ܦܝܫܠܗܘܢ ܚܬܝܡ̈ܐ، ܒܪܡܫܐ ܕܝܘܡ ܚܡܫܒܫܒܐ 10 ܢܝܣܢ 2025، ܥܒܘܕܘ̈ܬܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܢܘܣܟܗ ܚܡܝܫܝܐ، ܒܢܨܝܚܘܬܐ ܪܒܬܐ ܒܛܘܝܒܐ ܕܟܢܫܐ ܪܒܐ ܒܡܬܚܐ ܕܐܪܒܥܐ ܝܘܡ̈ܐ، ܗܘ ܟܡ ܛܟܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܒܫܘܦܗ ܥܝܕܝܐ ܒܦܢܝܬܐ ܕܕܪܓܐ ܒܪܩܘܒܠ ܬܠܐ ܕܩܨܪܐ ܥܬܩܝܐ ܒܠܒܐ ܕܪܘܣܩܬܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܫܘܪܐܠܗ ܝܘܡܐ ܐ̄ܚܪܝܐ ܥܒܘܕܘ̈ܬܗ ܒܓܠܚܐ ܦܠܟܠܘܪܝܐ ܐܡܢܝܐ ܦܝܫܠܗ ܡܘܩܪܒܐ ܒܝܕ ܝܗܠܐ ܕ (ܓܢ̄ܒܪܐ) ܐܬܝܢܐ ܡܢ ܐܪܡܝܢܝܐ، ܘܚܒܫܠܗ ܝܘܡܐ ܐ̄ܚܪܝܐ ܡܢ ܥܕܥܐܕܐ ܓܠܚ̈ܐ ܘܠܘܚ̈ܐ ܦܠܟܠܘܪ̈ܝܐ ܐܡܢܝ̈ܐ ܘܙܡܝܪ̈ܝܐ ܦܝܫܠܗܘܢ ܡܘܩܪܒܐ ܒܝܕ ܝܗܠ̈ܐ ܫܘܬܦ̈ܐ ܓܘ ܥܕܥܐܕܐ، ܘܡܢܝܗܝ ܝܗܠܐ ܕ(ܢܡܪܘܕ) ܡܢ ܪܘܣܝܐ، ܥܡ ܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܕܥܝܪܩ.
ܘܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܚܕ ܡܡܠܐ ܫܘܪܪܠܗ ܓܘܗ ܕ(ܥܕܥܐܕܐ ܕܝܪܬܘܬܐ ܣܘܪܝܝܬܐ ܦܝܫ ܡܚܘܫܒܢܐ ܡܢ ܫܪܝܪ̈ܘܬܐ ܣܘܥܪ̈ܢܝܐ ܒܘܫ ܚܝܠܢ̈ܐ ܠܐ̄ܣܪܬܐ ܒܗܝܝܘܬܐ ܡܪܕܘܬܢܝܬܐ ܘܐܘܡܬܢܝܬܐ ܒܥܠܬܐ ܕܠܐ ܡܩܪܒ ܓܠܚ̈ܐ ܐܡܢܝ̈ܐ ܦܠܟܠܘܪ̈ܝܐ ܒܠܚܘܕ)، ܘܪܡܙܠܗ ܕܥܕܥܐܕܐ (ܡܬܪܓܡ ܗܝܝܘܬܐ ܠܢܘܣܝܐ ܚܝܐ ܪܥܫ ܓܘܗ ܦܪܨܘܦܐ ܘܟܢܘܫܝܐ ܒܐܘܪܚܐ ܕܡܚܝܝܬܐ ܕܠܫܢܐ، ܠܒܘܫ̈ܐ، ܐܘܡܢܘ̈ܬܐ ܕܐܝܕܐ ܘܡܘܣܝܩܐ).
ܘܐ̇ܡܪܗ (ܐܘܓܼܢܐ) : (ܐܡܝܢܝܘܬܐ ܕܙܘܝܚܢ ܫܢ̄ܬܢܝܐ، ܝܠܗ ܬܢܝܬܐ ܠܬܚܡܠܬܐ ܕܐܡܝܢܝܘܬܐ ܕܡܪܕܘܬܢ ܐܘܡܬܢܝܬܐ ܐܝܟ ܕܝܗ̄ܘܐ ܐܟܝܬܘ ܡܢ ܩܕܝܡ ܚܕ ܥܐܕܐ ܕܚܘܕܬܐ، ܘܡܝܕܥܬܐ ܚܝܬܐ ܕܡܪܕܘܬܢ ܐܘܡܬܢܝܬܐ ܚܝܬܐܝܠܗܿ ܘܟܫܩܠܐ ܫܘܒܗܪܐ ܒܡܐ ܕܡܘܩܪܒܠܗܿ ܘܪܣܝܟܬܐ ܒܠܒܐ ܕܬܫܥܝܬܐ ܘܕܥܬܝܕ، ܘܐܚܢܝ ܠܐܟܐ ܝܕܥܚ ܡܢ ܝܗ̄ܘܚ، ܘܟܫܩܠܚ ܫܘܒܗܪܐ ܒܓܢܢ)، ܘܪܡܙܠܗ ܕܙܘܝܚܐ (ܟܐܬܗ ܠܟܠܝܬܐ ܕܪܩܘܒܠ ܦܫܪܬܐ، ܘܗܕ ܗܝܝܘܬܐ ܫܪܫܝܬܐ ܘܠܐ ܕܠܐ ܬܠܩܐ).
ܘܡܘܒܝܢܗ ܕ(ܙܘܝܚܐ ܟܢܫܝܐ ܝܗ̄ܒܠ ܚܝܠܐ ܕܪܥܫܬܐ ܒܫܘܒܗܪܐ ܘܒܝܬܝܘܬܐ ܠܗܝܝܘܬܐ ܐܘܡܬܢܝܬܐ، ܘܗܢ ܝܘܡܐ ܠܐܠܗ ܕܟܪܐ ܬܫܥܝܬܢܝܐ ܒܠܚܘܕ ܐܠܐ ܚܕ ܣܗܡܐ ܡܢ ܟܝܢܐ ܡܠܝܐ ܡܢ ܚܝܘܬܐ، ܡܕܟܪܬܐ ܒܬܫܥܝܬܢ ܥܡܘܩܬܐ ܗܝ ܕܕܥܪܐ ܠܒܒܠ ܘܐܫܘܪ، ܘܐ̄ܣܪܬܢ ܒܗܝܝܘܬܐ ܠܐܠܗܿ ܚܢܝܢܘܬܐ ܠܕܥܒܪ ܒܠܚܘܕ ܐܠܐ ܥܒܕܐ ܠܩܘܒܠܝܐ ܘܒܢܝܐ ܠܕܥܬܝܕ، ܒܥܠܬܐ ܕܝܗܒܠܢ ܐܚܢܝ ܦܪ̈ܨܘܦܐ ܘܟܢܘܫܝܐ ܪܥܫܬܐ ܒܐܝܩܪܐ).
ܘܒܚܘܬܡܐ ܕܡܡܠܗ ܡܘܩܪܒܠܗ ܐܘܓܼܢܐ ܐܓܪܬܗ ܠܝܘܒܠܐ ܚܕܬܐ ܡܢ ܒܢܝ̈ ܥܡܢ، ܘܫܘܪܪܠܗ ܕ(ܗܝܝܘܬܢ ܠܐܝܠܗܿ ܡܢ ܕܥܒܪ، ܐܠܐ ܓܙܐ ܚܝܐ ܡܨܝܬܘܢ ܕܛܥܢܝܬܘܢ ܠܗܿ ܒܟܠ ܫܘܒܗܪܐ ܘܕܒܢܝܬܘܢ ܕܥܬܝܕܘܟܢ، ܘܐ̄ܣܪܬܘܟܢ ܒܠܫܢܘܟܢ ܘܝܪܬܘܬܘܟܢ ܠܐܝܠܗ ܚܕ ܝܘܩܪܐ ܐܠܐ ܝܠܗ ܫܘܒܗܪܐ ܪܒܐ، ܘܐܚܢܝ ܠܐ ܕܒܩܚ ܒܩܛܡܐ ܐܠܐ ܒܓܘܡܪܐ ܠܗܝܐ ܕܡܕܝܢܝܘܬܢ ܢܗܪܝܢܝܬܐ).
ܘܦܝܫܠܗܘܢ ܡܦܘܠܓ̄ܝܐ ܒܝܘܡܐ ܐ̄ܚܪܝܐ ܡܢ ܥܕܥܐܕܐ ܕܘܪ̈ܥܐ ܕܐܝܩܪܐ ܠܟܠ ܣܢܕܢ̈ܐ ܘܪ̈ܥܘܬܐ ܪ̈ܘܫܡܝܐ ܕܥܕܥܐܕܐ، ܘܡܢܝܗܝ ܡܩܪܒܬܐ ܕܩܘܒܠܛܝܒܘܬܐ ܘܐܝܩܪܐ ܠܡܝܛܪܦܘܠܝܛܘܬܐ ܕܐܪܒܝܠ ܟܠܕܝܬܐ ܒܝܕ ܐܒܐ (ܙܝܥ̄ܐ ܫܐܒܐ)، ܘܐܒܐ (ܡܐܪܬܢ ܢܒܝܠ) ܡܢ ܦܛܪܝܪܟܘܬܐ ܕܥܕܬܐ ܕܡܕܢܚܐ ܐܬܘܪܝܬܐ، ܟܕ ܦܝܫܝ ܡܚܘܫܒܢܐ ܐܢܝ ܬܪܬܝܢ ܥܕ̈ܬܐ ܣܢܕܢ̈ܐ ܪ̈ܫܝܐ ܕܥܕܥܐܕܐ.
ܘܚܒܫܠܗܘܢ ܥܒܘܕܘ̈ܬܐ ܕܝܘܡܐ ܐ̄ܚܪܝܐ ܫܘܬܦܬܐ ܕܡܣܟܡܢܬܐ ܕܠܒܘܫ̈ܐ ܐܠܩܘܫܝܬܐ (ܨܚܘܐ ܟܐܕܘ) ܒܓܠܚܐ ܦܪܝܫܐ ܠܦܘܠܚܢ̈ܗܿ ܐܢܝ ܫܩܝܠ̈ܐ ܡܢ ܡܕܝܢܝܘܬܐ ܢܗܪܝܢܝܬܐ، ܕܡܓܫܡܢܐ ܓܘܝܗܝ ܪܘܚܐ ܕܗܝܝܘܬܐ ܘܫܪܫܝܘܬܐ ܕܝܪܬܘܬܐ.
ܘܚܒܫܠܗ ܝܘܡܐ ܪܒܝܥܝܐ ܘܐ̄ܚܪܝܐ ܡܢ ܥܕܥܐܕܐ، ܡܩܪܒܬܐ ܕܡܢܝܢܐ ܡܢ ܙܡܝܪ̈ܬܐ ܫܘܬܦܠܗܘܢ ܓܘܝܗܝ ܡܢܝܢܐ ܡܢ ܐܘܡܢ̈ܐ ܕܥܡܢ (ܢܝܢܘܣ ܪܘܐܝܠ، ܐܫܘܪ ܠܥ̄ܙܪ، ܡܝܪܢܐ ܐܝܫܘ)، ܥܡ ܐܡܢܬܐ ܒܪܘܩܬܐ (ܠܝܢܕܐ ܓ̰ܘܪܓ̰) ܗܝ ܕܦܝܫܠܗܿ ܡܝܘܩܪܬܐ ܒܕܘܪܥܐ ܕܗܒܢܝܐ ܕܒܪܘܝܘܬܐ ܣܘܪܝܝܬܐ، ܘܐܘܡܢܐ ܡܝܩܪܐ (ܣܪܓܘܢ ܝܘܚܢܢ) ، ܐܢܝ ܕܡܘܠܗܐܠܗܘܢ ܒܐܡܐ ܕܥܕܥܐܕܐ ܒܝܘܡܗ ܐ̄ܚܪܝܐ ܒܡܢܝܢܐ ܦܪܝܫܐ ܡܢ ܙܡܝܪ̈ܬܐ ܐܢܝ ܕܡܘܒܣܡܠܗܘܢ ܠܒܐ ܕܟܢܫܐ ܥܡ ܪ̈ܩܕܐ ܝܪ̈ܬܘܬܢܝܐ ܗܠ ܫܥ̈ܐ ܡܬܘܚܪ̈ܐ ܡܢ ܪܡܫܐ.
ܘܦܝܫ ܕܟܝܪܐ ، ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܐܡܝܢܝܬܐܝܠܗܿ ܒܛܘܟܣܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܓܘ ܢܝܣܢ ܡܢ ܟܠ ܫܢ̄ܬܐ، ܦܝܫܝ ܥܒܝܕܐ ܓܘܗ ܥܒܘܕܘ̈ܬܐ ܝܪ̈ܬܘܬܢܝܐ ܘܥܡܡܝ̈ܐ ܡܫܚܠܦ̈ܐ، ܟܕ ܦܝܫ ܥܒܝܕܐ ܗܕ ܫܢ̄ܬܐ ܠܡܬܚܐ ܡܢ (7-10) ܢܝܣܢ 2025 .
