ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ( ܒܪܢܐܪܕ ܝܘܣܦ)، ܝܘܡ ܚܕܒܫܒܐ 12 ܟܢܘܢ ܬܪܝܢܐ 2025، ܒܒܢܝܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ، ܡܕܒܪܢܝܬܐ ܕܡܫܕܪܘܬܐ ܕܡܛܟܣܬܐ ܐܡܪܝܟܝܬܐ ܕܡܪܒܝܬܐ ܬܒܝܠܝܬܐ (USAid) (ܐܝܪܝܢ ܘܐܢ ܡܐܪܟܝܙ)، ܒܚܒܪܘܬܐ ܕܡܕܒܪܢܝܬܐ ܕܡܟܬܒܐ ܕܫܠܝܘܬܐ ܒܡܛܟܣܬܐ (ܟܪܝܣܬܝܐܢ ܕܐܢܬܘܢ)، ܘܡܫܬܐܠܢܝܬܐ ܕܐܣܘܪ̈ܐ ܓܘܢܝ̈ܐ ܒܩܢܨܠܝܘܬܐ ܐܡܪܝܟܝܬܐ ܒܐܪܒܝܠ ( ܗܐܝܠܝ ܟܝܢܓܼ).
ܘܟܪܟܠܗܿ ܡܫܕܪܘܬܐ ܒܡܢܘ̈ܬܐ ܕܒܝܬ ܥܬܝܩ̈ܬܐ ܘܚܙܐܠܗܘܢ ܡܘܠܟܢ̈ܗ ܘܐܝܬܘ̈ܬܗ ܥܬܩܝ̈ܐ، ܘܡܘܚܘܐܠܗܘܢ ܕܡܝܪܘܬܗܝ ܒܦܘܠܚܢܐ ܦܝܫܐ ܥܒܝܕܐ ܘܡܬܩܕܡܢܘܬܐ ܒܬܪ̈ܡܝܬܐ ܐܢܝ ܕܩܐܡ ܓܘܝܗܝ ܒܝܬ ܥܬܝܩ̈ܬܐ ܒܥܘܕܪܢ ܥܡ ܘܟܝܠܘܬܐ ܐܡܪܝܟܝܬܐ ܕܡܪܒܝܬܐ ܬܒܝܠܝܬܐ (USAid) ܘܦܪܝܫܐܝܬ ܒܬܪܡܝܬܐ ܕ (ܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܒܨܘܪ̈ܘܬܐ ܒܥܝܪܩ)، ܗܘ ܝܠܗ ܒܪܥܝܘܬܐ ܕ(USAiD) ، ܡܛܠ ܐܪܫܦܬܐ ܕܝܪܬܘܬܐ ܣܘܪܝܝܬܐ ܕܗܘܝܐ ܒܐܝܕܐ ܕܒܨܘܝ̈ܐ.
ܘܪܡܙܠܗ (ܐܘܓܼܢܐ) ܒܣܘܘܕܗ ܠܐܢܢܩܝܘܬܐ ܕܐܡܝܢܝܘܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܫܘܬܦܬܐ ܥܡ ܡܛܟܣܬܐ ܐܡܪܝܟܬܐ ܕܡܪܒܝܬܐ ܬܒܝܠܝܬܐ، ܘܫܘܪܪܠܗ ܥܠ ܐܢܢܩܝܘܬܐ ܕܗܕ ܫܘܬܦܬܐ ܒܪܩܡܢܬܐ (ܣܓܼܠܢܬܐ) ܕܡܘܠܟܢ̈ܐ ܕܒܝܬ ܥܬܝܩ݁̈ܬܐ ܘܩܢܝܢ̈ܗ ܥܬܩܝ̈ܐ ܠܢܛܪܬܐ ܕܝܪܬܘܬܐ ܕܥܡܢ ܡܢ ܬܠܩܬܐ.
