ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܝܘܡ ܬܪܝܢܒܫܒܐ 10 ܐܕܪ 2025، ܓܘ ܐܘܢܐ ܕܐܝܡܪܣܘܢ ܒܒܝܬ ܨܘܒܐ ܕܗܐܪܦܐܪܕ ܒܡܕܝܢ̄ܬܐ ܕܒܘܣܛܢ ܒܐܘܚܕܢܐ ܕܡܐܣܐܬܫܘܣܬܣ ܐܡܪܝܟܝܐ، ܐܡܘܪܘܬܐ ܐܢܢܩܝܬܐ ܒܫܡܐ ܕ(( ܢܛܪܬܐ ܕܡܪܕܘܬܐ ܕܣܘܪ̈ܝܝܐ/ܟܠܕܝ̈ܐ/ ܐܬܘܪ̈ܝܐ ܘܚܝܠܢܬܗܿ ܒܥܝܪܩ ܕܪܝܐ)).
ܘܐܬܝܠܗܿ ܐܡܘܪܘܬܐ ܒܩܪܝܬܐ ܡܢ ܡܢܬܐ ܕܠܫܢ̈ܐ ܘܡܕܝܢܝ̈ܘܬܐ ܕܡܕܢܚܐ ܬܚܬܝܐ ܓܘ ܒܝܬ ܨܘܒܐ ܕܗܐܪܦܐܪܕ ، ܒܥܘܕܪܢ ܥܡ ܨܢܕܘܩܐ ܕܠܝܠܝ ܘܡܝܫܐܠ ܢܐܒܝ ܕܐܡܘܪܘܬܐ ܐܬܘܪ̈ܝܐ، ܒܚܕ ܓܕܫܐ ܐܟܕܝܡܝܐ ܓܠܝܐ ܡܚܙܐ ܝܨܝܦܘܬܐ ܬܒܝܠܝܬܐ ܪܒܬܐ ܒܝܪܬܘܬܐ ܡܪܕܘܬܢܝܬܐ ܕܥܡܢ.
ܘܕܪܫܠܗ (ܐܘܓܼܢܐ) ܒܡܬܚܐ ܕܐܡܘܪܘܬܐ ܠܣܩܘܒܠܝ̈ܘܬܐ ܚܝܠܢ̈ܐ ܐܢܝ ܕܟܠܝ ܕܪܩܘܒܠ ܡܪܕܘܬܐ ܕܗܢ ܡܟܘܝܢܐ ܫܪܫܝܐ، ܗܘ ܕܥܩܪ̈ܗ ܡܬܝܚ̈ܐܝܠܝܗܝ ܠܐܬܪܐ ܕܒܝܬ ܢܗܪܝܢ ܥܬܝܩܐ، ܗܘ ܕܟܠܐܠܗ ܕܪܩܘܒܠ ܣܩܘܒܠܝ̈ܘܬܐ ܪ̈ܒܐ ܒܬܫܥܝܬܐ ܚܕܬܐ ܒܥܠܬܐ ܕܩܪ̈ܒܐ ܘܓܠܘܬܐ ܘܠܐ ܝܗ̄ܒܠܬܐ ܕܝܨܝܦܘܬܐ ܡܪܕܘܬܢܝܬܐ ܒܙܒܢܐ ܕܫܘܚܠܦ̈ܐ ܣܝܣܝ̈ܐ ܘܟܢܘܫܝܝ̈ܐ ܒܥܝܪܩ، ܘܪܡܙܠܗ ܒܣܘܘܕܗ ܕܫܒܘܩ ܡܢ ܥܣܩ̈ܘܬܐ ܐܢܝ ܕܡܘܒܪܐܠܗܘܢ ܡܚܝܠܘܬܐ ܕܩܐܡ ܡܪܕܘܬܢܝܐ، ܐܠܐ ܥܡܠ̈ܐ ܐܡܝܢܝ̈ܐܝܠܝܗܝ ܠܢܛܪܬܐ ܕܠܫܢܗ ܘܥܝܕ̈ܗ ܘܝܘܪܬܢܗ ܬܫܥܝܬܢܝܐ.
ܘܝܨܦܠܗ ܐܡܘܪܐ ܥܠ ܥܡܠ̈ܐ ܡܘܩܪܒܐ ܠܚܡܝܬܐ ܕܗܕ ܝܪܬܘܬܐ ܥܬܝܪܬܐ، ܟܕ ܓܠܐܠܗ ܠܓܪܐ ܐܢܢܩܝܐ ܕܫܘܬܐܣ̈ܐ ܡܪ̈ܕܘܬܢܝܐ، ܘܒܩܘܕܡܝܗܝ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܢܛܪܬܐ ܕܗܝܝܘܬܐ ܡܪܕܘܬܢܝܬܐ ܕܐܢܝ ܟܢܘܫܝ̈ܐ، ܘܡܘܒܝܢܗ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܘܒܐܘܪܚܐ ܕܡܕܒܪܢܘܬܐ ܡܩܪܒܐ ܥܡܠ̈ܐ ܪ̈ܒܐ ܒܗܕ ܨܒܘܬܐ ܒܐܘܪܚܐ ܕܥܒܕܬܐ ܕܥܕܥܐܕ̈ܐ، ܣܢܕܬܐ ܕܕܪ̈ܫܝܬܐ ܣܘܪ̈ܝܝܐ، ܛܘܟܣܐ ܕܥܒܘܕܘ̈ܬܐ ܡܪ̈ܕܘܬܢܝܐ، ܥܡ ܚܘܪ̈ܙܐ ܕܝܠܢܝ̈ܐ ܢܝܫܝܗܝ ܝܠܗ ܚܝܠܢܬܐ ܕܠܫܢܐ ܣܘܪܝܝܐ.
ܘܫܘܪܪܠܗ (ܐܘܓܼܢܐ) ܥܠ ܐܢܢܩܝܘܬܐ ܕܥܘܕܪܢܐ ܡܫܘܬܦܐ ܒܝܢ ܫܘܬܐܣ̈ܐ ܐܟܕܝܡܝ̈ܐ ܬܒܝܠܝ̈ܐ ܘܓܢ̄ܒܢ̈ܐ ܡܪ̈ܕܘܬܢܝܐ ܓܘ ܥܝܪܩ ܘܩܠܝܡܐ ܕܟܘܪܕܣܬܢ ܠܚܝܠܢܬܐ ܕܐܢܝ ܒܟܝܪ̈ܘܬܐ ܘܢܛܪܬܐ ܕܐܡܝܢܝܘܬܝܗܝ، ܘܩܪܐܠܗ ܒܝܬ ܥܕܢܐ ܠܚܝܠܢܬܐ ܕܥܡܠ̈ܐ ܠܣܢܕܬܐ ܕܬܪ̈ܡܝܬܐ ܐܢܝ ܕܡܫܘܬܦܝ ܒܚܡܝܬܐ ܕܗܕ ܝܪܬܘܬܐ ܐ̄ܢܫܝܬܐ ܫܪܫܝܬܐ ܡܢ ܬܠܩܬܐ.
ܘܦܝܫܠܗܿ ܩܒܝܠܬܐ ܐܡܘܪܘܬܐ ܒܝܨܝܦܘܬܐ ܪܒܬܐ ܡܢ ܓܢ̄ܒ ܒܨܘܝ̈ܐ ܘܬܟܕܝܡܝ̈ܐ ܘܝܨܘܦ̈ܐ ܒܡܪܕܘܬܐ ܘܠܫܢ̈ܐ ܥܬܝܩ̈ܐ، ܟܕ ܦܝܫܠܗܘܢ ܡܘܩܪܒܐ ܓܘܗܿ ܕܘܪ̈ܫܐ ܥܬܝܪ̈ܐ ܥܠ ܫܒܝܠ̈ܐ ܒܘܫ ܛܒ̈ܐ ܠܚܡܝܬܐ ܕܗܢ ܝܘܪܬܢܐ ܡܪܕܘܬܢܝܐ ܗܘ ܕܡܡܬܠ ܚܕ ܣܗܡܐ ܐܢܢܩܝܐ ܡܢ ܬܫܥܝܬܐ ܕܦܢܝܬܐ.
ܘܦܝܫܐ ܡܚܘܫܒܢܬܐ ܐܡܘܪܘܬܐ، ܗܝ ܩܕܡܝܬܐ، ܕܦܝܫܐ ܡܘܩܪܒܬܐ ܒܝܕ ܡܫܬܐܠܢܐ ܡܪܕܘܬܢܝܐ ܡܢ ܒܢܝ̈ ܥܡܢ ܡܢ ܓܘܝܐ ܕܐܬܪܐ ܒܗܢ ܫܘܦܐ ܐܟܕܝܡܝܐ ܫܪܫܝܐ، ܗܘ ܡܢܕܝ ܕܡܚܙܐ ܐܝܩܪܐ ܪܒܐ ܠܐܢܢܩܝܘܬܐ ܕܝܪܬܘܬܐ ܡܪܕܘܬܢܝܬܐ ܕܣܘܪ̈ܝܝܐ/ ܟܠܕܝ̈ܐ / ܐܬܘܪ̈ܝܐ ܘܓܪܗܿ ܒܥܬܝܪܘܬܐ ܕܡܕܝܢܝܘܬܐ ܐ̄ܢܫܝܬܐ.
