ܒܪܥܝܘܬ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܩܝܡܠܗ ܚܘܝܕܐ ܕܣܦܪ̈ܐ ܙܣܝܘܡ̈ܐ ܣܘܪ̈ܝܝܐ ܒܚܕ ܙܘܝܚܐ ܒܦܘܪܣܐ ܕܝܘܡܐ ܕܓܠܝܘܢܘܬܐ ܣܘܪܝܝܬܐ، ܕܟܪܐ ܕ (174) ܕܡܘܠܕܐ ܕܓܠܝܘܢܐ ܣܘܪܝܝܐ ܩܕܡܝܐ ( ܙܗܪܝܪ̈ܐ ܕܒܗܪܐ)، ܝܘܡܐ ܕܐܪܒܥܒܫܒܐ 1 ܬܫܪܝܢ ܬܪܝܢܐ 2023، ܓܘ ܐܘܢܐ ܕܦܢܕܩܐ ܕܗܟܣܘܣ ܒܥܢܟܒܐ، ܒܛܘܝܒܐ ܕܡܢܝܢܐ ܡܢ ܐܦܣܩܘܦ̈ܐ ܘܐܒܗ̈ܬܐ ܟܗܢ̈ܐ ܘܦܪ̈ܠܡܢܝܐ ܩܕܝܡ̈ܐ ܘܩܐܡܝ̈ܐ ܘܡܫܬܐܠܢ̈ܐ ܡܕܒܪ̈ܢܝܐ ܘܡܢܝܢܐ ܡܢ ܡܘܪ̈ܕܢܐ ܕܥܡܢ.
ܘܒܬܪ ܟܠܝܬܐ ܕܚܕ ܕܩܝܩܐ ܕܫܬܩܐ ܥܠ ܪ̈ܘܚܬܐ ܕܣܗܕ̈ܐ ܕܡܡܠܐ ܚܐܪܐ ܘܓܠܝܘܢܘܬܐ ܣܘܪܝܝܬܐ، ܫܘܪܐܠܗ ܙܘܝܚܐ ܗܘ ܕܦܝܫܠܗ ܡܬܘܓܒܪܐ ܚܘܪܙܗ ܒܝܕ ܝܘܕܥܝܬܐ “ܢܝܢܐ ܗܘܪܡܙ” ܒܡܡܠܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܝܫܠܗ ܡܘܩܪܒܐ ܒܝܕ ܡܕܒܪܢܗܿ ܓܘܢܝܐ ܡܝܩܪܐ ” ܟܠܕܘ ܪܡܙܝ ܐܘܓܼܢܐ” ܐ̄ܡܪܗ ܓܘܗ ܕܐܚܢܝ (( ܟܦܝܫ̈ܐܗ̄ܘܚ ܐܕܝܘܡ ܠܙܘܝܚܐ ܒܕܟܪܐ ܕ(174) ܠܢܘܦܩܐ ܕܓܠܝܘܢܐ ܩܕܡܝܐ ܒܠܫܢܐ ܣܘܪܝܝܐ، ܘܗܢ ܝܘܡܐ ܐܝܬܠܗ ܣܘܟܠ̈ܐ ܘܪ̈ܡܙܐ ܪ̈ܒܐ ܠܓܢ̄ܒܢ، ܘܟܦܫܬܢ ܟܠ ܫܢ̄ܬܐ ܠܐܝܠܗܿ ܠܡܕܟܪܬܐ ܘܙܘܝܚܐ ܒܠܚܘܕ، ܐܠܐ ܕܟܠܚ ܘܡܬܚܡܠܚ ܘܕܟܪܚ ܐܢܝ ܓܢ̄ܒܪ̈ܐ ܕܡܘܩܪܒܠܗܘܢ ܟܠ ܡܢܕܝ ܛܝܡܢܐ ܚܠܦ ܡܡܠܐ ܚܐܪܐ، ܐܠܐ ܘܕܒܚܠܗܘܢ ܒܕܡܝܗܝ ܙܟܝܐ ܕܗܘܐ ܡܡܠܐ ܕܥܡܢ ܫܡܝܥܐ ܐܕܝܘܡ ܒܥܠܡܐ ܟܠܗ)).
ܘܕܟܪܗ ܐܓܼܘܢܣܛ̈ܐ ܚܠܦ ܡܡܠܐ ܚܐܪܐ: ܐܫܘܪ ܝܘܣܦ، ܘܝܘܚܢܐ ܡܘܫܐ ܓܘ ܐܘܪܡܝ، ܘܒܫܐܪ ܚܠܡܝ ܐܠܒܘܪܓ̰ܝ ܓܘ ܕܝܪ ܒܟܪ، ܘܦܪܝܕܘܢ ܐܬܘܪܝܐ ܗܘ ܕܦܝܫܠܗ ܛܠܝܩܐ ܓܘ ܚܘܝܕܐ ܣܘܦܝܬܝܐ. ܗܘ ܕܩܪܐܠܗ ܠܕܘܪܪܘܬܐ ܕܣܟܠܘܬܐ ܒܝܢܬ ܒܢܝ̈ ܥܡܢ ܠܦܘܬ ܦܘܠܚܢܐ ܓܠܝܘܢܝܐ، ܘܕܟܪܗ ܓܘܢܚܐ ܕܚܠܘܠܐ ܕܒܓܕܝܕܐ ܘܡܐ ܓܕܫܠܗ ܡܢ ܦܪܣܬܐ ܝܘܕܥܝܬܐ.
ܘܚܘܬܬܠܗ ܥܠ ܓܪܐ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܘܦܪܝܫܐܝܬ ܓܪܐ ܕܪܫܐ ܕ ܡܘܬܒܐ ܕܘܙܝܪ̈ܐ ܡܝܩܪܐ ” ܡܣܪܘܪ ܒܐܪܙܢܝ” ܘܝܗ̄ܒܠܬܐ ܕܦܘܪܣܐ ܒܪܩܘܒܠ ܚܐܪܘܬܐ ܕܦܘܠܚܢܐ ܓܠܝܘܢܝܐ. ܘܐܦ ܚܘܬܬܠܗ ܕܬܪ̈ܥܐ ܕܡܕܒܪܢܘܬܗ ܦܬܝܚ̈ܐܝܠܗܘܢ ܩܕܡ ܟܠܝܗܝ ܠܦܘܠܚܢܐ ܟܢܝܫܝܐ ܠܛܒܘܬܐ ܕܒܢܝ̈ ܥܡܢ.
ܘܒܬܪ ܗܕܟ ܦܝܫܠܗ ܡܘܩܪܒܐ ܡܡܠܐ ܒܝܕ “ܐܙܐܕ ܚܡܐ ܐܡܝܢ” ܕܘܩܐ ܕܓܠܝܘܢܝ̈ܐ ܕܟܘܪܕܣܬܢ، ܗܘܢܐܠܗ ܓܘܗ ܓܠܝܘܢܝ̈ܐ ܣܘܪ̈ܝܝܐ ܒܗܢ ܦܘܪܣܐ، ܘܪܡܙܠܗ ܠܬܫܥܝܬܐ ܕܓܕܫܐ ܘܢܘܦܩܐ ܕ((ܙܗܪܝܪ̈ܐ ܕܒܗܪܐ)) ܒܠܫܢܐ ܝܡܝܐ، ܗܘ ܩܕܝܡܐ ܠܓܠܝܘܢܐ ܕ((ܙܘܪܐܐ)) ܓܘ ܒܓܕܕ، ܘܡܘܥܒܪܗ ܥܠ ܦܫܡܬܗ ܡܢ ܩܛܥܬܐ ܕܓܠܝܘܢܘܬܐ ܣܘܪܝܝܬܐ ܚܕܪ ܓܢ̄ܒܐ ܣܘܪܝܝܐ ܦܪܝܫܐܝܬ. ܘܚܘܬܬܠܗ ܥܠ ܐܢܢܩܝܘܬܐ ܕܚܐܪܘܬܐ ܕܓܠܝܘܢܘܬܐ ܠܡܛܘܪܢܬܐ ܕܦܘܠܚܢܗܿ.
ܒܬܪ ܗܕܟ ܦܝܫܠܗ ܡܘܩܪܒܐ ܡܡܠܐ ܕܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ، ܒܝܕ ܡܝܩܪܐ ” ܪܘܢܕ ܦܘܠܘܣ” ܪܫܐ ܕܚܘܝܕܐ، ܬܢܐܠܗ ܒܡܡܠܗ ܚܕܪ ܐ̄ܣܝܪܘܬܐ ܕܠܫܢܐ ܣܘܪܝܝܐ ܬܫܥܝܬܢܐܝܬ ܒܥܕ̈ܬܐ ܘܕܝܪ̈ܐ ܘܫܩܠܬܗ ܛܒܥܐ ܬܘܕܝܬܢܝܐ، ܘܪܡܙܠܗ ܠܣܢܝܩܘܬܗ ܠܚܕܬܬܐ ܘܠܘܝܘܬܐ ܕܒܥܝ̈ܬܐ ܕܕܪܐ ܘܥܡ ܬܘܪܓܡܐ ܕܡܛܐ ܠܟܢܫܐ ܪܒܐ. ܘܕܟܪܗ ܡܢܝܢܐ ܡܢ ܓܠܝܘܢ̈ܐ ܘܡܓܠ̈ܐ ܣܘܪ̈ܝܝܐ ܓܘ ܬܫܥܝܬܐ ܘܒܥܐܠܗ ܠܩܝܡܬܐ ܒܓܠܝܘܢܘܬܢ ܣܘܪܝܝܬܐ ܘܡܛܘܪܢܬܐ ܕܫܒܝ̈ܠܗܿ.
ܒܬܪ ܗܕܟ ܦܝܫܠܗܘܢ ܡܘܩܪܒܐ ܬܪܬܝ ܒܪ̈ܩܝܬܐ ܕܗܘܢܝܐ ܒܗܢ ܦܘܪܣܐ ܡܫܘܕܪܐ ܒܝܕ ܕܘܩܐ ܕܓܠܝܘܢܝ̈ܐ ܥܝܪ̈ܩܝܐ ܡܝܩܪܐ “ܡܘܐܝܕ ܐܠܠܐܡܝ” ܘܢܛܪ ܐ̄ܪܙܐ ܓܘܢܝܐ ܕܚܘܝܕܐ ܕܣܦܪ̈ܐ ܘܟܬܘܒ̈ܐ ܓܘ ܥܝܪܩ ܡܝܩܪܐ “ܥܘܡܪ ܐܠܣܪܐܝ”.
ܒܬܪ ܗܕܟ ܫܘܪܐܠܗܿ ܝܬܒܬܐ ܣܘܘܕܝܬܐ ܦܝܫܠܗܿ ܡܬܘܓܒܪܬܐ ܒܝܕ ܝܘܕܥܝܬܐ “ܓ̰ܘܪܓ̰ܝܢܐ ܚܒܒܐ” ܒܫܘܬܦܬܐ ܕܡܝܛܪܦܘܠܝܛܐ ܕ.”ܝܘܣܦ ܬܐܘܡܐ” ܪܥܝܐ ܕܡܪܥܝܬܐ ܕܟܪܟܘܟ ܘܣܠܝܡܢܝܐ ܟܠܕܝܬܐ ܘܬܢܐܠܗ ܚܕܪ (( ܢܘܣܝܝ ܥܡ ܡܓܠܬܐ ܕܪܢܝܐ ܡܫܝܚܝܐ ܓܘ ܥܝܪܩ))، ܝܘܕܥܝܐ ” ܢܣܝܡ ܨܐܕܩ” ܬܢܐܠܗ ܚܕܪ (( ܝܘܕܥܐ ܣܘܪܝܝܐ: ܐܝܟܐ ܟܠܝܐܝܠܗ ܡܢ ܩܐܡ ܕܨܒܘܬܝ̈ܢ)). ܘܡܘܩܪܒܠܗܘܢ ܡܛܝܒ̈ܐ ܚܕܟܡܐ ܫܘܐܠ̈ܐ ܘܡܚܫܚ̈ܝܬܐ، ܘܦܘܢܐܠܗܘܢ ܥܠܝܗܝ ܡܠܠ̈ܐ ܒܟܠ ܚܘܒܐ ܘܐܝܩܪܐ.
ܘܐܦ ܗܕܟ ܦܝܫܠܗ ܦܬܝܚܐ ܒܝܬ ܓܠܚܐ ܕܦܪ̈ܝܣܬܐ ܣܘܪ̈ܝܝܐ ܗܘ ܕܝܗ̄ܘܐ ܒܥܘܕܪܢ ܚܘܝܕܐ ܕܣܦܪ̈ܐ ܘܣܝܘܡ̈ܐ ܣܘܪ̈ܝܝܐ ܘܒܝܬ ܐܪ̈ܟܐ ܣܘܪܝܝܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܘܚܒܫܠܗ ܡܢܝܢܐ ܡܢ ܟܬܒ̈ܐ ܣܘܪ̈ܝܝܐ ܘܦܪ̈ܝܣܬܐ ܕܚܘܝܕܐ ܘܡܕܒܪܢܘܬܐ ܓܘܢܝܬܐ.
