܐ ܘܚܘܠܦܐ ܕܪ̈ܢܝܐ ܚܕܪ ܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܐܢܝ ܕܒܥܝ ܩܛܪܬܗ ܓܘ ܝܪܚܐ ܕܐܝܠܘܠ ܐܬܝܢܐ ܒܪܘܣܬܩܐ ܕܥܢܟܒܐ ܓܘ ܗܘܦܪܟܝܐ ܕܐܪܒܝܠ.
ܘܓܠܚܠܗ “ܐܘܓܼܢܐ” ܓܘ ܣܘܘܕܗ، ܠܛܘܝܒ̈ܐ ܠܘܓ̰ܣܬܝ̈ܐ ܒܫ ܐܢܢܩܝ̈ܐ ܐܢܝ ܕܩܝܡܐ ܓܘܝܗܝ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܢܝܫܐ ܕܛܘܝܒܐ ܠܥܒܕܬܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܘܬܢܐܠܗ ܠܦܪ̈ܨܘܦܐ ܒܫ ܡܫܡܗ̈ܐ ܐܢܝ ܒܕ ܗܘܝ ܐܪ̈ܚܐ ܓܘ ܣܝܡܦܘܙܝܘܡ ܘܡܫܘܬܦܝ ܓܘ ܥܒܘܕܘ̈ܬܗ.
ܘܪܡܙܠܗ “ܐܘܓܼܢܐ” ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܒܕ ܥܒܕ ܒܘܨܝܐ ܓܘ ܐܝܟܢܝܘܬܐ ܕܡܨܝܬܐ ܕܠܫܢܐ ܘܡܪܕܘܬܐ ܣܘܪܝܝܬܐ ܠܦܝܫܬܐ ܘܐܡܝܢܝܘܬܐ ܒܝܘܪܟܐ ܕܐܢܝ ܙܒܢ̈ܐ ، ܫܒܘܩ ܡܢ ܪܒܐ ܣܩܘܒܠܝ̈ܘܬܐ ܕܟܠܝ ܕܪܩܘܒܠ ܐܡܝܢܘܬ ܐܝܬܘܬܝܗܝ.
ܘܩܘܠܣܠܗ “ܐܘܓܼܢܐ” ܒܚܘܬܡܐ ܕܣܘܘܕܗ، ܥܠ ܥܘܕܪܢܐ ܕܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܒܥܒܕܬܐ ܕܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ، ܘܫܘܪܪܠܗ ܥܠ ܐܢܢܩܝܘܬܐ ܕܥܘܕܪܢܐ ܡܫܘܬܦܐ ܒܝܢ ܫܘܬܐܣ̈ܐ ܕܥܡܢ ܒܐܬܪܐ ܘܓܠܘܬܐ، ܘܦܘܠܚܢܐ ܡܫܘܬܦܐ ܒܢܝܫܐ ܕܡܪܡܬܐ ܕܨܒܼܘܬܐ ܕܡܪܕܘܬܐ ܕܥܡܢ ܘܛܘܪܢܬܗܿ ܒܐܬܪܐ ܘܓܠܘܬܐ.
ܘܦܝܫ ܕܟܝܪܐ، ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ”ܟܠܕܘ ܪܡܙܝ ܐܘܓܼܢܐ” ، ܩܝܡ ܒܣܥܘܪܘܬܐ ܠܐܘܣܬܪܠܝܬܐ ܒܩܪܝܬܐ ܪܘܫܡܝܬܐ ܡܢ ܩܢܛܪܘܢ ܕܝܘܢܢ ܗܘܙܝܐ ܕܒܘܨܝ̈ܐ ܘܕܪ̈ܫܝܬܐ ܕܥܬܝܕܝ̈ܐ ܘܒܝܬ ܘܥܕܐ ܕܣܘܪܝܐ ܡܪܕܘܬܢܝܐ، ܠܕܘܪܫܐ ܚܕܪ ܩܐܡ ܡܪܕܘܬܢܝܐ ܘܐܡܢܝܐ ܕܥܡܢ ܓܘ ܐܬܪܐ، ܓܘ ܡܢܝܢܐ ܡܢ ܥܒܘܕܘ̈ܬܐ ܘܬܦܩܝ̈ܬܐ ܕܟܦܫ ܒܒܢܝ̈ ܥܡܢ ܡܬܘܬܒ̈ܐ ܬܡܐ.