ܫܘܬܦܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܚܕܒܫܒܐ 20 ܬܡܘܙ 2025، ܒܥܒܘܕܘ̈ܬܐ ܕܠܘܡܕܐ ܕܕܪ̈ܫܝܬܐ ܚܕܪ ܠܫܢܐ ܘܬܫܥܝܬܐ ܘܥܘܗܕܢܐ ܟܢܘܫܝܝܐ، ܗܘ ܕܦܝܫܠܗ ܩܛܝܪܐ ܬ̄ܚܘܬ ܫܡܐ ܕ(ܠܘܡܕܐ ܕܐܪܒܥ̄ܐܝܠܘ ܬܠܝܬܝܐ) ܠܡܬܚܐ ܡܢ 20 – 24 ܬܡܘܙ، ܓܘ ܒܝܬ ܨܘܒܐ ܕܒܪܠܝܢ ܚܐܪܬܐ (Freie Universität Berlin -ܒܝܬ ܣܦܪܐ ܕܕܪ̈ܫܝܬܐ ܫܝܡܝ̈ܐ) ܒܐܠܡܢܝܐ .
ܘܝܨܦ ܠܘܡܕܐ ܒܝܬܒܝ̈ܬܗ ܥܠ ܬܠܬܐ ܩܘܛܒ̈ܐ ܪ̈ܫܝܐ ( ܠܫܢܐ ܣܘܪܝܝܐ، ܬܫܥܝܬܐ ܘܣܪ̈ܝܛܬܐ، ܗܝܝܘܬܐ ܘܥܘܗܕܢܐ ܟܢܘܫܝܝܐ)، ܟܕ ܟܡܡܬܠ ܚܕ ܒܐܡܐ ܝܘܠܦܢܝܐ ܘܡܪܕܘܬܢܝܐ ܐܢܢܩܝܐ ܠܚܝܠܢܬܐ ܕܛܘܝܒܐ ܕܠܫܢܢ ܘܗܝܝܘܬܢ ܘܬܫܥܝܬܢ ܡܫܘܬܦܬܐ ܒܫܘܦ̈ܐ ܐܟܕܝܡܝ̈ܐ ܬܒܝܠܝ̈ܐ.
ܘܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܚܕ ܡܡܠܐ ܒܡܬܚܐ ܕܝܬܒܬܐ ܕܦܘܬܚܐ ܕܠܘܡܕܐ، ܫܘܪܪܠܗ ܓܘܗ ( ܡܕܒܪܢܘܬܐ ܝܗ̄ܒܠܠܗܿ ܝܨܝܦܘܬܐ ܦܪܝܫܬܐ ܒܕܪ̈ܫܝܬܐ ܠܫܢܝ̈ܐ ܘܬܫܥܝܬܢܝ̈ܐ ܘܝܪ̈ܬܘܬܢܝܐ، ܘܡܛܘܟܣܠܗܿ ܫܫܠܬܐ ܡܢ ܠܘܡܕ̈ܐ ܘܚܘܕܪ̈ܐ، ܡܢܝܗܝ ܣܝܡܦܘܙܝܘܡ ܣܘܪܝܝܐ ܩܕܡܝܐ ܒܐܬܪܐ)، ܘܪܡܙܠܗ (ܣܝܡܦܘܙܝܘܡ ܟܦܫܠܗ ܡܓܘܒܝ̈ܐ ܡܢ ܒܨܘܝ̈ܐ ܠܚܘܠܦܐ ܕܚܘܫܒ̈ܐ ܘܪ̈ܥܝܢܐ ܚܕܪ ܣܦܪܝܘܬܐ ܘܐܡܢܐ ܘܬܫܥܝܬܐ، ܒܢܝܫܐ ܕܚܝܠܢܬܐ ܕܛܘܝܒܐ ܕܠܫܢܐ ܘܢܛܪܬܐ ܕܝܪܬܘܬܐ، ܘܦܬܚܬܐ ܕܐܘܦܩ̈ܐ ܒܗܪ̈ܢܐ ܝܗ̄ܒܐ ܚܝܠܐ ܠܒܝܬܝܘܬܐ ܠܗܝܝܘܬܐ ܡܫܘܬܦܬܐ ܥܡ ܡܝܩܪܬܐ ܕܕܝܠܝ̈ܘܬܐ ܡܪ̈ܕܘܬܢܝܐ ܥܬܝܪ̈ܐ).
ܘܡܘܙܝܕܠܗ (ܐܘܓܼܢܐ) ܒܐܡܪܐ: (ܡܛܘܟܣܠܢ ܠܘܡܕܐ ܕܝܘܕܥܐ ܣܘܪܝܝܐ، ܗܘ ܕܟܦܫܠܗ ܝܘܕܥܝ̈ܐ ܕܥܡܢ ܡܢ ܐܬܪܐ ܘܓܠܘܬܐ ܠܕܘܪܫܐ ܕܣܩܘܒܠܝ̈ܘܬܐ ܕܫܛܪܬܐ ܘܪܩܡܢܬܐ، ܘܚܝܠܢܬܐ ܕܛܘܝܒܐ ܕܠܫܢܐ ܓܘ ܝܘܕܥܐ، ܥܡ ܫܪܪܬܐ ܥܠ ܚܕܝܘܬܐ ܕܡܡܠܐ ܠܟܠܝܬܐ ܕܪܩܘܒܠ ܣܩܘܒܠܝ̈ܘܬܐ ܡܫܘܬܦ̈ܐ)، ܘܪܡܙܠܗ ܠܫܪܝܬܐ ܕܝܘܩܢܐ ܕܗܒܢܝܐ ܠܓܠܝܘܢܘܬܐ ܣܘܪܝܝܬܐ، ܡܝܩܪܬܐ ܠܩܢܝ̈ܐ ܚܐܪ̈ܐ ܘܐܘܡܢܝ̈ܐ ܘܣܢܕܬܐ ܠܝܘܕܥܐ ܘܓܠܝܘܢܘܬܐ.
ܘܒܡܠܘܐܐ ܕܪܩܡܢܬܐ ܘܢܗܝܪܘܬܐ ܐܘܡܢܝܬܐ، ܪܡܙܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܠ (ܪܚܫܬܐ ܕܡܕܒܪܢܘܬܐ ܥܡ ܛܘܘܪ̈ܐ ܬܟܢܘܠܘܓ̰ܝ̈ܐ ܘܓܪܐ ܕܢܗܝܪܘܬܐ ܐܘܡܢܝܬܐ ܒܣܢܕܬܐ ܕܠܫܢܢ ܘܫܒܩܬܐ ܕܝܘܒ̈ܠܐ ܚܕ̈ܬܐ ܠܡܦܠܚܬܗ ܘܡܥܒܪܢܘܬܐ ܒܓܘܗ، ܒܐܘܪܚܐ ܕܒܬܝ̈ ܦܘܠܚܢܐ ܘܒܘܨܝ̈ܐ ܡܫܚܠܦ̈ܐ، ܚܒܫܝ ܡܦܠܚܬܐ ܕܢܗܝܪܘܬܐ ܐܘܡܢܝܬܐ ܒܬܪܨܬܐ ܘܛܘܪܢܬܐ ܕܡܐܢ̈ܐ ܕܡܠܦܢܘܬܐ ܣܘܪܝܝܬܐ)، ܘܡܘܒܝܢܗ (ܡܕܒܪܢܘܬܐ ܝܨܦܠܗ ܥܠ ܐܪܫܦܬܐ ܘܪܩܡܢܬܐ ܕܝܪܬܘܬܐ ܣܘܪܝܝܬܐ ܗܘܠܢܝܬܐ ܘܠܐ ܗܘܠܢܝܬܐ، ܕܗܘܝܐ ܒܝܕ ܒܨܘܝ̈ܐ ܘܢܛܪܬܐ ܕܥܘܗܕܢܐ ܕܥܡܢ ܚܝܐ).
ܘܚܬܡܠܗ (ܐܘܓܼܢܐ ܡܡܠܗ، ܒܫܪܪܬܗ ܥܠ (ܫܘܬܦܬܢ ܒܗܢ ܠܘܡܕܐ ܝܠܗ ܚܕ ܦܘܪܣܐ ܛܝܡܢܐ ܠܕܘܪܫܐ ܘܥܘܕܪܢܐ، ܘܐܝܬܠܢ ܣܒܪܐ ܕܢܦܩܝ ܦܠܛ̈ܐ ܠܬܫܡܫܬܐ ܕܢܝܫܢ ܡܫܘܬܦܐ ܒܢܛܪܬܐ ܕܥܘܗܕܢܐ ܕܥܡܢ، ܘܢܛܪܬܐ ܕܠܫܢܢ ܣܘܪܝܝܐ ܘܫܢܝܬܗ ܚܝܐ ܠܝܘܒܠܐ ܐܬܝܢ̈ܐ)، ܘܪܡܙܠܗ (ܠܫܢܐ ܕܝܡܐ ܝܠܗ ܚܕ ܓܫܪܐ ܗܘ ܕܥܒܪܚ ܓܘܗ ܠܗܝܝܘܬܢ، ܘܒܝܬ ܐܪ̈ܟܢ ܣܘܪܝܝܐ ܚܒܫ ܙܘܕܐ ܡܢ ܥܣܪܐ ܐܠܦ̈ܐ ܕܬܚܘܝ̈ܬܐ، ܘܐܝܬܠܢ ܣܘܪܛܐ ܠܫܪܝܬܐ ܕܬܪܡܝܬܐ ܕܨܝܪܘܬܐ ܪܩܡܝܬܐ ܕܟܬܒ̈ܐ ܝܩܝܪ̈ܐ، ܗܘ ܡܢܕܝ ܕܡܥܒܪ ܥܠ ܐܠܝܨܘܬܢ ܒܬܪܡܝܬܐ ܡܪܕܘܬܢܝܬܐ ܐܪܝܟܬܐ ܒܢܝܫܐ ܕܢܛܪܬܐ ܕܗܝܝܘܬܐ ܘܠܫܢܐ ܘܝܪܬܘܬܐ ܡܬܚ ܒܥܘܡܩܐ ܕܬܫܥܝܬܐ).
ܘܡܘܩܪܒܠܗ ܪܫܐ ܕܡܢܬܐ ܣܘܪܝܝܬܐ ܒܒܝܬ ܨܘܒܐ ܕܨܠܚ ܐܠܕܝܢ ܕܟܬܘܪ (ܟܘܬܪ ܢܓ̰ܝܒܿ ܥܒܕܠܐܚܕ)، ܡܡܠܐ ܫܘܪܪܠܗ ܓܘܗ ( ܡܢܬܐ ܣܘܪܝܝܬܐ ܘܫܒܘܩ ܡܢ ܚܕܬܘܬܐ ܕܒܪܝܬܗܿ، ܐܠܐ ܩܝܡܠܗܿ ܒܟܫܝܪܘܬܐ ܐܟܕܝܡܝܬܐ ܓܠܝܬܐ، ܟܕ ܡܛܘܟܣܠܗܿ ܪܒܐ ܕܘܪ̈ܬܐ، ܘܡܘܦܩܠܗܿ ܫܒܥܐ ܓܗ̈ܬܐ، ܘܐܦ ܗܕܟ ܦܬܚܠܗܿ ܚܘܪܙܐ ܕܕܪ̈ܫܝܬܐ ܥܠܝ̈ܐ (ܡܐܓ̰ܣܬܝܪ) ܠܢܦܝܩ̈ܗܿ)، ܘܪܡܙܠܗ ( ܕܐܝܬܠܢ ܫܘܒܗܪܐ ܒܫܘܬܦܬܐ ܓܘ ܛܘܟܣܐ ܕܗܢ ܠܘܡܕܐ ܬܒܝܠܝܐ ( ܠܘܡܕܐ ܕܐܪܒܥ̄ܐܝܠܘ ܬܠܝܬܝܐ)، ܘܐܡܝܢܝ̈ܐܗ̄ܘܚ ܒܡܐ ܕܫܘܪܐܠܢ ܓܘ ܠܘܡܕܐ ܕܐܪܒܥ̄ܐܝܠܘ ܬܒܝܠܝܐ ܩܕܡܝܐ ܘܒܝܬ ܦܘܠܚܢܐ ܕܥܡܗ ܚܕܪ ܕܪ̈ܫܝܬܐ ܣܘܪ̈ܝܝܐ ܘܣܘܪܬ، ܗܘ ܕܦܝܫܠܗ ܩܛܝܪܐ ܬ̄ܚܘܬ ܪܘܫܡܐ (ܡܛܠ ܫܛܪܬܐ ܘܡܚܝܝܬܐ ܕܠܫܢܐ ܢܗܪܝܢܝܐ ܫܪܫܝܐ)، ܓܘ ܐܪܒܝܠ ܐܪܫܟܝܬܐ ܕܩܠܝܡܐ ܕܟܘܪܕܣܬܢ ܕܥܝܪܩ، ܒܥܘܕܪܢ ܥܡ ܬܪܝܢ ܒܬܝ̈ ܨܘܒ̈ܐ ܕܗܐܝܕܠܒܪܓܼ ܘܟܐܡܒܪܝܕܓ̰).
ܘܡܘܙܝܕܠܗ ܕܟܬܘܪ (ܥܒܕܠܐܚܕ) ܒܐܡܪܐ: (ܗܕ ܡܐܙܠܬܐ ܦܪܫܠܗܿ ܒܩܛܪܬܐ ܕܠܘܡܕܐ ܬܒܝܠܝܐ ܬܪܝܢܐ، ܗܘ ܕܐܬܝܠܗ ܬ̄ܚܘܬ ܪܘܫܡܐ ܝܬܗ، ܘܦܝܫܠܗܿ ܚܙܝܬܐ ܫܘܬܦܬܐ ܪܒܬܐ ܡܢ ܒܬܝ̈ ܨܘܒ̈ܐ ܡܫܡܗ̈ܐ، ܘܝܗ̄ܘܐ ܒܥܘܕܪܢ ܥܡ ܒܝܬ ܨܘܒܐ ܕܒܪܠܝܢ ܚܐܪܬܐ ܘܒܝܬ ܨܘܒܐ ܕܟܐܡܒܪܝܕܓ̰).
ܘܡܢ ܓܢ̄ܒܗ ܡܘܩܪܒܠܗ ܪܫ ܟܠܢܝܘܬܐ ܕܕܪ̈ܫܝܬܐ ܡܪ̈ܕܘܬܢܝܐ ܘܬܫܥܝܬܢܝ̈ܐ ܓܘ ܒܝܬ ܨܘܒܐ ܕܒܪܠܝܢ ܚܐܪܬܐ-ܐܠܡܢܝܐ، ܦܪܘܦܝܣܘܪ (ܫܐܒܘ ܬܐܠܐܝ)، ܚܕ ܡܡܠܐ ܡܘܩܪܒܠܗ ܓܘܗ ܩܘܒܠܛܝܒܘܬܐ ܠܓܢ̄ܒܢ̈ܐ ܘܦܪ̈ܨܘܦܐ ܐܟܕܝܡܝ̈ܐ ܐܢܝ ܕܫܘܬܦܠܗܘܢ ܒܠܘܡܕܐ، ܘܪܡܙܠܗ ܠܐܢܢܩܝܘܬܐ ܕܟܡܠܘܬܐ ܘܐܡܝܢܝܘܬܐ ܒܝܢ ܫܘܬܐܣ̈ܐ ܕܝܠܢܝ̈ܐ ܒܥܡܢ ܒܐܬܪܐ ܘܓܠܘܬܐ.
ܘܦܝܫ ܕܟܝܪܐ، ܕܠܘܡܕܐ ܕܐܪܒܥ̄ܐܝܠܘ ܬܠܝܬܝܐ، ܗܘ ܕܩܒܠܗ ܒܐܪܚܘܬܗ ܒܝܬ ܨܘܒܐ ܕܒܪܠܝܢ ܚܐܪܬܐ ܒܩܘܛܢܝܘܬܐ ܕܐܠܡܢܝܐ ܚܘܝܕܝܬܐ، ܦܝܫ ܥܒܝܕܐ ܠܡܬܚܐ ܡܢ 20-24 ܬܡܘܙ، ܒܥܘܕܪܢ ܒܝܢ ܒܝܬ ܨܘܒܐ ܘܡܢܬܐ ܕܠܫܢܐ ܣܘܪܝܝܐ ܒܟܠܢܝܘܬܐ ܕܬܪܒܝܬܐ ܓܘ ܒܝܬ ܨܘܒܐ ܕܨܠܚ ܐܠܕܝܢ ܒܐܪܒܝܠ.
