ܡܩܪܒܐ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܘܝܐܐ، ܠܓܢ̄ܒܪܐ ܕܙܡܪܐ ܕܣܘܪܬܼ ܐܡܢܐ ܪܒܐ (ܐܝܒܼܢ ܐܓܼܣܝ)، ܗܘ ܕܫܘܢܐܠܗ ܠܓܢܘܢܐ ܫܡܝܢܐ، ܒܨܦܪܐ ܕܐܪܒܥܒܫܒܐ 18 ܐܝܠܘܠ 2024، ܒܥܘܡܪܐ ܕ(79) ܫܢ̈ܐ، ܒܥܠܬܐ ܕܚܕ ܟܘܪܗܢܐ ܥܣܩܐ.
ܟܡܩܪܒܐ ܡܕܒܪܢܘܬܐ ܓܘܢܝܬܐ ܒܦܪܨܘܦܐ ܕܡܕܒܪܢܗܿ ܓܘܢܝܐ ܘܟܕܝܪ̈ܗܿ ܘܫܕܬܢ̈ܗܿ ܠܐ̄ܢܫܝ̈ܗ ܘܡܚܒܢ̈ܗ ܘܟܢܫ̈ܗ ܘܠܒܝܬܘܬܐ ܐܡܢܝܬܐ ܕܥܡܢ ܒܘܝܐܐ ܘܣܘܠܝܐ ܠܚܣܝܪܘܬܗܿ ܓܢ̄ܒܪܐ ܘܡܪܐ ܕܓܓܪܬܐ ܕܗܒܢܝܬܐ ܦܪܫܠܗܿ ܓܘܝܗܝ ܦܘܠܚܢ̈ܗ ܐܡܢܝ̈ܐ، ܘܒܥܚ ܡܢ ܡܪܝܐ ܐܠܗܐ ܕܡܫܪܐ ܡܢܚܐ ܒܪ̈ܚܡܗ ܪܒܬܐ ܒܡܠܟܘܬܗ ܫܡܝܢܝܬܐ ܘܝܗܒܠ ܐ̄ܢܫܝ̈ܗ ܡܣܝܒܪܢܘܬܐ ܘܣܘܠܝܐ.
ܝܠܕܠܗ (ܐܝܒܢ ܐܓܼܣܝ) ܓܘ ܟܪܡܐܫܢ ܒܐܝܪܢ، ܘܫܘܪܐܠܗ ܡܐܙܠܬܗ ܐܡܢܝܬܐ ܘܗܘ ܒܥܘܡܪܐ ܕ(27) ܫܢ̈ܐ، ܘܟܬܒܠܗ ܣܗܡܐ ܪܒܐ ܡܢ ܙܡܪ̈ܝܬܗ ܥܡ ܩܝܢܬܝ̈ܗܝ ܒܚܒܪܘܬܐ ܕܐܚܘܢܗ (ܓܝܘܪܓܝܣ ܐܓܼܣܝ).
ܘܦܝܫ ܡܚܘܫܒܢܐ ܐܡܢܐ (ܐܝܒܢ ܐܓܼܣܝ) ، ܡܘܠܕܢܘܬܐ 25 ܐܝܠܘܠ 1945، ܚܕ ܡܢ ܙܡܪ̈ܐ ܒܘܫ ܡܫܡܗ̈ܐ ܕܥܡܢ ܒܬܦܪܝܬܐ ܒܙܡܪ̈ܝܬܐ، ܘܡܘܦܩܠܗ ܒܡܬܚܐ ܕܡܐܙܠܬܗ ܐܡܢܝܬܐ (20) ܐܠܒܘܡ̈ܐ، ܘܢܘܦܩܗ ܐ̄ܚܪܝܐ ܝܗܘܐ ܒܫܢ̄ܬܐ ܕ2017 ܒܫܡܐ ܕ(45 ܫܢ̈ܐ).
ܘܦܝܫܠܗ ܡܫܡܗܐ (ܐܓܼܣܝ) ܒܙܡܪ̈ܝܬܗ ܐܢܝ ܕܚܒܫܠܗܘܢ ܡܠܘ̈ܐܐ ܥܠ ܚܐܪܘܬܐ ܘܐܘܡܬܝܘܬܐ ܘܚܘܒܐ ܘܪܘܡܢܛܝܩܝ، ܘܚܝܐܠܗ ܚܝܘܬܐ ܐܡܢܝܬܐ ܥܬܝܪܬܐ ܙܘܕܐ ܡܢ 50 ܫܢ̈ܐ، ܘܫܒܩܠܗ ܒܬܪܗ ܚܬܡܐ ܥܡܘܩܐ ܓܘ ܡܘܣܝܩܝ ܕܣܘܪܬܼ.
ܘܒܝܪܚܐ ܕܬܡܘܙ ܥܒܝܪܐ، ܡܘܝܕܥܠܗܿ ܒܝܬܘܬܐ ܕ(ܐܝܒܢ ܐܓܼܣܝ) ܢܦܠܬܐ ܕܐܡܢܐ ܒܚܕ ܟܘܪܗܢܐ ܥܣܩܐ ܒܪܫܗ ܠܐ ܐܬܐ ܠܣܘܡܣܡܐ.