ܩܝܡܠܗܿ ܡܫܕܪܘܬܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܒܪܫܢܘܬܐ ܕܡܕܒܪܢܐ ܓܘܢܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܐܪܒܥܒܫܒܐ 2 ܬܡܘܙ 2025، ܒܣܥܘܪܘܬܐ ܕܡܕܝܢ̄ܬܐ ܕܙܟܼܘ ܒܗܘܦܪܟܝܐ ܕܕܗܘܟ ܒܩܠܝܡܐ ܕܟܘܪܕܣܬܢ، ܘܬܦܩܠܗܿ ܡܫܕܪܘܬܐ ܬܡܐ ܒܡܢܝܢܐ ܡܢ ܥܒܘܕܘ̈ܬܐ ܘܫܘܬܐܣ̈ܐ ܬܘܕܝܬܢܝ̈ܐ ܘܡܪ̈ܕܘܬܢܝ̈ܐ ܕܝܠܢܝ̈ܐ ܒܥܡܢ، ܘܫܘܪܪܠܗܿ ܥܠ ܐܢܢܩܝܘܬܐ ܕܥܘܕܪܢܐ ܠܛܘܪܢܬܐ ܕܩܐܡ ܡܪܕܘܬܢܝܐ ܕܥܡܢ ܒܐܬܪܐ.
ܘܒܫܘܪܝܐ ܕܣܥܘܪܘܬܐ، ܬܦܩܠܗܿ ܡܫܕܪܘܬܐ ܕܡܕܒܪܢܘܬܐ ܒܪܥܝܐ ܕܡܪܥܝܬܐ ܕܙܟܘ ܕܟܠܕܝ̈ܐ، ܡܪܘܬܗ ܕܡܝܛܪܦܘܠܝܛܐ ܡܪܝ (ܦܝܠܝܟܣ ܐܠܫܐܒܝ)، ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܣܘܘܕܐ ܥܠ ܐܢܢܩܝܘܬܐ ܕܛܘܪܢܬܐ ܕܩܐܡ ܡܪܕܘܬܢܝܐ ܕܥܡܢ ܓܘ ܦܢܝܬܐ، ܘܫܘܪܪܠܗ (ܐܘܓܼܢܐ) ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܫܘܬܐܣ̈ܐ ܡܫܚܠܦ̈ܐ ܕܥܡܢ.
ܒܬܪ ܗܕܟ ܩܝܡܠܗܿ ܡܫܕܪܘܬܐ، ܒܣܥܘܪܘܬܐ ܠܩܢܛܪܘܢ ܥܫܬܪ ܙܟܘ، ܘܚܙܐܠܗܿ ܒܡܬܚܐ ܕܣܥܘܪܘܬܗܿ ܥܠ ܐܝܬܘ̈ܬܐ ܝܪ̈ܬܘܬܢܝܐ ܘܥܡܡܝ̈ܐ ܒܫ ܐܢܢܩܝ̈ܐ ܕܐܝܬ ܒܩܢܛܪܘܢ، ܐܢܝ ܕܡܚܙܝ ܡܬܚ̈ܐ ܡܫܚܠܦ̈ܐ ܡܢ ܬܫܥܝܬܐ ܘܝܪܬܘܬܐ ܕܥܡܢ ܓܘ ܦܢܝܬܐ، ܘܒܪܐܠܗ ܣܘܘܕܐ ܥܠ ܐܢܢܩܝܘܬܐ ܕܚܙܝܬܐ ܕܫܒܝܠ̈ܐ ܠܥܘܕܪܢܐ ܡܫܘܬܦܐ ܘܡܩܪܒܬܐ ܕܣܢܕܬܐ ܠܩܢܛܪܘܢ ܠܬܫܡܫܬܐ ܕܒܢܝ̈ ܥܡܢ ܓܘ ܙܟܼܘ.
ܘܝܗ̄ܘܐ ܥܡܐ ܥܡ ܡܕܒܪܢܐ ܓܘܢܝܐ ܒܣܥܘܪܘܬܗ ܠܡܕܝܢ̄ܬܐ ܕܙܟܼܘ، ܡܕܒܪܢܐ ܕܡܕܒܪܢܘܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓܘ ܕܗܘܟ (ܪܐܐܕ ܓ̰ܪܓ̰ܝܣ ܐܒܪܗܐ)، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ( ܒܪܢܐܪܕ ܝܘܣܦ)، ܘܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐ.
