ܡܛܐܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܬܪܝܢܒܫܒܐ 3 ܐܕܪ 2025، ܠܡܕܝܢ̄ܬܐ ܕ(ܣܘܠܬ ܠܝܟ) ܒܐܘܚܕܢܐ ܕ(ܝܘܬܐ) ܐܡܪܝܟܝܐ، ܠܫܘܬܦܬܐ ܒܠܘܡܕܐ ܕ (RootsTech)، ܗܘ ܕܦܝܫ ܡܚܘܫܒܢܐ ܚܕܐ ܟܦܫܬܐ ܬܒܝܠܝܬܐ ܒܘܫ ܪܒܬܐ ܕܝܘܠܦܢ ܒܝܬܝܘܬܐ ܘܬܫܥܝܬܐ ܕܒܝܬܘܬܐ.
ܘܬܦܩܠܗ (ܐܘܓܼܢܐ) ܒܚܘܬܡܐ ܕܠܘܡܕܐ، ܒܚܠܦ ܪܫܐ ܕܫܘܬܐܣܐ ܕ(Family Search) ، (ܣܬܝܦܢ ܓ̰ܝܗ ܦܐܠܢܬܝܢ)، ܒܡܫܪܝܗܝ ܒܐܘܚܕܢܐ ܕ(ܝܘܬܐ) ܐܡܪܝܟܝܐ، ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܒܣܘܘܕܝܗܝ ܠܐܘܦܩ̈ܐ ܕܥܘܕܪܢܐ ܡܫܘܬܦܐ ܦܪܝܫܐܝܬ ܬܪܡܝܬܐ ܕܣܓܠܝܘܬܐ ܕܒܝܬܘܝ̈ܬܐ ܕܥܡܢ، ܗܘ ܒܕ ܩܝܡ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܬܡܡܬܗܿ ܒܡܬܚܐ ܐܬܝܢܐ، ܕܗܘܝܐ ܒܐܝܕܐ ܕܒܨܘܝ̈ܐ.
ܘܐܦ ܗܕܟ ܩܝܡܠܗ (ܐܘܓܼܢܐ) ܒܣܥܘܪܘܬܐ ܠܒܝܬ ܐܪ̈ܟܐ ܩܢܛܪܘܢܝܐ ܢܩܝܦܐ ܠܫܘܬܐܣܐ ܕ(Family Search)، ܗܘ ܕܝܠܗ ܡܢ ܒܬܝ̈ ܐܪ̈ܟܐ ܒܘܫ ܪ̈ܒܐ ܘܐܢܢܩܝ̈ܐ ܘܕܝܠܢܝ̈ܐ ܒܝܘܠܦܢ ܒܝܬܝܘܬܐ ܒܬܒܝܠ، ܟܕ ܡܦܪܐ ܥܠܠ̈ܬܐ ܪ̈ܒܐ ܠܦܪ̈ܨܘܦܐ ܐܢܝ ܕܚܕܪܝ ܒܬܪ ܫܪ̈ܫܝܘܬܝܗܝ ܒܝܬܘܬܢܝ̈ܐ ܘܣܓܼܠ̈ܐ ܕܒܝܬܝܘܬܐ، ܘܡܢܝܗܝ ܣܓܼܠ̈ܐ ܡܕܝܢܝ̈ܐ ܘܥܕܬܢܝ̈ܐ ܘܬܫܥܝܬܢܝ̈ܐ.
ܘܟܐܬܝܐ ܣܥܘܪܘܬܐ ܕ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܒܩܪܝܬܐ ܪܘܫܡܝܬܐ ܡܢ ܓܢ̄ܒ ܫܘܬܐܣܐ ܕ(Family Search)، ܠܫܘܬܦܬܐ ܒܠܘܡܕܐ ܕ(RootsTech)، ܟܕ ܒܕ ܗܘܐ ܐܪܚܐ ܕܐܝܩܪܐ ܒܝܬܒ̈ܝܬܗ، ܠܫܩܠܬܐ ܕܝܘܬܪܢܐ ܡܢ ܒܚܝܪܘܬܐ ܕܫܘܬܐܣܐ ܒܝܘܠܦܢ ܒܝܬܝܘܬܐ، ܘܓܪܫܬܐ ܕܕܪܥܢܐ ܕܡܥܗܕܢܝܬܐ ܕܥܘܪܢܐ ܡܫܘܬܦܐ ܥܡ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ، ܒܢܝܫܐ ܕܕܪܫܘܬܐ ܕܟܕܝܪ̈ܐ ܒܓܝܓܼܠܐ ܕܢܛܪܬܐ ܕܣܓܼܠ̈ܐ ܒܝܬܘܬܢܝ̈ܐ ܐܢܢܩܝ̈ܐ ܘܪܩܡܢܝܬܝܗܝ، ܕܗܘܝ ܒܐܝܕܐ ܕܒܨܘܝ̈ܐ .
ܘܦܝܫ ܕܟܝܪܐ، ܕ(RootsTech)، ܝܠܗ ܠܘܡܕܐ ܬܒܝܠܝܐ ܒܘܫ ܪܒܐ ܕܝܠܢܝܐ ܒܝܘܠܦܢ ܒܝܬܝܘܬܐ ܘܬܫܥܝܬܐ ܒܝܬܘܬܢܝܬܐ ، ܡܛܟܣܐܠܗ (Family Search ) ، ܘܚܒܫ ܒܬܝ̈ ܦܘܠܚܢ̈ܐ ܘܐܡܘܪ̈ܘܬܐ، ܘܓܠܚ ܫܟܚ̈ܬܐ ܘܬܩܢܝܘ̈ܬܐ ܒܓܝܓܼܠܐ ܕܒܨܝܬܐ ܒܬܪ ܣܓܼܠ̈ܐ ܒܝܬܘܬܢܝ̈ܐ ܘܐ̄ܣܪܬܐ ܕܝܘܒܠ̈ܐ ܒܚܕܕܐ ܒ(ܬܟܢܘܠܘܓ̰ܝܐ ܕܒܝܬܝܘܬܐ).
