ܬܦܩܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܚܡܫܒܫܒܐ 3 ܬܡܘܙ 2025، ܒܡܬܚܐ ܕܟܪܘܟܝܗ ܓܘ ܗܘܦܪܟܝܐ ܕܕܗܘܟ ܒܩܠܝܡܐ ܕܟܘܪܕܣܬܢ، ܒܟܕܝܪ̈ܐ ܘܫܕܬܢ̈ܐ ܕܡܕܒܪܢܘܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓܘ ܕܗܘܟ، ܘܫܘܪܪܠܗ ܒܬܦܩܬܐ ܥܠ ܐܢܢܩܝܘܬܐ ܕܡܩܪܒܬܐ ܕܙܘܕܐ ܡܢ ܥܡܠ̈ܐ ܒܢܝܫܐ ܕܢܛܪܬܐ ܕܝܪܬܘܬܢ ܘܡܪܕܘܬܢ.
ܘܩܘܠܣܠܗ (ܐܘܓܼܢܐ) ܓܘ ܡܡܠܗ، ܒܫܘܝܐ ܕܡܫܬܐܠܢܘܬܐ ܘܗܝܡܢܘܬܐ ܕܡܩܪܒܝܠܗܘܢ ܦܠܚ̈ܐ ܓܘ ܡܕܒܪܢܘܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܕܗܘܟ ܒܬܡܡܬܐ ܕܦܘܠܚܢ̈ܐ ܕܐܝܬ ܥܠܝܗܝ، ܘܫܘܪܪܠܗ ܕܣܩܘܒܠܝ̈ܘܬܐ ܓܘܝ̈ܐ ܘܩܠܝܡܝ̈ܐ ܠܐ ܟܠܝ ܕܪܩܘܒܠ ܐܡܝܢܝܘܬܐ ܕܦܘܠܚܢܐ ܗܘ ܕܢܝܫܗ ܝܠܗ ܚܡܝܬܐ ܕܝܘܪܬܢܐ ܡܪܕܘܬܢܝܐ ܘܢܛܪܬܗ.
ܘܫܘܪܪܠܗ(ܐܘܓܼܢܐ)، ܕ(ܢܨܝܚܘܬܐ ܟܐܬܝܐ ܒܥܡܠ̈ܐ ܕܟܠ، ܘܦܘܠܚܢܐ ܟܢܝܫܝܐ ܝܠܗ ܗܘ ܕܦܪܝܫܬܐܝܠܗܿ ܓܘܗ ܡܕܒܪܢܘܬܢ، ܥܡ ܦܘܬܚܗܿ ܘܥܘܕܪܢܗܿ ܥܡ ܟܠ ܫܘܬܐܣ̈ܐ ܝܠܗܿ ܥܠܬܐ ܐ̄ܚܪܢ̄ܬܐ ܒܫܪܪܬܐ ܕܟܠ ܐܢܝ ܢܨܝܚܘ̈ܬܐ)، ܘܪܡܙܠܗ : ( ܢܨܝܚܘ̈ܬܢ ܝܠܝܗܝ ܠܬܫܡܫܬܐ ܕܩܐܡ ܡܪܕܘܬܢܝܐ ܣܘܪܝܝܐ ܒܐܬܪܐ ܟܠܗ).
ܘܚܬܡܠܗ (ܐܘܓܼܢܐ) ܬܦܩܬܐ ܒܛܝܡܢܬܐ ܕܓܪܐ ܕܟܕܝܪ̈ܐ ܘܫܕܬܢ̈ܐ ܕܡܕܒܪܢܘܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓܘ ܕܗܘܟ ܒܡܬܚܐ ܥܒܝܪܐ، ܘܦܪܝܫܐܝܬ ܒܛܘܟܣܐ ܕܥܕܥܐܕܐ ܕܫܒܼܪ̈ܐ ܕܡܠܦܢܘܬܐ ܡܫܝܚܝܬܐ ، ܗܘ ܕܟܡ ܛܟܣܐܠܗ ܡܕܒܪܢܘܬܐ ܒܦܘܪܣܐ ܕܝܘܡܐ ܕܫܒܼܪܐ ܬܒܝܠܝܐ، ܓܘ ܚܙܝܪܢ ܥܒܝܪܐ ܒܦܢܝܬܐ ܕܐܠܩܘܫ ܒܕܫܬܐ ܕܢܝܢܘܐ، ܘܒܥܐܠܗ ܒܝܬ ܥܕܢܐ ܡܢ ܟܠܝܗܝ ܟܕܝܪ̈ܐ ܒܣܢܕܬܐ ܕܗܢ ܥܘܕܪܢܐ ܓܘ ܟܫܝܪ̈ܘܬܐ ܘܥܒܘܕܘ̈ܬܐ ܡܪ̈ܕܘܬܢܝܐ ܐܢܝ ܒܣܒܪܐ ܕܦܝܫܝ ܥܒܝܕܐ ܒܡܬܚܐ ܐܬܝܢܐ.
