ܐܡܝܢܝܬܐܝܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ، ܒܝܘܡܐ ܬܪܝܢܐ ܢܩܝܦܐܝܬ، ܒܣܥܘܪܘܬܐ ܕܡܢܝܢܐ ܐ̄ܚܪܢܐ ܡܢ ܫܘܬܐܣ̈ܐ ܘܚܘܕܪ̈ܐ ܪ̈ܘܫܡܝܐ ܓܘ ܥܢܟܒܐ، ܒܢܝܫܐ ܕܡܩܪܒܬܐ ܕܩܘܒܠܛܝܒܘܬܐ ܘܛܝܡܢܬܐ ܕܥܡܠܝ̈ܗܝ ܒܣܢܕܬܐ ܕܥܕܥܐܕܐ ܕܥܢܟܒܐ ܟܪܝܣܡܣ ܗܘ ܕܦܝܫܠܗ ܥܒܝܕܐ ܒܚܘܬܡܐ ܕܝܪܚܐ ܕܟܢܘܢ ܩܕܡܝܐ ܥܒܝܪܐ.
ܘܚܒܫܠܗܘܢ ܣܥܘܪ̈ܘܬܐ ܕܩܝܡܠܗܿ ܓܘܝܗܝ ܡܫܕܪܘܬܐ ܒܪܫܢܘܬܐ ܕܡܕܒܪܢܐ ܓܘܢܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܝܘܡܐ ܕܬܠܬܒܫܒܐ 23 ܟܢܘܢ ܬܪܝܢܐ 2024، ܟܠ ܡܢ ܚܘܕܪܐ ܕܚܘܠܡܢܐ ܕܐܪܒܝܠ، ܚܘܕܪܐ ܕܣܘܬܪܐ ܡܕܝܢܝܐ ܓܘ ܥܢܟܒܐ، ܚܘܕܪܐ ܕܡܝܐ ܘܐܓܼܘ̈ܓܐ ܕܥܢܟܒܐ، ܥܡ ܫܘܬܦܘܬܐ ܕܒܪܙܐ، ܟܕ ܛܘܝܡܢܗ “ܐܘܓܼܢܐ” ܒܡܬܚܐ ܕܬܦܩܬܗ ܒܡܫܬܐܠܢ̈ܐ ܕܐܢܝ ܫܘܬܐܣ̈ܐ ܠܓܪܝܗܝ ܪܒܐ ܒܢܨܝܚܘܬܐ ܕܥܒܘܕܘ̈ܬܐ ܕܥܕܥܐܕܐ ܕܥܢܟܒܐ ܟܪܝܣܡܣ ܟܠ ܚܕ ܡܢ ܫܘܦܗ، ܘܡܘܩܪܒܠܗ ܠܝܗܝ ܕܘܪ̈ܥܐ ܕܡܝܩܪܢܘܬܐ ܐܝܩܪܐ ܠܥܡܠܝܗ̈ܝ.
ܘܫܘܪܪܠܗ “ܐܘܓܼܢܐ” ܒܡܬܚܐ ܕܣܥܘܪ̈ܘܬܐ ܕܟܡ ܥܒܕܐܠܝܗܝ ܡܫܕܪܘܬܐ ܕܡܕܒܪܢܘܬܐ ܥܠ ܐܢܢܩܝܘܬܐ ܕܥܘܕܪܢܐ ܒܝܢܬ ܫܘܬܐܣ̈ܐ ܠܢܨܝܚܘܬܐ ܕܐܝܟ ܐܢܝ ܥܒܘܕܘ̈ܬܐ ܟܢܫܝ̈ܐ ܐܢܝ ܕܦܝܫܝ ܥܒܝܕܐ ܟܠ ܫܢ̄ܬܐ ܓܘ ܥܢܟܒܐ.
ܘܚܒܫܠܗܿ ܡܫܕܪܘܬܐ ܣܥܘܪܬܐ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܗܕܡܐ ܕܓܘܫܡܐ ܥܠܝܐ ܕܥܕܥܐܕܐ “ܣܪܡܕ ܓ̰ܠܐܠ” ܘܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐ.
